2011年9月23日星期五

諸事恒隆(下)

(刊於2011年9月23日am730)


上回講到,特首選舉入直路,如果要為呢場政治博奕貼馬仔,搶閘變身疑似候選人梁振英陣營,有一盞「燈」,就係恒隆地產(101)主席陳啟宗。

喺啱啱出爐年報裡面話,陳啟宗話自己其實唔係公司CEO(首席行政總監),而係CPO,即係「首席政治總監」,大約講緊中國呢個非市場主導經濟,點樣判斷政策及政治風險咁。

作為公司CPO,陳啟宗呢位老闆,應該唔易湊,第一好長氣,年報主席報告書可以寫足廿幾頁;第二自我感覺非常良好,吹水廿幾頁最少有一半吹緊自己及恒隆點勁點勁,例如地產商唔賣樓就梗係要做包租公,根本冇乜選擇,行家做多少少商業地產,陳啟宗就話人哋抄佢策略,仲吹到呢個轉變做「恒隆現象」,新地(016)近年租金收入已經超過賣樓收益,唔通又叫「九倉現象」咩?

當然啦,作為一個香港藍籌地產大孖沙,肯花時間親自寫廿幾頁嘢你睇,呢個動作其實抵讚,將恒隆主席報告書吹水唔抺咀部分略過,亦唔係全冇睇頭。陳啟宗把口唔收,表面上狂野風格,同佢經營作風其實馬咀唔搭豬頭,05年之前,策略其實都係「靜待其變」,保守得交關。

舉個例,呢種管理層,唔使擔心間公司會買咗乜嘢結構性投資者損手爛腳,恒隆對沖外匯風險,做法只有一個,就係真金白銀買人民幣,到今年6月,大大話話掃咗200億人仔現貨,陳啟宗亦唔怕話大家知,恒隆好多時係公開市場最大人民幣買家之一,如果間間香港地產商都咁做,銀行真係唔得佢死。

陳啟宗寫於7月29日

恒隆公布於9月28日

又例如,陳啟宗話,一年前搵前國泰(293)大班陳南祿過檔做董事總經理時,講明最重要任務就係「在內地買地」,過去一年老闆看法有變,可能「一兩年內都不會買地」。恒隆主席報書裡面,有一個幾有趣統計數字,陳啟宗話,5月之前14個月,23間內房商喺香港債市借咗最少1,200億港元,其中三分二係5年或更短,部分年息14厘,不過,中央樓市調控雖然喊打喊殺,但係至今仲未有一間地產商破產。

陳啟宗言下之意,就係中國地產調整期仲未正式開始,短期內甚至會有更多地產商加快進軍商用物業,不過恒隆已經洗濕咗個頭,喺05至09年期間,在大陸多個城市做咗唔少大項目,上海以外投資,大約已經掟咗5百億港元做緊,等如恒隆一半股東權益或市值,從呢個角度睇,恒隆變身做內房包租公呢個轉型動作,就唔可以係保守。

09年以前恒隆,係一間「雙城公司」,集中香港同上海兩大金融中心,而家幅射到全國幾個省會城市,香港鼻屎咁大之地,7百萬人口加每日幾十萬自遊行,所有人逼埋喺幾個商場打白鴿轉,做商業包租公唔難搵食,呢個模式可唔可以在大陸複製,唔可以隔岸觀火,去開大陸的話,行多啲商場啦。

伸延閱讀:
1. 百貨諸色(上)(下)
#

2011年9月22日星期四

諸事恒隆(上)

(刊於2011年9月22日am730)

只做對的decision...例如...
加入Enron...幾威...

今期講叉燒餸豬頭骨,開恒隆(101),本來對呢隻嘢冇乜興趣,不過近排特首選舉跑馬仔入直路,順便將特別高調諸事的地產商,炒埋一碟,同大家齊齊吹水八掛一下。

香港選舉政治認真古怪,一係選,一係唔選,但係原來參唔參選之外,仲有一個選擇叫「備選」。行政會議召集人梁振英主動爆響口,同傳媒講,已經「口頭上」劈炮辭職,最攪笑係冇交待原因,要大家心領神會,要搶閘落場參選下屆特首。

另一位「疑似候選人」,政務司司長唐英年,同英哥一樣,大家心口都插住朵大紫荊,都係行會最資深成員,表面上咁高咁大,不過睇真啲,英哥行會召集人呢個名,聽落好勁,但其實都唔知可以召乜集乜,連主要官員都唔係;唐唐就唔同,老闆由當年董建華變做曾蔭權,但唐唐政途完全冇受政治變天影響,由資訊及科技局局長到財政司司長到政務司司長,雖然喺每個位都唔見做得特別出色,但係就越做越高, 邊個政治後台更有食力,一眼睇晒。

聽講北京現任胡溫領導,由當年鄧伯爺隔代欽點,唔套權力交接方式,又唔知係唔係可以應用喺香港,但前排誤傳前國家主席江澤民大江西去,前立法會主席范徐麗泰,即刻變得好高調咁「積極考慮參選」,仲一反常態咁公開片人,原來就係幫最近先開始扮惡的唐唐做打手,如果英哥唔係真命天子,但又堅持去馬,最大解釋,可能係北京十八大搶櫈仔遊戲都未塵埃落定,政治可以瞬息萬變,當年可以爆個港英遺臣當奴,今日嚟個草根出身特首唔係冇得諗。

無論點,英哥堅持去馬,可以打破行政長官黃袍加身、小圈子舉手拍手呢個無聊遊戲,香港人今日個個要打倒「地產霸權」,就算曾蔭權下個月施政報告臨別秋波繼續扮跛腳鴨,喺回歸之後第一場有得揮的特首選舉過程中,相信亦會出現更多不利於地產商的消息。

貼馬仔要睇馬房,望吓兩個熱門後面有乜人,多少會知道邊個可以看高一線。

香港政商要員,好少會話公開支持邊個,只有幾個人好公開咁,唔介意畀人知道自己點押注,唐唐同英哥陣營,都有一盞「燈」。唐唐有范太站台,由彭定康年代到而家,幾時見呢位人大常委講錯一句嘢又話者落錯一注?英哥最「疑似」支持者,就係恒隆主席陳啟宗,陳啟宗早年狀似國際猛人,但係ENRON單嘢已經一鋪露底,早年支持一國兩際研究中心,唔夠幾年又係沉船,陳啟宗更好似從來唔怕得罪人,好似暗批唐唐「成世人一事無事」,或者「未講過一句話令人覺得有腦」,真正政治高人,把口又點會咁唔收。

下回再續,睇睇喺陳啟宗呢位CPO - 首席政治官 - 帶領下,恒隆又攪成點。

伸延閱讀:
1. 陳啟宗: 成世人一事無成
2. 陳啟宗梁振英富豪夜宴,五大地產商缺席(都仲有郭炳湘的...)
#