2011年12月13日星期二

買樓自由行(下)

1984年: 新地大埔中心廣告

內容
大埔繁榮路路通 許多新發展
景色優美樂安居 理想都變真
愉快自由幸褔 家家都稱心
新鴻基地產為您
建造嘅大埔中心
歡迎參觀
大埔中心氣象新
幸褔家園樂歡欣
2010年: 新地Larvotto廣告


內容
.......
.......
.......
.......
.......
.......
南灣
Larvotto

上回講到,香港新盤銷樓處,等同超級壓力煲,專煲首次置業人士等市場初哥,買樓要排隊甚至通宵硬企幾粒鐘,落搭之前冇現貨可以睇,被銷售資料誤導、貨不對辦又冇得退錢換貨,令一手住宅市場,成為香港最唔「自由」、最搵笨、投資者權益最不受保障的資產交易所。

新盤市場大部分問題,禍因種於「樓花」。

楝樓未起好就扲出嚟「預售」,聽講始創於已故國家領導人之一的霍英東,在1954年「種」出地球第一盤「樓花」:《九龍油麻地公眾四方街新樓分層出售說明書》,打破樓宇現貨交易、成楝出售的行規,仲可以分期付款,從此豬籠入水,吸引到長實(0001)由做膠花變咗賣磚頭。

大半個世紀前,地產仲係「新興行業」,項目資金壓力大,預售樓花令發展商資金周轉方便啲,有助城市化發展,無可厚非;今時今日,千億巨企其實絕對冇需要透過預售散貨,「賣樓花」繼續成為香港地產主流,有三個原因,第一,發展商知道呢個方法最容易在消費者身上搾取最大利潤,第二,政府無心無力管,第三,香港消費者及投資者多年嚟「縱壞」晒地產商,變態成為常態。

五十年代的住宅,只有幾層高,簡簡單單,樓花同最後實物唔會出現太大落差;今時今日,住宅起到九十幾層高,樓盤「發水」單位「縮水」,最後件貨係乜樣,好靠發展商提供資料。


有冇邊個老餅,記得1987年黃埔花園「實現理想好家園」的廣告?條片30秒,以單位實景及附近配套設施做背景,穿插一家大細幸幸福福的境頭,送「大門鐵閘」仲係賣點之一;今日是但搵條樓盤廣告,整首法文歌,搵件鬼妹典床典蓆游吓水跳吓舞就係,或者內地同胞好受啦,不過香港廣告公司做地產商生意就應該認真易賺。

早排有位神秘人,捐咗幾十本遠古「樓書」俾香港博物館,大家攞住近年的新盤銷售資料,入香港博物館對比一下,就會知道近二十年,香港地產商賣樓手法的轉變,變得越嚟越離譜越搵笨,「預售」之前仲有「預留」,牛池灣變成清水灣,垃圾堆填區變園林美景,有時仲出現疑似股票莊家式搭棚托市的手法,44樓變88樓可以話風水,收800呎錢賣600呎單位俾消費者,就唔單止係呃秤,而係明搶。

美孚新邨樓書
(照片來源: 積少天地)

立法規管樓花銷售呢家嘢,大大話話講咗最少廿年,絕對冇跨張,早在1992年,法律改革委員會,已經成立專責小組研究有關問題,先後在1995年及2002年,提出有關規管樓花及售樓說明的立法建議,但最後都係不了了之。

物極必反,拖足廿年,公眾對新樓市場種種混帳現象忍無可忍,政府終於被迫出招,上個月,終於推出「有關規管一手住宅物業銷售的建議法例諮詢文件」,進行公眾諮詢,搞得嚟,如無意外,有關法例最快要由下年選出的新一屆立法會通過。

政府今次講明,目前香港一手住宅市場,買賣雙方「地位並不對等」,地產商有「較大優勢」(措辭太婉轉了),「社會上有強烈意見」,要求立法規管銷售,提供清晰準確的物業資料,以保障消費者。幾項重要立法建議,包括有關「實用面積」及「價單」的規定,要發展商「須讓買家參觀有關一手已落成住宅物業」、以及引入「冷靜期」等,基本上同去年6月推出的所謂「9招12式」相若,算係幾認真,經過立法會變成點就有待觀察,希望香港政府政客,今次真心要在一手住宅市場,還香港置業人士一個公道及「自由」。

就住呢個拖咗廿年的立法諮詢,順叔作為外行人,都有幾句嘢想講,仲未講完,下回再續:完結篇。

關連文章:
1. 買樓自由行(上)(中)(下)(未完)
2. 發水秘笈(上)(中)(下)
3. 肥田冇人爭

伸延閱讀:
1. 參與有關規管樓花銷售的諮詢
2. 下載政府《有關規管一手住宅物業銷售的建議法例諮詢文件》
3. 楊懷康: 蓬勃樓市的發明家
4. 明報: 神秘人捐半世紀樓書珍藏
5. 下載法律改革委員會有關規管樓花銷售的立法建議
6. 立法會有關規管樓花銷售的討論及文件(有大量資料)


6 則留言:

  1. 好有型ge順叔, 好到位ge分析, 好有品的人格. 欣賞欣賞.

    回覆刪除
  2. 哈哈哈,真正「有品」的,其實係AM730...(「思想者」兄,不是量子吧?)

    回覆刪除
  3. 其實今個星期五,政府會在尖東搞一場諮詢,邊位有時間有興趣,應該去發表吓意見,好似要預先登記的,互聯網連結在「伸延閱讀」的第一項...

    規管一手住宅物業銷售建議法例的公眾諮詢

    日期: 2011年12月16日(星期五)
    時間: 晚上七時三十分至九時三十分
    地點: 九龍尖沙咀東部科學館道2號
    香港科學館演講廳

    回覆刪除
  4. 順叔, 你之前一週寫二次, 依家一週五次,真係好勁, 係唔係多讀者, 編輯要求你多寫呢?

    AM730之所以有品係因為施公有品, 一機構掂唔掂都係要睇最大嗰個, 物以類聚......

    回覆刪除
  5. 最開始一個星期一篇,500字,點到即止就收工,而家日日開飯,仲要千幾字,節奏反而冇以前咁好,亦未必會捱得好耐,而家都未諗到一個「可持續發展」方案,不過如果多啲人喺度吹水,一班散戶財經茄哩啡齊齊阿吱阿咗,肯定會有幫助...

    BTW,RETAIL近來講得太多,I.T條999遲啲先打...

    回覆刪除
  6. 唔知順叔你又睇唔睇daisy wong d文呢? 唔知點解, 睇完佢影d相, 我就唔係好想睇佢d文. 順叔你千千萬萬冇貼張相俾我地睇呀, 到時吓死人就唔好lar.....

    回覆刪除