今期又開
恒大(3333)，呢隻嘢在財經茄哩啡「確唔信名單」之列，舊年寫過一次《一年恒大》，正相翻閹之時，恒大已經變成新聞主角，有人代勞，被快閃空軍狙擊。
唱衰中國民企出名的Citron Research，6月21日發表研究報告，趁住阿公開始放水恒大股價反彈之勢，五十幾頁紙力數恒大五宗罪，其後跟開恒大的投行分析員，齊齊出報告力撐恒大，不過恒大市值至今已經唔見咗近80億港元，近十份大行報告唱好，都頂唔住一份唱淡報告，唔怪得越嚟越多人加入快閃空軍。
證券分析員企硬冇轉軚，冇話調低恒大目標價，信貸分析員就騰雞少少，標普最近又跳出嚟，話事件影響恒大的形象信譽及融資能力，調低恒大信貸評級展望，有乜冬瓜豆腐就放馬後炮，信貸評級機構份工都幾易做。
如果恒大計劃趁住股價反彈批股或者借錢集資，暫時唔使諗，恒大主席許家印飯到食唔落，在投資者會議解畫時京話爆粗問候老外娘親，仲聲恒大會全力反擊「將他打得落花流水」，Citron Research「死定」咁話。
許家印講到「造謠」在大陸可以鎗斃咁激，仲以為佢老人家會組織「龐大律師團」，在法庭上將Citron Research告到甩褲，點知一個屈尾十，恒大走咗入香港差館報警。
許家印在香港識人脈甚廣，由大孖沙到金魚缸古惑仔，應該識落唔少老友，真係有人唱衰自己間公司，做淡「他Ｘ的搶劫」，應該捉到手影，甚至可能有初步證據，從刑事商業罪案戰線入手，好過打民事誹謗口同鼻拗。
近年快閃空軍成行成市，好多香港散戶應該雞毛鴨血，中國企業都係時候做啲嘢，第一當然係執正自己，其次就係引起監管機構的重視，許家印貴為前中國首富，不了了之的話，等如承認自己身有屎，好冇臉囉，許家印應該化身中國民企的正義代表，同Citron Research死過，踢爆快閃空軍的運作手法，等大家開開眼界，最低限度告上法庭，將自己盤數攤開嚟講，等投資者可以更充份咁了解恒大的運作，將件事搞得越大越好。
Citron Research在報告所列舉的恒大「罪狀」，部分有砌生豬肉的成份，例如指住162億人仔的「其他資產」，就話許家印投資咗咁大嚿錢搞足球女排等個人興趣，大佬，162個億，分分鐘成隊曼聯都可以買返嚟，廣州恒大要百幾億，唔係好通囉。
不過又公道啲講句，Citron Research份報告，睇得出用咗唔少心機，佢自己都話研究歷時數月，最後得出恒大已經負資產360億人民幣的結論，撇開篇嘢舉證強弱，當中有唔少觀點查實好有睇頭，所提出的幾大問號，相信唔只係Citron Research的懷疑，不過行文用字就真係好激，例如賄賂地方政府官員，成份報告冇提出任何證據，就用到咁激烈的字眼，都係第一次見，可能因為快閃空軍太多，唔激已經引唔起市場注意。
當然啦，亦都唔排除Citron Research，手上仲有真實證據，準備食第二鋪大茶飯，以及應府恒大的反擊，如果係咁就認真高章，不過Citron Research負責人日前接受內地傳媒訪問，開始為事件降溫，話唔可以「Cheat」、「Fraud」等字眼形容恒大。
許家印及恒大最兇險的日子，應該在08年全球信貸風暴後，上唔到市，焗住日日去同香港大孖沙鋤大D，鋤吓鋤吓，鋤咗個驚世賭局，最後冇事賭到而家都死唔去，對本身的經營模式，肯定自信爆棚，冇諗住點改變。
Citron Research負責人話搞大件事之後，恒大的澄清及反擊，令成件事越來越透明，覺得自己為恒大做咗件「好事」咁話，呢句嘢又唔錯得去邊，經此一役，市場對恒大戒心肯定更高，下次再捽盤數出街時，可能要捽咗少少水份，帳面增長難復舊觀，絕對唔出奇。
關連文章:
1.
燒賣數簿
