邐迆長建

See through my fat ass...

今期開長江基建(1038)，先嚟個說文解字，香港話「呢Hea」，聽講可以寫做「邐迆」，冇認真考證過，不過電腦寫得出睇得到，用住先。

長建以前係間好穩健但好叉悶的公司，近年冇咁穩健，但仍然好叉悶，例如公布業績後批股，近一年幾乎變成指定動作，又例如「撤資」去英國歐洲掃貨的場面，大家亦見慣見熟。

公道啲講句，有動作但冇驚喜，即係話公司管理投資者預期有一手，唔會話有乜超乎想像的動作，不過長建日前兩個例牌動作，批股集資廿零億(港元，下同)，仲有連同系內幾間公司78個億收購天然氣配氣公司，唔係乜嘢驚天大刁屎，居然要搞到停牌一日。

長建今次批股，可能係近年香港ECM(股票資本市場)做得最邐迆的集資動作，又點會有人批批吓股突然宣布收購，規模大小都算係股價敏感資料，原本落咗飛的芬佬，個個都要睇清楚啲，或者想管理層先傾兩句，結果開市前一片混亂，最後唯有停牌，長建批貨亦只能以下限下價，亦冇辦法加碼，最後集資唔夠3億美金。

長建個招牌貼住長和系未來接班人李澤鉅個大樣，刮花少少都唔得，件事可以搞到咁邐迆，唯一解釋，就係長建個袋可能有十幾廿單刁傾緊，一扑鎚就要去馬，估計唔到成事之機，所以連長建咁要臉的管理層，都未能兼顧公布消息的時序，所以有關長建收購曼徹斯特市機場等各種傳聞，雖不中亦不遠，而好似英國配氣公司呢類10億美金規模的收購，在長建或長和系眼中，已經唔係有關痛癢，未來極可能仲有非常轟動的大刁。

今次批股之後，長建在業績報告又係講嗰句，手上現金超過80個億，負債比率僅為7%﹐「具備雄厚資本實力進行更多收購」，財經茄哩啡之前兩篇《透視長建》曾經講過，長建管理層出親嚟講嘢，包括在自己年報，次次都話「負債比率」幾低幾低，不過資產負債表之外(Off-balance sheet)收埋幾多債務，所謂「See-through Gearing」(透視負債比率)，永遠側側膊唔講，即係話表面上看落去，本數簿乾乾淨淨，下面查實好邐迆。

長和系過去兩年，在歐洲豪擲過千億收購，絕大部分彈藥來自銀行借貸，長建同你講，「負債比率」仲係個位數字，你會唔會信？呢種「你睇我唔到」的會計手法，查實有誤導股東及散戶之嫌，唔係一個負責任管理層應有的氣度。

當然啦，長和系數簿總管霍建寧都講明，長和系是不會做數的，因為長和系盤數的目標觀眾根本唔係散戶，尤其係長建，將啲債收收埋埋，要叉輪廚佢，就要付出唔少心力腦力，大行分析員好多時同記者趕稿時差唔多，見係李嘉誠，個個咪指住個位數字的「負債比率」算數。

信貸市場的「信唔信得過」，好多時係相對的，銀行都要做生意，債券投資者都要搵貨買，而家地球由中美日歐幾大經濟體系，家家有本邐迆的數簿，和黃(0013)以外的長和系公司，已經叫做好靚仔，長和系又咁有興趣搬錢過歐洲，過去兩年，長建由銀行貸款到發行永續性債券，大把人借錢，就係咁解。

今時今日的歐洲，理論上通街平貨，長建在利率接近零的時代，將本數簿半遮半掩地大舉槓桿化，籌集資金去歐洲血拼，目標又係唔會點死得人的公用事業，唔會錯得去邊，如果息口掉頭，融資成本頂唔順，橫掂股價已經反彈咗一個開，咪大舉批股還債囉。

收購講本身融資能力，仲有時機，長和系呢兩方面都掌握得唔錯，不過買埋一大抽嘢，跟住就要講管理，李氏力場未必可以鎮得住成班老外，英聯邦國家的監管事務係咪咁好搵，大家又可以問吓在澳洲的中電(0002)，不過，與其話長建而家專注公用事業，不如話佢已經變成一個真正的Asset Trader，按照劇情發展，再過幾年，長和系有可能會將新近收購的歐洲資產，以某種形式套現拆售。

關連文章:
1. 透視長建（上）、（下）
2. 仇富首富（上）、（下）
3. 冇你咁長命

伸延閱讀：
1. CLSA: Mind the GAPP
2. 朱泙漫屠龍記: 君子愛財
3. 波叔講古: Hea

阿汀整餅

克莉絲汀撚手招牌：調理法包（含蒜香）

潮流興盈利警告，人人冇錢賺，個個管理層都將枱底的污糟嘢刮晒出嚟放入今年業績，唔擔保部分穿少少櫃統底，透過行政、科研等唔多覺的開支，將公司現金轉化成營業虧損，再轉入自己袋。

盈警見得多，克莉絲汀(1210)上市唔夠半年就盈警，而盈警的理由，竟然又係上市之後擴張得太快，服。

上市如果係仆街的理由，名乎其實叫做阿茂整餅，調理法包，冇個樣整個撚樣．．．

伸延閱讀：
1. 克莉絲汀盈利警告

旺旺到着火（下）

旺旺湖南廠房大火

上回講到，旺旺(0151)賣零食，本來唔係一間特別吸引投資者眼球的公司，多年嚟廣告更加超老土，煩到「吃人夠夠」，可能係被最多人惡搞的廣告系列，不過盤生意越做越大，老闆蔡衍明更加榮升台灣首富。

相對在大陸，在寶島榮升首富可能冇咁敏感，不過身處頂峰，唔係人人都可以保持冷靜，例如在納斯達克上市的尚德太陽能，仲有比亞迪(1211)，兩位老闆施正榮及王傳福，先後榮升「中國首富」，兩間公司雖然冇話爆出乜嘢特別管業管治的醜聞，更加都係「科學發展觀下」的創新民企代表，但今日股價雙雙大幅插水，盈利急跌同時債台高築，面對實實在在的爆煲風險，或多或少就係早年風光之時，過份自信擴張太快所種下的後遺症。

太旺容易引入眼紅，蔡衍明在大陸搵銀多，加上本身火爆性格，難免在台灣成為借力打力的對象，例如旺旺中時媒體，年前併購中嘉有線，雖然屬於一宗台資「收復」外資的交易，但觸及跨媒體併購的禁區，近排再度拎上監管機構審查，有冇影響言論自由及台灣本土利益。

唔知係咪旺旺太旺，日前在大陸的包裝廠貨倉火燒旺地，月盈則虧，一場火雖然對旺旺業冇太大影響，但亦同時提醒大家，所有生意都有風險，當股價已經大升，安全空間亦大幅降低。

在大陸賣嘢俾人食落肚，頭號風險肯定係食品安全，因為產品發現九唔搭七的「不明物體」或有害物質，一單嘢可以成為致命打擊，例如蒙牛(2319)等乳品公司，到今日都未能收復幾年前三聚氰胺所導致的失地。

臺灣2011年爆發塑化劑事件， 包括食品業大哥大統一都有產品中招；旺旺仙貝2010年亦曾經被國家質監局驗出大腸桿菌超標，最攞命的是，出事源頭未必關公司自己事，可能係外判生產或加工的某一個環節或材料，亦有可能係競爭對手甚至快閃空軍的惡意中傷，今時今日，將任何消費產品拎去化驗實驗屍咁驗，多數會搵到一啲超標或不應存在的物質，一份研究報告，一篇傳媒報道，分分鐘股價大插元氣大傷，呢方面霸王(1338)及味千(0538)應該好有經驗。

中國消費市場潛力大，不過高度開放，業內競爭漸漸白熱化，旺旺暫時產品路線比較獨特，但未來難免會同娃哈哈或者外國巨頭等重量級對手正面交鋒，二線品牌上好佳， 樂事，達利亦未必唔會趕上。

近年所見，盤生意做得有聲有色的零售公司，都冇需要頭痛爭旺舖挨貴租的問題，例如百麗(1880)，將萬六個銷售點寄生在百貨公司或商場，又例如旺旺及康師傅(0322)等，分銷管理主要講緊同超級市場的關係，反觀李寧(2331)及國美(0493)等昔日王者，成日要為百間千間分店頭痛，兩間公司近月雙雙提到要加強在百貨公司及商場的銷售，可見零售公司對零售網絡的管理觀念，已經開始改變，同一道理，要了解旺旺的生意經，就要揭吓上市連鎖超級市場的年報及網頁，甚至得閒就去行吓，感受一吓零售公司在內地的分銷管道經營成點。

超市貨架既是兵家必爭之地，內地傳媒報道過，康師傅曾不惜工本，重金取得部分超市及雜貨店的獨家銷售權，務求將競爭對手踢出消費者視線，旺旺的競爭對手就算未有能力採用同一策略，旺旺產品已經略嫌太多元化，要齊齊保持競爭力，銷售開支只會繼續上漲，影響甚至會比原材料成本更大、更難以估計。

旺旺市值高峰大概1200億，PE超過40倍。近日稍微回落，但今年盈利就算升兩成，市盈率亦只回落到30倍，掉轉頭睇，現價買入，想話賺兩三成的話，就要有人肯付出近50倍市盈率的代價，旺旺雖然旺，不過目前環境要盈利升四五成，難度太高。

關連文章:
1. 旺旺到着火（上）、（下）
2. 中華台企（上）、（下）
3. 霸王秘方（上）、（下）

旺旺到着火（上）

人類歷史上最煩膠廣告

先嚟一個硬膠ＩＱ題：課室裡面，有傻豬、傻雞、傻狗，邊個會先被老師叫起來背書？（答案）

今期開旺旺(0151)，一隻名乎其實旺到着火的股票。

投資者的眼球，往往被「性感」的公司吸引，好似2000年的電盈(0008)，中外報紙日日頭版都係，曝光率夠爆，唔覺唔覺個個以為增長都好有爆炸力，對毫不起眼悶到出汁的行業，好多時反而不屑一顧，例如恒安(1044)，搞吓搞吓變咗藍籌，市值千億銀，12年前，又有幾多人相信，賣衞生巾好賺得過科網光纖。

旺旺08年3月在新加坡除牌，過底轉場嚟香港上市，相信唔少好似順叔呢類中坑散戶，記憶之中的旺旺，仲停留在十幾廿年前「旺旺仙貝」的廣告，印象深刻，因為實在娘爆，重重覆覆「旺旺」嚟「旺旺」去，唱多句「旺旺真夠味」，問你死味。

但係又吹佢唔脹，一件一蚊幾毛的零食，加咗「旺旺」兩個字，變成一盤每年營業額接近30億美元(下同)的生意，香港上市以來生意越做越大，2011年純利4億元，比起2007年已經升咗一個開，大陸同胞唔單止鐘意食米餅，近年旺旺產品類型越做越多，旺仔牛奶都咁通全國，乳品飲料成為增長最大亮點收入重要來源，佔營業額半壁江山，招牌米果反而只係佔四份一，不過毛利率拉均仍有35%，純利率14%。

過去幾年唔少富豪身家在一個二國金融風暴國債危機中大幅縮水，旺旺老闆蔡衍明，專注快消食品行業，憑住一盤毫不起眼的零食生意，越做越旺，在乜乜斯台灣富豪榜，今年第一次登上榜首。

蔡衍明提到自己的生意經之時，經常話對大陸好有信心，尤其係大眾化消費食品，經濟好，食品行業會率先增長，經濟差，亦會最後至陷入衰退，進可攻，退可守，反觀產生最多台灣富豪的手機及電子代工，科技行業冇錯較容易吸引投資者眼球，不過亦往往要面對好多專利訴訟，科技及消費者潮流轉變快，產品周典短，優勢唔易長期維持，上年寶島首富、HTC製造商宏達電老闆王雪紅夫婦，HTC一兩期產品唔好賣，業績倒退，股價已經由高位大跌四分三，富豪榜滑到落第八，曾幾何時的台灣首富、富士康(2038)老闆富士康，亦只係排第4。

大陸的大眾化消費市場高度開放，賣零售唔係冇競爭，旺旺跑得出，肯定有其成功之道，消閒食品勝負關鍵，就係想買時能夠好方便咁買到，旺旺有1.5萬中國經銷商，不但數量多，同時亦老早滲透到三四線城市。

同每一間成功的零售企業一樣，掌握分銷管道一直屬於旺旺的強項，隨住市場變化調整自己策略，例如舊年，旺旺曾經對銷售點進行全面調查，對社區校園100平米以下店鋪，重點改善貨架陳列，務求旺旺產品能夠佔據當眼地方，呢啲散戶或普通消費者鮮有留意的細微動作，正正是零售企業互相競爭的勝負關鍵，舉個例，大家去開大陸超市，望吓滙源果汁(1886)的飲料在貨架上的位置，就知道呢個國產品牌的競爭力有冇改善。

中國人對國產貨冇信心，尤其係食品安全，除咗毒藥之外，差唔多乜都有毒，所以非國產食品品牌，普遍更有競爭力，亦可以反映在旺旺產品的定價能力。

股神巴菲特老拍檔查理蒙格，提及佢老人家對議價能力及品牌力量時，曾經以香口膠為例，指出一嚿一蚊幾毫的零食，顧客一般唔會為慳雞碎咁多去買啲山寨牌子，寧願安全啲買大路牌子。

所以招牌夠響，定價可以比其他人高，呢種現象曾經反映在幾年前的霸王(1338)，透過大量宣傳，搶佔市場，同時換取規模效益，好似當年成龍「動L」廣告一樣，唔好睇少「旺旺」兩個字老老土土重重覆覆的轟炸式宣傳，夠簡單易上口，銷量高利錢厚，配合較好品質，管道控制，旺旺賺到盤滿鈈滿，情況同查理蒙格所言不某而合。

下回再續。

關連文章:
1. 旺旺到着火（上）、（下）
2. 中華台企（上）、（下）
3. 霸王秘方（上）、（下）

爆煲崔濱洲

借30億人仔俾瀕臨爆煲的中江集團，原來就係呢條木咀．．．

呢位濱洲哥，2010年做建行(0939)陝西大佬，大力催谷中小企貸款服務，舊年去到浙江，撞正溫州老闆走佬潮，又提出咩嘢「四味良方挺溫州」，催谷「小微」，催吓催吓，終於催爆。

搵日用崔濱洲起題寫篇巨銀小微，老編冇得剪喇啩．．．

伸延閱讀:
1. 崔濱洲: 為中小企做好貸款服務
2. 崔濱洲: 四味良方挺溫州
3. 崔濱洲被免職

強國通渠

堂堂中國首都，一場雨變成澤國，規劃經濟，規劃唔到幾條渠．．．

今期打八號波，為咗唔阻住老編放工（雖然佢改咗噚日一句嘢做「打得機多會盲」，但順叔決定原諒她），撞啱北京又係打風水浸，食住條水講吓水務水股，開開心心早啲收工，呃多日稿費。

近年地球越嚟越危險，氣候越變越怪，唔係百年一遇的天旱地震，就係千年一遇的狂風暴雪， 天災人禍特別多，怪唔得保險公司成日話生意難做。北京周未一場豪雨，連落20粒鐘，全市平均降雨量170毫米，聽講又係60年一遇的破記錄降雨量，天子腳下一夜變澤國災區，最少37人死亡，當中25人浸死，市政府估計財物損失超過100個億人仔。

公平啲講句，近幾年唔少主要城市，落雨打風的非常時期，都有出現水浸市中心的所謂「內澇」情況，例如美國紐約，舊年8月超級颶風吹襲東岸期間，曾經出現一日200毫米的「116年一遇」的降雨量，結果全市都係多處嚴重水浸，電力中斷，再之前一個月，南韓首爾亦出現過所謂「百年一遇」的豪雨，不過人哋預警系統可能做得好啲，市區好少話出現廿幾人被浸死的悲劇。

查實大陸主要城市，面對市區雨後水浸應該好有經驗，唔係北京獨有的問題，大城市暴雨後一片汪洋，好似已經見怪不怪，歌仔都大把得唱，例如南泥灣紅歌惡搞版《泥水灣》、「廣州市歌」《落大雨水浸街》等；「廣州地鐵瀑布」、「成都碼頭」等「景點」，相繼出現，網民苦中作樂比較邊個城市「海景」最壯觀，以前中國水災的防禦對象是大江大河，近年「內澇」已經成為最多人關注的城市病，官方數字統計，舊年縣級以上出現嚴重水浸的城市，高達258個，幾乎全部因為城市地底去水系統應付唔到忽然而來的暴雨。

市區水浸問題咁嚴重，就算係城市規劃外行人都睇得出，因為地下排水系統出咗問題，分分鐘唔少所謂去水管虛有其表，打開個蓋原來就係泥地冇渠，講到尾，就係城市化步伐太快，掛住建設地面，少理地底，投資唔夠，又或者規劃唔夠長遠完善。

唔好話地底的長遠規劃，近年中國成日有類似「深圳第一爆」及「江門第一爆」等新聞標題，講緊好多大型建築物，因為配合唔到城市發展，需要用炸藥一炮過移平，呢類新聞聽落好爆，但係睇真啲，唔少都係落成冇耐，十年八載貨仔，已經變得多餘；又舉多個例，過去五年，遼寧瀋陽已經炸平咗兩個加埋唔夠30歲大型體育場，包括中國足球隊第一次取得世界杯決賽圈資格的五里河體育場，大型體育場絕大部分南北向，避免兩個龍門對正太陽作賽，但係五里河體育場竟然係「東西向」，犯咗最基本的設計錯誤。

地面上的城市建設，已經咁亂咁冇長遠規劃，地底的排水系統，更加唔使講，唔使問阿桂，大把中國觀察家，可以指住中國雨後必澇的城市病，作為不相信中國模式的又一力證，就好似話中國國企銀行咁，表面上帳簿好靚仔，但係唔知下面收埋乜嘢爛數。

今次內澇重災區在中國首都出現，北京領導人都幾冇面，斷做唔認真搞吓城市規劃，都會落足本錢根治城市水患，強國治水，部分A股上市的城市水利工程企業，星期一股價逆市被炒起，財經茄哩啡都盡咗少少力，試吓搵吓港股有冇公司做呢類生意，搵咗半粒鐘，終於搵到半間，以前叫做「進業控股」(8356)，創業板上市，主力做香港渠務生意，近5年唔知有冇賺到一嚿水純利，最近新華社借殼上市，注入新華電視業務，改咗名做「中國新華電視」，大家冇聽錯，通渠公司變身中國官方喉舌。

趕稿，臨尾搞個爛Gag，北京有興趣派官方喉舌嚟香港「通渠」，不如先搞好全國的城市建設。

傳說中的去水位

伸延閱讀：
1. 廣州市歌: 落大雨水浸街

有腦唔怕洗

（部分內容刊於2012年7月23日am730)

今期湊熱鬧，開洗腦。

最成功的洗腦工程，往往都是不著痕跡，例如廣告宣傳，唔經唔覺將觀念，建購、深植於目標受眾的行為意識，好似近年住宅樓盤，幾千呎大型豪華住客會所，成為指定賣點之一，買家甘之如飴，正正係地產商最成功的洗腦工程之一，將私人會所等富豪玩意，轉化成普通人對居住環境的追求，忘記咗住客會所其實係樓盤發水的主要元兇之一。

最大型的洗腦工程，往往亦打住最正義的旗幟，例如宗教。Dan Brown的《 Angels and Demons》 同埋《The Da Vinci Code》 咁賣得，正正因為唔少冇睇過《Holy Blood Holy Grail》、唔熟識宗教歷史的人，睇完小說之後，赫然驚覺被宗教洗腦多年。今日香港的小學生甚至幼稚園學生，中文字都未識寫幾個，已經要背主禱文聖母頌，香港的家長，斷估又唔會點擔心子女被有宗教背景的教育機構，日日夜夜在洗腦。

今時今日，成日閂埋門在互聯網世界橫衝直撞的後生仔，如果真係咁容易洗佢哋個腦，相信千千萬萬的家長老師，就唔使日日咁勞心勞氣啦。長輩同你講「打得飛機多會盲」，廿幾年前可能仲會有人信，今日的後生仔睬你都傻，分分鐘會反駁一句「只要還沒有放棄打手槍青春就不算結束」。

家長老師耳提面命式的教育，就算打正牌洗腦，難度高，好多時甚至會有反效果，反而廣播傳媒耳濡目染的宣傳，洗腦效果更大，影響層面更唔止係年青一代。

有冇留意，近年香港傳媒，尤其係免費電視及電台，「中國國家主席」等北京領導人大號，已經變咗「國家主席」，「中國國家女排代表隊」，已經變咗「國家女排代排隊」或「國家隊」，這個抺去「中國」的表述，新聞傳媒看似漫不經意的「Style」的轉變，其實亦係最不著痕跡的國民意識宣傳之一，甚至可能係中央政府搵香港傳媒高層食飯灌水兼照肺之後才出現的轉變。

傳媒幫手洗腦，有時未必係受到政治干預，更多時只係習慣壞習慣，舉個例，近年北京有關促進中港融合的經濟措施，全部都係雙方互利的動作，香港傳媒日日「大禮」前「大禮」後，查實自己幫手洗香港人腦都唔知，好似年年七月一日皇恩浩蕩，成日將「大禮」兩個字掛在咀邊，久而久之，由大陸同胞到香港人自己，好似覺得香港冇咗中央支持就唔得。

又舉個例，唔少香港人好擔心大亞灣核電廠的安全問題，如果今日宣布擴建增產，好可能即時在香港引起極大反對聲浪，不過鏡頭一轉，上個星期，美軍海軍的核動力航空母艦喬治華盛頓號，裝住核子反應埋加埋幾千噸炸藥，停靠香港泊足一個星期，又好似冇乜香港人會擔心唔安全，美國核動力航母，就算泊埋日本，每次都有一千幾百個反核人士示威抗議，喬治華盛頓號定期停靠香港，香港傳媒的焦點，反而只係有幾多官兵，準備為中環灣仔酒吧帶嚟幾多幾多生意。

講咗咁多，查實只係想講，商業宗教政治文化，地球上，每一分每一妙，都有千千萬萬的人，為咗唔同目的，刻意無意的進行洗腦工程，正正反反，有時成功有時失敗，冇乜需要大驚小怪。

國民教育呢單嘢，2007年香港回歸十周年，中國國家主席胡錦濤嚟香港講到出口，「要重視對青少年進行國民教育」，明顯係政治任務，前特首曾蔭權，先後兩次在施政報告講到要大搞國民教育，一直冇乜人反對，2012年7月4日之後，反而會因為其中一份教材的其中一兩句低能表述，引起全港爭議，大家可以配合埋香港最新的政治形勢，退一步諗吓點解，就算唔用陰謀論去埋解呢件事，目前傳媒鋪天蓋地的「反洗腦」 輿論，其實正正係洗腦工程的一種。

一個人大吓大吓，隨住眼界的拓濶，「Unlearn」以前「Learn」咗的觀念，配合自己對人生的領悟，「Relearn」自己的立身之本，只是最自然不過的成長歷程，有腦唔怕洗，洗完再洗做人先會有進步，最緊要保持獨立思考的能力，投資如是，做人亦如是。

關連文章：
1. 大禮露微

伸延閱讀:
1. 蝸牛路: 鬥洗腦
2. 憤怒荷馬：爸爸媽媽，放過我吧！

同場加映

第一段片，原片應該係《長征組歌》裡面一段「四渡赤水出奇兵」，邊位高人將片段配上《Beat It》，查唔到，不過曾經在網上引發一段惡搞配樂風潮，配上唔同兒歌怪曲，惡搞到當年的紅劇演員發火，叫人「歷史不能拿来好玩」。

第二段《被迫的》，輯自胡戈短片《007大戰黑衣人》。