Best Blogger Tips

2011年4月1日星期五

屁股聯想(下)

(刊於2011年4月1日am730)

上回講到,聯想集團(992)企業策略冇方向感,產品開發冇創意,樂Pad對iPad,只會跟著潮流屁股走,但聯想集團以及母公司聯想控股,在體制改革方面,充海創意,大膽到你唔信。

1984年,中國出現第一批國有股份制企業,當年國企未擺脫大鑊飯思維,冇乜邊間唔係蝕到燶,搞股份制市場改革,「國有私有」意識形態兩陣激爭,踩鋼線隨時人頭落地,聯想系雛型,就係喺咁環境下出現,熟於第一批股份制企業,更係第一批員工批股公司。

根據聯想集團自己表述,當年柳傳志帶領10名中國計算機科技人員,拎住20萬元人民幣(下同),「在北京一處租來的傳達室中開始創業,年輕的公司命名為聯想」,對當年所隸屬老頂,中科院計算所,隻字未提。

聯想北京總部,設有一個巨型資料室,裡面裝滿編制好的聯想發展史,裡面資料歷史價值幾高,唔知,不過聽聞柳傳志讀歷史,三日唔埋兩日,會迫自己看看史書,應該好清楚,歷史可以是最容易偷天換日的文學創作。

聯想孰國有孰私有,柳傳志係國企經理人定係民營企業家,無謂深究,公平講句,聯想創辦當年,如果冇柳傳志大膽創業精神,應該只係另一間蝕到燶國企,唔會有今日聯想,不過同時,如果冇國企身份政策支持,亦唔會有今日聯想。

在2009年,聯想控股股權結構出現大變動,由於涉及非上市母公司,香港投資者冇乜留意,根據股權轉讓協議,中科院旗下國科控股,將29%聯想控股股權,作價27億元,賣畀牌面上係民企的中國泛海,中科院持股降至36%。

聯想控股旗下,聯想集團市值逾4百億,神州數碼(861)市值亦過百億,仲有地產及私募基金生意,總資產閒閒地過千億,點解29%股權只係賣得27億,中科院點解咁願放棄絕對控股權,股權掛牌轉讓點解有冇其他人競投,一連串大問號,聯想控股正計劃香港招股,可能到時會有線索提供答案。

柳傳志早兩年重新掌舵,內地傳媒將佢同蘋果喬布期復出相提並論,其後幾乎每一個月,都有一篇傳媒專訪出街,國內海外,享負盛名,應該有金剛不壞之身,作為科技界教父級人物,聯想作為科技界代表企業,如果只係另一個處心積慮幾十年,在國有私營灰色地帶搵著數的故事,會令人相當失望。

本期標題,原為「屁股聯想」,無意賣弄不文,只想指出,作為標榜科技創新的上市公司,聯想創意,值得屁錢,市盈率計,估值高過同行逾倍,更貴過蘋果,中國溢價,喺聯想身上,表現無遺。



伸延閱讀:
#

2011年3月31日星期四

屁股聯想(上)

(刊於2011年3月31日am730)
今期開聯想集團(992)。

美國蘋果公司推出iPhone,成為風靡全球潮玩,聯想有樣學樣,推出「樂Phone」,又叫LePhone,無論中文定英文,都有啲不倫不類。

消費商品唔怕生壞命,最怕改錯名。今個星期,聯想在上海正式發布推售平板電腦「樂Pad」,挑戰蘋果iPad,LePhone在上海,甚至喺法國都可能賣得出,不過喺香港賣「樂Pad」,廣東話發音,同賣某器官太相似,肯定唔會有乜市場。

電玩潮現,邊樣功能受消費者歡迎,例如唔要鍵盤只要輕觸式屏幕,個個都跟風照抄,不過老翻到連名都差唔多,「樂Phone」對iPhone,「樂Pad」對iPad,聯想山寨精神,又確係過份咗少少,仲要唔係近年先出現,早兩年Sony隨身攜帶個人微型電腦Vaio系列,標榜可以插喺褲後袋出街扮潮,興過一陣,聯想亦嗱嗱臨推出類似產品,不過比人哋厚咗一截,被用家批評,要有個大屁股,褲袋先插得落。

聯想,就係一間只識得跟住人哋屁股走的公司。

企業策略,聯想亦好似冇乜方向感。中國中產階級開始大量湧現、消費市場開始起飛之時,衝咗去美國收購IBM個人電腦業務,為走出去而走出去,人棄我取,高價買嚿豬頭骨,驀然回首,發現最容搵錢地方,其實係自己地頭,時至今日,呢邊IBM密密沽貨,聯想密密回購接貨。一單大刁打響國際知名道,當係宣傳費,可能係最大無形價值。

開發新地域市場,聯想行咗兔枉路,主打產品,兜兜轉轉亦行咗唔少大圈,早幾年賣咗手機業務,後來見個人電子產品市場越做越旺,發現唔對路,又高價翻兜,唔怪得公司業績,起起跌跌非常唔穩定。

作為老牌國產科技股代表,聯想標榜自己係一間「極富創新性的國際化公司」,作為公司老闆,柳傳志亦係國內科技產業、企管界教父級人物,去到內地書店,最經常出現封面人物,一個係馬雲,一個就係柳傳志,都係一流吹水高手。

產品開發,聯想冇乜創意,體制創新,呢間公司當年其實充滿創意,好識點樣在中國特色主義灰色地帶,大打擦邊球,下回再續。

伸延閱讀:
#