(刊於2011年11月17日am730)
 |  |
茄哩啡尻-UP Market Research，資料全部用DLM-WTF估值方法老作
上回講到，周大福珠寶(1929)上市前，五、六年時間，尤其是過去一年，暴肥一倍至超過1,500個零售點，擴張策略同中國運動服飾品牌類同，狂谷「加盟店」及「合營店」數目。
金舖當「7-Eleven」咁開，表面上規模大到驚人，實際上資產單薄得可憐，主要資產肯定只有「存貨」，資料有限，唔知道周大福有幾多負債，相信現金唔會多，如果上市前又出現借錢再派幾十億股息俾大股東的「例牌抽水動作」，周大福本帳簿會更薄，資產淨值俾晒佢100億元(港元，下同)多少少，市值超過3,000億，即係市帳率30倍！大家可以環顧全地球，有邊個零售品牌，市帳率可以有雙位數字。
運動衫賣唔出，最多散去特賣場；賣金銀珠寶，要承擔稀有金屬價格波動風險，同樣係老字號，周生生(0116)有2百幾間舖頭，全部自己經營，可以掌握存貨成本及散貨速度，規模只是周大福七分一，奉指「坐金」坐貨，周大福就唔可以咁，一定要做對沖，甚至「借銀租金」，管理層掌握唔到商品市場走勢，大家一鑊熟，如果大股東好了解金市幾時轉角轉勢，大牛市將收埋幾十年的私人金店賣俾你，可能更加得人驚。
就算唔計大股東動機，過去5年，黃金價格由600美金一安士，升到而家接近1,800美元，周大福最大風險之一，正正是在黃金大牛市時期，大量擴充規模，業務上游的存貨壓力，又大量積聚在自己控制唔到下游加盟零售點。
講穿咗，周大福最大賣點，唔係「周大福」三個字，而係個「大」字。不過，成間公司好大部分收入，可能來自香港澳門幾十間老店，當中又有一大截，來自內地同胞的自由行消費，如果係咁，在內地個棚搭到咁大，新舖過千間，可謂「多此千舉」。
如果Prada(1913)突然宣布開千間分店，股價肯定狂插，因為高端消費品牌，唔會咁輕易將招牌放俾外人經營，全國一千間Prada，仲點扮「上菜」？
周大福未來幾年擴張到2千間分店，其實唔係賣「品牌」，而係賣「規模」，不過金飾珠寶，又係奢侈消費，睇英文報紙，投資銀行作咗個新定位叫「Mass Luxury」，財經茄哩啡幫大家翻譯：「大眾化上菜」。
周大福呢條「大眾化上菜」，定位充滿激烈矛盾，並不出奇，因為大股東及管理層本身，就係全香港最突出的「Oxymoron」，呢個字就算唔查字典，望文生義亦唔錯得去邊。用現實解釋，就係「周大福」算得上「信得過」的金業老字號，但管理層經營上市公司往績，可以問吓新世界發展(0017)小股東，講開英文，唔爭在講多句：New World has been a poor buy because of Chow Tai Fook’s guys。
彤叔最近放咗兩單過百億大刁在枱面，呢邊周大福上市，嗰邊新世界供股：前者全港最大型未上市零售資產，後者全港最殘藍籌地產；前者在黃金牛市，用市帳率30倍賣俾投資者，後者股價勁插多年後，以市帳率0.3倍供股集資；前者貴在「規模溢價」，後者賤於「管理層折讓」；前者包括賣舊股，彤叔套現幾十億，後者如果小股東投降，大股東可以賤價增持新世界股權；前者衝擊市場對消費品牌估值上限，後者測試小股東對管理層容忍極限．．．．．．
兩單刁，冰火二重天，明顯不過，要同彤叔坐埋一條船，要緊貼佢老人家步伐，佢拎筍貨出嚟賣，夠「沙膽」先好掂；佢要增持新世界，咁就諗諗，冇貨的話，唔好喇，已經落搭，鬥長命囉。
今個星期，周大福四出推介，被捧為芬佬「焗買」(Must-Buy)的零售龍頭，同時周街賣廣告轟炸式宣傳，如果散戶被洗腦，以為股票都「大減價」就大劑。一連三期「周大福Pre-IPO研究報告」，報紙及網誌版本頗有不同，唔知有幾多小股民有耐性睇晒，順叔將會在網誌，上載一個中英對照精簡版本，散戶係時候發揮團結力量，唔該：廣傳！
 地鐵 |  FACEBOOK |
 巴士 |  iPhone |
電視 | 電台 |
關連文章:
1. 迎賓周大福（上、｜（中）｜（下）
2. 凸透新世界（上）｜（下）
伸延閱讀:
1. 大餅變紅衫
2. Business Week: The Death of Mass Luxury
3. 下載周大福Pre-IPO研究報告PDF版本
你D文的確寫得好有心機，但我就是不能轉載，你可能知道香港複印授權協會是包括am730的，但你每一篇文都在我個網留下紀錄。
回覆刪除Dear 順叔,
回覆刪除I read your articles in AM730 everyday. You have chosen very current and relevant topics for your columns, such as your pre-IPO analysis of Chow Tai Fook. You obviously have done lots of research and preparation to do your writing. As different from many other stock market commentators, your investigative approach to reveal company information is very intersting and educative for the general punblic. You used to write two times a week, but now you write five days, and still maintain high quality of work, and AM730 is very lucky to have you as one of its columnist. You may remember me, I have written to you previously and told you that I am doing farming in the Yuen Long areas. BEST, TAM
greatsoup bro，多謝支持。我其實也將你的「文庫」加入了在「博客連結」，但「文庫」文章連結太多，產生的搜索結果跟普通google沒有分別，所以唯有暫時拿走．．．ｓｅｎｄ個ｅｍａｉｌ給我，留個聯絡好嗎？在你的博客找不到聯絡方法．．．．
回覆刪除順叔:
回覆刪除多謝, 一個很有HEART的財經評論員, 不為名利, 黙黙付出, 別樹一格, 卓爾不群, 踢爆大戶掠水的勾當, 令人心折, 多謝你, 亦支持你! Keep the ball rolling!
80pe真係貴, 不過周大福呢個名又真係響, 而唔係得過大字, 我識不少大陸豪客中(各城都有d), 幾乎個個都識周大福, 買金就係去周大福. 就大陸豪客而言, 周大福絕對掂過prada, 畢竟無咩對手, 而且唔係有錢人先買金,中產都可以買
回覆刪除早排寫ＰＲＡＤＡ，已經被人鬥過，周大福上市之後，順叔預咗被人鬥到仆街的。同意「周大福」三個字，在大陸賣得，成間公司亦唔係一無是處，拔，當全港傳媒一片唱好，咩「新股王」、「黃金龍頭」、「華資首富」，連１００卡粒石仔都做頭條，順叔在一個小小雞棚，講幾句相反意見，其實已經係一個好公道的處理手法．．．
回覆刪除我也明白的, 90倍pe扮30倍, 用最樂觀既增長計pe, 借錢派息, 真係唔狗都唔做, 都唔多信得過. 與其買90pe既周大福, 不如買內地發展都不錯的六福, 畢竟歷史pe唔到20 但老實說, 市帳率就算5, 6倍, 以其高roe, 品牌, 高增長都值, 而不是樓主的1.5倍都唔買
回覆刪除１． 巴打「浩」，在報紙版本的《周大福迎賓（上）》，最後的一句「周大福珠寶如果做到1.5倍市盈率上市，已經相當誇張」，是順叔手民之誤，已在次日作出更正聲明了
回覆刪除２． 最初落筆時，沒有想過會寫足三集的，因為手上只有今年５月，在周大福官方網頁偶然抄下來的一組數字，最初的「假設」，是周大福珠寶資產值接近「１０００億」，後來找到更多舊報紙資料，發現有關「假設」比最初估計差距極大，唯有在後來兩篇逐步修正，細心看的話，斧鑿之痕甚深，如果一氣呵成地寫的話，不會這樣左穿右插的
３． 周大福、六福及周生生，分別極大，不難看出，亦不能一概而論，遲些再講
我指的都是pb不是pe
回覆刪除至於三間的分別, 我都明白...
I hope "周六福" and "周大生" can go to stock market in the future..XD
回覆刪除順叔，看你旳專欄已年多了，很佩服你的分析與公義心，請繼續努力！
回覆刪除