2010年6月3日星期四

財經影帝(下)

(刊於2010年6月4日am730)

影帝打工乜都一腳踢,就係唔走出幕前...

上回講到,影帝周星馳變身財演,自導自演比高(8220)呢場戲,值唔值買飛入場。

比高未來三大業務之一,搞網絡遊戲,暫時睇,國內外,電影收得,唔代表電玩受歡迎,掉轉頭都係咁,大陸現時趨勢,電影同電玩公司互搶飯碗,只可以當十斤叉燒斬多四兩,可以不理。

第二瓣,大陸電影院綫,十劃未有半撇,仲要同坐擁四成市場嘅中影爭飯食,亦可以不理。

主菜其實拍電影,亦係同中影合作核心範疇,五年拍十至廿套戲,每套成本五百至二千萬人民幣,即係主打中小成本電影。呢個市場,空間暫時好細。在大陸,唔係大片,成本冇億億聲,好難有片商投資。好簡單,明星陣容唔勁,場面唔大,觀眾唔會入場,寧願翻屋企睇老翻。唔係大片,亦好難霸到檔期,陳可辛講過,《如果.愛》成本九千萬,都叫重皮,在大陸上畫兩星期,戲院仲有六成滿,但到《無極》上,大片(香港爛片,收幾百萬),一夜之間霸晒所有影院,一個廳都冇留俾《如果.愛》。

香港電影圈,唔駛堆砌豪華星陣,又可以吸引大陸觀眾入場者,可能只有周星馳。問題係,周董幫比高打工,服務承諾包括電影題材、審視劇本、同合夥人講數、選角等等,唯一唔包,正正係幕前演出,即係話周星馳幕前叫座力,唔係比高資產之一,甚至會同公司正接競爭。

每個人在唔同階段,有唔同要求,星爺如果百分百投入,搞自己上市電影王國,唔係冇得諗,不過星爺近年幾年先出一部戲,可能因為學占士金馬倫,十年一潤先夠矜貴,又可能今時今日,星爺有名有利,冇咁大衝勁再闖高峰。

就算公司好,亦要管理層對股東好,呢樣,星爺暫時未有往績,只可以從佢點對身邊拍檔夥記,粗略估計。

星爺同菱電胡法光家族,好啱傾,由山頂天比高到比高,拍住上,對其他人,冇咁長情,例如《少林足球》成班師兄弟,到《長江七號》,幾乎剩翻星爺獨腳戲。娛樂圈多是非,亦真亦假,大家不妨將周星馳三個字,分別同李修賢、吳孟達、洪金寶等名字一齊Google吓,超級諧星背後人事,可知一二。

中國大國堀起,下一步提升軟實力,三網融合,文化振興,駁渠灌水,十年前科網熱,好可能在中國資訊高速公路重演。
電影產業食正呢個浪,睇戲心態買飛入場,冇問題,但衝浪唔等如裸泳,潮退之時,唔好做冇著褲嗰個。

等星爺下一套好戲。

關連文章:
財經影帝(上)
財經影帝(下)

伸延閱讀:
1. 陳可辛論大陸大片
2. 文隽:周星馳時代宣布結束!
3. 周星馳回應「倒周」風潮

財經影帝(上)

(刊於2010年6月3日am730)


各位觀眾,財經影帝出場!
毋忘六四。

講緊舊年6月4日,創業板公司比高集團(8220,前稱帝通國際),公布向周星馳及股東之一菱電,作價3億(一半係債),收購尖沙咀商場,拉開股壇大戲序幕。

財經茄哩啡舊年底開壇,開宗明義,重新詮釋「財經演員」呢個辭彙: 金融界搵食,個個都係演員。股佬話你知「唔升穿兩蚊可能下試一個九毫半」,最多累師奶輸餐茶;場戲做到似層層全人類落搭,先係真正財經演員,例如,十年前說服華納兄弟,同AOL合併有得諗嗰班賓架,肯定係一流財演。

比高呢場大戲,由影帝級人物領銜主演,仲有大陸振興文化、扶助影業呢個總劇本,「你個死茄哩啡」,當然要跑吓龍套。

香港觀眾睇電影,只認明星,同樣道理,股民亦好受名人效應,消息曝光股價暴炒,周星馳拍住菱電,用個三線商場,換取比高控股權,成本每股五仙,一年炒上三毫左右。月前,個商場差唔多平手出售,賣俾電盈(008)前高層鍾楚義間資本策略(497),套現1.5億,呢個亦係比高易手基本殼價。

單嘢部署超過一年,開頭傳過比高會在大陸搞零售,唔知係咪後來心猿意馬(585),見梁伯韜同鍾楚義唔識電影都玩到咁過癮,堂堂影帝冇理由唔出手。

點都好,比高進軍影業,相對意馬,交易算簡單易明,未來大計亦交待得好清楚。
首先,公司2月建議,委任周星馳做執董,收購《長江七號》三年知識產權專利。星爺變周董,老闆又打工,合約五年,盛惠4500萬,收可換股債,換股價1毫,另加2.5億認股權,認購價亦係1毫,周星馳持股35.6%,加埋菱電,控股啱啱一半。

星爺出手,本身等如為股價做代言人生招牌,比高又話,星爺本身同中國電影集團、美國哥倫比亞影業等巨擘,已經建立直接工作關係,香港電影圈唔係咁多人做到,根據服務協議,周星馳承諾,為比高電影業務,「投入充足及合理時間」,唔計認股權一年人工唔駛一千萬,抵到爛云云。

上星期,股東會通過有關建議,千呼萬喚,星爺終於蒲頭見人,即時送上見面禮,公布同中影達成戰略合作協議,未來五年,合作炮製十至二十套電影,又話會以電影主題搞網上遊戲,發展二三線城市影院業務,仲委任銀狐鄒文懷個女做非執董,場戲做足全套。

演員埋晒位,劇本無懈可擊,值唔值得買飛入場,下回分解。

關連文章:
財經影帝(上)
財經影帝(下)

伸延閱讀:
1. 09年6月4日帝通宣布幫星爺買商場
2. 比高 - 星爺 - 中影聯手