財經茄哩啡: 超人大飛機（中）

2012年2月7日星期二

超人大飛機（中）

上回講到，長實(001)主席李嘉誠同中國航空工業國企打交道多年，長和系在中航工業旗下三間香港上市公司，先後作出股權投資，十幾廿億銀貨仔，呢批貨本來已經封晒塵，但近來開始重新增持，好似對民航工業國企重現興趣。

航空產業已經被列入「戰略性新興產業」，中國要打造國產大飛機，決心同射人上月球一樣咁大，07年已經立項，多多錢都肯投資，唔似得十幾年前咁，要四圍揼愛國資本家心口；近十年嚟，長和系在內地亦冇乜大手筆投資，諗唔到乜嘢理由，李超人忽然會有興趣，重鎚出擊幫手打造大飛機，進入一個重未落手落腳的實業領域，長和系未來縱使繼續增持中航工業系股份，最有機會組成「戰略聯盟」拍住上的，可能只有在深圳的地產項目。

每個成功商人，搜集市場資訊、建立人脈關係都有自己一套，例如長實99年幫手買殼投資中航國際香港(232)之後，高層葉德銓一直坐住非執行董事職位，唔通「小霍建寧」食飽飯冇嘢做咩；又舉個例，深圳中航(161)舊年9月29日，喺香港起壇，宣布並慶祝42億元人仔收購系內12間公司雜碎業務的重組大刁基本完成，據中航工業官方網頁資料，「香港首富李嘉誠也特地趕到現場」表示祝賀。

9月29日國慶前夕，香港啱啱扯8號波，股市都停市，誠哥如果風雨不改親自出席，咁就認真俾臉，唔單止咁，中航工業副總理顧惠忠，早兩個月在《中國航空報》寫咗篇「與李嘉誠先生面對面」的文章，透露中航工業一班高層，在國慶前夕拜訪咗誠哥，介紹中航工業最新情況，並且「歡迎李嘉誠先生進行戰略投資」，在長江中心60樓食飯灌酒期間，顧惠忠呢位長江商院EMBA畢業生，話自己被超人風采深深折服云云。

長和系同中航工業系統淵源深厚，超人對內地民航工業國企，肯定知道唔少一般散戶甚至芬佬未能掌握的資訊，之不過，又未必代表佢老人家一面倒睇好，超人做大刁，由幾十年前買和黃(013)到十幾年前賣橙，出晒名冇手影捉，中航工業重組沙塵滾滾之際，長和系密密增持相關公司股份，甚至超過權益披露水平，更似係一項畫公仔畫出腸的「禮貌式」投資，特登做俾人睇，驚死人唔知佢什係好支持中國民航工業，如果真係要捉手影，最多只可以話，近年中國民航工業的發展，以致中航工業的一系列重組，最近重新吸引到超人的眼球。

如果要詳細講中航工業系統的重組，可能上中下左右前後都講唔晒，複雜到無倫，一間上市公司，分分鐘有四五層控股關係，新新舊舊上市非上市，分司名又極度相似，可能越講越亂。


深圳中航的3個不同招牌 (即係自己都未知自己想做乜)

好簡單咁講，香港上市的深圳中航同埋中航國際香港，都只係中航工業的「曾孫」公司，亦係民航工業國企當年「軍轉民、內轉外」時期，「不務正業」的後遺產物，兩間公司英文名，都係「CATIC」行頭，即係「中國航空技術進出口總公司」的代稱，「中國航空技術進出口總公司」08年之後，「軍民分立」，變成「中航國際」，雖然仍然有做民航用品出口，但基本上係中航工業非核心產業的整合平台，逾千億元資產，好大部分位於深圳，亦係集團內最有可能最快「整體上市」的資產。

「中航國際」總裁，叫做吳光權，2010年開始，做埋深圳中航同埋中航國際香港兩個香港上市平台的話事人，中航國際香港英文名，最近已經改咗用中航工業招牌「AVIC」行頭，但係深圳中航，網頁招牌轉咗冋「AVIC」，但上市公司仲係叫「CATIC」，未來公司個招牌點變法，可能預示咗企業重組的方向，包括會唔會成為「中航國際」上市的整合平台，定係繼續做收買佬，併購系內雜碎業務。

下回再續。

關連文章：