大家要留意天然氣及液化天然氣(LNG)的分別，昆侖能源另外兩大嚿業務，包括 LNG加工儲運，仲有天然氣銷售，先至係公司未來重點發展的業務。
昆侖能源在江蘇及大連，有兩大LNG接收站，主要為入口LNG提供裝卸儲存服務，一年加埋可以處理750萬噸LNG；另外偏及全國15座LNG加工廠，暫時每日可以處理138萬立方米天然氣，未來兩年全面投產後，產能將狂增至2,000萬立方米一日，成為「國內陸上最大的LNG生產及供應商」，投資咁多落LNG配套設施，因為最終一項「天然氣銷售」，其實重點亦係講緊LNG，主力賣液體唔係賣氣體。
根據昆侖能源星期三出爐的年報，所謂「以氣代油」的戰略，主力其實推廣LNG「動力燃料」在城市公交、重型卡車、內河船舶及油田鑽機的應用，中央政府要推廣LNG應用，昆侖能源亦係推動LNG作為主要「動力燃料」的政策工具，市政府及大型運輸企業要配合國策，效率應該遠高過特區政府推廣石油氣的士。
昆侖能源的天然氣銷售，其實亦包括城市管道燃氣，同新奧燃氣(2688)等民企爭飯食，日前就有內地傳媒報道，昆侖能源及中國燃氣(0384)附屬公司的職員，在南京爭地盤差啲大打出手。巨型國控油氣公司，近來日日俾人鬧，靠壟斷地位迫死民營企業，所以中石化要加入戰團，都係拍住新奧，國企民企聯手收購中國燃氣。中石油幾乎壟斷天然氣上游供應，昆侖能源更加唔可以公開做到絕，似乎因為係咁，昆侖能源呢方面反而一直收收埋埋，從來冇透露有乜策略，亦冇披露呢個高增長的最下游零售市場，佔天然氣銷售比重幾多。
唔計聯營公司貢獻，昆侖能源最好賺的生意，就係天然氣管道，就係靠去年才完成交易的「陝京三線」交易，同類筍嘢，阿媽冇講明會陸續有來，大家可以留意吓，中石油並未為管理層引入購股權計劃，昆侖能源三名最高管理層，包括主席李華林，反而先後獲授近1億股昆侖能源認股權，絕大部分在2007年開始授出，當中超過一半，今年1月6日行使咗，行使價只係HK$4.186，現市值沽出的話，獲利超過5億港銀。(相關權益披露）
李華林在中石油，只係官至「董事會秘書」，可以話係董事長蔣潔敏條靚，大佬一年人工唔過一球，條靚在子公司又可以賺幾個億，你話合唔合理呢？昆侖能源在2007年開始向管理層大送購股權之後，同時又開始積極向天然氣業務轉型，甚至可以向阿媽買件超筍貨，你話又有冇咁啱呢？呢個就係在上集所提及，昆侖能源作為紅籌，資本市場操作可以更「靈活」的最佳例子，大家記住，睇國企紅籌公司年報，最緊要望吓管理層購股權有冇重大變動，好多時都同公司股價表現有直接關係。
無論中石油未來仲有冇好嘢益阿仔都好，昆侖能源賣氣體又好賣液體都好，專注天然氣呢個獲得國策大力支持的高增長行業，對股東始終係好事，昆侖能源係貴得有道理的，近年啲股票越貴，投資者似乎越有興趣。
十二五規劃對天然氣應用冇訂定量化目標，不過多年來多個官方提法好一致，要在2015年，將天然氣在能源消費的比重，由目前3.8%，提高到8.3%，屬於一個天文數字的增幅既然講到係「以氣代油」及「氣化長江」的政策工具，斷估昆侖唔會無端端變返做中國神油，目前市值大約1000億元，未來幾年膨脹多一倍，冇乜難度，當然啦，呢個增幅未必完全來自股價的自然增長，更大可能來自股本的擴張及收購，買啲乜嘢返來，就要邊行邊睇了。
關連文章:
1. 昆侖氣概（上）、（中）、（下）
2. 國民爭氣
3. 群鴻氣海（上）、（下）
伸延閱讀:
1. 第一財經: 南京化工園燃氣爭奪戰
2. 新世紀周刊: 昆侖能源股權激勵模式引發爭議
3. 蔣潔敏: 不管油價漲跌都該投資中石油
4. 新華網: “十二五”天然氣發展任務艱巨
「睇國企紅籌公司年報，最緊要望吓管理層購股權有冇重大變動，好多時都同公司股價表現有直接關係。」
回覆刪除真係多謝順叔, 呢句真係精華。
小小意見, 無論昆能想下一步做咩, 無論呢d 業務配唔配合國策, 我比較擔心既係點做先係 profitable。
睇番 857 2011年既業績, 天然氣與管道業務既營業額增長左 47.9%, 但經營利潤就跌左 23.9%, 原因係進口氣虧損大增加上工程折舊。
工程折舊可能係一次性, 我先唔理, 但進口氣價格問題我覺得係問題。
講番昆能,佢地既 LNG 有幾多係進口, 個銷售價係唔係用市場價,買入價會唔會係母公司拿到D 著數, 我一D 都唔清楚。
呢類公用事業一日唔係用市場價賣, 都係審慎d 好。
同意，呢句真係一言驚醒夢中人，如果有網站列出所有大型上市公司購股權資料同變動就正。
回覆刪除