Best Blogger Tips

2011年10月21日星期五

凸透新世界(下)


今期凸透新世界發展(0017)呢個上市系統,上回凸透到公司及管理層個底太花,記錄不良但又提出破集團記錄供股集資大計,嚇到小股東眼凸手震,今回凸透埋管理層動機。

三兩年批股供股一劑,股本突變多自然搞到凹凹凸凸,好似新世界發展咁,廿幾蚊批過股,幾蚊又供過股,長線股東手上股票變晒碎股,買賣都麻煩,市場亦唔知道大股東心目中,究竟間公司值幾多錢,有分析員批評新世界發展最新「海嘯價」供股大計「破壞價值」,唔係冇道理。

恒指成分股當中,論市值,新世界發展差唔多敬陪未席;論代表性,比唔上其他香港地產公司;論成交額,近年又俾管理層嚇到越嚟越縮水,下個月恒指季檢,除咗思捷(0330)幾乎肯定出局,新世界發展藍籌地位亦唔係太穩陣。

新世界發展資產淨值超過1,300億,市值300億左右,折讓冠絕藍籌,但大股東周大福集團以及主席鄭裕彤家族,在一眾地產大孖沙當中,持股量控制權又係最低。資產值錢、股價低殘、管理層質素差、大股東持股量低、小股東不滿情緒高,加加埋埋,新世界發展就變成一個容易被狙擊目標。

呢件事唔係未發生過,一度活躍香港,曾經大手掃入領匯(0823)的孩童基金TCI,2005年一度打過新世界主意,當時管理層又係一招大折讓批股,幾個動作將持股量,由36%提高到目前40%左右。最新「海嘯價」供股,如果小股東全部唔供,彤叔家族持股量就可以增加到6成。從呢個角度睇,新世界今次供股,一來可以從一步減低被狙擊風險,二來亦可以測試吓小股東態度及實力,集資過百億之餘,大股東又分分鐘可以混水摸魚趁低吸納,一舉都唔知幾多得。

新世界大股東及管理層,唔係唔叻,唔叻彤叔又點會咁發,不過一間公司業務咁雜,香港地產都未搞好,酒店百貨巴士電訊公路乜都搞一餐,千年一遇企管天才都未必搞得好,更何況,新世界管理層,就算未試過存心搵小股東笨,亦從來冇全心全意搞好個上市系統。

城中富豪成日成為大型新股基礎投資者,多年嚟可以霸尖買到唔少筍貨,長和系主席李嘉誠多數透過上市公司或者慈善基金出手,彤叔就鋪鋪自己落袋,近排同周大福,投資利福(1212)平保(2318)佐丹奴(0709)等都有聲有色,但幾時會益吓新世界發展小股東?

周大福聽講年底前會上市,集資超過200億,彤叔趁黃金熱潮,私人套現一大筆,呢個時候重手隊低新世界發展股價,兼搞到小股東成手碎股,好難唔令人聯想到,大股東有意將過千億上市資產,平價收返落自己袋,小股東得兩個選擇,一係投降由得大股東殘價增持,一係科水,同一個多年嚟對非常刻薄的大股東繼續鬥長命。

關連文章:
1. 凸透新世界(上) |(下)
2. 豪門二代(上)
3. 晒地之王(上)(下)

同場加映:

2011年10月20日星期四

凸透新世界(上)


今期本來想用「世說新語」起題,諗吓諗吓,都係要「凸透新世界」。

千祈咪用高登的象形文字去理解呢幾隻字,財經茄哩啡今次只係徇眾要求,做一個好多股民都想做的動作,就係凸透新世界發展(0017)呢個上市集團及管理層,多年嚟令人搲頭莫明的動作。

新世界發展最新杰作,同旗下新世界中國(0917)同時宣布「海嘯價」大折讓供股,仲要二供一,老母挾住個仔,齊齊掠水最少156億港元(下同),集資金額及折讓幅度太驚人,投資者嚇眼凸口凸,理得你新世界定舊世界,走得快好世界,消息出街同日,母子股價同時直插,市值一日已經唔見近百億元。

公道啲講句,今時今日資金開始緊張,要做一個150億銀貸款,就算係大型藍籌,銀行都未必做,肯做都未必輪到新世界,個價咁殘先嚟批股亦唔係路,如果管理層見到未來好多投資機會,有需要儲定彈藥大肆擴張,攤大手板問股東籌旗,其實係唯一選擇,市場咁大反應,如果唔係有春江鴨做淡,唯一解釋,就係對管理層冇信心。

喺藍籌地產股當中,新世界出晒名折讓永遠最大,今次系內兩間公司供股價,相對資產淨值,都折讓接近8成,股價暴跌後,市值同供股價已經相差無幾,仲衰過三線蚊型地產股,折讓咁驚人,唔係話市場讚你啲資產又平又靚,而係投資者質疑公司的賺錢能力,亦即係所謂「管理層折讓」。

一個往績不良的管理層,而家宣布公司有史以來最巨型集資計劃,攤大手板問小股東要錢俾管理層再大展鴻圖, 又有幾多人有信心同佢同坐一條船?

最能夠體現新世界管理層往績記綠一樣嘢,又正正係咁多年經過咁多次集資,冇轉化成公司價值。由96年對上一個地產周期開始,新地(0016)只係批股集資過兩次,近十幾年新地發展成點,投資者有眼睇,新世界唔計發行可換股,96年至今已經補充資本6大劑,幾乎等如藍籌地產公司抽水動作數目總和,不過期間資產淨值,由唔夠600億,膨脹超過1倍到今日超過1,300億,不過市值就又高峰近千億,大幅縮水到今日300億,資產再大嚿再值錢都乜用。

阿媽係咁,個仔都唔會好得去邊,新世界中國北搞地產,仲早過中國海外(0688)變「中國海內」,醃住個2千萬平方米土地儲備十幾年唔知做乜,隔離恒地(0012)都晨早私有化咗個恒基中國,唔使大大間上市公司擺喺度篤眼篤鼻,新世界發展跟住做的話,就算存心囤地唔做嘢,最少可以收窄多少資產折讓。

下回再續。

關連文章:
1. 凸透新世界(上) |(下)
2. 豪門二代(上)
3. 晒地之王(上)(下)

同場加映:

拾六拾七,一睇就明...