2011年9月16日星期五

咁就三年(下)

(刊於2011年9月16日am730)


上回講到,雷曼兄弟爆煲3周年,全球仍然被債務危機籠罩,不過金融巨企相對08年,穩陣咗好多,反而今日輪到政府債台高築,印銀紙救銀行救經濟之後冇錢還咭數,銀行危機演變為國債違約危機。

08年全世界望住一間間金融巨企骨牌式輪流瞓低,最恐怖之處,係當時信貸投資產品太複雜,冇乜人明白每間金融機構坐住乜嘢資產,好似一個個無底深潭,今日國債規模雖然更大,不過最少好多人睇得明問題有幾嚴重,炸彈亦唔係拆無可拆,最少可以收買吓時間。

例如歐債問題,歐盟其實得兩個選擇,一係解體,一係進一步融合。全世界都建議,歐洲應該發行聯合債券(Eurobond),呢個方案變相要德國法國等財政相對健全國家,在融資成本上補貼其他唔生性兄弟,本土政治都冇免費午餐,歐盟更加冇咁團結,未見棺材唔會流淚。

銀行爆煲之後可以渣都冇,一個國家就算違約都唔會在地球上消失,政府要處理赤字問題,市場唔會要求一夜之間搞掂,最緊要有清晰路向及時間表,歐盟大可以拋出一個過渡性方案及時間表, 5年好未,發行聯合債券又好,歐洲央行印銀紙頂住先又好,接受財政補貼國家,如果5年內仲係冇錢還債,一係要被踢出歐盟,一係要交出部分財政收支主權,咁樣最少可以解決燃眉之急,拖多幾年。

另一個可以出手碌住咭收買時間者,就係中國。呢幾日傳緊意大利向中國求救,買債買銀行,單嘢流料居多,如果歐洲發行聯合債券,中國多數會舉腳支持,幫得你意大利撲火,希臘又攤大手板,幫得幾多個?

中國近年勁插美國,處理美債及美匯問題唔負責任唔講國際道義,等陣先!乜匯率唔係「內政問題」咩?美國副總統拜登,上個月訪問中國,為國家副主席習近平下年訪美探路,習近平講咗一句,在保持國際金融安全上,中美應該共同發揮「負責任、建設性的大國作用」,「共同提振市場信心」,人民幣未係國際儲備貨幣,呢句話未必代表中國人民幣匯率問題取態有變,不過好明顯,北京隨時準備出手,不過要睇吓可以攞乜咩返嚟,中國會點出招,歐美國家點還,未來一兩個月G20峰會及之前準備會議,會有多少線索。

換句話講,呢期國債危機,唔會係解決方法,不過要克服者唔單止係金融問題,仲要係政治、外交問題,好死唔死,2012可以話係全球選舉年,美國總統大選,中國又十八大,世界強國領導人大換班,令問題變得更加複雜。

08年之後,中央銀行家已經幫政客收買咗3年時間,未來銀紙換時間空間已經越來越細,講到尾,今手國債危機,之唔係市場對政府信心危機。

伸延閱讀:
1. 閱讀咁多做乜Q!
#

2011年9月15日星期四

咁就三年(上)

(刊於2011年9月15日am730)

2008年9月16日的報章頭版
(留意吓,份份都係雷曼靚女交易員Elizabeth Rose)

2008年9月15日,美國雷曼兄弟宣布破產,將一場所謂「金融海嘯」推向高潮。咁就三年。

今日開始,應該全球財經傳媒,會有一大堆鑑古知今式評論文章,海嘯咁湧出嚟,斷估睇都睇唔晒,睇得晒都睇唔明,睇得明都睇唔通(最好策略可能係乜都唔睇)。

點解咁講,因情況真係咁複雜,例如要拆解歐債危機呢個局,入場券係要熟悉歐洲政治,要睇通一個國家政治發展已經夠難,唔好講廿幾卅個國家,兵慌馬亂,唯一可以肯定一點,就係當年一場危機仍然未結束。

過去3年,可以話係中央銀行家印銀紙幫政客買返嚟。08年銀行出事,出現系統性風險,國家撐住,不過救銀行直接成本,加上經濟放緩間接成本,而家要找數,輪到國家出事,出現國債違約風險,早排標普調低美國信貸評級,以致近年沒完沒了嘅歐債危機,都係當年碌爆咭後遺症。

3年前歐美政府出錢出手打救金融機構,因為AIG、 RBS呢啲金融巨人,大得不能倒,瞓低就攬住一齊死,一間金融機構幾大,都大唔過一個國家啩?咁如果希臘或者意大利真係冇錢還,歐盟又會唔會冒住解體風險睇住佢地死?當然,亦有可能發生08年9月15日情況,雷曼兄弟大,不過未大到不能倒,美國當年容許危機局部爆發,再拖全世界落水拯救地球呢一招,未必冇可能重演。

好似滙控(005)呢類扎根歐洲多年金融機構,喺歐洲多個國家有經驗有人才,都未必睇得通全局,全球裁員開源節流,好明顯要尚算好天收埋落雨柴,近排股市跌到一仆一碌,亦反映機構投資者驚重蹈08年覆轍,冇咁多人仲喺賭場裡面博大細。

另一個值得比較地方,其實正正就係金融機構資產負債表,全球巨型銀行,唔計中國國企銀行,近幾年已經保守咗好多,好似滙控咁︳總資產相對08年,幾乎冇乜點增加到,大部分銀行杠桿倍數低咗唔少,冇乜太多表外資產,仲因為監管機構收緊資本要求,個個排隊賣嘢撲水,銀行體系肯定較當年更加安全,從正面角度睇,由監管機構到企業家到投資者,風險意識相對3年前高咗好多,真係出事應該都冇08年咁大鑊。

下回再續。
伸延閱讀:
1. 閱讀咁多做乜Q!
#