Best Blogger Tips

2011年1月6日星期四

Build Your Dreams(上)

(刊於2011年1月6日am730)


比亞迪宣傳片

今期又開比亞迪(1211)。

舊年有幾個短篇,講過呢間公司,蜻蜓點水,而且犯咗一個錯誤,就係當咗比亞迪一隻車股咁睇。

早排想搵吓,美國有乜儲電設備綠色投資,唔少研究資料同埋冷門新聞,不約而同指向一間公司嘅電池技術,正正係比亞迪。

比亞迪舊年目標,要賣80萬架車,8月認衰,調低四分一,就算股神現身中國做宣傳,仍然唔達標,星期三正式公布,全年賣唔夠52萬架,股價由高位唔見一半,大中細行幾乎全面轉軚,最淡嗰個里昂分析員,睇緊24蚊,話比亞迪汽車銷售,今年會繼續頹落去。

分析員啄實賣車目標甩拖,比亞迪最高策略目標,舊年執行成點,反而冇乜人留意(包括順叔)。08年年報,王傳福喺主席報告書,仲講緊要在「2015年及2025年成為中國以及全球汽車領導者」,要大攪電動車,09年年報,變成「通過實現新能源業務的規模商業化,推動未來長遠及可持續發展」,公司展望,多咗一段「新能源業務」,除咗電動車,仲有「太陽能電池」及「儲能電站」。

呢三大嚿新能源業務,以前比亞迪集中講電動車,突然多咗兩樣,其實係策略突變,唔知係因為技術及商業化條件成熟,定係股神入股兼派人入董事局後,幫王傳福度條絕世好橋,總之比亞迪新能源業務,舊年動作多多,香港傳媒及分析員唔係好為意,但美國原來有唔少新聞及評論。

電動車及太陽能電池,大家好容易明白,儲能電站係乜東東,應該唔係好多人知,簡單嚟講,都係一嚿大電池,可以將電廠產生咗又一時用唔著嘅電能,收埋到有需要時再用。又換句話講,三大瓣新能源業務,其實都係靠比亞迪本業食糊,講緊佢電池技術有幾巴閉,有乜更廣泛節能應用,呢樣亦係股神相中比亞迪主要原因。

儲能技術,歐美唔少公司做緊,中美能源近年收購新能源公司,亦唔只得比亞迪呢一注,比亞迪電池係咪天下無敵,唔好問財經茄哩啡,不過應該係最環保一種,聽講股神入股比亞迪之前,派中美能源隻頭馬David Sokol去深圳摸底,為咗證明比亞迪電池天下最環保,王傳福拆咗粒大電池,將裡面化學液體倒入玻璃杯,喺Sokol面前灌咗落肚,Sokol唔夠膽啜番啖,但之後冇耐中美能源就宣布入股比亞迪,Sokol仲做埋董事,比亞迪亦出現咗新能源業務呢個新策略方向,喺美國盤生意亦開始加速。

下回再續,睇睇比亞迪新能源業務有乜搞作。

伸延閱讀:
1. Forbes: Warren Buffett takes charge
#

沒有留言:

發佈留言