Best Blogger Tips

2011年7月29日星期五

河蟹膠鐵(下)

(刊於2011年7月29日am730)

上回講到,為咗建設高鐵,中港台都搞出大頭佛。

溫州和諧列車意外,善後工作一鑊泡,加埋鐵道部部長劉志軍單嘢未知會燒到去邊,鐵道部近日發債有話圍唔夠飛,市場暫時對鐵路相關股份信心盡失,上市公司只要有個「鐵」字,呢幾日幾乎都被沽到反車,成個板塊市值蒸發幾百億。

火車「追尾」釀成慘劇,外行人都知道,鐵路通訊及管理系統供應商要揹最大責任,但成列車卡飛出路軌,無論官方最後點解釋,作為火車製造商嘅中國南車(1766),企業招牌受打擊一定最大。

今年5月中美戰略與經濟對話,南車董事趙小剛,係中方唯一央企代表,擺明車馬想向美國輸出高鐵技術,今次出事後,南車衝出中國大計,怕且要等多幾年,之前趙小剛仲話要將高鐵車組速度極限測試,推高至時速500公里,呢個「提速」大計,更可能永遠唔使再諗,南車系早排炒得最過火,大摩早兩個星期,先將株洲南車(3898)目標價調高至34元,今次跌得最傷,好難再被市場視為高增長股份。

中國高鐵要進一步提速,要出口鐵路技術,未來一兩年步伐肯定受影響,不過幾千公里高鐵系統已經起咗喺度,亦肯定唔會由得佢生鏽,可能會起慢啲,但唔會就咁放棄。中國以鐵路建設帶動經濟發展方向,唔係一個劉志軍話起就起,而係一個長遠戰略步署,例如可以喺好短時間內,喺國內調動大量軍隊及物資,呢種策略價值,唔係公路或者飛機可以代替,中鐵(390)及中鐵建(1186)等鐵路基建公司,年初開始已經大幅調整,睇唔到仲有乜嘢大跌空間。

中國近年大搞高鐵,鐵路公司財大氣粗,斷估外國競爭對手、以至生意及技術拍擋,受咗唔少氣,今次出事,好似班日本公司咁,梗係飛撲出嚟踩多三腳,有啲外國傳媒,更大字標題話中國出口鐵路技術,機會等如零。南車要出口高鐵技術到美國,可能唔使再諗,但係中鐵及中鐵建,賣點係膽正命平,國外工程未必會有好大影響。

市場越大反應,越有機會殺錯良民,例如廣深鐵路(525)同大秦鐵路(601006),一間係粵港物流老牌公司,一間掌握秦皇島煤運命脈,因為賺錢能力相對較高,先後成為鐵道部改革先頭部隊。噚日講過,溫州車禍成為中央整治鐵道部重要契機,鐵道部負債幾萬億,除非繼續老屈銀行硬食,債市唔會好大市場,唯一出路,就係加速鐵道部政企分家,即係鐵道部地區分局,要分拆多啲優質資產上市撲水,廣深鐵路及大秦鐵路更加係現成融資工具,鐵道部好好醜醜都係全國最大未上市資產,外國投行要湊呢個大客仔要做生意,遲啲分分鐘會幫手唱好吓添。

伸延閱讀:
#

2011年7月28日星期四

河蟹膠鐵(上)

(刊於2011年7月28日am730)

溫總泄露國家機密

最高領導人要建構和諧社會,「和諧號」火車撞到車毁最少39人亡,咪話唔大吉利是。今期開高鐵,一個可能係近年中國人社會當中,最「膠」亦最惹火易燃之物。

台灣起高鐵,爆發連串相關特大黑金弊案;香港起高鐵,引起工程專業到民主派到綠色組織強烈反彈,八十後年青一代更「膠」聲四起,培養咗一群反建制生力軍;大陸起高鐵,更加唔使講,連「鐵老大」鐵道部部長劉志軍亦中箭落馬,政治經濟上一定埋下唔少計時炸彈。

一種交通工具可以咁惹火,就算外行人都可以做一個合理判斷,就係高鐵呢種技術,社會經濟效益有好大爭議性,大陸近幾年新建高鐵長度,等如全球幾十年總和,涉及投資幾萬億計,引起問題就肯定更大。

溫州車禍,雖然唔涉及新建高鐵,傷亡人數,亦及唔上08年膠濟鐵路意外,但可以帶嚟咁大衝擊,其鋒直攖中央政府管治威信,可見各種矛盾,長期壓制被鐵腕壓制在一個內膠外閉狀態,爆起上嚟可以好得人驚,尤其係涉及人命安全,咁就更難「河蟹」。

唔少人都見識過,副總理張德江有幾大支嘢,當年做廣東省大佬時,特首曾蔭權見親佢都變得特別鵪鶉。升到做政治局常委,張德江近年雖然多數做災難救救援、安全生產等「細雞」工作,但做救緩總指揮仍然好鎮得住場,今次溫州車禍,善後工作竟然咁狼狽,甚至可以話由得班友喺光天化日下公然毀屍(差啲未殺人)滅跡,最少有兩大啟示,第一就係鐵道部作為中國行政體系最大獨立王國,今時今日仍然亂過七國,張德江都未必插唔到手,更可能係根本唔想插手;第二,鐵道系統班友,平日肯定惡慣又懶慣,真係出事,惡相低能相盡現。

鐵道部行政架構,照抄當年蘇聯系統,有咩問題,呢度唔講咁多,大家自己上網,或者去書報攤買本《外參》睇睇。劉志軍出事,已經係北京政治最高層要郁呢個獨立王國最大訊號,今次搞到咁大鑊,中央又冇話特別想「河蟹」件事,幾乎由得輿論大鳴大放,可以預期,鐵路系統改革,阻力會大減,即將進入「提速」時代,呢個其實係一個好正面發展,亦會真接影響連接鐵路系統、市值龐大嘅多間上市公司。

劉志軍年初落馬之後,投資者幾乎對所有鐵道相關股份信心,已經疑神疑鬼,今次和諧列車出事,信心再大打折扣,不過事發後市場反應,其實亦好「膠」。車禍星期六發生,星期一,幾乎冇一間所謂投資大行,走出嚟調低鐵道股評級,但係沽貨絕不手軟,隻隻股份跌到一仆一碌。

明天再續,睇睇「後高鐵」時代,鐵路股應該點玩法。
伸延閱讀:
#