2012年1月19日星期四
官紳同心
過年了，萬事以和為貴。唐唐拜票，去到元朗，同埋梁福元手拉手，就係要同大家講，新界好多村屋，居住環境唔係咁好，單位仲好狹窄添，大家應該體諒包容...
新界莊丁冇地起屋，應該問吓，愛國愛港更愛鄉的福元哥，點解大棠荔枝山莊，又可以佔地幾百萬呎，呢種圈地秘笈，全香港唔會有好多人識．．．
唔怪得林鄭唔撈了．．．
伸延閱讀:
1. 東周刊: 元朗大棠荔枝園涉嫌擅郊野公園土地用途
2. 太陽報: 梁福元霸郊野公園 無牌酒家被控37次
3. 財經茄哩啡: 新界阿凡達（上）、（中）、（下）
新界莊丁冇地起屋，應該問吓，愛國愛港更愛鄉的福元哥，點解大棠荔枝山莊，又可以佔地幾百萬呎，呢種圈地秘笈，全香港唔會有好多人識．．．
唔怪得林鄭唔撈了．．．
蘋果日報： 侍貓侍狗不侍豬 林鄭月娥約滿唔撈
伸延閱讀:
1. 東周刊: 元朗大棠荔枝園涉嫌擅郊野公園土地用途
2. 太陽報: 梁福元霸郊野公園 無牌酒家被控37次
3. 財經茄哩啡: 新界阿凡達（上）、（中）、（下）
 |
| 照片來源： 高登 |
文明中旅（下）
香港中旅做得好... | 連繫至親感受至珍 |
上回講到，中旅國際(308)管理層出事人事變動，之前做華潤電力(836)老總的王帥廷，過檔做中旅阿頭，新人事有望帶嚟新作風。
華潤集團一大抽上市公司，香港藍籌已經有3間，一隻華潤電力市值近8百億元(港元，下同)，已經等如中旅10倍，王帥廷在華潤集團係副董事長兼副總經理，在中旅母公司「港中旅」，官至副董事長兼總經理，叫做升官。
細有細做，都係幫阿公管理國有資產，相對已經係巨無霸的華潤，資產總額約550億元的港中旅集團，影響力細咗，但發展空間更大，作為集團唯一上市資產，中旅已經殘到貼地，認真做的話，唔難做到成績。
中旅之前兩年業績大倒退，兩年派息每股得1港仙，主要原因係近年投資的度假區資 產及裝修，可使用年前由40年減至20年，折舊開支大增，兩年純利加埋得1億銀多少少，中央政府近年大力推動旅遊業，視之為經濟向內需轉型的戰略工業之一，港中旅唔上市，唔知業績做成點，但係睇住中旅盤數的話，國資委應該炒哂班管理層。
張學武
| 
王帥廷
|
業績唔見得人，股價當然插，就喺呢兩年低潮期，中旅高層及員工，包括前主席張學武，獲得一批新認股權，加埋大約1.25億股，今年6月開始可以行使，行使價HK$1.7元，王帥廷如果有認股權，作價可能更低。
舊年開始，中旅開始進入盈利催谷期，上個月開始，密密回購股份，大家可以留意呢個動作會唔會繼續，中期業績前發出盈喜，同大家講已經折舊完畢，至去年6月底半年，純利已經彈返上3.5億元，仲話派息比率會保持50%咁話。
假設中旅盈利水平，回復到09年前的5、6億元水平，市盈率12、3倍，市帳率0.67倍，以一間收入跟內需消費直接掛鈎的企業嚟講，可以叫做平，股價上返HK$1.7元呢個管理層認股權行使價，唔會有難度。
港中旅在官方網頁提到，到2015年，目標係總資產膨脹兩倍至1,300億元，每年總利潤超過70億元，如果國資委真係有牙力，推動旗下百幾間央企，認真重組下亂過狗粥的業務，包括將千幾二千間國營酒店，轉劃俾幾間主要從事旅遊消費的企業的話，港中旅呢個五年計劃唔算太進取，問題係母公司想中旅發揮咩嘢角色。
在中國做旅行社競爭大，國營企業唔夠靈活，好難同携程網呢類民營旅遊網競爭，最大優勢其實做陀地，霸住名山勝地景點收入場費，老土擾民但夠晒穩陣，中旅就係向呢種所謂「旅遊資源」業務轉型。中旅本來計劃分拆酒店業務上市，繼續同阿媽收購景區業務，月前因為市況差，擱置有關計劃，其實唔係冇道理，旅遊概念在A股當炒，另一間旅遊業央企國旅(601888)，市盈率35倍，港中旅就算有靚資產，都應該放喺A股，唔係注入殘到無倫的中旅，港中旅如果選擇A股市場做發展平台，中旅難逃僵屍化紅籌的命運。
舊華潤: 紅色
| 
新華潤: 綠色
|
中旅有冇新作風，講到尾要睇管理層有冇大志，呢方面可以從細眉細眼的動作感受得到，例如中旅仲坐住間三流電廠，好心就益下華潤電力晨早賣咗佢，唔好俾人亂七八糟的感覺，王帥廷做開藍籌老總，更識得同機構投資者打交道，應該好明白呢個道理；又例如，大家可以行入香港中旅社觀察吓，招牌會唔會搞得光鮮一啲，當年華潤超市，由紅色變做綠色，就引證咗華創(291)專心搞零售的決心，亦成為股價轉向分水嶺。
企業形象同國家形象一樣，細微處見真實力，中國話搞「文明旅遊」，已經十一五講到十二五，順叔一位港燦網友話齋，經過70年代的肅貪倡廉及清潔運動，香港才真正晉身先進城市，中國要用「軟實力」同西方文化拗手瓜，同樣要做好呢兩大工程，熱切期待大陸同胞不再隨處便便四圍放飛劍的一日。
關連文章:
1. 文明中旅（上）、（下）
2. 文明旅遊
3. 中旅之旅(上)、(下)
2012年1月18日星期三
文明中旅（上）
近來打開香港報紙，通常有一兩單嘢，講吓內地遊客或者大陸同胞的言行舉止，例如在巴士行張摺枱食橙、喺產房打邊爐、大小二便痾落洗手盤咁。
好似早幾日，幾個拖住一抽旅行喼同兩三個細路的內地遊客，坐九鐵食童星點心麵，有香港人睇唔過眼，出聲話兩句，內地遊客可能態度太串，嗌到好勞嘈，一段「香港人大戰大陸人」視頻，在互聯網瘋傳。
或者唔係好多人講得清楚，本是同根生，奧運會中國攞金牌會覺得高興，但係面對身家爆發眼界未開的大陸同胞，又會咁易扯火，反映中港文明水平差距又好、兩地文化衝突又好，芝麻綠豆的小事變成新聞，在香港似乎越嚟越有市場，有大眾傳媒甚至將呢種，「唔知點講」又好似「唔係好講得出口」的情緒，叫做「仇內」。
又「仇富」又「仇內」，香港人認真唔得閒，但呢類事件，在社交網站傳播速度，快過茉莉花粉，唔係講笑的，上次廣東道Dolce & Gabanna旗艦店千人挑機，已經係一個好大警號，如果有大陸同胞，自由行隨街吐痰慘被香港人爆樽，咁就大件事兼大吉利事了。
大家仲記唔記得女導遊「阿珍」？只係年半之前的事，阿珍在旅遊巴上狂炳內地遊客的視頻，被大陸同胞放上網，搞出大頭佛，當時香港主流傳媒，幾乎一面倒鬧阿珍唔啱，如果呢件事發生在今日，阿珍就算唔成為英雌人物，斷估亦唔使被釘牌。就快過年旅遊旺季，大家又記唔記得女導遊「阿蓉」？如果又有內地「旅霸」，在香港撩導遊嗌交打交博賠償，好易擦槍走火。
當日「阿珍事件」之後，中央政府向香港亮出黃牌，發出旅遊警示，旅發局主席田北俊急急腳趕去北京擦鞋，而家田少或者香港政府真係要諗諗，點先可以同北京反映香港呢種所謂「仇內」情緒，叫當局在旅客自由行之前，重溫一吓已經在內地講咗好耐的「文明旅遊」，如果唔係，自由行好快會變成不可持續的政策。田少唔識點做的話，去西環睇吓可唔可以撞到郝鐵川啦，呢位中聯辦宣傳文體部部長咁得閒指手劃腳，再唔做吓正經嘢怕且要被炒魷。
03年自由行政策出台，唔少香港散戶望住「中國旅行社」個招牌，以為中旅國際實唔會死錯人，點知捉蟲，全國幾萬間旅行社，競爭激烈到零團費，「中」字加個「旅」，唔等如一間擁有市場優勢的壟斷性國企，自由行加「屍爬」的政策突變，更加令中旅國際變成最唔識賺錢的僵屍紅籌，中旅國際早年的發展，大家可以睇返前年7月「阿珍事件」之後，財經茄哩啡的兩篇「中旅之旅」。
18個月前的中旅國際，市值都仲有100億元(港元，下同)左右，當日已經話呢隻嘢管理質素，香港中資企業當中幾乎包尾，會計手法又古古怪怪，冇晒能見度，有推遲盈利入帳之嫌，到咗今日，市值再打8折，剩低80億元。
通常一間僵屍級的紅籌國企，多數有一班僵屍級的管理層，所以如果管理層大換班的話，應該要留意吓公司的最新轉變。
中旅國際舊年就換咗人，舊年9月開始，副主席鄭河水夠鐘退休，在中旅系做咗十幾年的主席兼執行董事張學武亦同時辭任，專注母公司業務，接替張學武嗰位新幹部，叫做王帥廷，調任到中旅國際之前，任聯華潤電力(836)主席，在在華潤系統工作多年。
呢個調動，非常古怪，下回再續，睇睇新人事下，中旅國際有乜新作風。
關連文章:
1. 文明中旅（上）、（下）
2. 文明旅遊
3. 中旅之旅(上)、(下)
2012年1月17日星期二
中華台企（下）
上回講到，香港大孖沙在中國市場，過去十幾年，冇乜邊間上市公司搵到大錢，唔少台資企業反而搵到盤滿砵滿，做到全國甚至全球最大，好難唔令人懷疑，更有統戰價值的台灣資本家，在大陸做生意特別有著數。
八十年代初香港前途談判，部分有銀士全家連人帶資產走夾唔抖，夠薑留低信者得救，包括趁低狂掃地產的幾位大孖沙；台灣資本家差唔多，做得最成功的，絕大部分就係晨早登陸大陸市場的一班。
如果共產黨因為要搞統戰、刻意該台企坐大、等台灣資本家成副身家放晒喺大陸呢個推斷成立的話，過去十幾年，因為對大陸冇信心而錯失最大大達機會的，應該算係統一國際(0220)，統一集團本來係台灣最大食品公司之一，不過當康師傅(0322)以「頂益」之名在大陸輸到損手爛腳之時，統一集團掛住在台灣陰陰咀笑，不思進取冇話俾心機反功大陸，如果今日在大陸搵銀最大市值最有代表性的台灣企業，叫做「統一」，你話幾開心呢。
以財經茄哩啡幾十年捱餐腸麵經驗，統一的「福字麵」，應該最健康，因為最冇味最唔好食，幾十年冇乜點變的包裝，反映咗一定管理思維，裡面包味精都孤寒過人，又點說服到人「再來一個」，統一國際07年底香港上市，積極進軍大陸，推出更多款式變化，康師傅已經霸咗最大市場份額。
十二年前的康師傳，最低每股HK$0.4元，艱難時期引入日本三洋食品，33%股權作價10億銀(港元，下同)左右，今日市值1300億港元，十幾年時間回報四、五十倍，康師傅主力中國市場，香港超級市場到今日搵碗杯麵都冇，如果當日買咗隻重組頻頻的「頂益」，相信唔會有好多香港人，識得坐到佢變成今日龍頭的康師傅。
即食麵加味精，係一種食多咗想嘔的垃圾食物，冇時間冇得揀先會隊落肚，不過未食過又會好恨食，康師傅已經炒到近40倍市盈率，日清食品，即係做「出前一丁」同埋「合味道」嗰間，在中國唔係咁賣得，但賣通全球，市盈率都係15倍，市值等如康師傅3成左右，唔係話康師傳一定增長見頂，不過牙煙啲咁解。
中國消費品牌，尤其係食得落肚嗰啲，食物安全稍有負面消息，股價可以即日唔見幾成，就算自己穩穩陣陣，競爭對手攞住你碗味精水，驗屍咁化驗，好難樣樣合乎規格，味千(0538)同霸王(1338)都係人版，呢個亦係所有中國食品消費股的共同風險。
做大咗，就要禮尚往來，大家識做，例如富士康(2038)及母公司鴻海，要帶頭加人工，唔可以再側側膊違返最低工資規定，康師傅要加價，亦試過被發改委請去飲咖啡。
近年去得最勇一位台資老闆，應該係旺旺(0151)主席蔡衍明，可能見當時郭台銘咁成功，08年終於覺悟，私有化咗在新加坡上市的公司，嚟香港上市，同年收購台灣中時集團，避免壹傳媒(0282)及黎智英在台灣影響力進一步坐大，跟住入股香港亞視，從此旺旺發展一帆風順。
香港電視台控制權，國企資金唔方便出手，香港地產商幫拖又話地產霸權，蔡衍明入股亞視，宏達電子王雪紅又出錢收購TVB(0511)，台灣資金出手就冇位俾人入，呢啲可能就係「協同效應」，唔怪得香港傳媒幾垃圾都有老闆肯埋單。
在中國共產黨眼中，最唔聽話的人，最有統戰價值，從呢個角度睇，壹傳媒應該算係奇貨可居，如果賣盤，叫價再貴都有代理人接貨，如果肥佬黎肯招安，分分鐘拆本Book B入大陸賣都仲得，呢個只係天方夜譚，暫時睇，馬英九睇重自己名聲，但唔似一個有野心要在兩岸關係留低乜嘢Legacy的政治人物，未來4年，中華台企睇怕可以疊埋心水，食幾年安樂茶飯。
關連文章:
1. 中華台企（上、下）
烏蠅都嚇死
警號響起，黃金俠唯有再次出動．．．
呢份通告，紫金礦業（２８９９）在１月１６日發出．．．
「興杭國投」，屬於福建省興杭縣一間芝麻國企，不過因為有座紫金山（唔好搞錯南京嗰座），坐住紫金２９％股權，應該係全國最疊水的「縣級」國企，而家同你講，有「業務發展需要」（冇講咩業務），將６億股紫金，抵押俾一間信託公司借錢（亦冇講借幾多、息口幾高）。
興杭縣同埋「興杭國投」，以前大部分幹部，都坐喺紫金董事局，人大四級代表換屆，福建又嚟咗個新省長，叫蘇樹林，以前中石化（０３８６）大佬，唔知有冇關係喇，不過，紫金董事會就已經「提醒投資者及股東」，在買賣紫金股票時，「應審慎行事」。
唔講咁多，得閒睇睇「奪命金股」同「紫金山下」．．．
伸延閱讀:
1. 奪命金股（上）、（中）、（下）
2. 紫金山下（上）、（下）
呢份通告，紫金礦業（２８９９）在１月１６日發出．．．
「興杭國投」，屬於福建省興杭縣一間芝麻國企，不過因為有座紫金山（唔好搞錯南京嗰座），坐住紫金２９％股權，應該係全國最疊水的「縣級」國企，而家同你講，有「業務發展需要」（冇講咩業務），將６億股紫金，抵押俾一間信託公司借錢（亦冇講借幾多、息口幾高）。
興杭縣同埋「興杭國投」，以前大部分幹部，都坐喺紫金董事局，人大四級代表換屆，福建又嚟咗個新省長，叫蘇樹林，以前中石化（０３８６）大佬，唔知有冇關係喇，不過，紫金董事會就已經「提醒投資者及股東」，在買賣紫金股票時，「應審慎行事」。
唔講咁多，得閒睇睇「奪命金股」同「紫金山下」．．．
伸延閱讀:
1. 奪命金股（上）、（中）、（下）
2. 紫金山下（上）、（下）
2012年1月16日星期一
文明旅遊
一則星島日報的小新聞，一段YOUTUBE視頻，呢兩日在香港網絡瘋傳．．．
類似「小事」的片段及相片，在香港社交網站越嚟越有「市場」，對大陸同胞哪種「講唔出口」又「唔可以講出口」的情緒，傳播速度拍得住中東茉莉花。
講緊年幾之前，女導遊阿珍，因為鬧內地遊客，被香港輿論千夫所指，北京仲對香港發出旅遊警示，旅發局田少，急急腳去北京擦鞋，看來田少有需要再往北京一行，勸籲當局認真搞搞「文明旅遊」教育。
類似以下的大陸同胞，嚟香港自由行，慘被爆樽，遲早一鑊，唔係講笑的．．．
 |
類似「小事」的片段及相片，在香港社交網站越嚟越有「市場」，對大陸同胞哪種「講唔出口」又「唔可以講出口」的情緒，傳播速度拍得住中東茉莉花。
講緊年幾之前，女導遊阿珍，因為鬧內地遊客，被香港輿論千夫所指，北京仲對香港發出旅遊警示，旅發局田少，急急腳去北京擦鞋，看來田少有需要再往北京一行，勸籲當局認真搞搞「文明旅遊」教育。
類似以下的大陸同胞，嚟香港自由行，慘被爆樽，遲早一鑊，唔係講笑的．．．
Presented by...
中華台企（上）
今期開台灣，講吓在大陸搵食的台資企業。
台灣第五屆總統選舉，可以話最理性一次，亦係最悶一次，冇軍演冇開槍，無驚無險，國民黨馬英九擊敗民進黨的「女版馬英九」蔡英文，再坐4年，兩岸政策繼續「不統不獨不武」路線，「先急後緩、先易後難、先經後政」。
小馬哥冧莊最少有個「 三不」，民進黨再上台唔知會搞乜嘢大頭佛，台灣選舉政治越見成熟，今次選舉結果，與其話「一中各表」的「九二共識」路線，擊敗內容更空泛的「台灣共識」，不如話台灣選民明知兩岸關係可見將來難以破局，「票投民進黨」可能換來不穩定因素，不如短期內「盡食共產黨」，穩穩陣陣「有經冇政」賺多4年錢再講嘢。
台灣商家挺藍挺綠唔係新鮮事物，今期多個大資本家，包括台灣女首富王雪紅，同埋富士康(2038)話事人郭台銘，在選戰後期公開撐「九二共識」，反而冇點名支持邊個候選人，潛台辭就緊要穩定。
79年前港督麥理浩上北京摸底，鄧小平叫佢帶兩句說話返香港，第一句係北京一定收會香港主權，第二就係請投資者放心，麥理浩返到嚟，公開只係講咗第二句。經濟捆綁政治，插翼難飛，呢個係北京的殺手鐧，香港係最佳例子，幾大華資財團，除咗近年幾千億元投資英國的長和系，其他新地(0016)恒地(0012)咁，間間全副身家9成9放喺大陸及香港，荷包指揮腦袋，在有利用價值的地方或時候，自然會發揮親北京的政治力量。
香港地產大財閥，有關中國的私人投資，例如炒大型國企新股咁，應該賺唔少，不過自己間上市公司，在過去十幾年，冇話邊間搵到乜嘢大錢，相對台灣資本家，簡直好似唔識做生意咁。
求其舉幾個例子，富士康母公司鴻海做電子代工、冠捷(0903)做電腦屏幕、裕元(0551)造波鞋、真明麗(1868)做LED燈飾，都做到全球最大或者數一數二中；高鑫零售(6808)做巨型超市、九興(1836)幫歐洲名牌做鞋、味丹國際(2317)做味精，又係做到全國最大，當然唔少得兩隻食品消費股龍頭，康師傅(0322)同埋旺旺(0151)，舊年12月，做埋恒指成份股添，以當日市值及流通量計，澳門賭場其實更有代表性，不過染藍台企做招牌，政治更加正確，可以鼓勵更多台資企業嚟香港上市，最理想程況，就係全部有代表性的台灣企業嚟晒香港上市，進一步邊緣化台灣股市，港交所(0388)萬一有機會收購台灣證券交易所，阻力都會細啲。
將香港及台灣最叻的一班資本家相比，台商在大陸可以賺到盤滿砵滿，大家當然可以話，香港地產商剩係識炒樓炒地炒通脹，但係唔可以忽略一個因素，就係台商的統戰價值，尤其係97年之後，相對香港資本家高得多，多間台企在中國霸佔到市場領導位置，應該在政策上有唔少優惠，北京在有意無意間，讓多間台企在大陸坐大，總理溫家寶早年都講到開晒口，台灣同胞係兄弟，可以「讓利」咁話啦。
「讓利」都有個譜，向台資的政策傾斜，亦可能只係相對外資而唔係國企，做得大的台灣企業，多數冇同國企直接競爭，台泥國際(1136)，後台勁到係前海基會董事長辜振甫家族，但水泥業太多大型國企，台泥就做唔到乜嘢成績。
當然啦，如果宏觀因素大轉向，亦唔係間間公司可以繼續一帆風順，例如中國近幾年調整經濟結構，內需行頭，出口暫時行埋一邊，匯率人工齊升，靠出口靠低勞工成本的富士康及裕元，隱性埋名幫外國牌子做代工，已經冇晒當日風光，被踢出香港藍籌，被康師博及旺旺取而代之。
下回再續。
關連文章:
1. 中華台企（上、下）
訂閱：
文章 (Atom)