Best Blogger Tips

2012年5月4日星期五

國美家事(下)

上回講到,國美電器(0493)在06年兼併第三大競爭對手永樂之後,整合期間,大圍環境「金融海嘯」,公司老闆黃光裕又「人生海嘯」,跟手出現管理層內鬨,外患內憂,好唔得閒。

一間公司出現這種程度的劇變,守得住陣腳,已經算係咁,不過國美發展步伐難免好到影響,09年前後出現「家電下鄉」等中央救市政策,家電業本應係黃金時期,但國美就冇辦法好好掌握,原本佔有12%的最大市場份額,近年被「千年老二」、深圳上市的蘇寧電器(002024)爬頭,仲要面對京東商城等網上電器零售商的前後夾擊。

安內而攘外,永樂前老闆陳曉,轉為國美打工之後,趁黃光裕兩公婆一身蟻自顧不暇期間,發動「政變」企圖收歸國美控制大權,身陷囹圄的黃光裕死咬唔放,2010年一場股東大會控制權之爭,轟動中外金融界,最後陳曉迫宮失敗,暫時黯然離去。

以前宮廷政變失敗,陳曉同埋當時高層核心,無辜定抵死都好,最少有一半人頭落地誅滅九族,可以想像,黃光裕夫婦到今日仍然有好強烈的危機感,唔單止同陳曉有你冇我,對陳曉主持大局期間,同陳曉稍有關連的人脈,亦唔會再得到黃光裕夫婦信任,擔心陳曉等二五仔回馬槍二度政變。

所以站在黃光裕夫婦立場,過去幾年掛在心上的頭號大事,肯定唔係國美的市場佔有率,而係自己在國美的控股權,任何影響到黃光裕控股權的人事,都會被列作信唔過之列,包括購入國美可換股債券注資的貝恩資本(Bain Capital),亦可能包括在2009年得到大量認股權的高級管理人員,亦可能包括陳曉主政期間,所收購回來的商務網站「庫巴網」的高層。

舉個例,國美舊年同埋今年第一季業績走樣,最重要原因,在於電子商務網站「國美在線」的投資,唔好忘記,國美在2010年底,已經收購咗「庫巴網」,再大舉投資「國美在線」,雙品牌雙重燒錢,好可能源於對「庫巴網」高層的不信任。

據國美最新年報顯示,今年3月,國美高層出現多項變動,包括「庫巴網」行政總裁王治全辭職,仲有將4個三、四十歲的年輕高管,擢升至上市公司的「高級副總裁」職位。香港候任特首,正式入主前第一項手術,都想加插兩個「副司長」新位,講穿咗,就係削「司長」之權,同時插兩個心腹增加自己對大局的駕馭能力,國美今年3月出現一系列的高層變動,可以反映黃光裕夫婦,在2010年「宮廷政變」一役之後,終於開始在人事上重掌大局。

可以想像,黃光裕夫婦要下屬繼續為自己賣命,不過又唔可以透過認股權同辱同榮,唯一選擇,就係升職加人工,相信未來國美員工開支的增長,會遠高於競爭對手。

管層理講到尾都係打工仔,人工高福利好,自然會留人留心,黃光裕較難控制的不穩定因素,是貝恩資本,仲有其他香港小股東的意願。貝恩資本創辦人,包括當年大摩賓架竺稼,投資大行當年食咗唔少巨企上市大刁,就係靠竺稼呢類華籍做雨人(Rainmaker)的人脈,黃光裕同貝恩資本有幾啱傾,唔知,不過肯定對呢班大鱷充滿戒心,與敵同眼,日夜擔心俾人起尾注。

亦可以想像,國美未來要擴張地盤,發新股融資的可能性甚微,因為大股東唔想被溝淡,銀行亦未必會好信得過黃光裕夫婦,在沒有安全感的大股東領導之下的國美,相信會係一間相當保守的公司,擴張策略絕對唔會好似黃光裕掌政時期咁顛咁豪。

國美現市值僅及200億港元,唔算得超級價廉物美,不過大股東對失去控制權的危機感,唔會係杞人憂天,霸王集團(1338)插得太深都有人掃「平貨」,國美股價插得越深,大戶掃貨的可能性越高。

關連文章:
1. 國美家事(上)(下)

2012年5月3日星期四

國美家事(上)

今期開國美電器(0493)

國美近月懷消息一大籮,3月底公布的2011年業績,雖然純利仍有18億元(人民幣,下同),不過不進反退6%;業績後在美國路演,管理層又同投資者講到唔係咁好景,同店銷售倒退;五一黃金周前夕,發出自願性盈利警告,披露由於電子商務的業務虧損,今年首季純利將會大幅下跌。

近排做淡沽空民企容易搵食,一間大老闆坐緊監,管理層內鬥不息的民企,業務前景亮起紅燈,投資者信心好易受到衝擊,國美股價由3月底開始,狂插超過40%。

此時此刻,當然又係大行報告出動的時候,幾乎間間狂劈目標價,舉個例,3月28日,瑞信睇緊國美目標價2.3港元,業績一出,以「差過預期」為理由,劈到HK$1.8,星期三見到盈警,再降到HK$1.5。跟住股價走勢劈目標價,有邊個唔識做?

財經茄哩啡忍唔住要再講多次,大行所謂「12個月目標價」,其實係最廢的市場指標,因為改完又改,一改又係12個月,即係永遠唔會錯。霸王集團(1338)個招牌,被唱到變成負資產咁滯,之前幾年唱好唱到天花龍鳳的大行報告,近年一份都見唔到,星期三股價咪又係反彈2成。
近排出事的「問題民企」,唔少死有餘辜,不過將國美拖埋落水,歸納為帳目有問題的敗類,似乎牽強咗少少,國美核數師冇保留意見亦冇辭任,冇吹大資產公平值,冇延遲公布業績,業績亦未見突然大走樣,請留意,國美冇A股,無需要做季度報告,更加無需要發盈警,近排出現有關財務狀況的壞消息,基本上係管理層主動自願披露。

國美未公布第一季數據,冇乜好講,2011年業績幾大罪狀,包括經營現金流大幅縮水90%,包括舖租的銷售開支增加超過3成,但同店銷售增長又跌至3%,呢啲數字當然唔靚仔,不過國美近年重新擴大分店網絡同時,又要投資網上商貿平台,提升電腦系統,燒錢大增效益未即時出現,盈利及現金流出現壓力,其實不難理解。

國美目前手頭上有60億元現金,40億銀抵押存款,加埋過百億銀,主要債務只有20億元可股股債券,現金等如負債四五倍,帳面上周轉唔似有任何問題,唔好話民企,國美財務狀況,其實好過唔少好似發電廠、航空公司等大型國企多多聲。

老實講,財經茄哩啡對國美一直印象麻麻,戒心甚重,因為那些年的「中國首富」,冇乜邊個有好下場,國美前主席黃光裕,四十未到已經做首富,無端端會剃光自己個頭,公司上市又走後門借殼,08年底出事,內幕交易及行賄等罪成,判監14碌,完全乎合「首富魔咒」的軌跡。

黃光裕雖然身陷囹圄,不過從來冇放棄過對公司的控制,聽講更加在獄中積極備戰進修,日日睇報紙雜誌留意市場變化,例如仔細閱讀有關電子商務的文章,東山再起重拾昔日風光之雄心表露無遺,前度中國首富未必從此洗心革面變成好人一個,不過現階段亂搞公司帳目、自掘墳墓的可能性亦甚低。國美現有股東及管理層,可能會因為唔想持股被可換股及認股權等因素溝淡,存有「唱淡」公司股價的誘因,不過在黃光裕未獲自由之前,國美甚至可能係最唔會出大蠱惑的民企。

國美近在2006年,先收購咗當時的第三大家電零售商永樂,永樂老闆陳曉,變咗幫黃光裕打工,成為國美老總,2008年黃光裕被公安拘查之時,斷估國美仲未消化完永樂,市場出現「金融海嘯」同時,黃光裕兩夫婦又面臨「人生海嘯」,2010年國美管理層的內鬥,講穿咗,就係陳曉趁老闆入獄、老闆娘官非未息之時,發動一場「政變」。

要了解國美未來發展,以及面對市場競爭所作出的種種策略變動,出發點都要由國美的「家事」講起,下回再續。

關連文章:
1. 國美家事(上)(下)

2012年5月2日星期三

中超魔球(下)

上回講到,中超聯16隊足球隊,幾乎隊隊背後財團都同地產有關,包括恒大地產(3333)、廣州富力(2777)同埋綠城中國(3900)三間香港上市的內地發展商,變咗「地產聯賽」。

一場聯賽90分鐘,賽事直播加埋前後吹水,有時等如黃金時段在電視賣足兩粒鐘廣告;一季聯賽大約9個月,各大報章刋載聯賽積分表,又等如日日做免費宣傳,加埋球員轉會等慣常熱炒新聞,地產商老闆幾千萬買個中超冠名權,擲幾個億班費,可以極速在全國打響知名度,除笨有精。

除咗商業宣傳,在中國搞足球,仲有一樣鮮為人知的著數,就係同地方領導拉關係。內地大型發展商,地盤多數擴張至全國,入屋叫人入廟拜神,同地方幹部飲茶灌水肯定係例牌動作,中超聯好好醜醜,都係賽程最長兼最多人關心的本地體育賽事,地產商老闆有隊中超球隊,講波經好自然成為拉近距離的最好話題。

中超聯冠名權易手當食生菜,但係都仲帶有地域性,前面點都有球會主場所在的省份或城市,地產商所控制的球隊,同當地高幹的關係,就更加唔講得笑。

做得地方官,好自然想捽靚政績,唔少地方領導,無論本身係咪球迷,會特別關方足球發展,因為唔少人視之為面子工程,甚至視地方球會為城市的「名片」,隊波表現好,領導出風頭,城市知名度提高,招商容易啲,甚至治安都會好啲咁話。聽講部分地方政府,為咗吸引財團揼水搞波,甚至會提供政策方便或稅務優惠,據唔少內地傳媒曾經報道,當年杭洲綠城開始大搞,浙江省政府唔單止將政府出錢興建的黃龍體育場俾球隊做主場,更加將旁邊50幾畝土地,劃埋俾綠城中國發展。

講到球會及城市的關係,球隊戰績及地方政績,就唔可以唔提吓大連同埋薄熙來。「足球是一個城市的名片」呢句話,是否出於出任大連市長時期的薄熙來,無從考究,不過大連市中心有粒直徑21米的巨型足球建築,就係呢位「足球市長」的主意,大連被稱為「足球城」,甚至有謂「大連三寶」:足球、服裝節、薄熙草(聽講因為薄熙來簽名好似「薄熙草」)。

大連球會,由甲A年代的大連萬達,到後期的大連實德,雄霸中國頂級足球聯賽多年,加埋差唔多有十次八次冠軍,背後薄熙來應該發咗唔少功,最少上海在陳良宇話事年代,上海申花大部分時候都只能排老二。

大連萬達當年稱霸中國足壇,「大連萬達」呢個招牌,亦成為咗中國最響亮的商業地產品牌之一,全國而家有八十個「萬達城」,集團亦大量投資在電影院線卡拉OK等娛樂文化事業,飲飲食食消閒娛樂一條龍,如果恒隆(0101)千三億元市值,一半來自內地商業,大連萬達市值最少應該都有六七百億港元。

內地地產商,借一蚊錢圈十蚊地,擴張越快借貸越高,商業地產相對住宅資金周轉更慢,好出奇地,大連萬達一嚿巨型商業磚頭,從來冇需要上市集資,已經有足夠財力發展到目前規模,異數異數。

大連實德近幾年先開始涉足地產,同大連萬達一樣,亦好似從來冇上市集資的壓力,無獨有偶,薄熙來月前出事之後,兩間靠大連足球起家的企業話事人,亦傳出被當局調查的傳聞,實德及萬達先後否認涉案消息,有關傳言,太多真真假假,大家自己上網查查。

中國足球既是經濟的縮影,亦是政治的寫照,一個爛到入心入肺的球圈,在渾水浸淫日久,唔會乾淨得去邊,名字出現在中國足球聯賽出現的公司,細細注玩吓就可以,真係投資,最好避開。

國家副主席習近平話自己有三個願望,希望國足可以出線、主辦及羸得世界杯。咪玩啦,細路仔踢街波的空間都冇,國家足球隊又會叻得去邊,用磚頭做的足球,踢唔郁的。

關連文章:
1. 中超魔球(上)(下)

2012年4月30日星期一

中超魔球(上)

今期開中超。

「Moneyball」呢個英文字,以前多數在涉及擲波波的遊戲出現,講緊特別重要的關鍵球,例如NBA明星賽鬥射三分,每排波最後第五粒顏色波,射入分數雙計,叫做「Moneyball」。後來用咗嚟做書名,揭露在光怪陸離的美國職棒聯賽,點樣利用本小利大的另類方法營運球隊,以近似發掘低估值高潛力股票的財經數據概念,屈機式突圍而出。

本書近年拍埋荷李活電影,變成被濫用的流行術語,總之有個波,體育加商業就叫做「Moneyball」,香港仲要翻譯做「魔球」,死未。如果純粹因為呢個字的「無厘頭」,用嚟形容中國的「頂」級足球聯賽,反而幾係合適。

今年的中超聯賽,16支球會,聽講總投資額超過30億元(人民幣,下同),被喻為有史以來最豪華的中國頂級聯賽,不過無論現場入座定係電視觀眾,數字雙雙創新低,英超聯電視轉播費用佔球會收入40%,中超反而唔夠1%,一個13億人的足球市場搞成咁,用一潭死水形容,已經非常俾面。

又唔怪得中國觀眾冇眼睇,國足近年場內至場外的表現,傷盡國人感情,黑心黑臉黑腳黑哨醜聞,幾乎無日無之,近月中國球圈大吹反腐之風,幾單大案陸續開審,球員球證到球會班主到足總高層,除咗執波仔,球圈幾乎每個層面都有人涉案涉貪,黑幕被踢至90年代中期,等於同全國球迷踢爆一個最公開的秘密,中超自94年職業化以來,從來冇一場真正具有體育精神的賽事。

英超聯等歐洲足球聯球,各球會已經是地區傳統一部分,歷史悠久,感情深厚,就算高度商業化,球會老闆由外國財團控制,唔會偏離球會傳統太遠得罪本地擁躉兼半個米飯班主,球會招牌更加唔會輕易改變。

中超聯靠商業贊助,而唔係球會傳統或球迷忠誠度,搞足球一為神功二為弟子,球隊多以背後財團個招牌名命,反映球會老闆財力投入多於一切,經營模式有今生冇來世,球會冠名權,頻密過前車仔前鋒二五仔安力卡轉會。

有冇邊個老餅球迷股民,仲記得寶光實業(0084)以前的黃創山黃創保?仲有冇人記得精工及寶路華等以手錶品牌命名的球會班霸?如果30年前的香港甲組足球聯賽,反映了當年鐘錶業的盛衰,今日中超聯就是內地房地產市場的一個縮影。

今年16隊中超球會當中,廣州恒大、廣州富力、杭州綠城、天津泰達、河南建業、江蘇舜天等,背後老闆都係地產公司,當中恒大(3333)、富力(2777)同埋綠城(3900),唔單止係香港人熟悉的香港上市公司,無獨有偶,三間都係起步較慢但擴張較狠,負債比率偏高的房企,同地產公司或者內地磚頭冇關的中超球隊,只有三兩間,足球聯賽變咗「房企聯賽」。

發展商搞足球,點會個個為興趣,最大著數,就係另類宣傳,好好醜醜本地足球消息都要報道吓,好似廣州恒大咁,聽講今年班費超過7個億,對於一間幾百億市值公司,只係九牛一毛,電視報紙日日提住公司個名,好過擲幾億銀在中央電視台黃金時段賣廣告,恒大呢類專門在三四線城市做新項目的發展商,客戶多數係冇買個樓的樓市初哥,搞足球賣磚頭的宣傳效果更加顯著。

而家市場對內房企業周轉狀況非常敏感,拋個招牌出嚟搞開足球,收水唔搞,更可能被視為負面消息,被人沽空做淡,洗濕個頭都要繼續搞,廣州恒大作為上屆冠軍,今年繼續帶頭,廣州富力亦在三甲前列位置,杭州綠城同埋大連實德,兩隊背後老闆及財團,近年多是非,做緊包尾大幡,呢個「房企排行榜」,唔可以百分百反映相關地產商的資金鬆緊,但應該反映咗多少球隊老闆,仲有幾多閒暇心情搞隊波。

下回再續。

關連文章:
1. 中超魔球(上)(下)