迎賓周大福（上）

（部份內容刊於2011年11月15日AM730）

財經茄哩啡Pre-IPO研究報告，熱烈迎賓！！！

(哈哈哈哈！見報標題，冇博客版咁文縐縐的．．．)

早排寫開「奪命金股」，望住上游冇睇下游，竟然唔記得咗，新世界發展(017)主席鄭裕彤，袋裡面有隻收埋幾十年的「周大福」，趕緊年底前應節上市。彤叔多年來咁多筍嘢益股民，今次搣埋粒冠上明珠，拎出股市公開迎賓，順叔作為財經大戲影評人，當然要補返一飛講兩咀。

香港監管機構，咁多年強調保護散戶利益，得個講字，簡單如新股上市過程中，散戶同大戶之間資訊的嚴重不對稱，都從來冇認真正視。舉個例，新華人壽中港兩地上市，A股招股書初稿，上星期在上海交易所已經有得下載任睇，香港H股，紅衫魚斷估通街都係，香港散戶想搵兩頁住望吓都冇。

大型新股，大戶多數最少有幾個星期消化，唔好話招股文件初稿，承銷團晨早會準備好大堆研究報告派通街，再選擇性咁向傳媒發放利好消息，單刁煲到烚烚聲，臨上市前幾日，先至開個記者會當係同街坊見面，入飛就過數，唔幫襯就過主。

好似周大福珠寶咁，聽講今個星期開始見芬佬，順叔為小股民服務，利用極有限資訊，喺呢個大戶有嘢睇散戶等糶米的空檔期，做個周大福「Pre-IPO茄哩啡研究報告」。

首先，根據今年5月，「周大福集團」網頁上面資料，集團總市值(Market value)約2,560億(港元，下同)，咁大嚿，因為除咗「周大福珠寶」之外，仲有新世界發展控股股東「周大福企業」，今日周大福官方網頁，有關「周大福企業」的資料，已經剷走晒，剩返即將在股市公開迎賓的「周大福珠寶」。

「周大福企業」係彤叔的私人投資俱樂部(周大企業港交所資料披露)，本身是新世界系的控股旗艦，彤叔好多個人投資，例如狙擊佐丹奴(0709)、入股平保(2318)、以至一大抽港股上市資產，呢嚿嘢，以半年前市值保守估計，最少值1,500億，亦即係話，「周大福珠寶」，如果話資產值1,000億元的話，其實已經好跨張。

好喇，就算俾周大福資產淨值一千億，拎出街賣幾多錢呢？根據承銷團班投行賓架，向傳媒吹水唔抺咀的數字，胃口大大都有，最勁吹到有40億美元集資額，最近冇吹得咁大，都講緊25至35億美元，可以好肯定咁講，而家出街的集資數字，只係反映大股東彤叔「胃口」，同周大福珠寶真正價值冇乜太大關係，老闆彤叔同保薦人講，要30億美金，班賓架兼真正財經演員就盡做，做唔到，咪賣多少少股份出街囉，用中位數保守估計，假設集資額30億美金，港紙233億元，賣一成股份，周大福珠寶市值2,330億；賣一成半的話，市值都有1,550億。

根據承銷團向幾家本地傳媒放風，周大福珠寶至3月底財政年度，純利唔夠40億元，如果市值1,550億，市盈率已經38倍，市值2,330億元的話，市盈率更加58倍，嘩，大佬，「周大福」喳喎，講緊歐洲名牌Prada(1913)，而家都係36倍市盈率，「幫襯周大福的同志」，真係富貴得過「穿著Prada的惡魔」？

周大福珠寶同類型公司，例如周生生(0116)、六福(0590)咁，近年叫做明星股之一，往績市盈率，都係20倍唔夠，大家有冇留意，承銷團為咗講到周大福珠寶估值冇咁離譜，喺住街唱緊的「估值」，其實係「2013年預測市盈率」，在18至25倍之間，聽落去冇咁跨張，荷李活都話《2012》世界未日，今日上市預測到2013年！？俾個地球首席執行官你做好唔好！？

究竟「周大福」三個字值幾多錢，周大福珠寶又坐住乜嘢資產咁矜貴，下回再續，睇睇呢間80年老字號，幾時變咗千幾二千間分店的零售巨人。



關連文章:
1. 迎賓周大福（上、｜（中）｜（下）
2. 凸透新世界（上）｜（下）
3. 大餅變紅衫

同場加映：

尻尻尻．尻，「一口價」，3333億！