James Cameron's 3D Vision

GOW財茄台最新笑電影，財經茄哩啡向超級大導致敬之作。

占士金馬倫近排好能唔得閒，成日飛去中國，日前又去簽約，以堅定不移的目光，描準中國的３...３Ｄ市場喎。

請問，《阿凡達》續集幾時先有得睇，係咪真係２０１５．．．

關連文章:
1. 財經影帝（上）、（下）
2. 財經影評（上）、（下）

伸延閱讀:
1. 新浪視頻: 占士金馬倫進軍中國3D電影市場
2. Huffington:'Avatar' Director's Pace Group To Launch Joint 3-D Venture

海底撈鹹魚（下）

呢期講鹹魚股，上回講到，上市公司搵到名牌基金做策略投資者，放盤淡水未必一定翻生，好似國美電器(0493)咁，突然大量競爭對手加入，爭到條條都變晒鹹魚咁滯。

近排國美跌得急，因為出咗盈警，一間舊年仲賺緊近廿億人仔的公司，今年上半年見紅，係投入大量資源發展電子商貿。國美同埋老對手蘇寧電器(A股:002024)，近日聯手發起地獄割喉減價戰，成個勢，似乎想在京東商城(360buy.com)未上市之前，以本傷人將呢個網上對上擠走，不過聽講內地消費者好興在網上買電器，砌底一個又出一個，唔單止阿里巴巴的淘寶網，騰訊(0700)今年先完成收購的易訊網(51buy.com)，又話要加入減價戰戰團。

玩電子商貿大戰，唔係搭個網上平台咁簡單，最攞命要做埋倉存物流，呢個環節舊年開始出現好多新政策，斷估未有邊間公司掌握到絕對優勢，一場混戰。美國幅員唔細得過中國幾多，人口較少，網上購物流行咗好耐，不過電子商貿都取代唔到現實世界的零售網絡，否則Walmart唔需要開咁多巨舖請咁多人，中國電貿戰打到飛起，血光之後，國美蘇割等坐住幾十億銀、資產負債表又唔算單簿的鹹魚，應該有一兩條可以翻生。

有一類公司，變成鹹魚股的原因，在於擴張得太快，唔肯走位衝去晒太陽，想唔變鹹魚都唔得，例如比亞迪(1211)。咪以為比亞迪只係燒錢搞電動車，呢隻嘢放落太陽能電池的投資，亦都唔嘢少，早兩年在大陸睇報紙，提到陝西省發改委有個「陝南循環經濟發展規劃」，2009規到2020，當中「十大工程」之一，就係比亞迪投資225億元(人民幣，下同)的5000兆瓦光伏電池項目。

比亞迪今年有113億元銀行債務到期，每年資本開支約100個億，舊年主業現金流入只有60個億，最近一單新聞，竟然係在天津起電動巴士廠，又投資20個億，好似完全唔擔心會爆煲。比亞迪及保利協鑫(3800)等公司，話佢環保節能又得，話佢科學發展又得，啱晒國策，所以應該大把地方政府搶住搵佢哋投資，亦會有唔少補貼或著數，呢樣極可能係比亞迪仲咁夠膽燒錢的主要原因。

國內得到政府支持，甚至中央政府的祝福，歐美國家近年成日追住中國光伏業，認為國家補貼構成不公平競爭，應該唔會全部老屈，加上做光伏有著數下個個湧住去晒太陽，國策支持變產能過剩，一間二間公司變晒鹹魚，發展太陽能是一個必然趨勢，中國光伏企業，最終會有幾間鹹魚翻生，不過亦多數有唔少會變成梅香鹹魚。

當然啦，有啲鹹魚只係扮翻生，彈兩吓以為復活，好似思捷環球(0330)咁，高層出名人工高福利好，但偏偏個個都坐唔定，出出入入好似自制股價波幅，今日升3成過幾個月跌2成，已經變成不折不扣的炒股，最新呢位行政總裁又唔知可以坐幾耐，會唔會又掟個「3年轉型計劃」，一年唔夠就拜拜嚟多過起跌循環。

要捕捉到觸發鹹魚翻生的因素，應該留意管理層在逆境的時候的取態及策略，呢啲先係最有用的金融財經資訊，不過呢，由大行報告到傳媒報道，多數人都傾向一沉踩多腳，好似呢兩日提過的上市公司，股價已經跌咗幾截，大行分析員先嚟調低所謂「12個月目標價」又有乜用，有時上內地網上論壇索索風，甚至搵啲公司管理層的微博關注吓仲好。

用100個億港銀做指標，而家可以買起半間保利協鑫，5間霸王國際(1338)，3間滙源果汁(1886)， 0.8間國美電器，0.7間思捷環球(0330)，兩間李寧公司(2331)，呢度唔係話建議撈底，只係想指出一點，而家個市夠殘，成個金魚缸都係鹹魚，查實唔需要分析都知道，未來必定有唔少鹹魚翻生的故事。

關連文章:
1. 海底撈鹹魚（上）、（下）

海底撈鹹魚（上）

鹹魚理想．．．

呢期太忙，搵幾條鹹魚股望吓，即係跌得好殘，又有唔少人心郁郁博反彈的上市公司。鹹魚雖然唔識游水，但潛在海底唔易撈，博鹹魚翻生更係高難度動作，呢期只係當打吓牙骹呃兩日稿費，即係放馬後炮。

鹹魚有好多種，有一種叫做深海鹹魚，壓在一個極深的經濟周期，要慢長的結構性變化，或者市場相信結構性變化將會發生，先至會翻生，今年最好例子，就係大陸國企電廠。

發電廠應該係近年最折墮的國企，好似華電國際(1071)咁，5年時間總資產谷大2.4倍，純利反而跌咗86%，增加產能等如做蝕本生意，因為被煤公司及擁有壟斷性地位的電網公司撳住搶。舊年底寫過幾篇《煤電網聯動》，講過中煤能源(1898)無端端同中國電力(2380)行埋，合資搞發電廠，可能因為煤企索到風，知道電力市場即將出現變革，對發電呢盤生意開始改觀。跟住大半年電企經營環境的確好似出現結構性變化，不過電改只係做咗小手術，電網仍然好惡，真正變化在於市場對煤價走勢轉趨悲觀，最激的講法，有人唱緊煤價十年大牛市已經玩完添。

大陸發電市場的結構性變化，有機會再講，重點係，如果要博呢類深海鹹魚翻生，就要超有耐性，等待漫長周期的完結，前題仲要係公司唔會爆煲，最好好似大陸國企電廠咁，打腫塊面扮肥佬，年年借錢保持派息，就可以諗諗，而家唔少航運公司都已經變成深海鹹魚，幾年之後，唔排除可以好似電廠咁翻生，不過中間有冇其他更好選擇，又係另一回事。

一條在其他人眼中的鹹魚，在其他公司看來，可能好有策略價值，放落盤淡水好似就會識郁，最佳例子就係綠城中國(3900)，本來瀕臨爆煲邊緣，九倉(0004)突然「白武士」式的出現，營運資金雖然仍然緊拙，但最重要係投資者相信公司最大問題已經得到解決，股價即時鹹魚返生，反彈一倍咁滯。

近排例子仲有一個雨潤食品(1068)，突然爆出嘉里集團持股超過5%的權益披露，股價又係爆升幾成，雖則糖王郭鶴年都有少少糧油生意，除非糖王想腌豬肉干，否則唔似有意會收購雨潤，嘉里同豬肉檔亦似乎大纜扯唔埋，更似某種原因或交易，坐咗雨潤的衍生工具的技術性接貨。

有時策略投資者打救，或者名牌基金入股，有條水喉入股，未必代表一定會鹹魚翻生，或者點石成金式從此魚躍龍門，例如李寧(2331)，早排得到兩大基金入股借錢兼參與管理，股價一度爆升，但最近又已經打回原形，甚至更殘，最新市值，50個億港元都唔夠。

再之前亦有一個例子，叫做國美電器(0493)，2008年全球信貸風暴之後，大股東兼主席黃光裕又要入冊，搵咗貝恩資本入股，貝恩話事人叫竺稼，當年巨型國企排隊嚟香港上市時，呢位「造雨人」呼風喚雨，但係唔代表可以同管理層合作，貝恩資本除咗當日提供資金之外，後來國美管理層爭奪戰，以至近月國美同競爭對手的割喉減價血戰，貝恩資本都好似冇乜幫過拖，同現任管理層的默契，好似及唔上TPG在李寧咁肉緊。

國美屬於突然多咗好多魚爭食、爭到個溏都乾埋條條焗住晒的鹹魚，唔單止要同蘇寧等老對手競爭，仲要面對京東商城等電子商貿新玩家，呢個溏夠晒熱鬧，聽講取近連騰訊(0700)都玩埋一份，下回再續。

關連文章:
1. 海底撈鹹魚（上）、（下）
2. 煤電網聯動（上）、（中）、（下）

老感點唱．．．

買褲送褲袋（下）

（HEHEHE，呢篇嘢，無謂在報紙出街，又要寫又改圖又剪片好唔得閒，老屈咗老友阿瞬，在am730代筆兩日，報紙版本的「買褲送褲袋」只有一集，行文略有不同，呢篇下集唔收稿費，送嘅！）

發水秘笈既然係地產商的發達秘笈，公道啲講句，一個樓盤去到發展商手中，有邊個唔係大發特發，講緊去到幾盡，一個樓盤的設計，最後出嚟又剩低幾多「人性化」元素咁解。

上回講到，發水秘笈當中，有一式「腸乾屎頓凸」，乃非常難Chok的「超必Standard」，呢個傳說，臨時客串樓盤分析員的財經茄哩啡，都係在中環皇后大道中聽返來，講緊行內人一睇，就知道係「腸乾屎頓凸」，世界級地球級的建築設計，單位每一道牆、每一個窗台、每一個間格，都經過則師嘔心瀝血精心設計，令人歎為觀止，難度高過砌隻超級結構化的CDO。

長實(0001)啲樓盤，有冇去到「腸乾屎頓凸」的化境，順叔就唔知道喇，不過呢，假如量度一個圖則優劣的唯一標準，只係發展商股東利益，相信唔少行內人，睇到幾個近年好多人談論的樓盤，肯定會對幫長實打工的則師，寫個服字：咁都俾佢哋諗到！

好似最近廣被談論的海譽，順叔冇入過去，不過有線個《樓盤傳真》（呢個節目抵讚，準備買樓應該睇多啲），搵人入去一個千五呎的單位，度出嚟的地毯面積，唔計窗台，得八百呎多少少，所謂「窗台房」，比單位其他面積低咗大約半米，要行三級樓梯先去到，再睇睇個圖則的Elevation（立面圖），成楝單位的「工人房」，都向下凹咗少少，靠估的話，「窗台房」有可能其實係「冷氣機房」或者甚他機房，拎出街賣稱之為「工人房」， 再「送」一個無敵大窗台。窗台如果係「送嘅」，睇吓將來政府收緊發水限制之後，又會有幾多個發展商，會繼續「送」無敵大窗台。

地產公司的地產項目種類、圖則設計，查實好反映到管理層的思維及性格。長實大少李澤鉅，聽講讀土木工程，公司地產項目又係佢打骰，大家可以試吓想像，長實旗下則師，拎住份樓盤圖則，要出入長江中心10樓大少間房幾多次，最後終於過關之後，又會有乜嘢表情。

公道啲講句，個個都係搵飯食啫，好似長實班則師，老闆有乜要求，咪跟住做囉，唔通個個貝聿銘上身，吓吓同大少講「空間美感」、「人性化」建築設計？又好似老實樓神趙國雄咁，咪又係打份工，職責就係要賣樓，年終計數，咪又係講樓盤賣得幾快賣到乜嘢價錢？就算係大少，佢都係做返一個商家佬、一個上市公司高層的本份，見到機會有得賺就賺，同男人都見到靚女有得食就食一樣，好自然者。大少在長和系的角色，在守成而非創業，守業第二代，最緊要一分一毫都計到盡，大少在香港地產市場反映出嚟的風格，查實亦係做返一個好兒子的本份也。

之前唔係好明白，點解老實樓神咁大個人，特別鍾意扮鬼扮馬，一時扮車神，一時扮楚樓香仲要班女同事扮丫環，就算呢幾年賣樓，長實售樓部班友仔，都特別鍾意搞花臣，最近睇到一張圖表，呢個疑團頓時解開。

話說早幾日，「朱泙漫屠龍記」的博主，搵咗呢張圖表，叫順叔及一班網友估吓，係邊間地產公司：

大家可以見到，呢間「地產公司」，絕大部分資產，放在持股5成以下的聯營公司，資產負債表上，固定資產同埋投資物業，都非常單薄，同香港其他地產公司非常唔同，講到呢度，都無謂賣關子，冇錯，呢間「地產公司」就係長實。

至12月底，新地(0016)資產淨值3,283億元(港元，下同)，投資物業2,242億銀，佔咗68%；至6月底，長實資產淨值3,239億元，同新地差唔多，不過，投資物業只有275億，佔比只有8%！

望住呢組簡單的數字，一個好安全的結論，係長實作為一間「地產公司」，策略上，主力做住宅物業，不過唔客氣講句的話，咁多年以嚟，長實從未展現過做一級投資物業的能力，大佬，新世界發展(0017)都有個新世界中心，諗住重建成尖沙咀新地標啦，相對新地近年成功轉型做香港最大包租公，甚至可以講句，長實唔識做商場。

唔好話收租物業，長實做得有聲有色的豪宅項目，其實亦屈指可數，近年賣樓以樓面面積計，幾乎年年排行發展商榜首，唔係話老實樓神賣樓特別出色，而係話你知，長實呢間「地產公司」，主要在大眾化住宅市場(Mass Market)搵飯食，換句話講，如果政府大量復建居屋，公營房屋重新加入進行競爭，受影響最大的，正正就係長實。

在Mass Market賣樓，主要對象係冇任何置業經驗的上車一族，所以老實樓神成日要搞咁多花臣，增加自己同潛在買家之間的親切感，趙國雄去大陸推銷豪宅，又唔見佢扮楚樓香？

公道啲講句，當日銀行向散戶銷售迷仔債券，查實所有資料都公開，所有散戶投資者落搭前有冇睇、識唔識睇，唔可以怪晒銀行；買樓花都係一樣，買家明明見唔到實物，都唔去睇圖則（講緊屋宇署批出圖則而唔係經過粉飾的樓書圖則），或者唔識睇、唔識搵資料，一個願打一個願挨，完全合法，亦都唔可以怪晒發展商。

合法，唔等如合理，唔等如合情。

誠哥講生意之道，成日話唔可以搵人笨、賺到盡，因為賺一次冇下次，誠哥當日亦都講過一句「君子愛財，取之有道」，講緊有啲生意，就算合法、明賺，佢都冇做，因為過唔到自己「有道」的原則，咁即係誠哥自己都知道，「有道」及「合法」之間，查實有好大分別啦，如果「合法」等如「有道」，咁法家等如道家，韓非子等如老子，女人等如阿媽，底褲應該有褲袋啦。

絕大部分一手樓買家，置業等如人生最大的消費，最重要的投資，有今生冇來世，買過一次中伏，唔會有幾多人有下次，不過呢，長年累月落嚟，社會情緒終於會終極反彈，而家通街都嗌「地產霸權」，就係咁解。一間真正有水平的「地產公司」，唔應該只係識得話公眾針對自己，而係認真反思，在發展到今時今日的香港地產市場，咩先叫「可持續發展」。

講完，送嘅！

關連文章:
1. 買褲送褲袋（上）｜（下）
2. 老實樓神（上）｜（下）
3. 買樓自由行（上）｜（中）｜（下）｜（未完）
4. 發水秘笈（上）｜（中）｜（下）

伸延閱讀：
1. 長實回應「窗台房」足本完全版
2. 有線：海譽「窗台房」《樓盤傳真》
3. 有線：《樓盤傳真》Facebook網頁

同場加映：

底褲冇褲袋

買褲送褲袋（上）

本來無一物，何事建窗台。

今期由一幅網上瘋傳、窗台大過房的照片，睇睇點解香港住宅樓盤，越嚟越多窗台平台露台。

長實(0001)樓出晒名型英帥平靚正，一間公司對自己有信心，就唔怕公開自己的成功秘訣，上星期，副主席李澤鉅，竟然披露咗長實賣樓的最高商業機密，原來樓盤單位的窗台，查實賣大包益街坊，「送嘅」。

深受感動的香港人，相信唔介意被洗腦，請跟住大少的語氣，第一個字拖長少少兼特別大聲，跟住嗌一次：「送嘅」！

嗌多次：「送嘅」！

大聲啲：「送嘅」！

Yeah。

買樓送窗台，咁蝕底，仲可以一年賣樓賺幾十億銀，你估咁容易，唔信你試吓吖，拎條縮水兩個碼，不過有八個大褲袋的牛仔褲，喺條街大聲叫「買褲送褲袋」，睇吓班街坊行過，會用乜嘢表情望住你。 

香港人又係嘅，吓吓針對住長實，搞到大少連最高機密都要爆埋出嚟，好似屯門個盤海譽，一幅窗台大過半間房的圖片，都可以在網上瘋傳一餐，嗱嗱嗱，大少回應的技巧，值得所有香港公眾人物好好學習研讀，先放低一句「買樓送窗台」似非而是的金句，震攝全場心神，然後撻句類似「Net Area」的術語，當記者唔知佢講乜的時候，就換個概念，用唔會公開的「合約細節」，「大」班小記者冇睇「樓盤圖則」等公開資料，又話者「兇」人哋「睇唔明」、「冇做功課」咁。（Youtube: 記者朋友記住要做功課） 

長實所有負責賣樓的高層，好似老實樓神趙國雄咁，呢幾招已經練到出神入化，萬變不離其中，屢見不爽，大孖沙要在公開場合大石壓小蟹，冇可能同佢咬文嚼字，你贏囉。

咩係「Net Area」，查實亦無需深究，一個住宅單位，建築面積又好實用面積又好「Net Area」都好，呎價千變萬化，只係幫助消費者衡量單位價值的工具，去到最後的買賣合約，永遠只有一個單位一個價錢，例如海譽一個單位過千萬元，唔通你可以講價，同長實講唔使佢「送」窗台打個八折咩，掉轉頭，長實大少亦可以話，一千萬只係買一個窗台，其他面積全部「送嘅」，一樣得。

香港消費者學嘢喇，大少披露呢個香港最重要消費市場的最高機密之後，大家下次去買牛仔褲，記住要問吓個Sales姐姐，邊幾個褲袋係「送嘅」，Sales姐姐一定會被你撩得好開心，話唔定會打個折過你添。

以前的住宅樓宇，多數係方形柱體，近年絕大部分變晒多邊形，型過變型金剛；幾十年前，好似長實的城市花園、黃埔花園咁，名字簡簡單單，單位四四正正，邊度會話咁多窗台、工作平台、環保露台，而家長實做地產，由大少打骰，就冇以前賺得咁盡喇，今日長實的新盤，一個單位分分鐘送五六個乜台物台，生意真係難做。

要了解呢個變化，就要講多次「非結構預製外牆」呢個概念，近年新盤所有窗台平台露台，絕大部分都係「預制組件」，唔知點解政府認為好環保，鼓勵發展商多啲使用，豁免計算建築面積，即係唔使錢送俾地產商，所以近年新盤，「免費贈送」的窗台平台露台越嚟越多。

「預制組件」亦可以係貼住窗台露台、用嚟做間格的牆身，咪睇少一道10厘米厚100厘米濶的牆身，如果係「預制組件」，幾十層樓個個單位都有一道，加埋就好和味，所以近年新盤，古怪間格特別多，大家可以諗吓，香港則師係咪冇晒空間感，點解要花咁多時間，畫埋晒啲鬼五馬六的圖則，又唔見長實中環總部，搞到個變型金剛咁呢度一忽嗰度一件？

「買樓送窗台」已經唔容易，將幾百呎實用面積，變大一倍成過千呎住宅單位，造成豪宅的視覺效果，難度更加高，聽講傳說中的發水秘笈裡面，有一招「腸乾屎頓凸」，可以話係香港樓盤圖則的「超必Standard」， 唔係咁易chok，下回再續。

關連文章:
1. 買褲送褲袋（上）｜（下）
2. 老實樓神（上）｜（下）
3. 買樓自由行（上）｜（中）｜（下）｜（未完）
4. 發水秘笈（上）｜（中）｜（下）

伸延閱讀：
1. 長實回應「窗台房」足本完全版
2. 有線：海譽「窗台房」《樓盤傳真》
3. 有線：《樓盤傳真》Facebook網頁

同場加映：

底褲一見就老笠