股神造車

(刊於2010年9月30日am730)

今期開比亞迪(1211)，睇睇兩個發開就發嘅人，走埋一齊，會唔會繼續行運一條龍。

第一個，比亞迪老闆王傳福，忽蒙股神寵幸，變身中國首富，啱啱見完全中國最有權力嘅國家主席，轉頭又同金融界最呼風喚雨嘅股神攬頭攬頸，講運勢，今個月，好可能係王傳福人生高峰。

第二個，巴郡主席巴菲特， 08年信貸危機之前，入股比亞迪，其實睇中公司電動車潛力，一個唔該，中央突然全力支持汽車業，又補貼又下鄉，突然多個超級引擎，令呢筆投資，回報率一度遠超當年買賣中石油(857)。

老拍檔睇中比亞迪電動車潛力，股神仲晒手擰頭，除咗估唔到中國突然救車救市救地球，另一個意料之外收獲，可能係自己股神個朵，對比亞迪招牌嘅增值作用。

06年，比亞迪正式進入汽車市場，成年賣得5萬幾架，吉利(0175)當日已經搞咗十年，同年賣18萬架。09年，比亞迪銷售45萬架，吉利賣33萬架，短短幾年，比亞迪跑贏吉利，冇可能係產品質素問題，而係股神貼金，令比亞迪品牌價值暴漲。今個星期，比亞迪同股神新聞，由歐美到印度泰國傳媒，都有顯著報道(開拓海外市場都易好多)，免費宣傳效力，其他競爭對手，得個恨字。

箇中關鍵，巴菲特當年未必明，今日一定睇得清楚，所以訪華四日，除咗巡視業務，幾乎日日幫比亞迪做生招牌，公司活動十幾場，堂堂股神，花咁多時間做馬騮戲，亦可以好肯定咁講，短期內，股神唔單止冇意止賺走人，仲諗緊加注。

至今年六月底，比亞迪仲有現金18億人民幣(下同)，已訂約未但科水資本承擔53億，主要因為在西安、韶關及長沙起廠擴產，三個項目總投資95億，全部承諾在三年內全面投產，一年最少生產100萬架。

要在2013年，谷大產能兩倍，出現巨大資金缺口，比亞迪今年內，一係要A股上市集資(有國家主席加股神關照，應該冇難度)，一係要股神加注。問得股神要錢，要扮矜持唔可以賣太多之餘，又唔想還人情價大折讓批股，最大可能係透過可換股債券集資(睇息口可反映股神信心)，不過無論件事點發生，市場多數都會認為係好消息，多數有得炒。

比亞迪每年研發開支，只係十億多啲，電動車就算賣得，唔代表比亞迪造車科技水平，已經天下無敵。比亞迪，作為一個汽車品牌，可能全國最有價值，公司產品，係咪物有所值，有待時間驗證。

中國可能有過千萬車主，新車落地一兩年貨仔，比亞迪今年跑輸大市，但市盈率仍然冠絕全行，現價追貨，買緊股神品牌之餘，亦買緊王傳福造車能力，前者無可置疑，後者，最好先上大陸車網車主網，探探用家口碑。

伸延閱讀:
1. 王傳福在深圳特區30周年慶典演講視頻 (鳳凰網)
2. 老司機看比亞迪F0 (天涯論論，網上寫手打手多，真偽自辨)
3. 買比亞迪F0還是吉利熊貓 (天涯論論，網上寫手打手多，真偽自辨)