 |  |
中航工業近年好多涉及系內公司左手轉右手的重組交易，都係以非流通內資股找數，即係話資產賣方未有即時套現，又即係話未來真正的集資或套現平台，多數係A股市場而唔係香港。
航空工業當年做埋晒啲地產及物流等非核心業務，最多靠惡，唔係特別出色，深圳中航(161)同埋中航國際香港(232)兩雙嘢，就算繼續扮演系內收買佬的角色，收購雜碎資產，始終只係掛羊頭賣狗肉，有幾大嚿資產等住唧入去都好，現有香港股東股權被攤薄之餘，盈利前景唔見得會特別靚仔，重組變數太多，公司定位未見清晰，暫時可以唔理。
相對於同系香港公司，中航科工(2357)由中航工業直接持股，等如深圳中航同埋中航國際香港的「叔公」公司，定位亦最清晰，近兩年重組動作唔算快手，不過一步步嚟，反而俾到人較踏實的感覺。
呢隻嘢自2010年開始，由官方網頁到品牌形象改頭換面，中航工業老大林佐鳴，在系內廿幾間上市公司當中，唯一同時坐埋主席個位的，就係中航科工，中航科工定位，叫做中航工業的「民用航空產品製造業的旗艦公司」，同埋「國際化融資併購平台」，後者可以唔理，前者逐步落實。
 |
| 中航科工架構(至舊年6月) |
中航科工直接持有4間A股上市公司的控股股權，其中中航電子(600372)舊年基本成功變身，呢隻嘢以前叫「昌河股份」，周身債幾乎被除牌，接收咗中航工業所有航電業務的商業化資產，市值約200億元，中航科工持股約5成。
第二輪重組啱啱掀幕，另一間哈飛股份(600038)，中航科工持股啱啱超過5成，星期二停牌，因為要同中航工業籌劃「重大事項」，未來5日會有公布，未知攪邊科，哈飛主力生產直升機及部分民航機件，林佐鳴近年提及哈飛，一直明示暗示哈飛會成為整合直升機業務的上市平台，係咪得個講字，好快揭盅。
加埋在洪都航空(600316)同埋深圳上市的中航光電(002179)，中航科工在4間A股公司持股，最近市值約211億元人仔，相對本身市值，有4成溢價，不過4間公司往績市盈率炒到由40倍到140倍不等，兩個市價差別唔可以作為衡量標準，始終取決於民航工業的整體增長。
中國誓要打做「大飛機」，所謂「國產」，其實冇話幾百萬件零件樣樣自己做，中航科工同埋旗下幾間A股公司，都係C919項目的「第1類供應商」，要同好多外國公司爭，但最多少會有生意做，呢樣嘢走唔甩。另外一個重要發展，根據「十二五」規劃，全國運輸機場數目將增加接近50個至220個，加埋低空領域逐漸開放，通用航空即將好似幾年前的汽車市場，進入一個由冇到有的市場，中航科工唔單止係「民用航空產品製造業的旗艦公司」，甚至差唔多係「唯一一間」國企，鍾意玩飛機的話，基本上冇其化選擇。
美好前景，仲要班管理層生生性性，同埋各項重組順風順水，中航工業集軍工同民航於一身，系內山頭多，軍方背景又濃厚，解釋咗點解重組動作咁緩慢，甚至可以解釋，系內上市公司的股價波動，遠高於一般國企。
中航科工在去年2月，第一次引入股權激勵制度，筍到冇朋友，由公司直接在市場掃貨，並且支付5成代價，即係半價，呢第一批紅股，買入價約4.15港元，禁售期3年，每位高層每年半價買幾十萬股，都幾和味，管理層人工高福利好，唔會咁容易搵條命博攪攪震，如果中航科工股價異動波動頻率及幅度降低，可視作公司終於「軍民分家」，踏上企業化運作的徵兆。
關連文章：
|
|
|
伸延關讀:
1. 林左鳴：中航工業推進上市決心從未動搖
2. 財經茄哩啡: 打造大飛機（上）、（下）
3. GOW財茄台: 鐵翼長空四十年
沒有留言:
發佈留言