2010年9月10日星期五

港深特區(下)

(刊於2010年9月10日am730)

深圳香港
港深雙城記,一個行政特區,一個經濟特區,要融而為一,易融者,由人口流動到經濟活動,已經融咗,未融者,由城市規劃到金融市場,有難度,但屬必然發展趨勢。

市場上可比較兩點,如果中間出現不合理差距,長遠必定收窄,例如深圳骨場(正骨)鐘錢,過去十年,已經同香港拉近好多。整體樓價,亦係一樣,香港人投資組合裡面,絕對應該包括大陸物業(買入時機後話),不過香港人習慣彈丸之地,對大者會規劃唔會有感覺,如果連前海地理位置都唔知,就要惡補吓珠三角未來規劃,香港地政總署測繪處,唔該唔好咁落後,畫翻多啲連埋深圳河以北地圖同埋規劃大綱。同樣道理,又唔該港鐵(0066)管理層,介紹內地鐵路沿線,提供多啲規劃配套資料,唔好剩識得教人揼骨消費飲飲食食。

近排佔據香港金融頭版最多字眼,肯定係人民幣,快馬加鞭,作為人民幣結算行,中銀香港(2388),從來冇解釋有關業務實際操作,產生收入又有幾多,但今年已經跑贏所有冇併購消息銀行股,要突破歷史高位,絕對冇難度。

大陸人鐘情香港資產,因為容易搬出搬入,又有健全法制保護,相對放在國內,安全感大得多,樓係咁,股票都係咁,千祈唔好相信,深圳上海交易所,會影響港交所(0388)競爭力,港股直通車,遲早會開出,等緊一個資本帳開放金融試驗區,港交所可以話係,極少數只會買貴唔會買錯嘅上市公司。

最高難度,係體制融合,一個行政特區,一個經濟特區,一個要向中央納糧,一個自己閹埋唔知做乜,一個鼓勵生三個,一個奉行一孩政策,人人講港深合作機遇大過競爭,其實多餘,大家知道乜事,不過唔咁講出口: 一個廚房,點可以有兩個大廚。

香港基本法,對特別行政區地域面積,並冇任何限制,河套區可以劃入香港版圖,收編埋羅湖又點? 最徹底改革,其實係香港同深圳合併,一個政府一套規劃,齊齊用人民幣,普選立法會議員,同時變成人大代表,夠晒民主,深港人治港深超級特區,變成社會主義吸納資本主義終極試驗室,搞得掂,威過東西德合併,香港選特首跑馬仔,邊個夠膽提出港深合併,應該最少有二百萬深圳選票支持。

根據改革開放現代化「三步走」大計,到2020年,全國將變成惠及十幾億人口小康社會,申辦2023年亞運,香港一定唔得,加埋深圳,應該有得諗。放眼四十年,到2049,中共建國百年基業,目標係建成「富強民主文明和諧的社會主義現代化國家」,請大家記住,到時五十年不變大限,已經過咗期兩年。

超級大課題,時間篇幅所限,只能拉雜而談,唔好掟雞蛋。



關連文章:
1. 港深特區(上)(下)

伸延閱讀:
1. 遠東經濟評論: Beijing moves to curb Li Ka-shing's influence over China's ports
2. 全國政協委員提案港深合併
3. 高登論壇: 香港人點睇港深合併
4. 天涯論壇: 大陸人點睇港深合併

港深特區(上)

(刊於2010年9月9日am730)


今期開港深融合。

深圳特區三十而立,鵬城展翼,舉市慶歡,突然殺出長和系老闆李嘉誠,坐上主席台,做壓軸企業代表發言,仲有國家主席胡錦濤破例高規格接見,香港首富,搶盡風頭。

回帶十年前,2000年11月14日,深圳慶祝特區成立廿周年。當日最高領導人仲係江澤民,去深圳出席慶典之前,仲喺北京發火怒片香港記者「太簡單、有時天真」,當時香港政壇焦點,係董建華「競選」連任,財金圈熱話,講緊阿公要壓抑誠哥影響力。

事源11月初,當時仲未執粒嘅《遠東經濟評論》爆料,話中央唔想和黃(013)壟斷大陸貨櫃市場,交通部指令多個沿海城市,限制和黃擴展。單嘢北京否認咗,不過事實係,和黃其後減持部分內地碼頭,新項目再無法取得控股權,連以外資身分破例取得控股權嘅深圳鹽田,持股亦減到唔夠五成。作為長和系投資中國旗艦,長建(1038)策略急變,踏入21世紀後,由專注神州,變咗放眼全球,誠哥京中人脈斷線之說,從此不徑而走。

十年人事,今日胡主席突然捧誠哥上枱,幾忙都要見一見,只可以話體現咗「重商主義」,但未必代表誠哥終於搭通天地線,埋到當今最高領導身。

深圳係經濟特區,繼往開來,融合香港,搵個有貢獻、有代表性外資表揚吓,好合理,平心而論,唔搵港資,唔搵誠哥,唔通搵台灣郭台銘咩。

胡主席讚誠哥,為國為港為鄉,做咗好多「實事好事」,仲鼓勵佢要繼續運用影響力,促進粵港深合作,發揮更大作用。咁大頂高帽笠落嚟,長和系未來幾年,點都要在深圳,做番一兩個代表性項目,多做幾件「實事」,但投資還投資,肯定唔會有數碼港呢類筍貨,擺明官商勾結,破壞北京在香港認受性。

大陸官方喉舌,近年經常吹捧富豪行善,無需阿公分餅,自願性財富再分配,配合胡主席個和諧社會節拍。誠哥已經講過,在九月,會公布一個創意性公益計劃,事先張揚,斷估唔會小兒科,今次再被為愛國愛港企業家典範,分分鐘臨時加碼,將件「好事」再做大啲轟動啲,甚至惠及深圳居民都有之。

「胡李會」呢場大戲,商界大孖沙,可能係主要目標觀眾,香港地產富豪,除非成副身家捐出,短期內好難超越誠哥基金會多年工作。要出位,就要食腦,香港人現時對發水盤縮水樓深痛惡絕,邊個地產商,如果帶頭推出超實用樓盤,講明唔呃秤,分分鐘成為最佳銷售綽頭,熱賣利己之餘,亦係「好事」一件。

下回再續,睇睇香港深圳,一個行政特區,一個經濟特區,搓埋一舊,有乜睇頭。



關連文章:
1. 港深特區(上)(下)

伸延閱讀:
1. 遠東經濟評論: Beijing moves to curb Li Ka-shing's influence over China's ports