無記呢嚿資產，政治上商業上，仍然奇貨可居，唔係有錢就食得落，唔知點解，望住TVB呢舖大茶飯總係諗起長實(0001)主席李嘉誠嗰句，分身家私己錢資助細仔、電盈(0008)主席李澤楷買佢鐘意的玩具，千億併購搓圓撳扁，唔知會砌咗個乜嘢變型金剛出嚟。
香港兩間免費電視台，近年先後引入台灣資金，亞視有個旺旺(0151)老闆蔡衍明，今日TVB亦有個王雪紅，王雪紅已經取代富士康(2038)老闆郭台銘，成為台灣首富，寶島巨富點解對香港電視台咁有興趣，香港最敏感的資產又點解咁歡迎台資，順叔到而家都諗唔明，希望有高人指點吓。
呢場戲太高層次，普通茄哩啡可能永遠唔知道真相，無謂扯太遠，扯返來TVB電視城呢個娛樂文化血汗工廠，電視節目做到工業生產咁，年復一年倒模覆製，唔係代表TVB模式成功，只係證實咗冇競爭冇進步呢個咁簡單的道理，早幾年檢討免費電視市場，幾場公眾諮詢，由普通觀界到所謂「文化人」到各大小商業機構，表達咗各種各樣的民意同埋業界意見，唔知道政府聽唔聽到，仲有好似城市電訊(1137)咁破釜沈舟的投資者準備大搞，諗唔到唔發新牌的理由，免費電視講緊影響全香港觀眾，唔知點解背後瓜葛硬係要咁神神秘秘。
電視廣播執行董事李寶安，早前話反對發牌，原因係香港電視廣告市場，近十幾年個餅冇大到，呢個論點已經大把人督爆，唔加把咀，不過可以留意一點，電視廣播去年營業額及純利，同創歷史新高，淨賺超過15個億(港元，下同)，香港免費電視盈利貢獻都超過12億元，個餅冇大到？
電視廣播純利創新高，唔係話管理層開發新收入特別有創見，好多人忽略咗，東南亞及台灣等新興市場，近年經濟好咗，對華語電視內容需求大咗，亦係近年地球上，少數冇受到歐洲債務危機影響的一盤生意，無記節目發行及分銷等國際業務，2011年收入再增長15%，去到超過9億元，呢舊嘢成本唔高，盈利貢獻接近6個億，呢度仲未計台灣TVBS連續兩年廣告收入創新高的近3億元利潤。
無記嚿國際業務雖然靚仔，查實仲係食緊老本，內地市場近年競爭大咗，舊年劇集製作數量創新高，無記已經叫晒救命，成績不進反退，又賴政府收緊文廣控制，令無記多年「努力得來的成果打折扣」，查實同你講，TVB呢間娛樂工廠，在大陸市場查實冇乜競爭力，香港文化，以前在中港磨合的過程中長處強勢，而家出現有逆轉之勢，呢個亦係一國兩制最強防火牆的最大裂縫。
經過去年的升勢，電視廣播股價創埋新高，最新市值大約250個億，相對於2010年底，已經冇咁吸引，但係呢嚿奇貨可居的資產，近年似係政治籌碼多過商業投資，最少30年冇出現過一個有活力又有長遠控股決心的大股東俾心機去搞，管理層至創作人員，隔離台無競爭就用盡時間勾必鬥角，應有價值未被釋放，好簡單咁講，一個小朋友剪條「當周星馳聽到林峰CHOK得金曲金獎之後」的惡搞片，在Youtube都有過百萬點擊，坐住全地球最巨型華文片庫及珍貴史料片段的TVB，資產負債表上節目及影片版權的價值，實在唔應該只得3.36億元，互聯網業務，唔應該只係得一年幾百萬收入囉。
香港人已經冇啖好食，普通人打開電視機，只係想多少少選擇，點知都係咁難，咩霸權乜乜物物，老實講，財經茄哩啡唔係咁上心，只係想講句，就算北京唔想放手香港傳媒的控制，唔該最少搵個有多啲錢又有心搞的有銀士，咪再好似亞視咁，搵兩條友講微博，仲要一日重播四次吖大佬。
關連文章:
1. 文化富士康（上）、（下）
2. 電視風雲（上）、（下）
伸延閱讀:
1. 讀者甲的來信
