打造大飛機（上）

(刊於2010年11月25日am730)

大國堀起，其實好唔得閒，要射人上月球，又要國產大型客機衝上雲宵。

打造大飛機，可以話係幾代中國航天人夢想，決心氣魄，同當年冇褲著都要原子彈差無幾，傾全國之力亦要做到也，07年立項，由中國商用飛機負責研制開發，預計2014年首飛，兩年後投放市場。

兩年一度珠海國際航天展啱啱閉幕，國產大飛機C919首次亮相，雖然得半隻機殼，冇翼冇引擎，已經成為全球航空業焦點，仲聲稱接獲一百架訂單，買家幾乎清一色國企航空公司，暫時唔知係咪落訂冇退款嘅霸王死約，但如果C919可以安全起飛穩陣著陸，就算剩係賣中國市場，AIRBUS(空中巴士)及BOEING(波音)兩大歐美巨頭，已經唔可以獨霸藍天，AB之後，要加個C。

中國商飛估計，未來廿年，中國需要補充4,439架民用飛機，總值超過4,500億美元，超大部分係C919類型幹線機，一隻大飛機，零部件超過四百萬件，邊間公司做乜嘢特別叻，有冇國企做到勞斯萊斯級起動引擎，要專到無倫嘅專業人士先識講，財經茄哩啡只可以計條師奶數，一個幾千億美元大餅，就算放十份一落中國民用航天工業，拉動增值作用亦相當可觀。

呢個大餅，國企以前餅碎都食唔到粒，龍頭中航工業，08年重組後營業額過千億，但相信絕大部分來自非上市軍工生意，旗下逾廿間中港上市企業，09年之前，幾乎冇一間營業額過百億。

今日歐美巨頭要飛入中國，焗住分餅仔，空中巴士在天津總裝線，舊年6月交付咗第一架A320，又同幾間上市國企，在哈爾濱搞咗個飛機複合材料製造中心，多咗外國生意，加埋C919開始砌機，生產飛機零部件國企，應該開始步入增長期，如果打造大飛機順風順水，出現類似早幾年車企爆炸性增長，未必冇可能。

可能早年冇啖好食，好多掛名「航空」上市公司，業務雜碎到你估唔到。深圳中航(0161)，表面上做液晶體顯示器，其實做手錶；中航工業國際(0232)，表面上做直升機，其實做蒸氣機。

仲有間航天控股(0031)，表面上做火箭，其實做地產，08年底同母公司成立合營企業，發展海南島航天發射場配套區，總投資約12億人民幣(下同)，今年8月，4千幾萬買斷母公司35%項目持股，叫做筍，一個四百萬平方米加四公里海岸線地產項目，有錢發展都冇技術經驗營運，應該會學雅居樂(3383)發展海南項目，轉手引入策略投資，母公司在星期二，在網頁偷偷地公布，項目發展大綱，已經得到市政府批核，一個住宅酒店項目，隔離同時有火箭升空，點搓得埋，要等公司交待詳情，但如果當呢隻嘢係當海南特產，旅遊炒磚頭，現價平過雅居樂好多咁囉。

下回再續，睇睇一隻相對純正嘅航天工業股。

關連文章:
1. 打造大飛機（上）、（下）

伸延閱讀
1. 中央為什麼要大張旗鼓宣打造大飛機 (內地博客轉載新華網)
2. 大飛機市場ABC: C919接一百架訂單 (中國經濟網轉載人民日報
3. C919項目最新進展 (中國商用飛機公司網頁)
4. 中國大飛機造出來也出不了國門！(內地博客)
5. 大飛機「心臟」- 發動機 - 仍靠進口 (新華網)
6. 航天控股海南「發射場 + 地產」項目大綱獲批 (中國航天科技集團公司網頁)