港鐵「以股代息」安排

早排有網友問順叔，點解港鐵(0066)取消咗以股代息安排，順叔唔識答，直接將問題轉達咗俾港鐵有關人士。直接搵上市公司查詢，順叔都試過幾次，不過暫時為止，港鐵係第一個、亦係唯一一個，有回覆到財經茄哩啡的，以下係港鐵回覆的全文．．．

事實上，以股代息計劃的決議案是在二零零六年六月八日舉行的股東週年大會上獲得通過，而該計劃的有效期是直至決議案獲通過後第五年舉行的股東週年大會當日（即二零一一年五月六日）為止。因此，隨後宣佈派發之二零一一年度中期股息只以現金方式派發給股東。

公司已於二零一一年三月三十一日發給股東的以股代息計劃之通函中，提及以股代息計劃將於二零一一年期滿。此外，公司主席亦於二零一一年五月六日舉行之股東週年大會的講辭中，向股東帶出同樣的訊息，如下：

 「二零一零年度末期股息可提供以股代息的選擇是根據現行的以股代息計劃。但這計劃將於本大會後期滿。經檢討，本公司的財務狀況健康，因此董事局決定不在本大會上尋求更新該計劃的授權。」

二零一一年度股東週年大會的全部議程已上載於公司網頁www.mtr.com.hk。

公司確信會在每次匯報期間繼續就派發股息的安排（例如派息金額及派息方式）考慮所有相關因素包括現金流量及市場情況作出檢討。

至於政府收取股息的形式，查過去政府除收取現金股息外，亦有選擇收取股份以取代部份可獲的股息，例如於公司2010年年報中，第一百六十八頁的「股息」一項，便可查閱有關的安排，公司年報亦已上載於公司網頁，方便投資者查閱。

在此感謝 你的對港鐵服務的關注。

港鐵公司事務部

黑金經濟（下）

上回講到，「梁營悍將」劉夢熊，係就係同黑金好有關係，不過講緊「黑色黃金」，06年透過前身係「信用咭防盜」的國際資源(1051)，在馬達加斯加發現大油田，「遠景資源儲量」可能值9000億美元，被中央電視台列做商業欺詐案例，令夢熊大師在內地紅上加紅。

近排成個香港掛住「黑金政治」，冇乜人留意黑色黃金，近日油價又彈返上一百美金以上一桶，08年開始歐美日經濟齊齊叫救命，黑色黃金價格持續高企，疲元貴油，呢啲就係印銀紙、同埋市場對印銀紙預期的威力。

油價波動，做交通運輸生意的大型上市公司，近幾年幾乎全部有乜運行，的士司機就更加生意難撈，日前有的士司機慢駛要求求恢復燃油附加費，可見通脹壓力又開始有瞄頭。

今次司機大哥提出的要求，仲有一項可能好配合中港政治形勢轉變的素求，就係批評中外油商勾結組成「石油售價壟斷聯盟」，要求作為國企的中石油(0857)及中石化(0386)，退出呢個「聯盟」。

係咪真係有呢個寡頭壟斷的「聯盟」，唔知，不過要打破香港幾個主要市場壟斷，主要力量可能只有靠巨型國企。

香港政府好多政策，多年來不知不覺有心無意間，向巨型財團傾斜，大部分公用事業，都處於寡頭壟斷或絕對壟斷的市場狀態（包括地產市場），特首曾蔭權已經冇可能兌現就競爭法立法的承諾，如果今個月特首選舉，代表香港政商利益的一次重新洗牌的話，大家可以留意，未來5年，會唔會有政策改變，為大型國企南下開路，例如被香港人臭罵幾十年的電網及供電市場。

燃料供應，除咗中石油及中石化，其他主要「競爭」對手，都係外國公司，可能係最容易開刀的市場；仲有，煤氣(0003)的壟斷地位，係其中一個壟斷地位最高的公用事業之一，中央政府成日話供應天然氣嚟香港，係「挺港」措施之一，又唔知會唔會有政策空間，俾國企油公司，加入香港住宅燃氣市場喇。

以前每逢油價急升，中石化例必叫救命，原油煉油成本受浮動的國際市場價格影響，但在內地成品燃料價格受政策控制，煉一桶蝕一桶，今年中央政府唱到行，要搞燃油價格改革，對中石化呢隻壟斷性巨無霸，係一項結構性的政策改變，影響非同小可，中石化成個集團，近月動作多多，好多故仔，今個星期係咁先，遲啲再講。

關連文章:
-- 黑金經濟（上）、（下）

伸延閱讀：
1. GOW財茄台: 向熊胆說不
2. GOW財茄台: 夢熊黑金

新界風雲

「是誰令青山也變　變了俗氣的咀臉．．．」
「又是誰令碧海也變　變作俗流滔天．．．」

30年前，其實已經有一套《風雲》，無視電視劇，順叔上載咗呢套片的同名主題曲，霑叔作詞，仙杜拉主唱。

而家CCTVB的膠劇，個個主角都好似戇尻傻西，1980年呢套《風雲》，拍於新界城市化迅速發展之時，講緊新界人的變化，唔算經典，但當年的編劇，最少有嘢想講．．．

唱住嚟諗吓近年的新界地政問題，其實好應境．．．

講開新界，同場加映，謝謝收看。

人有相似（一）

人有相似（二）

關連文章：
1. 誰是上海仔
2. 夢熊黑金

黑金經濟（上）

人有相似（一）

人有相似（二）

今期開黑金。

先湊吓熱鬧，講吓「黑金政治」。呢個辭彙近排好有市場，不過香港人其實無需要跳線，首先，而家絕對未去到日本山口組捉啲債仔去福島核電廠開工、台灣陳水扁兩粒子彈咁跨張程度，香港就算有「黑金」，都仲要冚得好實，家陣非常時期，唔覺意俾香港人見到少少鬼影，咪當時運高開吓眼界。

99年之前澳門街日日讓子彈飛，現在太平盛世，搵單毒品案破吓都冇，紅吃黑，食硬，香港有西環中聯辦照住，團結收編招安五湖四海愛國愛港人士，化之合之為河蟹動員力量，「黑金」都變「白金」，天下太平可也。

新界咁大，居民又純真，唔擔保有冇一啲陰暗角落，地頭蟲加社團加有錢佬，三合為一會師，咁就有啲難搞，順叔見鄉議局所有喜慶場合，中聯辦高層幹部例牌係鐵腳，應該對形勢掌握得好好啩？暫時所有特首候選人，提到有關新界的政綱，都只係講丁屋僭建呢個「小問題」，應該就係咁簡單啩？

鄉議局係一個少數冇公開帳目的法定機構，新界雖然已經由遍地牛屎變做遍地黃金，唔少人發過豬頭，但係作為阿公的鄉議局，反而好莫財，起座新大樓，都要四圍撲水募捐幾年。順叔同唔少新界居民好老友，間唔中會搵本《鄉情》睇吓，鄉議局座新大樓，幾大地產商人人捐5球咁少，梗係唔夠，馬會竟然都捐咗4,200萬，如無意外，鄉議局係過去兩年，接受捐款最多的非慈善組織，連鄉議局都咁需要幫助，唔怪得政府要另外搞個乜嘢關愛基金了。

在流浮山的一個疑似「黑金」飯局，炒咗咁耐，最後原來只係一場至渾焗飯，中間人約中間人最後唔知邊個約邊個，「忠奸」難分，不過有理由相信，所謂「梁營悍將」的劉夢熊，呢單嘢應該幾無辜，因為夢熊大師係一個非常出色的「中間人」，唔會咁唔專業搞到唔湯唔水。

夢熊大師在國內，其實係一個名人，佢自己都話，Google吓佢個大名，分分鐘有成億個搜尋結果，當年九倉(0004)賣西隧俾「重慶李嘉誠」張松橋間港通控股(0032)，就係佢三呎不爛之舌得意杰作，當然仲有當年寶福「一億元買嚿擦子膠」事件。財經茄哩啡早排篇《渝港謎圖》講過，所有出色的「中間人」，一定有佢過人之處，一個中間人越高調，其實反映本身可以發揮能量越低，今次夢熊大師化身「梁營悍將」，相信都係發揮緊佢「生意是這樣做成」的奇技，夢熊大師的出現，只是今期特首選戰七國咁亂的另一寫照矣。

夢熊大師在國內最響朵一役，真係同黑金有關，不過係黑色黃金。

非洲國家馬達加斯加，除咗可能有恐龍，原來仲可能有石油，而且資源量可能極之豐富，在2006年，夢熊大師當日捽緊隻上市公司，叫做「信用咭防盜」，冇錯，就係今日的國際資源(1051)，話在馬達加斯加買咗兩大塊油田，再搵個二打六勘探公司的報告，話石油「遠境資源儲量」，高達21億噸，用當日每桶油價去計算，出現咗「9000億美元石油」項目的黑色黃金笑話。

呢單嘢，當日好轟動，因為上咗中央電視台《經濟半小時》，成為「反商業欺詐調查」系列報導之一，如果馬達加斯加真係咁多油，斷估一級國企油公司晨中進駐咗，今日「信用咭防盜」變成國際資源，桃花依舊，人面全非，不過都係拎住份勘探報告，同大家講「遠境資源儲量」幾多幾多，咁耐以嚟一毫子都未賺過，市值仲有成90億港銀，唔知道同「信用咭防盜」年代相比，其實有咩唔同。

咁錯，今期其實想講黑色黃金，不過財經茄哩啡「事事評論員」上身，吹多咗，下回再續。

關連文章:
-- 黑金經濟（上）、（下）

伸延閱讀:
1. 《鄉情》: 馬會毫捐4200萬俾鄉議局
2. GOW財茄台: 資本人物Dream Bear(Youtube連結)
3. GOW財茄台: Dream Bear反對活取熊胆廣告(Youtube連結)

夢熊黑金

夢熊大師同黑金 （講緊石油），又真係脫不開關係的．．．

向熊膽說不

夢熊大師，真係試過，以全國政協身分提案，建議立法規管養熊企業的。如果覺得食魚翅都有問題，更加應該向熊膽說不。

唔條片唔係純粹搞ＧＡＧ，養熊取熊膽汁，近來在大陸好多人關注，竟然成為一個「道德投資」的最佳教育課，有心人，應該響應吓夢熊大師呼籲，上去片未提及，ＷＳＰＡ的網頁支持，又或者，可以在呢個討論「歸真堂」上市的專頁，了解多啲情況．．．

治港鐵道（下）

上回講到，副總理李克強舊年嚟香港，掟低咗份「十二五」香港「被規劃」的「治港36條」，李克強前腳返北京，港鐵(0066)後腳宣布內地業務重大突破，以900元人民幣一平方呎地價，取得深圳龍華線一個住宅項目。

港鐵公司公共關係做得唔錯，但對小股東的投資者關係非常求其的公司，例如以股代息計劃，失驚無神取消咗，就冇解釋到點解。

港鐵上星期公布2011年全年業績，未有年報睇，根據已公開資料，內地業務盤數收埋咗，只係放咗條未計利息稅項折舊攤銷的大數，包括舊年6月投入服務的龍華線第二期的深圳業務，EBITDA由虧損4,100萬(港元，下同)，縮窄到大約600萬，講咗等如冇講。

港鐵每年折舊攤銷支出，大概32億左右，以一間千幾二千億規模的「中年」鐵路公司嚟講，細到出奇，因為「車站樓宇結構」等大型土木工程，使用年期長達100年，除非香港地鐵變到倫敦Underground咁殘咁舊，都人人可以忍受又冇人投訴，否則呢項會計政策相當唔合理，如果內地車站設施，同你講又可以用足100年，更加荒謬。

只係做鐵路的話，港鐵屬於少數絕對唔應該駛入內地的香港上市公司，冇納稅人長期補貼，法國大餐多嚿魚，投資幾百億銀俾你賺到雞碎咁多又點，要在內地保持香港的服務質素，賺錢機會更加近乎零，同香港人講有增長機會，吹水咩。

在「治港36條」當中，港鐵獨食其中一條，成為唯一直接進入北京領導層思維的香港上市公司，訊息其實相當明顯，就係港鐵已經成為「十二五規劃」的「政策工具」之一。

內地早幾年鐵路投資大躍進，搞成點，有眼睇，鐵道部今日成為全國最巨型債仔，欠債超過2萬億元人民幣，要阿公四圍撲水吊命，乘機大刀闊斧改革呢個超級獨立王國，例如政企分家，甚至傳緊好快會開放鐵路經營權俾地方政府，引入私人資本，呢個時候，港鐵「被歡迎」駛入內地，啱晒時節。

港鐵主要做城市內軌道交通，同鐵道部唔係太關事，以中國鐵路投資的規模，港鐵嗰兩條A信貸評級亦幫唔到太多，港鐵最大競爭優勢，唔係輸出「資金」，而係輸出「管理」，幫內地鐵路公司「升呢」，做顧問生意大有可為。

當然啦，「治港36條」從來唔係一份「大禮」，而係至2015年間香港「被規劃」的「施政報告」，唔會為咗俾生意港鐵做咁簡單，港鐵最大「政策任務」，就係加快香港同內地的融合，舉個例，深圳十二五規劃，講緊一條輕軌快線，接駁香港同深圳機場，大家可以睇睇會唔會要港鐵硬食，整劑高鐵續集。

港鐵貴為藍籌，市盈率貴過新地(0016)，得一個原因，就係用納稅人錢長期補貼股東，就算唔講土地資源，港鐵明明係鐵路公司，成立目的就係提供鐵路基建，阿公要起港深廣高鐵，包蝕唔賠，香港段資金成本竟然唔使港鐵揹，但同時港鐵又可以分享鐵路網絡擴張的經濟利益，呢個已經係最大的政策津貼，這份大利是，同兩鐵合併時，港鐵唔使硬食九鐵蝕錢資產，有異曲同工之妙，就係打劫納稅人荷包。

今日港鐵變成香港「被規劃」的「政策工具」，可唔可以好似以前留守香港的歲月，保持強勁增長，要睇同內地地方政府交手過程中，可唔可以繼續攞到「政策津貼」，例如好似深圳龍華線地產項目，如果出現第二劑，可以初步確定，港鐵可以將「鐵路加地產」的模式，搬上大陸，變成一間網絡貫穿深圳香港、能夠以基建優勢化解樓市風險的的鐵路巨無霸。

港鐵在香港，永遠處於納稅人及股東利益衝突之間，前者一直處於下風，一間長期得到大量政府補貼的公司，是穩建投資者的最佳選擇，最少，可以對沖一下港鐵狂加票價的風險。

關連文章:
1. 治港鐵道（上）、（中）、（下）
2. 中聯辦內望

伸延閱讀：
1. 港鐵「被歡迎」
2. 河蟹膠鐵（上）、（下）
3. 地主鐵路（上）、（下）

治港鐵道（中）

上回講到，中央官員有關香港「管治」的視野及思維，香港人未必時時看到感受到，但不知不覺間，政治經濟社會各方面被越箍越緊，例如中聯辦主任彭清華，舊年底接受內地傳媒訪問時透露，在08年全球信貸危機之後，成立咗一個「經濟小組」，呢個新發展就唔係咁多人留意。（彭清華訪問片段）

副總理李克強舊年8月訪港，大家可能冇為意， 3日行程重頭戲，其實係出席「國家十二五規劃與兩地經貿金融合作發展論壇」（而家話望返轉頭，呢場大龍鳳，肯定係係內地官員主導，所以由訊息發布、行程安排等，可以搞出咁多大頭佛），李克強在論壇上的主題演講，只係講咗6大政策方針，之後新華社出稿，罕有地將李克強的發言變大，變咗「支持香港經濟社會發展」的36項措施出嚟。

呢個被形容為「挺港36條」的「大禮」，其實係「治港36條」，甚至可以話係香港在十二五期間「被規劃」的「施政報告」，李克強返到北京，打開香港新聞，見到自己幾乎變成「小強」，輿論焦點放晒「黑衣人」侵犯香港人人身自由、差佬在港大禁錮學生仔等負面新聞，堂堂副總理應該會睇到嘔血。

直接被「點名」寫入「36條」、跑進中央政策思維的香港上市公司，唔計間接提到的港交所(0388)，只有港鐵(0066)。據新華社新聞稿，作為支持中港經貿合作的其中一項措施，中央政府「支持香港鐵路公司深化與北京、上海、深圳市地鐵建設和運營方面的合作，並擴展到杭州等市」。

李克強8月18日前腳踏出香港返北京，同日港鐵已經宣布，一項在內地發展的最重要突破，成功投得深圳地鐵4號線龍華線龍華車廠上蓋物業的土地，地價約20億元人仔，呢個係港鐵在大陸的第一個地產項目，亦係港鐵可以將香港「鐵路加地產」營運模式，照搬上大陸的最重要試點。（龍華線項目位置圖/明報資料）

呢個龍華線地產項目，樓面面積約222萬平方呎，即係話地價成本，大約只係900蚊一呎，港鐵可以邀請發展商參與，亦可以自行開發，項目所獲取「部分利潤」，將與深圳市政府分享，用於支持深圳市軌道交通的發展咁話。

大家去開深圳，不妨坐龍華線視察吓未來樓盤，睇睇有關項目，如果未來唔往返港深唔使過海關，坐地鐵要幾多時間返香港，又可以留意吓，深圳同香港毗鄰的鐵路沿線樓盤，賣緊幾多錢，900蚊呎地價聽落認真筍，接近賣大包益港鐵。

既然係筍價，就算內地地產商幾等錢使，仍然會好多人搶，但根據港鐵公司發言人當日向香港傳媒透露，深圳市政府有關龍華地塊的「公開招標」，前提條件之一，要擁有地鐵營運權，咁就擺明度身訂做益港鐵，如果掉轉頭在香港發生，香港地產大孖沙，肯定嘈到拆天。

全地球，唔會有好多條賺錢的鐵路，港鐵更可能係最世界最賺錢的鐵路營運商，2011年純利147億港元，純粹計算香港業務收入，分分鐘仲好賺過電能國際(0006)中電(0002)兩個壟斷性公用事業加埋，原因唔係港鐵搞鐵路能人所不能，而係壟斷鐵路沿線的土地開發權，全港所有地產大孖沙都要俾面。

財經茄哩啡舊年6月寫篇《地主鐵路》講過，港鐵變成一間上市公司之後，同「服務市民」呢個最初成立的目的，越行越遠，頭頂戴住AA級信貸評級光環，從來冇好好利用債市籌措資金，在香港起鐵路，條條都要攤大手板問政府要地產作為補貼，膽粗粗殺入大陸向左走向右走，幾百億資金投入賺嗰雞碎咁多，又唔需要地產補貼，大佬，如果內地鐵路搵錢容易，鐵道部唔會蝕到阿媽都唔認得，港鐵營運模式，變相要香港納稅人，透過香港土地資源補貼內地的鐵路建設。

當然，如果在內地起鐵路，個個項目可以好似深圳龍華線咁，可以筍價取得地產項目，同當地市政府對分盈利，又唔同講法，下回再續。

關連文章:
1. 治港鐵道（上）、（中）、（下）
2. 中聯辦內望

伸延閱讀：
1. 港鐵「被歡迎」
2. 河蟹膠鐵（上）、（下）
3. 地主鐵路（上）、（下）

那些唐英年

呢條片，穿插咗好多唐唐以前的境頭，例如２００２年第一日返政府工做工商及科技局局長，仲有２００３年開始做ＦＳ，一路勁食鑼絲。從來未見過一個政治人物，可以有咁多笑料。

香港網民惡搞咗佢咁多劑，已經出現ＦＡＴＩＧＵＥ，網上惡搞其實有助社會「消消氣」，幾多人啖氣落咗幾多就唔知，最少在順叔眼中，笑呢條友，多過憎呢條友．．．

順便介紹一個好搞笑的ＹＯＵＴＵＢＥ頻道，以「電影金咪獎」（兒童不宜）做主題，順叔剪呢條「唐唐十大金句」，靈感就係嚟自呢位網友ＭｏｖｉｅＣｕｔｔｅｒＸＤ，佢ＣＵＴ咗唔同的香港電影「十大金咪」境頭，中間又會穿插一個政評馬評的鏡頭，認真苦心造諧，所以話，香港網民政治意識好高的．．．

誰是上海仔

呢個可能係香港政壇最公開的秘密，唐唐，其實就係「上海仔」，亦係上海幫的「囝囝」。。。

如果大家留意智渾大師的佛偈，唐唐政途平步青雲，係「老江叫老董用唐唐」，唔係掉轉頭「老董叫老江」，唔怪得一傳「大江西去」，唐唐就被人打到變豬­頭了．．．

治港鐵道（上）

今期開港鐵(0066)。

中國的「全國人大」，應該係全地球最多人的「立法機關」，一年一度的人大政協會議，人民代表加全國政協，仲有各省市黨政軍領導，幾萬友塞喺北京圍威喂兩個禮拜，可以傾到啲乜嘢出嚟，就算唔熟內地「代議政制」，都可以斷定「兩會」呢場大龍鳳，主要作用係收風放料兼串連。

特首選戰埋牙，撞正人大政協會議，全國全港最親建制一班人，雲集北京開會，四圍向左走向右走，如果阿公有乜意見要統一思想，照計晨早乜都講晒，離3月25日投票日得兩個禮拜，仲係亂七八糟，連「黑金政治」都爆埋，可以想像，可能「中央」爭櫈仔遊戲的都未搞掂，坐館未傾好，冇乜時間「欽點」揸數，如是香港出現一場真正有得爭有得打的特首選舉。

講到「黑金政治」，其實香港人唔需要太神經緊張，杜琪峯套「黑社會以和為貴」都有得睇，「Jimmy仔」就算集食腦及狠辣於一身，智慧型古惑仔，在國安系統控制下，想唔做話事人都身不由己，呢個電影情節，反映咗一定政治現實，萬事有個譜。舉個例，如果社團人士做中間人，走去請法律界、教育界選委，睇吓請唔請得郁？大家反而應該思考吓，點解「江湖猛人」，可以請得郁鄉事派大佬，如果社團人士在香港政治世界真係有活動空間，這種空間究竟在哪裡，透過目前制度產生的行政長官，又會點處理呢種空間。

唔會太多香港人咁天真，以為政治遊戲真係君子之爭乾乾淨淨，今次圍繞特首選舉發生的一齊，引蛇出洞的讓有銀士表態，後發先至的搶奪民意高地，關鍵時刻踢爆黑幕致對手於死地，種種手段謀略，唔好話順叔呢類財經茄哩啡，相信香港好多政商精英，都上咗一堂深刻的政治課。

為咗了解呢場被喻為「西環對中環」、「共產黨對地產黨」的惡鬥，香港人都係時候唔好成日掛住「國金外望」，多啲留意西環呢個「政治中心」，發生緊乜事。中聯辦主任彭清華，平日對住香港記者冇乜兩句，舊年12月在西環中聯辦接受內地傳媒訪問，提供了罕有的「中聯辦內望」的畫面及對話，順叔在網誌上載了相關訪問及連結，建議各位上去幫襯吓。

大部分香港人概念裡面的中聯辦，可能係門口隔住示威者的鐵碼，但係中聯辦42樓頂層，原來係一個環迴觀境台，握守維港西面入口汲水門，套用彭清華在訪問中的說話，如果維港是一「錢袋子 」，中聯辦位置上就鉗住了「錢袋子的袋口」，事實上，彭彭在訪問中提到，08年全球信貸危機期間，中聯辦成立了一個「專責小組」，呢個「配合特區政府防範系統性風險」的小組，「如果有需要，就一定會繼續存在」，在河水不犯井水的那些年，這種直接介入香港財金政策的工作小組，就算存在，亦不會在傳媒公開，可見中央政府鉗住香港「錢袋子的袋口」，已經開始由無形變得有形，枱底變得公開。

中聯辦頂樓的視野夠廣，裡面張香港地圖，亦連埋成個珠江三角洲一齊劃，彭清華在訪問中，拎住份地圖講香港的「十二五規劃」，開口埋口，就係副總理李克強去年訪港時宣布、有關香港的36條措施，睇到呢度，順叔恍然大悟，所謂「挺港36條」，只係有意無意間令香港人在自我婑化的辭彙，真正的形容詞，應該係「治港36條」，令香港進一步融合內地經濟，插翼難飛，同時發揮香港優勢，服務中國金融市場及區域經濟，齊齊整整的一套香港經濟發展藍圖思路，香港人人話中央「挺港」、「送大禮」的時候，不經不覺間，香港已經「被規劃」了。

在這「治港36條」裡面，跑進國家領導人管治思維，被李克強提及的香港上市公司，只有一家：港鐵。

下回再續。

關連文章:
1. 治港鐵道（上）、（中）、（下）
2. 中聯辦內望

伸延閱讀：
1. 港鐵「被歡迎」
2. 河蟹膠鐵（上）、（下）
3. 地主鐵路（上）、（下）