(刊於2010年1月8日am730)
(標題為後期改動)
過去十年，唔少香港人在大陸搵到大錢，不過香港最有錢果個，反而錯失咗大陸黃金十年。試下想像，和黃(0013)十年前賣橙之後，千億利潤搣多少投資中國，而唔係留在英國燒錢攪3G，今日和黃應該值幾多錢。
全球大趨勢，銀紙講普通話，傳統藍籌開拓中國唔夠進取，投資價值絕大多數不進反退。十年來唔少分析員唱好和黃，最後都係反底唔成功，連09年最大力唱好嘅BNP，今個星期都要曲線唱淡，一面話城哥頻頻增持利好兼有大動作，一面大幅調底目標價。
大股東持股量變化，無錯，好多時代表本身對公司信心，不過未必可以應用在誠哥身上，因為佢係個單邊大好友。睇兩個半月，誠哥增持18次，好似好激，但拉長十年睇，誠哥一股長實和黃股份都未沽過，翻查聯交所記錄，長和系是但一個在任董事，都冇減持記錄。夾硬話跟手有大動作，呢樣全世界已經知道，和黃計劃在大陸上市，換句話講，誠哥頻頻增持，可能其實係為左十幾二十年以嚟，第一次減持做準備。
拉闊啲睇，投資者其實應該問，今日連GOOGLE都加入移動通訊市場，係咪代表新嘅電訊消費模式，即將出現，發達經濟電訊公司，股價殘足十年，係咪時候反底，再拉闊啲，就要問下今時今日，連華創(0291)都有個中國零售主題概念，瓣瓣有啲嘅綜合企業，又係咪已經過時。
