Best Blogger Tips

2012年3月22日星期四

次輪好戲(上)

香港政壇近排太多大戲,仲要套套咁精采,搞到順叔事事評論員上身,差啲忘記咗作為財經茄哩啡的老本行,業績期都冇時間望到幾多張成績表,乾溏,冇貨交,今期唯有半政半經,圍住行政長官選舉呢個權力遊戲,睇睇周邊有乜人和事,吹吓水炒吓雜錦。

溫故知新,講吓現任特首,在商界好多朋友的曾蔭權先。當奴選過兩次特首,05年嗰次,董建華腳痛,當奴開心到吹口哨,自動當選,攝位做埋老董餘下兩年任期,07年競選連任,對手得條袋巾梁家傑,冇醜聞冇得打,悶到抽筋下喊住繼打呢份工。

雖然連選兩屆無驚無險,但係幫當奴出錢出計,擔擔抬抬都總會有著數,例如陳德霖咁,金管局出名高薪厚職兼唔使做,05年竟然劈炮,唔做副總裁,幫當奴助選,跟住幫渣打(2888)打吓工,搞吓「智經」智囊,又做吓特首辦大內總管,當奴成功冧庄,攞命陳修成正果強勢回朝,09年坐正國金頂樓金融雲端。

攞命陳「中年靜修」,05至09年離開金管局呢個白鴿轉,進退認真精采,如果唔係,任志剛可能到現家都未退休,打破埋聯儲局前主席格林斯潘,成為任期最長的「中央銀行家」。任總做足16年,攞命陳人工冇咁高,更加有5年任期,香港改朝換代,2013年,唔知到時聯繫匯率仲喺唔喺度,金管局又使唔使再執位。

大家仲記唔得許仕仁?呢位出晒名的「橋王」,斷估當年幫當奴出咗唔少屎橋絕橋,可能係真正的「造王者」(Kingmaker),但亦係最冇「著數」的一個,最少大家睇唔到,只係做咗兩年過渡期政務司司長,差唔多做義工咁,過吓癮就飄然而去,不帶走一絲雲采,認真高。

許仕仁深諳進退之道,所以市場曾經傳聞,攞命陳進出金管局的幾步棋,都係許仕仁傳授,甚至有人傳過,當年佢在新地(0016)董事局,獻計迫前主席郭炳湘休假,呢啲嘢都係以訛傳訛,新地曾經隆重其事,發表聲明否認,許仕仁曾經為新地董事局變動提供任何意見。

當然啦,講到香港特首的「造王者」,又點會少得東亞(0023)主席兼行政總裁李國寶,佢老人家做嘢好似做上癒,除咗退休之期越押越後,做熱門特首競選人的競選辦主任亦做到不亦樂乎,幫當奴連做兩屆,今次又親自上陣撐唐英年。

不過呢,今次特首選舉,唔係好似上屆咁,一個大衛打十個歌利亞,真係出晒刀仔,寶寶貝呢啲藍血(Blue Blood)人,當然唔係好慣,仲有一樣奇怪事,李國寶力撐唐英年到底,但係佢背後的李氏家族,政治取態都好自由,前行政會議成員李國章,原來支持唐唐對家梁振英,仲幫佢做埋證人,唔話得。

東亞的李氏家族,唔係香港最有錢的「李」,但肯定最Blue Blood,五代皆昌,由經營生意到在政壇打滾,肯定有一手,今次李國寶同李國章,一個挺唐一個撐梁,唔知係大家望族分散風險的投注策略,定係代表東亞李氏家族,其實唔係咁槍口一致,如果東亞未來需要面對敵意收購,又唔知會點。

李國寶當日幫當奴助選,仲係籌款大隊長,負責揼大孖沙心口要錢,兩次都籌得超過2千萬港銀,籌錢又出力,當奴坐正之後,李國寶亦入埋行政會議,東亞在內地盤生意,亦越做越大,05至07年,就成為東亞最風光的兩三年。

公平啲講句,以李國寶級數,雖然做立法會幾十年三點不露,就算冇幫當奴助選,做行政會議成員亦一啲都唔失禮,不過呢,如果唔計滙控(0005)交通銀行(3328)的投資,東亞而家在內地盤生意,係香港銀行當中最大一間,擴張生意咁順利,同政治人脈多少有啲關係,例如搵人向地方政府辦事人打個照呼,呢啲已經係最大的無形價值。

下回再續。

關連文章:
1. 次輪好戲(上)(下)

伸延閱讀:
1. 財經茄哩啡: 新地之料(外篇)
2. 壹周刊: 新地太子復仇記
3. 蘋果日報: 許仕仁住新地樓手尾長
4. 東方日報: 許仕仁否認受查傳聞

2 則留言:

  1. 正如97前,全世界都睇香港已死,香港亦有唔少人移民。而加梁未上,大家亦實牙實齒判定香港核心價值將會消失。

    但實際上,香港應帶有示範台灣既歷史政治任務,最核心既核心價值照計唔應該會輕易被剝奪掛?

    田大少話梁上場,香港市民要做好準備。繼我話,你班既得利益佬做好準備就真。香港市民買定花生睇好戲就可以了。

    回覆刪除
  2. 個個睇市升時,個市跌,睇跌時,就升。而加個個睇梁上場,將是香港黑暗日子開始,係咪個個料事如神?實則從政既人咁易俾你睇穿,就好打有限啦。

    再者,特首算係咩?小小知府。最終都係要睇朝庭邊位話事人,及市民堅守既力道。

    梁若上場,弄個天怒人怨,只會是添煩添亂。客觀形勢下,中央和市民既最佳博奕係維持現狀,硬推23或剝奪言論新聞自由只會擊起反彈,未有迫切需要,亦不合乎利益。

    梁的迫切任務反而應是理順貧懸殊下的民情。他日經濟民生好時,市民對國內善意增加,事情才好商量。

    回覆刪除