Best Blogger Tips

2013年12月31日星期二

Cinda-rella


今期開Cinda,中國信達資產(1359)

「連信達做什麼生意也不知道」就落注的,大有人在,不過「連信達做什麼生意也不知道」就跟白頂紅唱黑的正義屎士,亦都唔少。本來財經茄哩啡已經改正歸邪,冇寫「IPO-1000 Focus」好耐,近排睇咗唔少西人西語,忍唔住手痕寫幾句,指教吓。

先睇睇幾份西洋大報的標題。南華早報,8月已經開始唱衰大行動,大字標題「資不抵債的有毒廢料收集站」(China’s insolvent toxic-waste dump);Economist,將中國四大資產管理公司(AMC)稱為「搽在豬咀的唇膏」(Lipstick on a pig);Forbes,質疑信達係中國有史以來最揾笨的新股(Is this China’s Worst IPO ever ?

從西本位出發唱淡信達的主流(主觀)論據,來來去去嗰幾飛,其一係中國AMC為阿公掃垃圾,冇納稅人埋單,信達已經爆煲十次;其二係跳掣式的條件反射反應,中國金融系統、國有銀行既然係垃圾,講多無謂,作為垃圾筒的信達,肯定更加垃圾。

查實西洋鏡背後,只是一般的洋相故事:好耐好耐以前,有個小姑娘,叫做Cinda-rella,佢有兩個好尻肉酸的家姐,一個叫RTC(Resolution Trust Corporation),一個叫TARP(Troubled Asset Relief Program)…

冇錯,「銀行 – 壞銀行 = 好銀行」呢條神奇公式,亦即係成立國控AMC為金融體系啜毒呢條橋,中國只係向佢老美偷師。80年代美國近千間吸存款放樓貸的機構(savings and loan associations),爆到一褲都係,RTC就係為咗處理系統風險而生的「壞銀行」,從1989年到1995年,RTC最少重組咗747間儲貸機構,納稅人直接間接埋單的金額,一樣以幾千億美元計。2008年金融核爆之後成立的TARP,故技重施,不過阿TARP呢隻肥西,比RTC豬扒千倍而已。(題外話,佢老美日唱夜唱中國地方債風險,帶頭爆煲唔能還錢的,曉,之唔係底特律?!)

呢度唔係話中國金融系統冇問題,之不過一百步笑五十步,會笑大個口的。Bad debts tell good stories,順叔早月寫《變態超人》,講到長實(0001)阿誠伯90年代初準備殺入美國,第一單刁,就係收購RTC掟出街的其中一個垃圾債券30億美元組合,據當時和黃(0013)大班馬世民所講,買呢堆垃圾債券的最重要考慮,就係為咗「a periscope into corporate America」,可以即時掌握到近300間美國公司的信用資料。同樣道理,信達上市的最大價值,查實係提供咗一個了解中國金融體系的新功具,唔買都應該埋嚟睇吓,跳掣式唱衰,同瞇埋眼炒新股,差無幾。

先睇歷史大背景,中國AMC誔於1999年,當時中國準備入WTO,由計劃經濟向市場經濟急劇轉型,大量國企仲未學識食自己,簡單掃一掃《朱鎔基講話實錄》在1999年前後的政治經濟問題,就知道十煲粥七隻蓋有幾杰,深層次矛盾集中反映在金融領域,只係在金融系統掃場,幾年間已經查處咗超過4萬友,好死唔死,撞正亞洲金融風暴,銀行體系累積大量壞帳,1999年訪問北京的格林斯潘,都話中國學美國,成立「壞銀行」為「好銀行」買時間,係「非常有益」的方法。

即係AMC生出嚟就係為咗幫阿公做嘢,肩負「政策性」任務,四間AMC各自為四大國企銀行啜毒,信達可以話揹咗最厭惡性工作,因為對口單位係建行(0939) 喪搭國家開發銀行,1999年4月財政部注資100億(人民幣,下同)做註冊資本成立信達,幾個月後間嘢已經技術性破產,因為哽咗建行2,500億不良貸款,仲有國開行的1,000億筍嘢(合共3,500億)。

更大鑊者,在呢個信達稱為「政策性業務階段」(1999年至2003年)所收購的「政策性不良資產」,四大AMC要按銀行帳面值原價收購,冇任何折扣,硬食,融資方法主要透過向人民銀行借錢,仲有發行債券,而債券竟然又係由四大銀行買返!例如信達在1999年硬食建行2,500億壞帳,只係出咗30億現金,另外2,470億發行10年期、2.25厘的債券(下稱「歷史債券」)俾建行。

到咗2005年,建行已經夠靚仔上市,但係Cinda-rella仍然爛口爛臉,為咗消除投資者對建行所持「歷史債券」的疑慮,財政部拍心口支持有關欠款的信用;到咗2010年,本金加利息2千幾3千億「歷史債券」更由信達帳簿剔除,成為(資產負債)「表外資產」,信達同老母財政部成立「共管基金」,延期10年,信達用所得稅還本金,財政部用一般預算還利息,並且繼續提供信用保證。

換句話講,Cinda-rella挨義氣啜毒,只不過將大量不良資產,在阿公的資產負債表搬嚟搬去,並冇完全消化排出體外,呢個亦係一般老外睇淡信達處理不良資產能力的主要理由。至2010年底,信達累計硬食咗3,963億「政策性不良資產」,望落好似好大,不過扣除3,500億在1999年從建行及國開行購買的最大抽壞帳後,過去十幾年,Cinda-rella為阿公硬食的垃圾其實唔多,而且據信達招股書所講,呢批最垃圾的資產,已經唔再表列於帳簿(冇披露原因及細節,有可能只係冇再分開表列)。

去到2012年底,信達累計收購咗11,061億元不良資產(原值,信達冇透露用咗幾多錢買返來),累計回收現金2,769億,以Cash recovery rate計,一蚊雞爛數回收現金25仙,不過呢條數,未包括處置過程中獲得的實物資產及股權,包括一大嚿所謂「債轉股」(Debt-to-equity swap)資產。

Cinda-rella幫銀行買壞帳,變身多間國企的債主,收爛數的時候,銀債股償,呢嚿「債轉股」資產,有幾百間上市及非上市公司的股權,最大上市資產包括5.9%中國鋁業(2600)、7.3%青海鹽湖;未上市類包括42%神華准格爾、30%大同煤礦等。呢嚿嘢在信達的帳簿帳面值只有276億元,根據獨立估值報告(非IFRS),總值623億。

信達「債轉股」組合的公平值有冇被低估,睇下閣下點睇,驟眼望落去,超過60%資產,來自近一年最仆街的國企行業:煤碳,另外25%來自同類仆街的化工及金屬行業。換個角度睇,現價買入信達,變相撈底押注煤碳股,2007年的時候,呢抽嘢好值錢,問題係信達唔可以隨便將大量國企的主要股權亂掟,信達可能係最熟悉煤碳國企財務狀況的公司,做「債轉股」公司的大耳窿本身已經係一盤大生意,萬一未來煤碳化工行業真係出現過剩產能的整合,又或放寬民企外資入股相關國企的限制,信達可以係重組併購的重要玩家。

唔少西人評論,話信達披露不足,公司冇解釋具體業務,投資者落注只係靠個「信」字云云。查實就算唔計招股書資料披露水平,信達咁多年嚟,提供咗唔少資料,問題係論者有冇做功課,或者選擇性失明。

Cinda-rella幫阿公掃銀行垃圾多年,手上掌握超過50萬間公司的信貸記錄,本身就係一個極有價值的資料庫,好多人冇留意,信達本身亦幫阿公做智庫,研究壞帳成因及銀行體系風險,旗下有個「信達金融風險研究中心」,近幾年就有關議題做咗唔少公開報告,輯錄信達本身的案例,都已經出咗5本書,當然好多內容其實隱短揚長,不過或多或少可以了解信達的實戰攻防,例如當年三九集團(三九胃泰老母)的重組,仲有新疆天然氣開發公司以股抵債的案例,都提供唔少新聞傳媒以外的金融史料。

亦有部分相對深入的評論,例如Financial Times (Cinda:Making riches from rags)及Wall Street Journal(Pricey play on China’s bad debts),指住信達手上的「不良資產」,有62%來自房地產,話呢個係信達最高險所在,呢個論據基本上成立,但引用資料錯到離罩。信達作為一間「壞銀行」,同一間現代銀行一樣,問題在於資產同負債好難簡單歸類劃分。所謂6成「不良資產」來自房地產市場,講緊信達近年增長最快的業務,亦可能係最大的風險因素。

信達在2010年完成股改,同年進入所謂「全面商業化業務階段」,呢一年最重要的突破,係攞正牌收買非金融類不良資產,亦係目前四大AMC唯一一間。在信達合併損益表的Top line,有項收入叫做「應收款項類不良債權資產收入」,2010年收入係「零」,2013年頭半年增加到42億,佔總收入22%;在合併帳簿,產生呢個爆炸性增長收入的資產,叫「應收款項類投資」,總額亦由2010年的「零」,狂升到2013年6月的804億,呢個增長新引擎的資產,有62%來自主要係地產市場的「非金融機構購入應收帳款」(並唔係FT及WSJ所講,信達超過6成「不良資產」來自地產市場)。

簡單嚟講,如果地產公司A揾咗建築公司B起樓,有筆1億銀尾數,6個月要找,地產公司A周轉有問題,信達會向建築公司B買咗呢筆應收帳,通常會有少少折讓,例如9,800萬咁(2%),跟住同地產公司A講數,將還錢期限延長,例如18個月,期間收地產公司A貴利。假設信達向銀行借一年錢拉均融資成本6%,又假設地產公司A要俾信達13%利息(中型地產商在香港發點心債,息口閒閒地雙位數字),調整2%收購折讓、3%壞帳率及其他使費,信達呢盤「應收款項類投資」投資,隨時有5至6厘回報,咁又解釋咗,點解信達帳簿上「借款」一項,會由2010年的78億,狂升至2013年6月的1,041億。

世界上又點會有低風險高回報的金融生意,呢盤高風險生意,銀行一直在大做特做,不過收收埋埋,出咗事就撥去做「表外資產」,信達上市前董事長侯建杭(見上圖)接受香港傳媒訪問,爆咗句陰毒,叫投資者睇睇銀行的「出表率」(將不良資產撥出資產負債表)的變化,就知道信達未來的增長空間。北京近年矢言打破銀行壟斷,銀監人行等監管機構,近排開始日日講住「去槓杆化」,民營銀行亦已經提上議程,在在顯示監管機構已經開始為銀行體系放氣,中國超過9成金融資產放在銀行體系,比例在未來數年好可能會大幅降低,將更多資產轉移到AMC及證券公司等金融機構。

講到呢度,唔難睇到,對風險胃納較高的投資者嚟講, Cinda-rella係「壞銀行」及「影子銀行」的混合體(可參考黃元山有關信達影子銀行角色的的短評),Cinda-rella上市,亦係投資者第一次可以透過大型上市國企,押注中國的影子銀行。

呢個「灰姑娘」屌唔屌得過,又可以咁睇,Cinda-rella除咗引咗策略投資者UBS及渣打(2888)上釣,仲有一抽基礎投資者,當中包括想揾Cinda-rella做盲公竹入大陸的垃圾債券專家(仲有準備在深圳前海大搞的神秘基金融通資本),聽講另一間AMC華融,已經開始傾緊外國策略投資者。入咗股,唔代表呢班友絕對睇好信達(半年Lockup過咗之後會有一定分曉),不過最少可以反映老外投資者對中國金融垃圾市場的濃厚興趣。

外國投資者(包括H股)持有的內地銀行股票市值,超過1萬億,飽飽滯滯,帳面1倍多少少都冇乜人吼,作為爛帳收買佬,信達屬於中國金融的「逆周期」奇貨,銀行越大鑊,信達越快樂,某程度上,睇好「壞銀行」即係睇淡內銀,呢個論點順叔基本上同意,不過增長放緩甚至倒退一件事,會唔會爆發系統性危機又係另一件事,如果話信達同內銀管理係「自相矛盾的故事」,就流於西人西語的硬膠理論,曉,歐美唔少垃圾債券基金非常成功,咁唔通又話西方金融市場係垃圾咩屌你。

呀,BTW,Happy New Year!

伸延閱讀:


同場加映:
Rella

2013年12月20日星期五

老美二五仔(下)


上回講到,美國二五仔大兵曼寧,將佢老美駐全球各領事館的超卨25萬份情報電文,泄咗俾維基解密,爆到全球都係,結果曼寧被判坐監35碌,如果真心支持資訊自由平等人權,對曼寧表達支持的最好方法,就係唔好浪費佢一番心血,閒時重温吓佢爆俾維基解密的內容,包括大約950份由香港老美領事館發出的情報電文。

香港政商高人當中,最經常出出入入花園道老美領事館、兼且最大口的,大家又估吓係邊個?苦瓜李柱銘?錯。多銀教主陳日君?錯錯。民主阿婆陳四萬?又錯。大話精CY (Lai)?都錯。

冇錯,頂頭張相查實已開估,答案係任志剛呢條「香港第一拎」。下文引述咗部分維基解密有關任一蕉同美國使館人員的會晤內容,各Reference ID後的Hyperlinks,就係任一蕉在花園道的一條條腳毛。

普通人去老美領事館,通常都會媽媽聲,又打手指模又排隊,任一蕉當日作為香港金管局行政總裁,全球人工最高的所謂「中央銀行家」,工作只有一樣,就係含住聯繫匯率條拎(Link),佢摸上老美領事館,好似普通人返阿媽屋企食飯咁平常如入冇人之境,例如有次去開搞護照,都會特登走去同老美領事打吓招呼嗲幾句。(Ref ID: 08HONGKONG1746

眾所久知,任一蕉仲話得事的時候,堅持唔肯改革香港聯匯,不過對住美國佬講起大陸的匯率,條友又會雙重標準,兼且好鐘意阿吱阿咗,例如在2006年3月,有幾件老美參議員,訪華兼順便訪港,作為常客,任一蕉例牌衝去花園道打招呼,同人哋講人仔匯率改革步伐「不幸地緩慢」(Unfortunately slow),當年人仔匯率係中美關係熱點,任一蕉作為香港金融要員,鼓勵美國參議員,繼續向中國施加政治壓力(the U.S. should by all means continue to put political pressure on China),唔知算唔算手指拗出唔拗入?(Ref ID: 06HONGKONG1285

咁都未算,同一場合,任一蕉更加在老美參議員面前,大口點評北京領導人,明示暗示,在人仔匯率改革問題,當時的總理溫家寶太保守阻頭阻勢,人行行長周小川面對太多官僚掣肘,如果周小川話得事,人仔改革晨早掂咁話。(If it was just Zhou, you'd be there)當年的副總理鐵娘子吳儀,在老美圈內評價甚過,任一蕉仲提醒美國朋友,由金融改革的職責到認識,吳儀其實只係一知半解。(her responsibilities and knowledge with regard to reform of the financial system are limited)

查實2005年7月匯改之後,人仔一直在上升軌跡,2006年3月的時候,兌美元已經開始衝「八算」,換句話講,港元咬住「7.8」,人仔兌港元好快見「一算」壓力(2007年1月人仔兌港元突破Parity一兌一),阿水都見到,內地同胞嚟香港買樓掃名牌,折扣越嚟越大,任一蕉堅持聯匯對香港冇構成通脹壓力,唔知呃邊個。佢老味,呢班友仔對住美國佬又係另一套講法。2006年4月一份外交電文顯示(Ref ID: 06HONGKONG1383),有條坐喺香港政府某委員會的二五,同美國駐港領事館爆料,話有關聯繫匯率廢存問題的內部討論,查實已經展開!(One financial contact told us that the conversation about the future of the peg has already begun within a Hong Kong Government advisory committee that he sits on)夠資格為匯率向港府提供意見的委員會,唔會有好多個,最大嫌疑,就係嚟自金管局樓下的外匯基金諮詢委員會,呢條二五仔係邊個,呼之欲出啦。

當然,唔排除有人提供流料跣尻佢老美的,不過如果閣下在未來五至十年退休,強積金、保險等以美元計價,閣下又相信假如脫鈎之後港元兌陰司紙可能升值的話,就要諗諗自己份防老儲備會唔會唔見一截。(順叔近年買的保單,已經全部轉買港元,因為預咗在香港退休)

公道講句,港元既然拎咗陰司紙,作為金管局阿頭,任一蕉同佢老美保持緊密聯繫,了解美國金融政策變化,可以話係職責一部份,不過,任一蕉同佢老美係未行得太埋,唔同人可以有唔同判斷。例如在2009年3月,任一蕉上京之前,預先拜會花園道,爆響口話中國即將容許幾百間公司作為人仔貿易結算的試點。(REF ID: 09HONGKONG559

又例如在2009年10 月,任一蕉同美國金融情報官Stuart Levey工作午宴,條美國佬提出北韓利用香港銀行進行核計劃相關的財務交易,點晒名(姓名、公司同埋銀行都有)要任一蕉幫手,任一蕉就拍心口話金管局在香港擁有「高度自主」(high degree of autonomy),不過有關北韓資金的問題,佢會透過「私底下、非正式的對話」(private, non-official conversations with local banks on UNSCR-related issues)向香港銀行提出溫馨提示咁話。(REF ID: 09HONGKONG1266

可以試吓想像,如果任一蕉同老美咁熟,同當年捧佢上神枱的英國阿蛇,關係又點會疏遠,去得花園道出出入入,又點會唔順便行過正義道探吓英國駐港領事館?事實上,任一蕉向英國前老闆提供的情報,細緻到包括北京領導人的飲食習慣! 根據2009年6月在北京美國領事館發出的電文,引述咗英國駐北京使館官員Tamsin Rees所透露、有關中英經貿對話的細節,條女提到,任一蕉聲稱同中國副總理王岐山好老友,經常一齊飲酒 (the former head of the Hong Kong Monetary Authority had said he used to go drinking together with Wang),點知跌尻咗英國阿蛇一鑊金,話說2009年王岐山訪問英國,英國人於是根據任一蕉提供的情報,準備咗盛大的「Whisky dinner」,點知王岐山話自己「酒精敏感」,滴酒不沾,搞到成件事變咗「bloody disaster」。(REF ID: 09BEIJING1582

北京自己都養埋一大堆大陸密探零零柒,應該已經建立自己人事檔案,邊個係花園道正義道常客,應該心裡有數,老美電文亦唔涉及乜嘢高級別的機密,對來自大陸的「有心」讀者嚟講,涉及香港人和事的老美電文,最有睇頭的,反而係香港目標人物在美國佬面前、非公開場合的意態:邊位人兄講咗乜嘢、人前人後表現有冇唔同。當25萬份電文,透過維基解密爆到通街都係之後,在2009年5月底,就爆出任一蕉唔會再冧莊金管局總裁的消息,唔知通佢老美電文的內容,有冇影響到任一蕉的仕途呢?既然任一招係千年難得一見的能吏,值千九幾萬港銀一年,點解退休之後,在大陸金融體系乜嘢顧問角色都冇?唔通北京覺得呢條友養唔熟?

眾所久知,英國契媽的殖民年代,香港在國際財經事務上,屁都唔會放一個,毫無角色,在後過渡期,出現180度大轉變,「香港」開始出席(出現)世界貿易組織、APEC、世界航空、航海協議、設立駐華盛頓及倫敦「專員」等。好簡單,如果香港呢隻當年會生金蛋的鴨,唔可以再為契媽服務,97回歸之後,對英國最有利的發展,就係香港在國際財經事務上,保持高度獨立自主,根據前港英政治部Agent羅亞所講,呢招叫做「己所不欲盡施於中國」。(見《香港絕密檔密》第121-123頁)

在「高度自主」的香港,最「高度自主」的財金系統,唔使問阿桂,莫過於金管局,而任一蕉在位咁多年,有眼睇,力保金管局「獨立王國」地位不遺餘力,舉個例,又係維基解密,在2008年10月,任一蕉向老美使館講,希望香港在討論國際金融危機的Financial Stability Forum,擁有獨立一席位,(REF ID: 08HONGKONG1984)暗示唔想只係作為G20成員中國代表團的成員之一,任一蕉甚至講到出面,呢個問題佢唔好意思開聲,最好由佢老美代勞(Yam replied that it would be difficult unless someone outside of Hong Kong raised it with Beijing),到咗2009年3月,Financial Stability Forum議決取消香港席位,任一蕉又即刻跑上花園道喊苦喊忽,話呢個係忽視香港重要金融中心地位的嚴重錯誤云云。(REF ID: 09HONGKONG530

有人話國際城市的獨特地位,係保持競爭力的重要元素,呢個講法,唔會有太多人反對,不過呢,如果同一班友仔同你講,又要擔心香港被上海新加坡超越的話,就屬於硬膠性的自相矛盾。假如一黨專政的上海、一家專政的新加坡,都有條件成為國際金融中心,咁香港經濟體系向大陸靠攏,又點會影響競爭力?

當然啦,最能將香港阻隔於大陸經濟,同陰司紙體系緊緊綁埋一齊的,就係聯繫匯率呢條冚家拎,而最出力捍衛呢條冚家拎的,之唔係就係任一蕉。任一蕉執掌金管局呢個獨立王國16年,咬住七點八唔放,拍拍屎忽走人之後,2012年又話係時候檢討聯匯,邊度有人咁屎忽架,可以好公道咁講句,全香港最冇資格講檢討聯匯的,就係任一蕉。

講到呢度,近排陰毛上腦的順叔,忍唔住要引述羅亞有關98年亞洲金融風暴的陰謀論(見《香港絕密檔密》第90頁):

九八年來政局氣象,似乎也因應過渡後而趨新,陰謀論者以為前港英政府開始發動其隠藏殺著,出手狠毒,招招針對要害,向本港命脈痛下殺手。局內人以為過去港英運作百年,香港成功因素己是公開秘密,前朝鷹犬如肥彭之流,「俸祿」仍舊照支,未致貽害特區,但若能泄漏玄機,把本港賴以謀生的金融經濟要害公諸西方財閥,利用本港自由銀行體系弱點,投下賭注一舉而攻下香港。

深諳前朝歷史讀者,當會知道過去最少英裔官員控馭的部門,正是金融銀證經貿機關,全數任用華人忠貞分子,為港英最早實驗「本地化」計劃之所。此批前高官技藝招式有限,份屬英式流派,此時任由其施展所長,全部不出對手所料。國際投機打手如索羅斯之輩,早己獲前朝傳授絕招解拆,只懂一式半招的特區高官,早在敵方掌握之中。

事有湊巧,過渡後港府屢遭考驗,特區危機此起彼落,最早有禽流感事件,經而有港元遭受衝擊脫鈎可能,近日發展金融體系更受創,港府官員笨拙手法,一一表現無遺

話時話,98年三英戰大鱷,氣吞天下的當奴,臨退休幾乎過唔到世,肥龍當然亦一身蟻,唯獨任一蕉繼續風騷人間。查實,任一蕉都有鋪癮買Penthouse的,近的唔使講,真金白銀買落IFC頂樓的金融雲端,幫外匯基金增值唔少,跑馬地蔚雲閣頂層複式單嘢,唔知又有幾多人記得?

關連文章:
1. 老美二五仔(上)(下)
2. 抽水兩條拎(上)(下)
3. 脫鈎任尻噏

伸延閱讀:
1. 羅亞:《香港絕密檔密》第121-123頁
2. 羅亞: 《香港絕密檔密》第89-90頁
3. 壹周刊:任志剛的不尋常交易
4. 星島日報:任總自爆20年買樓詳情
5. 林本利:新地優質品牌的背後

同場加映:


同場再加映:

2013年8月29日星期四

老美二五仔(上)



今期,如題,開二五仔。

所謂二五仔,查實睇吓閣下企邊面,有美國人選擇同老美作對,亦有唔少香港人成身老美味。代史上跣老美最大劑的二五仔(Whistleblowers),包括啱啱被判35碌的大兵曼寧 (Bradley Manning,見左圖),特別要提吓呢位「哥」仔,因為順叔真心覺得佢做咗一件大好事。

曼寧當年派駐伊拉克負責情報分析工作,因利成便,爆入老美機密資料庫,存取大量資料,後來仲泄埋俾維基解密(Wikileaks)。經曼寧爆出嚟的猛料,包括老美在伊拉克及阿富汗的近50萬份軍事報告,有聲有片(例如轟炸阿富汗Granai時冧咗百九幾個平民的大屠殺),仲有超過25萬份老美外交電文。結果,曼寧被老友黑客篤背脊,被老美周咗,上星期被判35碌,廿六歲人,慘。

到今時今日,好多人寧願信維基百科,都唔相信維基解密,無他的,相信唔少人跟本冇親眼睇過維基解密內容(或者唔識用),同埋唔知呢個爆料網站開邊辨,凡係有人提及,往往會條件反射式的大腦自動閉塞。

維基解密係咪可信,查實有兩個重要佐證,第一,被爆大鑊之人,由老美自己到香港的政商大腕,從來冇人夠膽話純熟流料;第二,睇睇維基解密創辦人阿桑奇(Julian Assange)而家幾折墮。

如果袋裡面冇番幾粒核彈(例如普京、金正恩),公開同老美作對,通當常冇乜好收場(例如薩達姆、查韋斯),維基解密大爆曼寧提供的機密資料之後,老美唔單止煮死曼寧,仲要徹底收阿桑奇皮。如果阿桑奇只係撒播吓無傷大雅的惡搞流言,又點會因為扑嘢變成「性罪行」成為國際通緝犯咁大劑?

同另一位老美二五仔斯諾登(Edward Snowden)相比,曼寧真心膠味更重,最新動向係要求「變性」,以「女人」身份服刑,仲叫傳媒稱呼佢做「Chelsea Elizabeth Manning」(見右圖)添。

咁多年嚟,唔同人向維基解密爆料,可能有唔同政治目的,亦有唔同手法,好似斯諾登咁,明顯就係好有部署,爆極都仲有嘢爆(可能有曼寧前科,仲好識保護自己)。曼寧就好唔同,幾十萬份文件,一次過隊晒俾維基解密,大家可以想像,50萬份軍事報告,加埋25萬條外交電文(來自全球各國),曼寧冇可能全部睇晒、消化完再選擇性爆料,換句話講,有關資料更加可信,動機亦更純正(曼寧自稱睇唔過眼老美在伊拉克所作所為),順叔話真心佩服曼寧,就係咁解,就算唔俾諾貝爾和平獎,乜嘢新聞自由大獎,都應該頒返幾個俾佢。

維基解密上251,287條老米外交電文,最初並唔公開,以TORRENT形式流傳,仲要有PASSWORD先睇到,當時維基解密同部份英美傳媒合作,確保電文提及大口仔二五仔身份獲保密或人身安全之後,先會在公眾傳媒公開,具體情況順叔都唔係好掌握到,聽講後來PASSWORD被GUARDIAN爆大咗,阿桑奇又被老美趕得太絕,結果在2011年9月初,將廿幾萬條電文,一次過全部公開,冇遮冇掩。

掀開舊報紙,可以發現,2011年9月開始,香港傳媒開始大量引述美國駐香港領事館的電文,爆吓呢樣爆吓嗰樣,冇錯,所有相關資料,就在曼寧彈俾維基解密的25萬條外交電文當中,換句話講,香港人之所以得知有乜二五仔同老美有乜關係,都係多得曼寧。

曼寧家陣被判35碌,斷估唔需要坐足,但十年八載都唔會走雞,出到嚟已經係一個中坑,為咗表示對曼寧的支持及同情,唯一可以做的,就係唔好浪費佢一番苦心,將老美電文裡面,有關香港的資料,抽幾份歷久常新,但又冇乜人講過的細節,分享一吓。

由於電文內容,幾乎全部最係閂埋門傾偈,可以發現,唔少香港政商人事,在老美前鏡頭後,同平時的表現談吐有好大分別。邊啲人好鍾意行入老美領事館阿吱阿咗,在乜嘢場合以乜嘢形式同邊個美國官員放料,好多嘢可以睇。除咗記錄邊個講咗乜嘢,電文對放料人士講嘢時的態度,亦有相當詳盡的描述,甚至評價,查實更加精彩。有心機細心睇吓,對了解香港的政經互動,肯定有用過睇報紙千百倍,退一萬步,望吓有關埃及、敍利亞的電文,亦肯定好過睇經濟學人,可能更加明白,點解茉莉花之後,埃及敍利亞點解會咁仆街,老美又做咗乜嘢好事正義事。

言歸正傳,維基解密披露涉及香港的電文,大約950份,絕大部分在2005年至2008年發出,即係美國駐香港總領事郭明瀚(James Cunningham)、2008 年至2009 年的總領事唐若文(Joseph Donovan Jr.)期間的香港情治報告。

如果邊位有興趣自己睇,可以Click入去下面呢條Link:
Secret US Embassy Cables: Browse by Consulate Hong Kong

另一個使用方法,就係用文字做關鍵詞搜索,可以Click入去下面呢條Link:
Secret US Embassy Cables: Full-text search everything

舉個例,如果想知道,「CY LAI」係咪老美二五仔,可以用「JIMMY LAI」做關鍵詞,摷返生果肥西在花園道26號留低咗幾多腳毛;腸實阿誠伯有冇做過二五仔,就可以用「LI KA-SHING」做關鍵詞,搜索一吓(記住用開關引號刮住佢,例如" JIMMY LAI "、"LI KA-SHING"咁)。

下回再續。

關連文章:
1. 老美二五仔(上)(下)


同場加映:
I am Bradley Manning


2013年7月25日星期四

變態超人(下)

(原圖: 誠伯基金會

上回講到,長實(0001)阿誠伯要將含咗幾十年的「雞肋」百佳「舌累」返出嚟,本來最有胃口即瀬的,就係華潤樓下間大士多華創(0291),不過呢間帶住老毛大號(毛公「潤」之)的「黨企」,最近一身屎,誠伯呢個時候拎間PK出嚟,叫賓架四圍撲買家,唔買都嚟睇吓,時機上,似乎唔係咁想同華潤做生意,爆個好次泰國正大的馬六甲僑資媽沙出嚟接貨,未必冇可能。

誠伯一話賣PK,Xianggang即刻起哄,講得最多,又係嗰幾飛,乜嘢撤資、仇富鬥地主影響投資環境咁。誠伯「撤資」呢個話題,大大話話講咗二三十年,有乜冬瓜豆腐,又拎出嚟揚兩吓,由20世紀「撤」到21世紀,撒嚟撒去都仲撒緊,煩唔煩膠嘅啫。

回帶到1986年,當日誠伯在香港的資產,佔成個集團超過9成,和黃(0013)食埋港燈(0006)之後各間上市同時已經佔香港股市的15%,誠伯開始部署國際化,主要殺去加拿大,佢接受當地Maclean's雜誌訪問時,已經話唔可以再在香港繼續「放題」,Husky就係當年買落,仲有唔少其他地產項目,包括令太子柒具「名震溫哥華」的「Regatta Court」(呢單嘢有機會再講)。

去到90年代初,誠伯撤定唔能撤,又成為熱門話題,當日誠伯同政府搞到好薑,導火線之一,哈,又係咁啱,又係同香港的電視市場有關,當日九倉(0004)伯爺仲未大去,但接近油盡燈枯,九倉想搞有線電視,誠伯就有件衛星電視(同北京中信扯晒天地線),不過港英政府卡能住咗誠伯,唔俾衛視放廣東話,單嘢撐到好行,誠伯在91年的華東水災籌款,公開講到如果政府唔俾衛視播廣東話,佢旗下公司不排除採取「激烈行動」,仲話希望政府唔好迫佢做一啲「唔想做的事情」咁。(最後嚿豬頭骨由英國佬搵咗梅鐸鐸叔高價收購,算唔算揞口費?)

討論誠伯撤定唔撤,查實根本冇意思。首先,屌,晨久早撒咗啦,到今時今日,Xianggang資產佔腸實禾米唔夠20%;第二,個個都可以撤,就係誠伯唔撤得,點解咁講,過去二、三十年,誠伯唔少大刁,例如引到P&G上釣拍住入大陸,都係因為誠伯同北京有偈傾,如果誠伯做出一啲動作,俾人覺得佢在北京已經斷晒線,即係話枱面上冇咗最重要的談判籌碼。

所以,估乳有暈,廢話,切條撚咩。

誠伯的發達之道,根據佢自己所講,就係「唔會賺到盡」,做生意留一線,留啲剩菜殘碴俾對家食吓,咁其他人先會信得過佢,生意日後自己找上門(有興趣,可以睇睇呢個誠伯訪問視頻)。

將呢個「唔會賺到盡」的做刁技巧,反轉嚟睇的話,其實可以發現,誠伯發達之道,就係在某一領域,建立類壟斷的優勢,大啖大啖狂啅一輪快錢,到形勢改變,或者自己策略調整的時候,將剩餘價值「舌累」返出嚟,做好人,換取更大利益,又大啖大啖的狂啅,呢本生意經,萬變不離其宗。

最經典例子:九倉。誠伯係第一個睇中九倉的華資孖沙,仲平價打咗口釘,消息爆出街之後,九倉股價炒起咗,船王包SIR又話想「棄舟奔陸」,結果誠哥放低到口的肥肉,聽滙豐(0005)大班沈弼話,將收購九倉的機會「讓」俾包蛇(等佢同怡和硬撼),呢單嘢誠伯除咗買賣九倉股權賺大錢,仲可以交換之後滙豐半賣半送(兼低息借錢)和黃控股權俾長實。

再遠少少,誠伯痴膠花起家,到1973年時候,已經疊埋心水搞地產,哈,唔知點解,又閹埋好多膠料,當年石油危機爆發塑膠原料價格爆漲,好多膠花廠嗌救命,誠伯聯合同業直接入口原料撓起中間人,同時將長江膠花廠的存貨半價分配俾痴膠花商會的同行,結果個個讚誠伯信得過靠得住。誠伯放棄咗自己的夕陽本業,換返來的,查實係地皮,仲要係免費,腸實早期唔少地皮,就係同廠佬合作發展,最後有幾多廠佬簽咗約但等唔切項目收成已經執咗粒或死能咗,咁就唔知道了。

從呢個角度出發,腸實PK呢盤生意,價值及經營環境都開始轉變,零息年代令PK的現金流冇乜大著數,競爭法及商品說明條例等政策轉變又令超市生意難做,橫掂入唔能到大陸,誠伯而家趁PK仲有剩餘價值的時候,拎出街賣,除咗可以套現大嚿現金(傳緊叫價三、四十倍PE… 喎),更應該睇吓誠伯想同邊個交換禮物、想交換啲乜嘢返來。

同樣道理,將成個局拉大拉長嚟睇,李氏力場壟斷香港幾十年,啅足幾十年大錢,家陣形勢改變,李啅人都可以化身碼頭風雲主角馬龍白蘭道,假如而家嘔返出嚟,誠伯又想換啲乜嘢返來,同邊個換,同老共換,定係同以前殖民宗主事頭婆換?從近年腸實禾米的部署,查實已經睇到一定脈絡,如果重點係搵大BUTT裂顛英女皇,幾乎可以斷定,腸實禾米未來發展,俾盡佢,就好似留在Xianggang的太古(0019)咁,專打「九0一」穩守突擊,只會守,難進攻,發展爆發力有限。

誠伯早月去咗汕頭,主持汕大新醫學院大樓啟動儀式,獲學生贈送超人首辦模型(見上面改圖的原圖),出席畢業禮時,自傷自憐憂國憂港,話「華人首富」呢個封號,令佢百般滋味咁話。(誠伯演辭辭節錄

死鬼羅德承好鐘意講一個關於恒地(0012)四叔的笑話。話說好多人問四叔,點先可以發達,四叔就話,好簡單,日日起身就諗點發大達,最終就會發,再問:「咁咪好易痴尻線?」四叔好坦白咁講:「梗係啦,你睇吓我就知道。」(呢個故仔可以在《羅德丞政海浮沉錄》搵到)

即係咁講,一個人要發達,仲要係大發特發嗰種,先決條件,對「錢」的概念,一定要同世界上99.99999%的人唔同,先可以晉身0.00001巴仙的大富大貴,同時要對錢,有一種近乎怪癖、變態的追求及迷戀,就好似HK變態超人咁,一見到底褲,就難以自己,即刻想老笠。

好多大富人家,都有呢種特質,好似誠伯二仔阿碌柒咁,當年食咗數碼港地皮,已經係全港所有地產大孖沙恨之忽得的肥肉,點知只係一場更大龍鳳的前戲,蛇吞象食咗香港電訊變成今的的電盈(0008),當年的「八號仔」,已經變成「老八」,香港千千萬萬小股民輸到底褲都甩咗。

又好似誠伯阿大仔柒佢咁,起樓認真取之有道,多年嚟唔少杰出住宅單位代表作,某某「平台層」單位,個睡房幾乎隊出碼路(見「僭建演義」);某某「窗台房」,本來無一物,買樓何事送窗台(見「見買褲送褲袋」);仲有某某「連天台單位」…… 又係賺盡樓市買家每一條底褲,呢啲唔叫「賺到盡」,唔通叫富貴浮雲?(仲未計冇你咁長命搞寶藥啅廿個億單嘢...)

誠伯仲有個好動人的故事,話說有日佢跌咗個兩蚊落車底,佢想執返,有個食蕉見到,幫佢手執咗,誠伯收返兩蚊落袋,再打賞一嚿水貼士,誠伯講呢個故事(故事視頻),正本係想講「用之有道」,又係反轉嚟睇,「跌咗兩蚊都要執返」,先真正反映超級巨富對錢的態度。

做得大孖沙,知心冇幾人(梅鐸老婆都阿Wendy釘姐姐都被人話係老共間諜),外人睇誠伯,更加只能透過傳媒,斷估外界對佢有唔少誤解,誠伯覺得委屈,可以理解,不過「賺到盡」呢家嘢,就冇可能係老屈囉。

誠伯條女阿海豚姐姐,2002年曾經無端端搵咗信報及信報月刋做訪問(應該想買信報好耐),問足六粒鐘,查實絕大部分係廢話口水,例如叫人睇下本冷門到佢老妹都唔認得的《Einstein’s Wife》咁,當日啱啱Tom佬(2383)收購ATV被山雞電視(2008)個流腸樂截咗糊,條街有人傳緊誠伯要將海豚姐姐雪入冷宮,叫人去了解吓愛恩思坦個老婆的委屈,唉,旋妹真係用心良苦,斷估呢個訪問的主要目的觀眾,唔會係一般財經茄哩啡囉。

訪問裡面,最精彩爆料,有兩條,一條係東方廣場單嘢(即係今日匯賢信佢就托(87001)),1995年陳希同落馬收皮之後,新任北京市委書記尉健行,特登邊請誠伯上京,當面宣讀一封信,澄清誠伯及陳希同冇任何特殊關係咁話。(海豚姐姐細說東方廣場

另一條料,八卦少少,周旋於董建華及誠伯兩大政商巨擘的海豚姐姐,講到董伯伯及誠伯的性格,話兩人同時具備「內向及外向」的性格,但誠伯激烈好多,「李生的性格是兩邊都極端的,所以他內在的張力很大。」

嗱,海豚姐姐講誠伯性格,信得過喇卦,咩叫做「兩邊都極端」、「內在的張力很大」呢,唔通講緊誠伯生意之道,總想留一線餘地,但係有時見到跌咗兩蚊、路邊有條底褲,又唔能忍住要執返啅埋?定係講緊,誠伯對錢的執著,本來可以啅更多,但已經好忍手?

由1979年時代雜誌的Superman,到今日皇后大道中的大頭魔鬼改圖,誠伯形象的轉變,唔會吓吓全香港人老屈你的。今時今日的香港,何嘗唔係「內在的張力很大」,各種矛盾打晒死結,真係超人先可以解得甩,作為香港主權過渡世紀大刁大茶飯的最大得益者,誠伯望住今時今日的香港,如果以「受害者」的角色出現,咪玩啦,不如入場睇《HK變態超人》好過。

誠哥、超人,你喺邊度?

關連文章:
1. 變態超人(上)(中)(下)

伸延閱讀:
1. 評台:如果變態超人在現實世界,他的敵人是… ?
2. 有道德搶劫--味皇:(惡搞)超油切
3. 投資一周:和黃差過新地


同場加映:

變態超人主題曲
阿伯第一的秘密,英國阿SIR腸實,
變態朋友,底褲絲襪,一見就老笠。
肚滿腸塞,點著襪,將港人重罰,
信佢朋友,往往輸凸,底褲全部輸甩。
送你柒具,起樓有道,隊尻出馬路;
喪搭擇雞,閪私有,啅夠扮逃走。
仲未夠!仲未夠!
東一刮,西一刮;
東一擸,西一擸,一蚊都擸...
飽上耳鼻喉,食夠唔撚走。
(「擇雞」係潮州話,私有講緊電盈,咪諗錯隔離)



2013年7月22日星期一

變態超人(中)


上回講到,日本英雄漫畫改編的真人電影《HK變態超人》今個星期公映,撞啱長實(0001)阿誠伯有單PK刁,財經茄哩啡唔能忍住要抽吓水寫吓財經影評。

超級市場呢門生意,新對手隨時由石頭爆出,冇人冇物,政治肌肉唔夠大嚿(Walmart自2008年起單單為咗殺入印度已經花咗2,500萬美金政治游說費),好難長期保持優勢(葉玉卿老公在加州就有間「Hong Kong Supermarket」連銷店,威過,近年好似唔係咁掂,就係例子)。

香港超市,可算異數中的異數。

作為超齡宅男,財經茄哩啡讀得書少出國唔多,唔知道地球上,仲有冇邊個國家或者地方,超級市場會好似香港咁集中,PK同惠康,各自半匡天下,呢個雙頭壟斷,由英治殖民時期,已經開始形成,1997年之後,行業集中度更高。

超市的出現,首先趕絕大量糧油雜貨舖,例如1973年惠康推出袋裝米之後,香港人就開始改變糴米的習慣,零售米舖執粒,跟手趕絕埋小型超市。廿幾年前,香港仲有唔少地區性的超市,例如柴灣超級市場、油麻地超級市場咁,仲有過一間KK超級市場(後來被廣南收購,2001年粵海系爆煲之後執粒),根據消委會2003年一份有關超市競爭研究報告,1996年至2001年間,小型超級市場數目,大幅下降41%(就連過江龍好似廣南、仲有家樂福,都頂唔順PK惠康雙劍合璧)。

控制咗最重要的零售網絡,超市自然惡過供貨商,入貨價平過人(又可以拖數),零售價又貴過人,仲成日掛住「全港至平至抵」、「大減價」等宣傳搵七人笨實,類似現象消委會多年來篤爆過無數次,於是一件「睇見就眼冤」的「雞肋」,變成幫誠伯「日日賺」、「賺到盡」的霸權超市。

真正掌握「唔會賺到盡」之術,查實係香港「大BUTT裂顛」殖民時期的英國佬。當年滙控(0005)恒生(0011)、置地(牛奶公司)食美心,都只係食一半留一半,啅咗控股權,留返一半利益以及經營權俾華資,等佢哋幫英國佬搵銀(順叔到今日都認定恒生擠提一役係「大BUTT裂顛」陰謀),容許誠伯在超市、電力等市場,同傳統英資對分利益,異曲同工。

要真正了解李氏力場,就要明白呢套將英國利益,同華資財團捆綁埋一齊的金權政治。

1997年香港主權移交,係中英之間的一場世紀大刁,誠伯作為香港首席孖沙,誠伯唔會只係代表華資利益,同時亦要代表英國佬的利益,中英雙方都默許認可,先可以由97前發到97後,好似超市及電力市場,雙頭壟斷在英治時期形成,97後繼續發揚光大,PK發即係惠康發,港燈(0006)發即係中電(0002)發,任何影響到PK惠康競爭力的政策威脅,例如競爭法、商品說明條例咁,唔知點解,總係諸多阻滯,誠伯發功即係幫嘉道理拖,變相做咗半個英資利益代言人。

叉遠少少講,當年滙控同怡和等英資大班對著幹,支持誠伯及九倉(0004)伯爺包蛇,都係做緊同一個捆綁動作,俾你做英國佬,明知97大限要撤退,英資遲早要含撚,最高招就係養大一兩件華資孖沙,在某程度上會代表吓英國利益。舉個例,1997年7月1日香港財政儲備(連埋土地基金), 3,500億港紙,英國佬唔可以搬返去「大BUTT裂顛」,有乜好得過養肥一兩個相對信得過的華資孖沙,將在香港賺返來的錢,搬去英國投資。大家可以計吓條數,誠伯近十年在英國歐洲的投資,少唔少得過3,500個億?

言歸正傳,差啲唔記得今期講PK。

如果香港的超市霸權,只因為誠伯商業眼光高超,同政治肌肉冇關的話,PK應該在中國好能巴閉啦,PK早在1994年成為第一家登陸上海灘的外資超市,門店一度有廿幾間,但擴張野心被大陸的資本限制卡能住咗,到2000年執剩一間咁大把,2006年學Walmart搞Superstore唔掂,之後再扮上菜搞高檔超市Taste又唔能掂,舊年全線PK收皮,如果真係咁能英明神武,又點會三進三出上海灘,搞嚟搞去得個吉。

好喇,而家香港政府終於的起心肝搞競爭法,啱啱執行的的商品說明條例,又搞到馬經講「全港最準」都唔得,又有想加入共產黨不得其門的阿信屋(0759,疑似)呢類新形勢新對手,誠伯終於同大家講,唔想「日日賺」,可能將件含咗幾十年的「雞肋」舌累返出嚟,PK可能賣盤。

牛頭角順嫂都知道,如果PK賣盤,最有興趣接手,又最可以因為本身業務發掘百佳潛力的,就係華潤樓下隻零售綜企華創(0291)

1949年共產黨上台之前,成立過好多公司,呢類在地下陣線的商業機構,已經全部收皮,碩果僅存的只有一間華潤集團,可以話係最紅的一間「黨企」,可以想像,唔少老共派嚟香港的的情治人員,都係在華潤掛單,多年來擔任唔少秘密任務,包括協助誠伯的老友老鄉莊世平成立南洋商業銀行(解釋咗呢間銀號點解唔合併入中銀集團),仲有60年代大躍進冇得食年代都要供應香港的「三趟快車」。

誠伯同華潤合作,更加歷史悠久,華潤第一個地產項目,就係同誠伯合作,在1979年,買起成個天水圍(冇錯,係成個天水圍5,200萬平方呎土地),項目涉及投資百億計,更步定橫跨97大限,土地問題成為英國搵中國傾香港主權問題的缺口,天水圍亦成為香港前途信心的代名詞。

誠伯同華潤咁有淵源,如果真係要賣PK,姣婆撞正姣仔,仲要係熟人,應該一拍即合,即刁至係,不過上個星期,外電傳出PK可能賣盤的時機,有好似唔係咁對路。

上星期有個新華社樓下報紙的記者,實名「踼爆」華潤電力 (0836)早幾年百億貴價買爛煤,呢單嘢,查實已經傳咗年幾兩年,今年兩會期間,有條友已經「實名舉報」過,仲在網上四圍貼一封俾華潤老大宋林的公開信,乜料都爆晒,不過好快被河蟹,封公開信順叔留咗底,有興趣可以跟住呢條Link(123億天價併購案,華潤欠股民及國民一個交代),溫故知新,新華社記者只係執人口水尾,最重要訊號,只係間接證實咗要隊呢間「黨企」的力量,就係來自黨內。

華潤雖則話有幾個月時間做危機處理,不過今次涉及國際投資者利益,一身蟻,華電係香港藍籌,宋林係港府經濟發展委員會成員,北京好信得過的梁愛詩仲要係花樽董事,「黎CY」呢類輿情特攻,又點會放過呢個機會,梗係大唱特唱,呢個時候傳出PK要賣盤,好似有陣想整鬼華潤的味道(當然大前提係華創真係想買PK)。

當然啦,呢個世界,老共要做嘢,未必吓吓要搵黨企國企,好多人可以幫手,例如早排滙控賣平保(2318)兩成H股的辣手煎堆,就爆咗個泰國正大出嚟,唔知去邊度撲咁多銀,百億美金接咗滙控手平保之後,早前個月仲有六十幾億美金食埋泰國零售批發商萬客隆(Siam Makro);那些香港足球班霸精工老闆黃創山家族,近排好似咸魚翻生,間Bangkok Skytrain好似越做越有。

呢堆馬六甲華僑幾多斤兩,生意做得大同老共有冇關係,唔知,不過近年香港超市既然大把泰國貨,突然殺個正大卜蜂出嚟,接咗誠伯間PK,唔係冇可能的,老共在許家屯年代的香港鬥地主方針,叫做「拖住英資、穩定華資、爭取外資、團結僑資、台資,壯大中資」,家陣在香港做嘢,中資太敏感,英資太含撚,華資又未必穩,連兩間電視台都搵咗台資,PK賣盤爆間僑資接貨,唔會太出奇。(呢個觀點,部分來自REALFORUM的網友)

下回再續。

關連文章:
1. 變態超人(上)(中)(下)

伸延閱讀:
1. 消委會: 食品及家居日用品零售市場的競爭研究報告(2003年)
2. 中國經營報: 李嘉誠麾下超市三度折戟上海灘
3. 華潤雜誌: 香港天水圍這片土地,這片領土
4. 中華人民共和國公民李建軍: 給華潤集團董事長宋林先生的公開信
5. WSJ Blog: Investment bankers seek shoppers to PK
6. 朱泙漫屠龍記: 2014高達渣古的終極決戰


同場加映:
變態女超人

2013年7月21日星期日

變態超人(上)


今期開超人,のPK。

先嚟一個同場加映,廿年前出版的日本漫畫《變態超人》搬上大銀幕,笠上女人底褲變超人、一身肌肉著絲襪的反傳統變態英雄,今個星期香港公映,正。

原著日文漢語,叫做《究極!! 變態仮面》,有唔少中文譯名包括《變態假面》及《瘋狂假面》咁;日文英語“Hentai Kamen",簡寫就係“HK",所以有啲電影海報,譯做《HK變態超人》,呢個時勢在香港公映,實在究極應景。

本來唔想抽水,不過撞正百佳可能賣盤,財經茄哩啡唔能忍住要寫吓影評。冇錯,香港人究極熟悉的超人,當然長實(0001)和黃(0013)的主席阿誠伯。

誠伯「超人」呢個朵點嚟,斷估出現於1979年,滙豐(0005)半賣半送(兼低息借錢)和黃控股權俾長實蛇吞象一役之後。當年香港人,包括華資商家佬,日久日受咗英國人氣,誠伯呢類可以同英資大班拗手瓜的中國人,好自然被視為華人之光,大受吹捧,當中吹得最大力的,就係半個潮汕同鄉的信報林伯,「曹仁超」的筆名,掉轉頭就係「超人曹」。仁超捧超人,林伯吹誠伯,超人大號不脛而走(亦有人話,超人盛名,來自當年某報紙佬的對聯「高人高手高招,超人超智超福」,木宰羊…),去到九十年代,連鬼佬傳媒都知道超人大名,誠伯大頭相加「SUPERMAN」的標題,不時成為封面,幾威。

廿年河西,當年港人個個景仰的超人,家陣幾乎變咗頭號公敵,早排碼頭風雲鬥地主,超人超大頭被妖魔化放在皇后大道中,呢種場面,七、八十年代難以想像。誠伯慣咗被神化多年,臨老被插,難免究極谷氣,自己明明「愛國愛港」,被人狂踩「李氏力場」;明明「取之有道」,又被人唱「地產霸權」;明明做生意必定「留有一手」,香港人又話佢吓吓「賺到盡」。

超人眼界所及、誠伯口中所言,同在香港的普通地球人所見所能感受,好究極唔同囉,落差好究極大囉。唔通一個人要大發特發,對搵錢就要有近乎怪癖的追求,好似變態超人咁,一聞到女人條底褲味,就會失去自控能力笠上頭,欲罷不能?

好似PK咁,總有一間喺左近,幾乎香港地球人個個都要幫襯,不過誠伯就成日為PK喊冤,話PK毛利率其實好削,山大斬埋唔夠2%孖展咁話,誠伯頭號跟班阿CANNING,更加講過PK屬於雞肋業務,「睇到都眼冤」添。

在香港做超市,冇錯,毛利率未必好高,增長空間可能有限,收銀連送貨養住一萬幾千人,好容易俾工會「做世界」,拔,挑,如果真係咁食之冇味,丟之又點會可惜,晨撚早賣尻咗啦,閹住隻雞翼尖托咩。

一盤生意,視乎老闆有乜其他嘢搞,可以帶嚟唔同的附加價值。

好似誠伯做咁,1986年衝出世界的第一刁,有冇人記得,其實係擁有Financial Times的Pearson集團5%股權,代價大約係8千萬美金,當年唔少人對誠伯呢單刁搲晒雀,唔知佢開邊辨,諗返轉頭,呢步棋其中一個考慮,可能係等FT班友落筆寫誠伯時,可以小心啲或者鬆手啲,如果誠伯想起邊個外國商家佬個底,摷FT個DATABASE都容易啲啦(當年資訊冇咁電子化);同樣道理,誠伯同期進軍美國第一刁,係細仔理柒李介紹的一堆JUNK BONDS,除咗買平貨,當然亦因為掌握到大量信貸資料同佢老美金融的陰私,為殺入美國試水。

做實業一樣,例如做碼頭,可以掌握到全球經濟起伏最重要的溫度計,甚至係國家軍事機密;做超級市場,冇咁巴閉,不過可以知道消費市場最新變化,又可以同供應商打關係,美國P& G當年搵誠伯做盲公竹,合營寶潔中國,誠伯幾乎連豉油都唔使出,已經拎咗廿個巴仙(2005年賣肉沽出套現20個億,美金),除咗話誠伯在內地的人脈,斷估P& G就係被誠伯的PK及屈臣氏等零售網絡吸引,以為可以在大陸複製PK在香港的成功經驗。

仲有,從供應商角度出發,如果大陸各大超市的貨架,最究極搶眼位置放晒出前一丁或卡樂B,康師傳及旺仔產品塞埋一角,康師傳(0322)旺旺(0151)有冇咁容易做得成藍籌?有時甚至可以透過向供貨商施壓,隊瓜競爭對手,香港的超市霸權有冇咁做,唔知,不過可以問吓當年搞蘋果速銷幾乎破產的「黎CY」囉。

超級市場呢盤生意,去到細微地方,應該仲有唔少竅妙之處,財經茄哩啡只係識條毛,不過可以好肯定咁講,視乎老闆係邊個、可以做啲乜,絕對唔會係「雞肋」囉,PK「睇見就眼冤」,好可能只係有啲潛力,腸實及誠伯睇到而做唔到而已,例如在大陸複制香港的半壟斷地位,講緊PK在華南做得唔錯,但華東PK,舊年上海已經執晒粒。

下回再續。

關連文章:
1. 變態超人(上)(中)(下)


同場加映:

HK變態超人

舊年腸實大少鉅鉅語出驚人,創買樓送窗台之舉,財經茄哩啡寫過兩篇買褲送褲袋,當日都有用到變態超人的造型改圖,不過年代久遠,冇乜人知道講乜,有興趣,買飛入場...

2013年6月10日星期一

李氏樓刁(下)



開咗個頭,已經過咗三個月,係時候埋單,HEA埋佢。

兩單李氏樓刁,仲未大結局,勢估唔到,順叔幅改圖會批中,長實(0001)誠伯件雍澄軒,擺出一副摟屌姿態,結果「APEX」真係變咗「appendix」,分拆「闌尾級」酒店出售的偉大創舉,已經爛咗尾;嗰邊恒地(0012)四叔要捐出「環尾」級農地,幫後生仔上車,不過俾你做政府地政,一嚿「環尾」豪過嚟,冇路冇配套,要又唔係唔要又唔係,拖得就拖,大東北計劃當然仲係冇突破。

有心人可以計吓數,誠伯唔可以分析酒店出售,對腸實財務有乜影響;四叔私人向恒地股東購回農地,價錢係咪合理、對恒地新界農地的價值有乜影響咁。不過呢啲數字遊戲,留返俾分析員做,財經茄哩啡最有興趣的是,兩單李氏樓刁的結果,對兩位最有錢的「李」日後在香港的運程,有乜啟示。

之前兩篇李氏樓刁重覆提及,誠伯及四叔兩單樓市大刁,好有弦外之音,同香港的政治變奏,絲絲入扣。

四叔善心大發,放細魚鈎大魚,同一招式已經出過好多次,最經典例子,包括在1995年,在天津發展所謂「微利房」,變相捐錢幫天津搞基層房屋福利,一年後恒基中國就上市,今次捐農地,唔使問阿桂,舊曲重彈,為咗早日推動大東北的發展,而呢個位處中港之間新市鎮的,正正係融合中港社會經濟的重要規劃項目之一。

掉轉頭,誠伯分拆酒店出售,從供應角度出發,最重要弦外之音,查實就係香港市區唔少土地,用咗嚟起酒店,如果香港政府願意拆牆鬆綁,容許分拆酒店出售,即時會有大量市區住宅單位應市,不過代價就係,要放慢內地遊客自由行的步伐,換句話講,同四叔推動大東北計劃、令香港社會經濟向大陸靠攏的方向,完全相反。

如果誠伯代表「兩制」,四叔代表「一國」,兩位最有錢的「李」,大唱對頭戲,成件事會變得好有意思。

先講少少歷史。

誠伯同埋四叔,聽講以前係老友底,廿幾年前的富豪八掛新聞,仲講到兩條友係高而富波友,同埋鋤大弟鐵腳,呢啲傳言唔知有幾真,不過可以肯定誠伯及四叔,在香港某時空曾經有重大共同利益及合作空間,前身係嘉諾撒聖心書院中學部(而家搬咗去置富)的西半山嘉兆臺,就係合腸實恒地兩大地產商之力的杰作,樓盤合都結合咗誠伯及四叔兩大孖沙大名,八十年代尾,誠伯帶隊衝出世界,去咗加拿大重建溫哥華世博會舊址項目,四叔同埋新世界(0017)彤叔,都係中標發展商太平協和的主要股東。

腸實及恒地,近廿年已經冇話有乜合作項目(查實誠伯已經好少同其他孖沙合作,西九同新地合作的「活力星」係罕有例外),早幾年四叔「亞洲股神」上身,日久日公開講股經,誠伯忍唔住向傳媒暗串四叔,可見兩位孖沙近年可能已經冇乜計傾,甚至臉阻阻。

可能2007年炒股太容易賺錢,四叔可能開心過籠,「亞洲股神」一度上身,除此之外,以佢超級富豪身分,算係非常低調,不慍不火,對人和和氣氣,甚至帶少少傻戇,扮豬食老虎,好少話同人公開嗌交,四叔同誠伯,為咗商業利益公開拗手瓜,只有兩鑊,包括1993年,四叔靠人情牌,擊敗誠伯及中信泰富(0267)紅太子榮智健,成功收購美麗華酒店(0071),連首席香港大孖沙及紅色資本第一紅人都可以砌低,四叔行情看漲,1995年曾經一度超越誠伯,成為FORBES有銀榜的華人首富。如果話美麗華酒店一役,誠伯及四叔都仲係良性競爭,1995年腸實及恒地,在馬鞍山兩大樓盤對撼,同時搶客散貨,就擺到明互砌,當年壹仔的壹仔封面,大字標題二李「決戰馬鞍山」。

商場上明刀明槍,已經唔係咁多,政治暗戰又有冇?

唔係冇,不過冇乜痕跡,又或者好多人都唔記得。

2003年港交所更改權益披露要求,持股5%的股東要公開身分,公眾赫然見到誠伯持有東方海外(0316)近10%股權,披露咗誠伯早在十幾廿年前,已經押注在董建華,不過當年的董伯伯,未成為「江握手」之前,只係一隻冇乜人留意的黑馬,八十年代尾九十年代初,問鼎首任特首大熱門人,叫做羅德丞(何東外孫),本來係港英陣營重量級人物,突然倒戈幫北京做嘢。

四叔向來俾人的感覺,不問政治,但當年羅德丞係恒地副主席(聽講四叔係羅德成老母契仔,即係大羅契細佬),大羅住四叔樓下(麥當奴道惠苑),大羅個「新香港聯盟」(當年梁振英係中堅份子之一)的麥當奴道會址,更加係四叔名下一口釘,友情價租俾大羅使用,雖則話四叔唔多出現「新香港聯盟」的活動,不過大家可以想像下,如果香港首任行政長官,唔係好好先生的董伯伯,而係行事霸道、深諳英國佬管治秘術兼情治陰謀的羅德丞,回歸後的香港管治,會唔會較為順暢,回歸之後,「李氏力場」又會唔會咁霸道?

好喇,歷史恩怨講完,到咗今時今日,除咗今日兩單李氏樓刁,仲有邊個戲棚,見到四叔及誠伯,喺度唱緊對台戲?答案係越搞越柒的佔領中環。

面對敏感的政治話題,四叔當然彩你都傻,唔會公開阿吱阿咗,不過好似當日同大羅的關係咁,唔高調出聲,唔代表冇落注。

今年三月人大兩會期間,四叔大仔家杰,平時木木納納,唔好話論政,在香港絕少浦頭見記者,以政協身份去到北京開會,據傳媒報道,竟然破天荒大鬧香港後生仔,「搞對抗」、「搞唔掂就將所有責任推到政府」,更加直拆揮舞「英國旗」的人「豈有此理」,最激一句,鬥埋佔領中環的人,是「想攬住香港一齊死」,心態唔好咁話。

有冇留意,由以前的港英二奶四萬陳師奶,到誠伯跟班霍建寧,以至好似四叔大仔的富二代,在香港唔多出聲,去到天子腳下,特別生猛多口水,好鍾意在北京酒店見記者?斷估班友的目標聽眾,唔係普通香港蟻民,而係北大人,北大人有心要聽的話,亦冇需要透過香港傳媒的二手料,而係直接現場原汁原味收音(偷聽),所以四叔大仔在北京的一席話,仲有四叔舊年去北京捐錢時接受香港傳媒訪問(見李氏樓刁第二集),其實已經算係交咗心。

當然啦,「一國」同「兩制」之間的拉扯抗迎,又點會只係誠伯同四叔的遊戲,九倉(0004)船王女婿吳乾淨,早日已經大大聲就佔中表咗態,近年在澳門跑到好出的銀河娛樂(0027)主席呂致和,亦都公開呼籲唔好阻人搵食,新世界純官去咗扶貧,好似個個都吼住誠伯首席大孖沙個位咁。

誠伯嗰邊,以前佢揸正牌做香港辦事人的時候,成日掛住咀邊一句,就係嫌香港事事太政治化,影響投資者信心、營商環境咁,無他的,「港人治港」的港人,由行政長官到港交所主席,個個都係自己友,李氏力場法力無邊,又有邊個想變,俾你都會大大聲講一國兩制港人治港係咪?

早幾個月腸實禾米記者會,例牌又係誠伯答問大會,有人問到誠伯,點睇佔領中環,誠伯個答案竟然係:冇好答案!呢個「冇好答案」的答案,嗱嗱嗱,去到呢啲位,財經茄哩啡唔識分析咁多,呢度借用咗佔中嗰位戴學者的說話,「首富李嘉誠日前無明言反對佔中是玄機所在,相信對方正採取觀望態度,一旦運動成勢,就有機會歸邊。」

咁係咪即係話,佔領中環呢個遊戲,等緊誠伯歸位,等住「主場」同「力場」滙流合體呢?

得閒再講。

關連文章:
1. 李氏樓刁(上)(中)(下)
2. 大話東北遊(下)

伸延閱讀:
1. 九倉吳光正: 佔中是與中央爭權
2. 恒地李家傑: 佔中如「攬住死」
3. 新世界純官: 佔中屬違法行為
4. 嘉華呂致和: 佔中礙繁榮不應支持
5. 香港倒後鏡: 末代貴族羅德丞


同場加映:

四叔:李家誠係我個仔

2013年3月5日星期二

李氏樓刁(中)



上回講到,長實(0001)誠伯及恒地(0012)四叔,最近不約而同拋出兩單樓市大刁,一個破天荒拆售「闌尾級」酒店,一個可能將新界「環尾級」農地捐獻俾納稅人。兩個最有錢的李,兩單樓刁,一個摟屌,一個賣俏,可能代表咗「一國」及「兩制」之間你推我拉的兩股重要力量。

政府同腸實就拆售酒店單嘢開晒大拖之際,日月報忽然爆單大嘢,引述「接近李兆基消息人士」報道,四叔已經在農曆新年前,向政府建議在「環頭環尾」大搞面積300平方呎、樓價約100萬的上車盤,政府即時提出反建議,叫四叔不如將農地捐出,由政府興建廉價私樓咁話,「據悉四叔對捐地建議並不抗拒」,不過「堅持要以年輕人為協助對象」。

自從天匯單嘢之後,日月報同恒地關係有幾好,眾所久知,呢單捐地獻環尾的消息,十居其九係政府爆料,恒地發言人據報證實咗消息,近日更有傳媒報道,四叔已經整好份「捐地表」,俾政府任揀添,更妙者,隔離新世界發展(0017)亦表示,會「睇四叔頭」,決定未來係咪將部分囤積多年的新界農地嘔返出嚟。

所謂好人有好報, XIANGGANG大孖沙做善事,好少死錯人的,大家睇吓舊年特首換屆之後,新世界「SOLUTION」走咗去「扶貧」就知道乜事,又例如七十年代尾中國改革開放之始,誠伯一直唔肯在大陸大舉投資,不過捐錢就從未手軟。假如未來坐館要氹你心口,作為一個古惑仔,就算肉痛都要舉起五肢支持係咪?那些年中國共產黨要全方位同香港大資本家埋堆,唔少統戰動作聯誼活動,都由「善舉」而起。

舉個例,四叔最為人津津樂道的善舉,出現在1978年。話說現時跑馬地樂活道比華利山豪宅,當年叫做「簡氏別墅」,亦係培僑中學的舊校址所在,恒地買咗地皮重新發展,同時向政府投得天后廟道地皮,幫培僑中學重建新校,地價連建築費,恒地拍心口負責70%,等如捐咗二千萬幾萬港銀,當年長實一年純利都係1.3個億,可以想像,四叔「義助」培僑中學拆遷的「善舉」,有幾大手筆。

培僑中學校長何許人也,叫做吳康民, 2012年香港特首選舉之前,總理溫家寶突然親自召見康民叔,之後康民叔就發表咗特區政府新班子的「鐵三角論」,可見康民叔在中共的地位。據康民叔自己所講,在1978年的時候,佢親自多次同四叔講數,更加多次進言,大陸在中共十一大三中全會老鄧坐正兼正式啟動改革開放路線之後,「內地與香港均有美好前景,投資地產肯定有前途」,成功打動四叔「善舉」。(不過當時的新華社香港分社統戰部部長何銘思,亦即係後來霍英東身邊的紅人,對康民叔大發雷霆,話佢成日纏住四叔,「破壞他們所做的統戰工作」)呢個比華利山的動人故事,在康民叔及四叔的口爆自傳都有記錄,可以見到,為咗完成香港回歸祖國的統一大業,當年中共統戰陣線全方位向香港大孖沙傾斜,你有你統我有我統,齊齊善舉愛心爆棚。

四叔第一次擲出「環尾」農地起上車盤的建議,查實已經係舊年5月的事,當時梁振英隊冧唐唐成功上住做特首冇耐,哈,又係咪啱,四叔又係做善事,仲飛到北京咁遠,出席自己30年前創辦的「培華基金」的一個卡啦蘇捐錢活動。八十幾歲人飛嚟飛去,你估好玩咩,四叔在北京自咗邊個就唔知道喇,不過即時罕有咁接受咗香港兩三份財經報章的專訪,更罕有地就樓市政策指手劃腳,提出可以幫助香港人置業的三招政策,當時四叔的「開價」,係政府免農地補地價,等發展商起上車盤幫年青人置業,當時冇乜人留意,去到舊年底,四叔個農地免地價方案,公開又講得具體咗,300呎一個,每個100萬,唔少人先驚覺四叔想請大家食大茶飯,好喇,到政府同誠伯為咗酒店拆骨出售單嘢打晒拖,四叔叫價好似忽然大降,由免補地價,變咗捐獻農地。

以前港英政府要在新界發展新市鎮,你估先行部隊係乜?當然唔係寮仔部,而係政治部,搵人去新界收料放水,隻眼開隻眼閉,總之班鄉紳搞得搞班父老,最緊要冇人武裝起義(可以睇返羅亞本「政治部回憶錄」),今時今日政治部解散咗,老共有冇搵人做同一件事,唔知,不過政府今日要大搞新界大東北,唔通真係怕咗班香港八十後或者環保團體咩,最重要阻力,就係要講得掂大東北的大地主四叔。

就大東北計劃,政府而家話仲未決定,由政府收地發展,定係同發展商合作發展,查實早在舊年6月(即係四叔忽然訪京善舉後冇耐),當時仲做緊發展局局長的政務司司長林鄭月娥,曾經在立法會講講,預留400億元在大東北收地,取代公私營合作的模式。(政府收回大地主手上的農地自己發展新市鎮,有個極具爭議先例,見「大話東北遊(下)」)

四叔閹住大抽農地幾十年,就係等呢一舖,又點會咁易放過你,可能佢老人家聽到400個億都呆咗:咁少?!

計條簡單的婆毑數,恒地在新界東北有510萬呎農地,即係大東北計劃(2,852萬呎)的五份一左右,政府用400個億收地,恒地只係收返80個億。

好喇,如果按照四叔最開頭建議,免補地價由地產商發展,當佢3倍地積比率,510萬呎農地可以起到1,530萬呎樓面,300呎的單位,可以起到51,000個,每個賣100萬,可以收返510億。

當然啦,婆毑數還婆毑數,發展成本、市場轉角風險、政府收地拗數金額,樣樣都係變數,但係兩個唔同發展模式,邊個著數啲,好易睇得到。

下回再續。

關連文章:
1. 李氏樓刁(上)(中)(下)
2. 大話東北遊(下)

伸延閱讀:
1. 李兆基:向政府獻計三招助港人置業

2013年3月1日星期五

李氏樓刁(上)

The Appendix of Apex (按圖放大)

牙痕,講幾句。

香港大孖沙界,唔少已經七張幾八張,新世界彤叔同埋澳門賭王,最近已經鮮有露臉少問世事,不過仲有一對活寶,仲好精靈,最近兩個星期,仲不約而同搞咗單大新聞添。

呢邊長實誠伯,失驚無神將間「闌尾級」的酒店分拆出售,擺明同政府挑機;嗰邊恒地(0012)四叔,你估佢唔到,慈善家上身,閹埋幾十年的農地,都話要捐啲「環頭環尾」出嚟,幫年青人上車咁。

兩個最有銀的「李」,兩單樓刁,一個摟屌,一個賣俏,放埋一齊睇,香港成個局,當堂立體咗唔少。

先講誠伯單刁。

長實間雍澄軒,三星級都唔知入唔入流,就算在腸實唔係咁出色的磚頭組合中,都只可以話屬於「闌尾級」的三四線物業,連改個無厘頭英文名「APEX」,都好有「APPENDIX」的味道,件嘢如果只係睇外表,唔講仲以為係「腸乾屎頓凸」又一發水住宅杰作,一個酒店則搞成咁,一望就知有古怪,查實早在2004年,長實曾經向地政總署申請預售樓花(當日新聞報道),不過即時俾人屌到開巷,最後拆骨出售計劃無痴而終(到前年申請埋分契,政府冇理由唔知誠伯想做乜)。

誠伯乖咗唔夠幾年,早兩個星期超人硬上弓,將件嘢拎出嚟賣。當日銀行可以成功老滾散戶「迷債」係「債」,不過香港人炒磚頭大半個世紀,你同佢哋講「酒店」係「住宅」,就唔係個個接受到,樓刁出街,主動摟屌,誠伯腸實自然被人屌到反肚。

通常涉及誠伯的新聞,又在香港炒到好大件事的話,鬼佬傳媒多數會跟進,不過呢單嘢香港炒到打使咁,國際傳媒幾乎冇提及,在鬼佬眼中,可能覺得明明一個好普通又合法的商業動作,唔明白點解香港人會炒到咁大鑊。將酒店分拆出售,無論係「公寓式酒店」又好,「酒店式公寓」都好,在外國都普遍過普遍,普遍到2006年,DONALD TRUMP喺佢個電目THE APPRENTICE裡面,宣布自己公司TRUMP SOHO的計劃(最後項目幾乎爛尾,有買家更加以「銷售誤導」為由,將DONALD TRUMP公司告上法庭,此乃後話)。

好喇,既然分拆酒店出售咁普遍,香港人點解又覺得腸實條APEX咁大碌?

好簡單咁講,磚頭市場作為香港經濟支持幾十年,香港(及內地)投資者,又係出咗名鐘意炒磚頭,但係香港房地產市場的創意,近乎零。講條春咩,俾你做地產商,撓起兩隻手可以年復一年咁賺到底褲都著唔落、肥到屙尿睇唔到條撚,仲要肥田冇人爭冇競爭,又點使搲爆頭諗吓類似「TIMESHARE」、「CROWD-FUNDING」的另類物業發展模式,所有創意,咪去晒起發水樓賣縮水樓,點樣「賣樓送窗台」咁,香港人咪一路以為酒店就係酒店,住宅就係住宅,未見識過中間其實有好多「CROSSOVER」的彈性囉,所以今次誠伯查實用心良苦,做緊一場香港地政界好耐冇人肯做的投資者教育。

唔少人話腸實向政府挑機、宣戰,以特首梁振英(測量師行老闆)及政務司司長林鄭月娥(前發展局局長)最熟悉的題目,兜巴刮返政府一二號人物,不過誠伯呢鋪牌最高章之處,查實係打咗張表面好毒但查實又好正的牌,令下家都唔知上唔上佢好。

而家政府唔係冇錢,而係日九日呻冇地起樓,搞到要填海開山鑽地洞,撚嚟撚去都話幾年後先有土地供應,好喇,誠伯在腸實求其扯條「闌尾」級酒店出嚟,已經有幾百個單位,聽講腸實擁有類似地契條款的酒店單位(冇規定唔可以拆骨出售),超過四千個,全香港加埋(一路冇人問政府有幾多個類似酒店項目、有幾多單位),分分鐘有十萬八萬個,如果政府肯接受呢個「酒店」及「住宅」中間的灰色地帶,隻眼開隻眼閉,即時有大量住宅單位供應,土地用途用「酒店」變成「住宅」,發展商當然賺到笑,但可以解決到冇地起樓的燃眉之急,發展局膠波局長亦唔需要咁頭痕。

當然啦,如果出現呢個咁政策轉向,間間酒店變晒「酒店公寓」或「公寓酒店」,班自由行住邊先?財經茄哩啡忽發奇想,誠伯出得呢一招,用心良苦,潛台辭唔通係希望香港政府反思一下,自由行實施十年,係咪時候剎吓車?講得白啲,誠伯呢單樓刁,查實話俾大家知,如果唔係自由行,唔會咁多市區土地變咗酒店,市區土地供應亦唔會咁緊張;講大一啲,就係香港同中國關係,唔通,誠伯對於中港融合的大趨勢及速度,好有意見,咁願摟屌,亦要借呢單樓刁帶起香港人的討論?

所謂「中港融合」,查實亦有好多其他辭彙,例如「同化」、「兩制變一國」咁,最多香港人最易理解,最易感受到磨擦衝突的政策,一個叫自由行,一個叫新界東北,講到呢度,就係四叔出場的時候,四叔的樓刁,同誠伯單嘢,朝完全唔同的方向推進,下回再續。

關連文章:
1. 李氏樓刁(上)(中)(下)
2. 買褲送褲袋(上)(下)