(刊於2010年1月15日am730)
港交所(0388)CEO裁周文耀，今日LAST DAY，在任六年，周生最大LEGACY，就係乜都冇做，冇出力開拓新收入來源，更冇做過任何具爭議性改革，例如董事禁售期，一見爭議即刻縮沙，季度業績報告、創業板廢存問題，都係得個拖字。可能呢啲就叫LAISSEZ-FAIRE，周生在任期間，港交所市值膨脹超過十四倍。
兩代CEO，唔係講李小加，而係之前果位鄺其志，呢位前官場神童，本來有望成為香港財爺，不過十年前離開政府，加入港交所做CEO，可能帶住太多官場傲氣未酬壯志，大刀闊斧改革，仙股事件，本意要保議小投資者利益，結果搞出大頭佛，03年再次拂袖離開，周文耀上場，食正港交所03至07黃金五年。
KC可能個人太叻，意態氣度，總係帶住一絲不屑，過去十年仕場商場兩個轉折，第一次不屑，賠上政治前途，第二次不屑，跌左幾億。點解咁講，KC離任前後同時沽清港交所股票，當時港交所股價唔夠十蚊，認股權行使價七個幾，真正落袋得幾百萬。
投資者買港交所股票，唔會因為呢間公司，作為監管機構，有幾大牙力，而係作為一個賭場，有幾多人開盤、幾多人落注，周文耀無為而治，平平安安坐足六年，329萬股認股權行使價八個幾，市值接近五億。
十年人事，兩代港交所CEO，所以話，決定命運嘅，唔係能力，而係性格。
 |
| 我手OPTION百幾蚊... |
伸延閱讀:
1. 鄺其志為事業入籍澳門
