2010年12月17日星期五

暴炒烈酒(下)

(刊於2010年12月16日am730)

上回講到,茅台五糧液等著名土炮烈酒,近年掀起漲價狂潮,搞到全國嘈嘈閉。

話口未完,星期三,阿公終於忍唔住出聲,新華社出咗份稿,大字標題「十傳媒評擊五糧液漲價」。中國消費品牌,尤其係食得入口嗰啲,最大風險,係被競爭對手惡意中傷。五糧液被官方喉舌狂插,可能非常無辜,事緣今個星期,多間北京超市,聲稱收到五糧液廠家加價通知,理由係「為滿足消費者身份需求」,即係話唔賣怪啲,有失買家身份咁解。

大佬,五糧液企業管治往績認真麻麻,但斷估班高層唔係白痴(亦唔排除部分區域經理真係白痴),一句成本增加搞掂,冇理由在愁貧仇富敏感地區踩鋼線,五糧液已經否認發出有關加價白痴理由,但形象已經大大揩嘢,亦證明就算係奢侈品,如果漲價漲到影響和諧社會,阿公一樣會當係眾人之事,插之有理。

講到呢度,可能唔少人會問,點解幾個響噹噹靚酒名牌,產品售價會搞到咁混亂,呢個亦係中國酒商一個好大問題,冇直接經營零售網絡,就算喺自己地頭賣土炮,都係靠分銷商一層層推售,中間邊個環節有人囤貨居奇,會直接推高產品售價。

茅台在國內主要經銷商,叫白山方大,未上市,冇乜公開資料,五糧液嗰個,叫銀基集團(0886),香港上市,今年股價升咗1.5倍,因為唔少投資者買唔到橙買個桔,當銀基係烈酒A股隻輪咁玩。

國產烈酒零售價急漲,銀基今年業績,應該相當靚仔,不過作為五糧液主要經銷商之一,銀基就算可以洗脫帶頭囤貨居奇嫌疑,亦難免被人質疑,管理旗下分銷商,有冇出咗問題,烈酒暴炒成為全國焦點,廠商如果因為顧及品牌形象,開始檢討營銷策略,直接參與零售網絡業務(在青啤身上發生過),又或者阿公忍唔住出手,大大棍扑落高檔酒市場,會直接影響銀基盤生意及投資者信心。

銀基呢類酒辦出現,因為早年中國超市百貨業未夠成熟,今日全國連鎖零售巨人,幾乎已經全國插晒旗,網絡日趨成熟,可能係銀基最大威脅。銀基每年採購額,八成來自五糧液,五成銷售,來自一名「最大客戶」(可能係同機場免稅銷售有關),銀基做十蚊生意大約賺三蚊,呢名「最大客戶」,或者其他零售巨人,過銀基一楝,直接同五糧液做生意,分咗中間人三蚊利潤,未必冇可能。

所以銀基幾乎在所有場合,都強調自己同五糧液,包括可能互相參股(開口牌絕大多數吹水),每年採購額,都要按照雙方「私人及商業協商」,鐵打的交情,流水的官場,五糧液始終係國企,不過如果買銀基,要隨時留意五糧液管理層變動。

關連文章:
1. 暴炒烈酒(上)(下)

2010年12月16日星期四

暴炒烈酒(上)

(刊於2010年12月16日am730)

今期開白酒,講緊國產土炮烈酒。

中央電視台可能係全世界最好賺電視台,每年年底公開拍賣黃金廣告時段,收入動輒過百億,今年招標額126億(人民幣,下同),再創歷史新高。之前幾年,奶品商最肯掟錢賣廣告,今年央視黃金招標,頭三位取大豪客,全部係國產烈酒商,齋睇呢張經濟雨晴表,已經知道賣酒好搵。

國產烈酒,外國投資者可以飲,但公司清一色國內上市,唔係人人可以投資,所以香港人唔係太熟呢個高增長行業,五糧液及貴州茅台,市值都超過千五億,前者已經超越萬科成為深圳最大市值公司,後者由前年前幾蚊雞爆上現在超過二百蚊,酒王變股王。

炒烈酒股好搵,炒烈酒亦相當唔失禮。

十年前,老豆牛一,買咗支五十年陳茅台,盛惠三千幾港元,今日聽講要過萬蚊。無知有時最有福,當年飲得好過癮,咩掛杯咩三百幾種香味等茅台術語出齊,後來聽講,所謂幾十年陳釀,其實得一滴酒基,係唔係,唔知,不過如果今日要買支五十年茅台,記住數番轉頭半個世紀,諗吓六十年代大躍進,食都冇得食,有冇咁多剩糧釀酒。

通脹預期令全國炒風熾熱,唔係新聞,做紡織不如炒棉花,做玩具不如炒膠粒。炒生鮮食品,時限風險等如買末日輪,阿公一句唔該價格管制,可能落得一倉爛蒜。烈酒越陳越香,完全唔同講法,一時賣唔出,慢慢飲又得,送禮又得,放入櫃底幾十年都仲得,所以大戶有大戶炒,散戶有散戶炒,攪到全國投訴緊,點解靚酒越嚟越貴。

唔好話五十年陳釀,最普通53度茅台,據多份內地傳媒報道,舊年五一期間,唔使六嚿水,最近在超市零售價,已經超過千二大元,炒高逾一倍,仲要有價冇貨,五糧液品牌冇茅台咁響,但價格升幅亦相當驚人,更奇怪者,幾大上市酒商,幾乎齊齊公開澄清,過去一年,出廠價冇乜點加,誰炒了你的烈酒,口同鼻拗。

中國人有錢咗,多咗人飲得起高檔酒,肯定係事實,但需求肯定冇話忽然拋離供應一倍咁跨張,即係話整個烈酒銷售網絡,有唔少人在唔同層面囤積居奇。中央價格管制,未必會管到奢侈消費品,不過如果炒到全國嘈嘈閉,就會變成眾人之事,湯臣一品就係咁出事。

呢個現象,直接影響一間近月非常受歡迎嘅香港股票,銀基(0886),下回再續。

關連文章:
1. 暴炒烈酒(上)(下)