2012年9月19日星期三

飆凸你的夢(下)

上回臨尾整咗一抽數字,講緊比亞迪(1211)近年燒錢速度驚人,物業廠房的固定資產,比東風汽車(0489)仲要多100億,(人民幣,下同),講緊東風舊年賣咗217萬架車,係比亞迪的5倍。

比亞迪搞落咁大嚿固定資產,主要原因係大食,成個新能源產業,由太陽開始的太陽能電池,到最後的電動車,成條鏈都想食,呢個垂直模式,去到自己間車廠一樣咁直,除咗車轆及玻璃,其他乜都自己做,呢種生產模式,生意好可以量產時,更有成本優勢,賣唔去就蝕得更深,而且對於一間只係得十年八載經驗的車廠嚟講,容易出現品質問題,比亞迪早兩年因為股神帶脅知名度太高,出現問題時好自然初人唱得更加大聲。

好似比亞迪頂住股神個朵,美國幾乎冇人唔識,美國分公司開遲咗一年,投資規模及員工人數比想像中大幅縮水,當然俾當地傳媒鬧到狗升淋頭。聽講早排公布半年業績,開個投資者推介會議,公司管理層更當面被人噴到一臉屁,內地傳媒更加唔使講,類似「比亞迪大敗局」、「兵敗山倒」的大篇幅報道,幾乎一個月見幾次,黑仔成咁,實在好難想像到,兩年前的今個月,王傳福仲在胡錦濤面前講「Build Your Dream」,仲同巴菲特攬頭攬頸。

早排寫咸魚股時講過,最有用的財經資訊,唔係人哋衰到貼地時踩多兩腳,而係睇睇一間公司的管理層,在逆境時做緊乜做咗乜,有關比亞迪的新聞,香港唔係咁多,不過內地傳媒仍然有一大蘿,有興趣可以留意吓,肯定有用過大行報告。

今年4月,比亞迪在北京搞咗個「汽車技術品質發佈會」,提出公司所有車型,「四年十萬公里」的保養保證,聽講有啲南韓車10年保養都有,比亞迪呢個唔算最長的品質保證,不過由於成架車幾乎都係比亞迪自己砌出嚟,99.9%以上的汽車零件都在呢個超長保養保證之內,等得4年蚊都瞓,都係嗰句,大陸車主雜誌成行成市,一個車款賣唔賣得,呃唔到人,近兩年國產車市場份額下跌,唔夠老外車廠鬥,比亞迪呢類年輕車廠,鬥平仲有得鬥,鬥品質就應該冇咁快,嚴控品質同時要面對成本上升的問題,口碑更要時間累積,即係傳統汽車業務進入長期戰鬥,短期內唔容易有破。

比亞迪近兩個月,先後有兩單新聞,在天津及雲南投資廠房,生產電動的士及巴士,兩個項目投資都係十零廿億計,唔係細數,繼續燒錢。中國有50萬架大巴,仲有120萬架的士,加埋佔全國車輛數目唔夠2%,不過燒油量超過20%,排污量就應該更高,即係話如果中國大力搞電動汽車,由地方政府推動的公交市場肯定係第一步,講到明地方政府,有地方主義,唔係話去就去,比亞迪似乎焗住「基地換訂單」,起埋廠房換取電動公交車的市場。

比亞迪電動車在公交市場,仲有少少進展,經常聽到山旯旭的外國城市,都會幫襯吓佢買幾架電動車,好似香港都會搵一兩架比亞迪的K9同電動的士嚟試玩,呢個市場好多公司都搞緊,聽講早排日產(NISSAN)個老外總裁就嚟咗香港搵特首梁振英,傾咗日產的電動的士有冇得諗,不過近排中日關係搞成咁,日本車在中國呢兩年應該都冇得點發圍,比亞迪的電動車在香港試行時,就有機會近距離睇吓佢有幾多斤兩。

運會轉,勢會變,如果2010年的9月係王傳福的運勢高峰,兩年後的今日,怕且都已經跌到係低谷,由一個極端掉去另一個極端,如果80蚊樓上的比亞迪,被市場及傳媒過份追捧,今日15蚊左右的比亞迪,又一定可能被市場及傳媒過份睇淡,當然啦,講到運勢呢家嘢,似技術分析多過基本分析,更似係賭仔分析。

關連文章:
1. 飆凸你的夢(上)(中)(下)
2. Build Your Dream(上)(下)
3. 忽然暴跌(下)
4. 股神造車

3 則留言:

  1. 順叔好文。我覺得比亞迪電車戰略有太大風險。日本電池技術世界上數一數二,但系都無辦法推廣到有大錢賺。買家要肯付高價可以回本,就要跑夠長途同快速充電,但是兩方面連Sanyo同Panasonic都未有技術做得到。比亞迪深圳的士每日要在黃金時間充一兩個鐘電,回報如果無補貼其實好低。太陽能電池除左美國反傾銷外,歐美國家手頭緊補貼同公債基建都大量減少(西班牙有好一筆國債是太陽能欠下的)。我唔知手機電池有幾賺,但系我覺得大家開始用手機同平板電腦上網後,laptop買少左。整體電池需求會下降(laptop舊電大過電話同平板好多)。

    回覆刪除
    回覆
    1. 有唔少人話BYD係假嘢,不過禾唔係好信,如果可以由做一粒電池,砌咗一架車出嚟,唔會假得去邊,會唔會好似以前福記咁搞大太大谷爆自己係另一件事。
      呢嘢隻同李寧一樣,係少數禾主觀願望希望佢做得成功的國產品牌

      刪除
    2. 我覺得其實BYD不假,但系兵行險着。但系呢類重點科技股,阿爺應該無可能會比佢爆煲,用人力財力照著的。

      刪除