三一兩睇（上）

三一重工梁穩根雙喜臨門

今期開三一重工(600031) ，生產重型機械，最巨型A股民企。

中國重工企業，唔少在香港上市，三一重工就有一隻掘煤的三一國際(631)H股，工程機械製造商，舊年之前，屬於一個好多資金追捧的明星行業，鐵路及房地產投資雙雙降溫，相關股份亦開始跑輸。三一重工舊年嚟香港H股上市，聽講胃口高達260億港銀，見晒人紅衫魚都出埋，臨門一腳撻Q，斷估好快會捲土重來，財經茄哩啡啱啱開始睇呢隻嘢，暫時冇乜特別感覺，今期先在表面一層睇兩睇。

過去十幾廿年，對中國有鐵佬嚟講，有兩頂避之則吉的高帽，載在頭上多數大吉利是，光環變魔咒，第一個係「中國首富」，第二個就係「走出去」海外併購為民族品牌爭光。前者，例如比亞迪(1211)的王傳福，同埋恒大地產(3333)的許家印，做咗「首富」之後，公司股價同家身大幅縮水；中國企業衝出國外收購「血拼」，除咗部分全地球都係咁掘的天然資源大刁，暫時冇邊間叫做修成正果。

三一重工創辦人梁穩根，最近連戴兩頂高帽，先係幾個富豪榜，評為「中國首富」，上星期宣布夥拍中信集團旗下基金，投資約26億元人仔，收購德國混凝土泵生產商普次邁斯特(Putzmeister)。

富貴如浮雲，唔少人估計，「取之有道」的長實(001)主席李嘉誠，貴為「香港首富」，私人財產可能多唔過百足咁多爪的新世界(017)主席鄭裕彤。十個有錢佬，斷估十個唔知道自己個袋有幾多錢，幫有銀士數銀紙的「富豪榜」，其實無聊到爆，中國企業家做嘢好多太勇，外國投資者對中國概念亦每每熱炒過籠，「中國富豪榜」的最大作用，可能係睇睇邊個行業開始出現過熱現象。

富豪榜在內地亦有「殺豬榜」之稱，源於在唔理黑貓白貓的年代的所謂「原罪」，摸住石頭踩著鋼線搶住先富起來的一班，或多或少有啲嘢唔見得光，樹大即招風。梁穩根是少數冇靠地產起家的「首富」，亦是受惠於A股市場的變革第一個「首富」。

文革結束高考恢復，幾代人齊齊爭崩頭，相對於在66至68年大學畢業、命運最悲淒的「老三屆」，77至79年考入大學的「新三級」，出咗唔少猛人，包括好多規劃並見證過去中國經濟黃金十年的監管機構最高層，梁穩根屬於「新三級」人物，那些年知識份子從商，黑貓白貓之間肯定更多心理包袱，唔夠勇唔夠狠，晉身巨富例子不多，梁檼根算得上異數，經營民企代表成為龍頭，經營政治亦有一手。

舊年「財富榜」公布之時，聽講內地傳媒打鑼都搵唔到梁穩根，原來跟副總理王岐山去咗華盛頓，成為中美戰略與經濟對話的隨團商界代表之一，呢位民企「第一人」，亦係共產黨員，已經做咗3屆全國人大代表， 07年17大被選為為共產黨代表大會代表，舊年內地傳媒更一度盛傳，中共組織部已完成梁穩根的考察，今年18大梁穩根將會成為中央委員或後補委員之一咁話。

中共中央委員會有204個成員，後補委員有167件，最實際權力，就係可以參與推舉中央政治局幾個常委，要晉身呢個決定中共最核心權力的核心權力組織，閒閒地二三十年黨齡未死未落馬先排到隊。

梁穩根絕對唔係最資深共產黨代表，但肯定係最有錢一個，如果中共俾首富資本家行入權力最高層，即時成為最具代表性的「先進生產力的發展需求」的代表，合否出現呢個變數，緊要過薄稀來做唔做到政治局常委。當然啦，內地傳媒熱炒梁穩根棄商從政之時，三一重工正準備在香港上市，呢單料最大作用，就係淡化投資者對「首富魔咒」的忌諱。

三一兩睇，下回再續，睇睇三一重工的海外併購。

關連文章：

三一兩睇（上）

三一兩睇（下）