2010年10月22日星期五

貴物鬥窮人(下)

(刊於2010年10月21日am730)

QE2 = 強2姦?

上回講到,美國佬狂印銀紙,全球焗跟,中央銀行取代影子銀行,炮製巨量熱錢,令今年市況,好似三年前大牛市DEJA VU。

除咗熱錢急促流轉,大陸貨幣政策亦似曾相識,人行星期二加息,因為大量熱錢流入炒高資產價格,要平抑通脹,但加息預期又吸引更大量熱錢湧入,雞先蛋先有用 冇用,費事嘥時間。

大陸對上一個加息週期,07年3月中開始,半年內加咗五次,期間港股足足升咗一萬點。如果呢個加息週期,又係每次四分一厘咁慢慢吱,唔 係一厘兩厘咁推上去,大家可以當加息係好消息。

恒指 vs 人行基準利率

仲有一樣似曾相識,就係大陸向香港泄洪,07年開港股直通車,衝咗落屎坑,今日密鑼緊鼓攪人民幣離岸中心,其實係同一件事。大陸想提高人民幣影響力,就要將人仔國際化,但又唔夠薑打開資本帳,人仔離岸中心就係一個折衷方案,為人仔衝世界試水之餘,亦可以減輕資金湧人國內衝擊力度。

呢個水池,未來會變得幾深幾闊,大得幾快,大家可以睇睇,港交所(0388)行政總裁李小加,上個月整咗篇「關於人民幣國際化的六個問題」,相對淺白咁,講咗人民幣國際化路線圖,洋洋萬言書,咁出力,無他,因為港交所食粥食飯靠呢個試水池也。

九月開始,港交所升足五成,見過180蚊。港交所十二個月目標價,基本上反映投資銀行,對港股未來一年有幾旺場嘅預期,睇番舊年11月12日,港交所公布第三季業績之後,高盛睇163、摩通睇158、瑞信睇140、美林睇130、瑞銀睇104,全部錯晒(點解目標價要睇12個月未? 因為一改再改永遠唔會錯!),即係話,投資銀行,全部低估晒,過去一年人仔國際化速度,亦低估咗對對港交所帶嚟嘅旺場效應。

上個月,「港深特區」一文中講過,喺中港融合呢個大格局之下,港交所係少數有買貴冇買錯嘅股份,呢個論斷,今日仍然未錯。如果大家相信歷史會重演,港交所有機會重返250蚊樓上歷史高位,其實唔係一定要買港交所,是但執藥都冇問題,但前題係「如果歷史會重演」。

今年同三年前大牛市最大分別,係經濟,當日全球一片歌舞昇平,今日歐洲美國仍然瓜瓜地,全球資金炒爆新興市場,巴西同泰國,最近已經透過加稅壓抑外資湧入境內債市,同香港謝絕投資移民買樓,一樣道理,即係話貨幣戰爭,真正殺戮戰場,唔係匯市,而係資產市場。

賤人毆疲元,貴物鬥窮人,唔想被通脹強姦,唯有焗賭,不過要講多次,記住轉身要快,斬纜要狠。

關連文章:
1. 貴物鬥窮人(上)(下)
2. 肥田冇人爭

伸延閱讀:
1. 關於人民幣國際化的六個問題 (資料: 港交所)
2. The Yuan Three-Step (轉載梁鳳儀在亞洲華爾街日報文章)
3. UBS舊年今日點睇港交所 (版權問題,偷咗雞一星期,條LINK已剷...)
4. 港深特區(下)

2010年10月21日星期四

貴物鬥窮人(上)

(刊於2010年10月20日am730)

通街唱緊貨幣戰爭,如果大國咁有戰意,就算天安號、釣魚台唔開拖,貿易戰都打咗幾年;地球充斥陰謀論,如果政客咁有遠見,大家唔使咁閉翳。一句講穿,洋基佬印銀紙,全世界焗跟,賤人毆疲元,貴物鬥窮人。

舊年5月底,曾俊華慷納稅人之慨,擲168億派糖仔,公開話好擔心年底出現通縮,對本港經濟造成負面影響云云,跟住脹定縮,全世界有(冇)眼睇,最高級財金官員咁水皮,對建華年代通縮陰影咁忌諱,佢老闆,又點夠薑郁個樓市?

特首可能知道香港有幾多熟地,但控制唔到有幾多單位,需求更加冇得估。最清楚香港樓市炒作需求者,應該係港燈(0003)煤氣(0006),每月搵人抄錶,就知道有幾多單位,被大陸豪客掃咗做吉宅,唔租唔賣,博通脹博升值。

大道東個「皇后超逼」,市區重建,變香雞型豪宅,同隔離街藍屋保育策略,牛頭唔搭馬嘴,連曾蔭權都睇唔過眼,插咗幾句。聽聞附近有個全灣仔最高新盤,星期二已經走咗十件八件貨,高層九百呎單位,盛惠千四萬,即供可以打個九五折,睇一年,唔準摸貨咩,好似話一年內搵到人接火棒,簽個字轉個名搞掂,第一手炒家連釐印都慳埋,吹咩。

實質負利率,存錢入銀行,等如資助大戶炒高資產價格質低自己購買力,應唔應該買樓,應唔應該炒埋一份,呢個問題,唔識答,亦唔敢答,只能重覆今年二月底,在「最好賺但最冇競爭的生意」一文中一句,樓市易升難跌,但風險高於機會,從香港社會情緒及承受力睇嚟,可以走棧窗口,亦越嚟越細。

唔好唔記得,同樣係負利率,97年,講緊供樓利息接近雙位數字。如果焗結婚焗買樓,記住咪當零息係老奉,銀行唔係善堂,通街拆息掛鈎按揭,其實同當年ELN、迷債差唔多,唔方好嘢,銀行度過計過,蝕頭賺尾,供樓者戇居居,先甜後苦,要有財力準備,捱貴息冇問題,又要有心理質素,樓價跌唔會太影響心情,左右日後投資決定。

上星期碟冷飯,炒多次,今年市況,同三年前大牛市好相似,中央銀行取代影子銀行,製造大量熱錢,全球再焗玩過山車,抗衡通脹又好,浸泡泡浴賺翻多少都好,最緊要轉身夠快,暫纜夠狠,做唔到,唔好諗。

講完樓市,下回再續,睇睇股市。

關連文章:
1. 貴物鬥窮人(上)(下)
2. 肥田冇人爭

伸延閱讀:
1. 信曾俊華定信阿媽? (YouTube片段,曾俊華講通縮)
2. 《五百年來誰著史》 (好過睇宋鴻兵陰謀論...)