(刊於2011年4月15日am730)
 |
| 匯賢上市前資產值變化(資料:中文招股文件P.130) |
上回講到，長和系所分拆匯賢產業信託(87001)，旗下資產只有北京東方廣場，不過胃口大得出奇，賣4成集資112億(人民幣，下同)，市值279億，臨上市前一年，物業估值更大幅膨脹140億港元。
計番條師奶數，即係東方廣場估值，喺2010年，被估高近6成之後，先證券化拎出街賣，同期一啲內地上市發展商，物業估值肯定冇咁大幅發水。
長和系過去幾年，其實都分拆過唔少二三線物業，以REIT形式上市集資，例如置富產業(778)，03年香港搞緊REIT之時，先喺新加坡上市剃證監會眼眉，舊年香港介紹形式上市，仲有隻泓富產業(808)，05年香港上市，每股2.16港元招股，最新股價1.9港元，講緊過去5年，香港磚頭價格狂升，泓富股價反而長年潛水，明顯上市集資呢個動作，冇帶嚟任何資本增值，或多或少，反映咗長和系分拆物業上市，估值去得好盡，股票去到街外投資者手中，已經冇乜肉食。
長和系旗下咁多物業，自己老本行又係做磚頭，如果有心搞好旗下一隻REIT，應該陸續注入資產，而家東拆一件西拆一件，反而令人質疑大股東壯大公司業務誠意，今日匯賢出現，長和系可能可你講，呢隻嘢會變成投資內地商用物業旗艦，但掉轉頭睇，即係話畀置富泓富班股東聽，中國商機，你哋唔會有份。
香港上市REIT，包括匯賢，大股東會收管理費，不過唔係收現金，而係收基金單位，雖則話小股東都可以選擇以基金單位取代現金派息，但有幾多個散戶會咁做，長遠計，如果公司冇乜動作，即係分拆上市大股東高價套現一大筆現金之後，可以再不斷蠶食小股東權益。
講到呢度，都唔使浪費時間，研究吓匯賢派息有幾多厘，而家全國大興土木，北京上海廣州武漢，主要省會到二三線城市，幾乎去到邊度，都起一楝楝摩天巨廈，第一高樓記錄，二三年改寫一次，商廈供應增幅巨大，做包租公其實唔會太穩陣，順叔可以寫包單，長線投資者，一定有機會喺招股價樓下，買入匯賢。
講多無謂，短炒實際，香港第一隻人民幣計價股票，又有長和系名牌效應，大家或者冇為意，匯賢上市，由中信證券國際做獨家財務顧問，中信證券搞緊香港上市，呢單刁係國際化省招牌之作，匯賢上市初期多數炒爆，玩新股，抽獎當怡情，幾時收手，自己執生。
伸延閱讀:
1. 匯賢招股書財務資料摘要
#
