迎賓周大福（中）

(刊於2011年11月16日am730)

(標題為後期改動)

上回講到，新世界發展(0017)主席鄭裕彤，私人持有幾十年的周大福珠寶，要趕在年底前上市迎賓，胃口極大，不過散戶除咗聽投資銀行吹水，乜都睇唔到。

保薦投行最新「吹」谷緊的善款數字，集資最多350億元(港元，下同)，賣10.5%股本出街，即係周大福市值3,333億元，純利唔夠40億，往績市盈率超過90倍，貴絕全球，貴到核爆！

點解手上資料有限，都要幫周大福撰寫「Pre-IPO茄哩啡研究報告」，因為呢個世界，好多嘢大家講吓講吓，好多人會信以為真，唔好話曾參殺人，曾蔭權衰十一都會有人信，例如，好多人以為周大福首創「九九金」呢個純金標準，呢個講法其實非常值得懷疑，因為就算周大福官方網頁，亦只係話「相信」自己是港澳兩地首推「999.9」純度的先鋒，即係話「九九金」意念，極可能出自其他金業前輩。

周大福在1998年，先在北京開設內地第一間分店；到2010年，亦都在北京，開設第1,000間珠寶分店；一年唔夠，今日周大福上市承銷團，喺條街唱緊的業務規模，珠寶加埋鐘錶，講緊超過1,500個零售點。十年時間，由一變到一千已經夠跨張，過去一年，零售網點再谷大50%，未來幾年仲話會增加到2,000間添。

男演員如果要除衫賣肉，十個有九個，上鏡前十幾分鐘，會狂做掌上壓或者舉鐵，谷到胸肌青筋暴現血管膨脹先肯埋位；多數有本事印股票的真正財經演員，攞間公司出街賣之前，亦多數會整吓盤數，執到靚靚先開場迎賓，個個都會咁做，問題係做得有幾離譜。

新百貨收取周大福專櫃佣金激增

周大福其中一個最重要生意拍檔，肯定係近幾年谷數谷得好勁的內地百貨公司，包括自己個細妹新世界百貨(0825)。新百貨最大收入來源，來自「專櫃銷售」抽佣，周大福正是新百貨五大尊貴客戶之一，根據新百貨至最新中文年報第130頁，透露咗同各間姐妹公司關連交易金額，當中來自周大福「專櫃佣金」，至6月底財政年度，超過7千萬，按年勁升超過280%，出現咁情況，有兩個可能，一係新百貨突然冇親情講，對住家姐狂加佣勁抽水；另一個就係新百貨零售舖面，突然大量被急速增肥的家姐霸咗。

在2006年10月底，即係差唔多5年前，當時周大福執行董事鄭錫鴻，接受一間本地報章訪問時曾經透露，當時周大福中港兩地有超過500間分店，內地約佔460間，當中20%為「加盟店」，40%為「合營」，40%為「自營」，呢位彤叔世侄當時已經表示，有計劃5年內，將分店數目增加到1,000間，但表示「投資40億至50億元開分店，真是濕濕碎」，公司從來冇上市的打算。

如果冇估錯，周大福珠寶所謂「超過1,500個零售點」，當中唔會太多獨立舖頭，大部分可能係一個「店中店」甚至係「店中櫃」；另外一粒更有效「大隻丸」，就係增加「合營」同埋「加盟店」數目，將「周大福」個招牌分判出去，等街外人借自己個老字號做生意。

呢種將零售品牌，當係「7-Eleven」咁就的經營策略，可以極速谷肥零售網絡，類似擴張手法有乜後遺症，太多存貨壓力散咗落「加盟店」層面，食滯咗又會點，港股其實有「板」睇，遠至10年前港股神話思捷(0330)，近至近排跌到啪啪聲的中國運動服務品牌，正正就係採取呢種「7-Eleven」式開枝散葉策略。

新疆克拉瑪依市都有3間周大福．．．

如果香港傳媒有心做，上去周大福網頁，逐間分店打電話，甚至實地視察，好可能會出現早排思捷被踢爆，部分分店其實不存在的問題。

呢種增長模式，品牌擁有人肯借個老字號出嚟，加盟商夠膽坐貨，咁就一拍即合，即係成間周大福，唔會有好多資產，如果市值超過3千億的話，周大福市帳率，可能超過30倍！

谷得大，長得快，肯定有古怪，下回再續。


關連文章:
1. 迎賓周大福（上、｜（中）｜（下）
2. 凸透新世界（上）｜（下）

克拉瑪依位置．．．

伸延閱讀:
1. 大餅變紅衫
2. 周大福在2006年的5年計劃