Best Blogger Tips

2011年6月3日星期五

地主鐵路(下)

(刊於2011年6月3日am730)

今時今日,大家係時候問吓,港鐵(0066)存在最大目的係乜。

七十年代政府開始起地下鐵路,因為路面交通太擠塞,要一個鐵路系統方便市民出入,同時配合市區規劃及房屋政策,提供公共空間及連接區內通道,地鐵更加係警隊唯一跨界警區,咁多政策任務,簡單一句,其實為咗「服務香港市民」,但私有化後的港鐵,同呢個最根本目的,越行越遠。

港鐵舊年收入增加57%,去到295億,變化咁大,因為香港以外鐵路項目開始營運,包括北京杭州深圳甚至遠至英國瑞典澳洲,海外鐵路附屬公司攤分收入,激增近9倍,去到101億,不過計埋折舊等,稅前利潤得1.5億,即係賺得1巴仙多少少。

港鐵從來冇講到香港以外鐵路項目,總資金投入咗幾多,但係一年收支均以百億計,斷估放咗唔少錢落去,呢個亦解釋咗,點解港鐵近年盈利勁升,但係派息又極孤寒,因為好大嚿錢,拎咗去內地及外國擴張業務,相關生意,目前已經佔港鐵收入三分一,比重未來極有可能超過一半,香港政府應該全面檢討港鐵「放眼世界」,對股東係咪有利,港鐵仲係咪服務緊香港市民,算唔算不務正業。

香港起鐵路就呻窮,去到冇雷公咁遠起鐵路,為咗賺雞碎咁多,又有大大嚿錢;淨負債比率兩成唔夠攬住AA級信貸評級,又唔肯發債融資,要大量土地資源補貼,結論就係,「冇地產項目就冇錢起鐵路」呢個講法,其實係香港公共財政最荒謬大話!

深圳北京等地鐵項目,冇地產補貼,港鐵都有信心做,仲視為重要增長來源,如果係咁,港鐵自己地頭做嘢,冇理由仲要吓吓伸手攞地,換句話講,港鐵根本唔需要地產項目盈利支持鐵路發展,但需要地產收益令條數繼續靚仔。

港鐵舊年賺120億,仲多過中電(0002);如果剩係計香港部分收入,港鐵過去5年盈利總和,超過港燈(0006);港鐵車站舖位商場租金加埋地產收益,舊年過百億,仲多過九倉(0004)。呢啲數字話畀大家知,香港平民批評港鐵利潤豐厚仲要成日加價,唔係打橫嚟講,其實有理有據,大家亦係時候問吓,香港納稅人不斷補貼,令港鐵成為高增長藍籌地主,其實又係為咗乜。

公眾利益同股東利益,好多時候存在根本性衝突,港鐵盤數港鐵盤數唔靚畀四十幾萬股東鬧,上星期宣布加價,又畀七百萬香港人鬧,亦官亦商,非禽非獸,兩面唔係人。香港政府有兩樣嘢可以做,一係「國有化」港鐵,利用今日雄厚儲備建設新鐵路,提供價廉物美交通服務;一係掉轉頭全面私有化,同時修改強積金條例,容許香港市民,直接投資港鐵(或者其他政府賣大包資產),將政府手持75%股權,轉化成香港人退休資產,唔使畀芬佬屈機屈管理費同時,可以分享一吓納稅人多年補貼成果。

關連文章:
1. 地主鐵路(上)(下)

2011年6月2日星期四

地主鐵路(上)

(刊於2011年6月2日am730)



今期開港鐵(0066)

早排親政府鄉事派,輪流被踢爆村屋僭建,仲以為有法律高人或政府背後發功,向新界土豪宣戰,欲向丁屋政策開刀,點知火燒連環船,高官政要幾乎個個揩嘢。

聽講合資格男性原居民,超過廿萬,政府審批丁屋申請速度,大約每年一千宗,如果新界壯丁人人申請起丁屋,又個個生女,政府都要花二百年處理。香港人人有份,新界唔只係原居民嘅新界,熱切期待某有心人或某新界英雌,用人權法又好性別歧視條例又好,將丁屋政策及香港政府告上法庭。

丁屋或村屋,係破壞郊外風光最大僭建源頭;香港市區,仲使講,最巨型但又合法「僭建」,叫「發水樓」,你又發佢又發,唔覺唔覺,由市區到郊外,公共空間越嚟越細,如果高官夠彊拆除呢兩大「廣義僭建」,理得佢屋企個露台有冇玻璃圍封,香港傳媒唔該唔好浪費呢啲精力及時間。

發展商惡,鄉議局惡,香港最惡地主,叫港鐵。除咗數碼港同迪士尼,幾乎每一塊土地,賣出私人市場經營,都要公開招標,港鐵係唯一一間,唔使競爭又可以坐擁大量靚地嘅地主,發展商人人可以得罪,就係唔可以得罪港鐵,否則新鐵路走線可能走咗去隔離樓盤,新站出口可能開喺行家個商場。

發展商錢多,經濟上惡得起;鄉事派票多,政治上惡得起,港鐵做得成香港最惡地主,純粹因為個大股東戇居居。

可能大家冇為意,過去十年,財政司司長呢個位,已經有四條友坐過,換人頻率,可能係發達經濟體系當中最高,期間經濟大起大跌,當財爺一職淪為政途野心跳板,當理財哲學失去連貫性,當公共財政政策五時化六時變,港鐵就係咁變成今日之怪物。

港府原本係港鐵唯一股東,1999年財政預算案,當日財爺曾蔭權,提出私有化地下鐵路,主要政策考慮,唔係要為投資者製造一間超高增長上市公司,而係驚庫房莫財,唔可以支持多條新鐵路。私有化港鐵,一來可以為政府繼續變賣資產試水,幫補庫房收入,二來等港鐵有融資渠道撲水,唔使下下問阿媽要錢。

十年前香港有財赤,今日攬住幾千億唔知想點,成條港深廣高鐵都有錢起,政府冇錢改善交通網絡,已經唔成理由,更荒謬者,港鐵上市十年來,從來冇好好利用上市公司隻殼融資,從冇發行新股集資,淨負債比率,至舊年底,只有12.8%,肯定冠絕全球。中國鐵道部都負債累累,港鐵起鐵路幾乎唔使舉債,唔代表佢財務功夫高,而係話你知香港鐵路融資模式極度反常。

香港人需要一個又平又有效率的鐵路系統,唔需要一間攬住A股信貸評級唔識利用的藍籌公司,吓吓問納稅入要地要錢,當日上市做乜?

下回再續。

關連文章:
1. 地主鐵路(上)(下)