Best Blogger Tips

2012年3月8日星期四

十年大膠鑊(下)

上回講到,過去10年,有兩件影響深遠的大事,在大家樂(0341)身上發生,令到大家樂的生意在香港越做越大,第一件就係自由行,令到香港消費市場,由一個幾百萬人的市場,變成面向每年幾千萬遊客的消費樂園。

第二件,就係領匯(0823)的出現。

大家試吓望望,自己屋企或者辦公室周圍,有幾多間食肆小店,過去10年一直乞立不倒,總會有,例如有啲小本生意一星期做足7日、一日做足18個鐘咁,又話者做到有少少名氣,不過數目唔會多,因為租金越嚟越貴。

呢種情況,近年在領匯旗下的商場,應該更加普遍,唔同地區的領匯商場,好似似曾相識咁,因為租戶組合,嚟嚟去去都係嗰幾個,大家樂就係領匯其中一個大租客,領匯近年加租幾多有幾辣,望吓隻股票派息增幅就知道,睇報紙,成日都見 到小商戶老字號執粒的新聞,打個七折都有反映一定事實,但係分店網絡建基於屋邨商場的大家樂,又好似唔係咁受影響,分店仲越開越多,斷估大家樂呢類大客仔,加租一定會有,但傾租約時,可能有更大彈性,相對於小商戶,大家樂容易取得更有利的合約細節。

房委會在05年底,成功分拆領匯上市,變成市場化運作,呢項政策轉變,本來被視為對大家樂成本結構一大威脅,當時大家樂更加用真金白銀,買咗一嚿領匯股票,「對沖」租金上升風險,經過幾年嚟實戰,事實證明,屋邨商場經營模式的轉變,唔單止對大家樂成本結構冇乜影響,更多商場經過翻新後,令大家樂有更大地盤擴充分店,領匯的出現,甚至為大家樂帶來更大優勢,搶佔咗唔少原本小本經營的生意仔。

大食細的轉變過程,唔一定係大家樂食咗小食肆,大家可以試吓想像,原本5間茶餐廳舖位,而家變咗一間百佳,競爭就係咁樣消失。

換句話講,大家樂唔單止成功化解咗領匯加租的風險,更加因為呢個包租公的出現,擴大地盤,不過,領匯商場翻新得七七八八,開始要做收購,即係話呢條水開始到水尾。

如果投資者對大家樂管理有信心的話,掉返轉頭諗,經過呢10年,大家樂開源節流的話,好多措施都已經做咗,進一步壓縮成本的空間已經唔係好多,要靠橫向擴充,問題係,香港體積始終有限,目前全港九新界,有232間麥當奴,大家樂分店營運單位,至今年2月中有310個,單單比較呢兩個數字,已經可以知道大家樂在香港擴展的空間,已經相當有限,大家樂開始面對其他港企的同一問題,要諗辦法在大陸市場搵增長。

食快餐捱飯盒,大家樂在香港,算係大眾化食肆,但係打住大家樂呢個招牌,在內地可以幾中產,同樣一杯奶茶,中港收同樣價錢,而且係人民幣,順叔對內地同胞的消費品味冇乜研究,冇發言權,純粹講感覺的話,草根味道中產價錢呢個模式,未必可以行得好耐。

當年領匯出現開始加租,有自由行出現,今日大家樂面對最低工資呢個最新政策轉變,業務同時呈飽和之象,要再化危為機,難度就大好多。

至去年9月止半年,營業額按年升1成,但係因為人工成本大增,中期純利倒退15%至1.9億港元。過去管理層為咗保持盈利派息連年增長呢個光環,應該冇在會計帳目上留有一手,至今年3月止的全年成績表,增長好大可能斷纜,今日廿倍樓上往績市盈率,市場認真俾面。

如果話最低工資對大家樂影響大的話,對小型食肆的殺傷力,可能更加巨大,大家不妨又可以睇睇,最新的政策轉變,會唔會係當年領匯翻版,表面上不利,實際上幫大家樂擴充地盤,呢方面暫時冇定論,但可以肯定一點,大家樂未來幾年的變化,可以用嚟做最低工資的最佳實戰教材,好過拗咩自由經濟大嘖口水。

關連文章:
1. 中年大膠鑊(上)(中)(下)

伸延閱讀:
1. 湯財文庫: 羅氏家族掌控三間上市公司
2. 湯財文庫: 我的十年股
3. 網友TIP-OFF: 金裝大膠鑊 (似乎是在大陸行「翠華」路線的嘗試...)

4 則留言:

  1. 以前可能都會考慮食大家樂定M記,而加唔使諗,M記既20蚊麥樂雞完勝。

    大家樂加價加到天花頂,連唔包野飲既黑招都出埋,除非可以係流程上減省人手,否則讓利於員工成本已無懸念,純利率要回歸中值。

    至於國內,查實人工租金都較香港平,照計可以用十年前香港既定價,以香港出品賣高國內同行一至兩成,或者可行?

    不過講返轉頭,老麥可以有廿零蚊既餐,中式快餐似乎要諗諗長遠點流住D中間客。

    鐵頭仁

    回覆刪除
  2. CDC only has 15% gross margin very low in the entire fast food industry... I guess selling burger fried chicken or ramen are much cheaper than the complicated chinese dishes. So CDC has to going go a bit up-market in china to improve their margin. Investors put high expectations on China growth. They upgrade the format to full service "金装大家乐茶餐厅" in mainland with some success. They just opened one in 南京 and has very long lines so far...

    回覆刪除
  3. When fast food is not simply about price and efficiency, but ambiance and the look of the food as what is offered by "Goldern CDC", it's selling something else... That's vanity.

    回覆刪除
  4. let's hope they succeed in using their brand equity in China. Same goes with Vitasoy. It's a shame that with their brand name in HK built over so many years they haven't scaled up in china. With so much food safety concerns in China their brands should convey a safe and reliable image. I seriously fear for my health when i try a bag of Hong see fu noodle or Want want milk.... and don't know why anyone would pay up for a bowl of ajisen ramen while complaining CDC is expensive

    回覆刪除