Best Blogger Tips

2010年3月19日星期五

亂噏滙豐

(刊於2010年3月18日am730)

滙控(0005)三月初業績,又交唔到功課,大行幾乎齊齊發小報告,轉軚唱淡,當中高盛,原本睇122,上星期五,大幅調低到91,仲將大笨象,剔除於「確信買入名單」。

高盛呢個所謂「確信名單」,唔知信乜,2月24日出報告,先至將滙控09年純利預測,調高一成,仲話「相信」大笨象,炒房會繼續賺大錢、集團息差回穩、亞洲新興市場貸款增長勢頭良好云云,到3月12日,變咗「相信」滙控,炒房冇咁賺錢、淨息差繼續受壓、貸款零增長,所以將評級由買入降至中性,亂噏滙豐。

咪話順叔剩識車馬後炮,2月19日,財經茄喱啡寫「大笨象再跳舞」,講過高盛、美銀美林等大行,將滙控目標價,放在百二蚊樓上,太過進取,原因好簡單,都唔駛計又淨息差又貸款增長咁複雜,睇一樣: 大笨象舊年世紀供股,發行50幾億股新股,股本大幅膨脹,計埋條數,百二蚊滙控,市值超過二萬億,仲勁過07年,每股百五蚊高峰時期,唔係冇可能,不過可能要等好耐咁解。

判斷世紀供股對滙控影響,成隻大笨象秤又得,斬件睇每股攤薄效應又得,09年賺唔夠60億美金,全部派翻晒出嚟,每股派息都係34美仙,少咗幾乎一半,即係話滙控集資後多咗錢,但賺錢能力暫時未見太大改善。

月初滙控業績香港記者會,鄭大班閃咗去北京政協開會,仲坐足兩個星期,做得滙控執董,秒秒鐘幾千萬上落,斷估唔會願意花半個月做政治花樽,鄭大班在北京越耐,唔代表滙控內地上市好事越近,反而應該睇成,成事難度越高。

更何況,滙控最新份成績,唔係話大家知等錢駛,而係坐住舊錢唔知點駛,股本回報率肥晒大佬,就算成功內地上市,隻象谷大隻咗,每股盈利溝得更淡,習慣咗以為買滙控有買貴冇買錯、長坐收息實冇死嘅香港投資者,係時候反思一下。