Best Blogger Tips

2011年12月9日星期五

思捷女屍(下)

(部分內容刊於2011年12月9日am730)

上回講到,思捷(0330)是利用加盟店谷大收入的極速增肥大法鼻祖,舉「零售」之名,行「批發」之實, 08年前後原管理層套現完畢兼集體跳船後,業績開始勁走樣,提出「喚醒Esprit睡美人之吻」大計,今後一切所做之事,都為叫醒「思捷女士」(Esprit Woman)所做。

如果思捷以前係間百思不得其解的公司,今日亦唔好得去邊。

至今年6月底年度,思捷營業額仍然接近340億元(港元,下同),但「批發」業務,佔總收入比重,由以前6成水平,降至唔夠43%,「零售」啱啱掉轉,由以前4成幾,升至超過56%。

思捷十年

「批發」業務中間隔咗代理商一層,毛利率遠低於自營店的銷售,思捷收入冇出現大倒退,「零售」業務急速上升,理論上,毛利理應該大增係咪?唔係,毛利不進反退,七除八扣之後,純利更由42億元,急跌至唔夠1億,就算你話關閉北美業務及部分分店,都冇可能有咁大落差,搞到冇錢賺。

思捷亦史無前例咁,變相為未來兩年業績,發出強烈盈利警告,講明未來四年,投資超過180億元重振品牌,180億絕對唔係一個小數目,大過思捷目前市值,以及現金水平3倍以上,可以預期,未來兩三年,思捷肯定年年見紅,虧損可能仲會好跨張。

就算唔計數,思捷呢個「喚醒Esprit睡美人之吻」行動,聽落去非常浪漫,頭牌中女名模Gisele Bundchen,亦好索吓,但拎出街的轉型策略,又充滿激烈矛盾,唔係太有說服力。

例如思捷新任管理層,近月開口埋口,講到自己舊時個品牌幾威幾威,找回1968年在三藩市創立時的「加州傳統精神」,對「思捷女士」最為重要,如果品牌生命力在於「加州傳統精神」,點解又要撤出美國,而剝離北美市場的原因,竟然又係「缺乏批發分銷結構」。

最令人擔心地方,思捷的業務重組方案,仍未在「零售」及「批發」中間,劃出一個清楚定位,未來4年,準備掟近60億元「資本開支」裝修及開設零售店舖,又話要掟近額外40億元「經營開支」,擴大批授經營權組合。

帳目唔對路,策略唔對路,都唔及當年管理層集體跳船咁唔對路,今日思捷最唔對路地方,仍然在管理層。

思捷換班後,有兩個執行董事,一個叫周福安,兼任財務總裁,睇數。

思捷業務轉型,財務總裁需要「頻密往返歐洲」,11月尾,聽講思捷先帶齊芬佬分析員兼記者去咗德國,搞咗個投資者日,可能周福安返香港時暈機浪,唔夠兩個星期,提出辭去所有公司職務,原因係「未能額外付出所需時間於歐洲」。思捷在08年,由領匯(0823)挖周福安過檔之時,主業已經在歐洲,周福安冇理由冇心理準備,周福安離開領匯時,年度酬金只有560萬元,去到思捷,三級跳,至6月財政年度人工2,263萬元,再上一年都有1,688萬元。周福安只有49歲,事業正當盛年,高薪跳槽咬咗兩年就要鬆人,同你講因為唔想飛歐洲,你信唔信?

周福安辭職「原因」


周福安領匯人工

周福安思捷人工

另一位執行董事兼行政總裁Ronald Van der Vis,09年加入思捷之前,04年開始在一間叫「 Peale Europe」的歐洲眼鏡公司做行政總裁,當時市值約為7億歐元,近3千個銷售網點,唔係乜嘢大型品牌,但Van der Vis勝在後生,只有44歲,呢位高大靚仔口才又一流的歐洲人,而家要重拾「加州精神」,再造品牌,重整業務,專攻女人,殺入中國,難度高過說服投資者,一條千年女屍,其實係Gisele Bundchen,咀一啖就會醒。

爛船有三斤釘,思捷而家市值跌到140億元左右,籃籌地位朝不保夕,管理層上個月唔知喺邊度,搵咗堆數字,同你講,單單係「Esprit」呢個品牌,價值已經有33億美元,品牌價值,潮流觸覺,超出財經茄哩啡認知範疇,留給各位靚仔靚女判斷。

真係要咀?


關連文連:
1. 思捷女屍(上)(下)
2. 三思思捷(上)(下)
3. 體育戰場(上)(下)

伸延閱讀:
1. 壹週刊: 篤爆千億神話
2. 思捷INVESTOR DAY PRESENTATION(2011年11月)
3. Michael Ying掟2.6億買葉劉大屋


同場加映
(警告: 兒童不宜)

講到防腐保鮮,要請教佢...


講到女屍保存技術的話呢,或者要問吓呢三條友...


如果對考古真係咁有興趣的話,去片...

2011年12月7日星期三

思捷女屍(上)


周大福(1929)等中國珠寶零售商,同埋李寧(2331)等中國體育服飾品牌,近年都係採取同一個增長模式,透過「合營」、「加盟店」等形式,谷大銷售網絡,「多仔丸」同埋「肥仔丸」一齊噼...

打「零售」之名,行「批發」之實,有一個經典教材:思捷(0330)

思捷今日要全面轉型,將行動叫做「喚醒Esprit睡美人之吻」,未來所做一切,都是為她:「Esprit女士」。仲搵咗巴西名模「啜西」(Gisele Bundchen)做生招牌,有幾索,睇睇...

點擊圖片放大

但係,「思捷女士」,呢條「睡美人」,究竟最新狀況係點,係咪錫啖可以起身,睇睇...

點擊圖片放大

俾你係思捷CFO,你會唔會咀佢?


入正題。

要展望「思捷女士」(Esprit Woman)未來的風姿,首先要了解呢條中女老妹的過去。

將時間撥回2008年7月,思捷上一任財務總裁潘祖明,因為「有意發展其他事務」,辭任公司所有職務的一刻。

當日思捷市值仍然超過1千億元(港元,下同),股價80元樓上,潘祖明跳船之後一個月,思捷公布的全年業績,純利再增長25%至64.5億元,營業額及純利齊創歷史新高,但呢一份成績表,亦是思績連續高速增長十幾年後,神話結束的分水嶺,其後3份全年業績,每下愈況,至今年6月底年度,幾乎冇錢賺。

至2008年6月底財政年度,思捷話自己係一個「國際化青春生活方式品牌」,提供「華而不貴的奢侈」,全球有超過14,500個「批發銷售點」,但只有690間直接管理的零售店舖,當日「批發」業務佔公司總收入56%,之前幾年,亦保持在近60%水平,亦即是話,當日在分析員口中的「高增長零售品牌」,其實是一家「時裝批發商」,透過將存貨風險,大量推向加盟店的「批發」銷售,變成高速增長的港股神話。

當日的思捷,幾乎每一次公布業績之後,都有董事或管理高層批售舊股套現的「例牌重作」,公司創辦人邢李「火原」,最高持股超過4成,期間大大話話減持十次八次,保守估計,套現最過200億元,可能係過去10年在自己公司撳走最多現金的一倍富豪,不過,如果邢生娶咗大美人後不顧江山,一心走人艱世界,選擇在高位一炮過賣盤的話,可以套現近700億元,你又可以話,邢生係香港股市中,最唔了解公司潛力的一位話事人。

除咗邢生之外,其他董事及高層,包括話「有意發展其他事務」但近年又唔見蒲頭的潘祖明,在08年前後,唔係呢個辭職就係嗰個盡沽持股鬆人,集體跳船,面對呢個港股近代史最大謎團,投資者如果覺得「好正常」的話,到今個星期,接替潘祖明睇數的財務總監周福安辭職,應該見怪不怪。

如果排除管理層做數的可能,純粹以業務結構分式,思捷由盛轉衰的關鍵,就是食得太多「多仔丸」及「肥仔丸」的後遺症。以加盟店形式做生意,全球唔係好多個品牌得成功,有兩個最出名的,人人都識,一個叫麥當奴,一個叫7-Eleven,擺能靠多靠大,靠品牌溢價開飯的「零售」公司,冇一間會咁做「批發」。


思捷:時裝「批發」
思捷Storefinder

H&M:時裝零售
The World of H&M

大家可以上兩間公司的Storefinder網頁望望(上面有互聯網HYPERLINKS),兩間公司都在全球40個以上國家或市場有業務,H&M只有2,300間自營店,在中東北非,因為市場監管原因,有小量加盟店生意,但講明唔係業務策略之一,思捷今日仍然有超過14,000個銷售網點,在德國一個山旮旯小城市,都可能見到一條街有三、四間分店,望住呢兩組極端數字,結論只有一個:其中一個行錯路註定爆煲。

時至今日,思捷當年高層發達鳥獸散之後,搵咗個後生靚仔行政總裁,同你講業務轉型、品牌再造,未來幾年,將會豪掟過百億元,重建零售網絡及加強宣傳,一系列行動,思捷稱之為「喚醒Esprit睡美人之吻」行動(Giving Esprit,the sleeping beauty,a wake-up kiss),未來所做一切,只為了她 --「思捷女士」-- 而做。叫醒睡美人之前,新管理層已經警告,思捷未來兩年業績,肯定會非常核突。

下回再續,睇睇這個「喚醒Esprit睡美人之吻」,究竟有冇太浪漫化,要幾大力先有效,使唔使人工呼吸、或者心臟起博器狂電先可以叫得醒。

關連文連:
1. 思捷女屍(上)(下)
2. 三思思捷(上)(下)
3. 體育戰場(上)(下)

伸延閱讀:
1. 壹週刊: 篤爆千億神話

周街是福(下)

(刊放2011年12月7日am730)


上回講到,中國珠寶業其實競爭激烈,由疑似 A貨周大生,以至真正老字號老鳳祥,分店數目近年急速「細胞繁殖」,周大福珠寶(1929)亦鬥快鬥多在全國插旗,避免品牌在「周街是福」的混戰中淹沒,仍然保持「中國最大珠寶商」光環的一刻,滾水淥腳上市。

連老鳳祥銀樓亦一街係,可以想像,雕玉點翠、花絲細金等傳統手工藝,早被粗制濫造的工廠貨色淹沒,據周大福招股文件,舊年全國有58,000間珠寶零售點,當中有68%屬於加盟店,一個字號,千幾個零售點,可能絕大部分,同街邊戙個招牌冇乜分別。

內地消費者越嚟越有錢,不過由奶粉到金條,唔係咁相信國貨,山長水遠撲嚟香港買金買首飾,唔對路退貨退錢的話,有單有據更有保證。連周大福自己都話,擴張銷售網絡最大好處,係可以「最大限度提升曝光率及品牌知名度」,大陸同胞見慣見熟「周大福」街頭巷尾都有,落嚟香港自自然然會走入去幫襯。

05年3月,周生生有關內地發展陳述
(題外話,除了堅持自營,周生生證券一直持有港交所股分,
周大福連大福證券都賣了...)

呢種結構式消費模式唔會輕易改變,換句話講,香港珠寶店在內地銷售網絡規模,同實際收入,其實冇直接關係,例如六福(0590),星期二宣布開到第800間分店,超過700間在大陸,不過至超過7成收入,嚟自香港32間分店,當中又有一半銷售來自內地同飽。

又例如,周大福1,506個零售點,有459個,開在三線及以下內地城市,周大福唔會同你講,呢幾百間分店銷售數字有幾多,因為極有可能接近零。有55%銷售來自中國,不過,當中又有好大部分,來自向加盟店出售存貨的「批發」業務收入,如果想睇吓呢個業務模式是否可持續,可以睇返財經茄哩啡之前幾篇「三思思捷」及「體育戰場」,或者,在大陸開7-Eleven賣珠寶,容易過賣波鞋咁囉。

一個人,在可控制範圍內,做了一件自己想做的事,例如戒煙,是決心的表現,沒有做一件自己不想做的事,例如擦鞋,是原則的表現;當推動「信念」變成「事實」之間的力量,涉及一個群體的多數「行為」,就是「自我應驗預言」(Self-fulfilling Prophecies)的一種。

舉個例,金融市場的技術分析,當一大班投資者抱有同一「信念」,在「XYZ」理論下,認定一個「支持位」難以支持,齊齊做淡,結果「支持位」跌破,變成「事實」。「XYZ」等如「史力加通道」亦好,「死亡叉燒包」也好,「秋官效應」都好,只要大量資金抱有相似信念並採取同一行動,很可能會成為一個「自我應驗預言」,變成市場「事實」。

周大福千幾間分店,實際作用係做廣告招牌,包裝住香港幾十間分店,以市帳率雙位數字招股上市,市值以千億元計,集資後補充存貨,以「批發」形式賣予加盟店,短期帳面增長幾為不爭事實,但只是一個「自我應驗預言」。

真真假假,虛虛實實,明天的周大生,亦可以某種形式的「最大珠寶商」身分上市,市值越大,越容易被納入基準指數,基金越要追貨,又是另一個「自我應驗預言」。這種建基在一個「自我應驗預言」上的「自我應驗預言」,之前亦曾出現:2008年5月的蒙古能源(276),前身是新世界數碼。

今天的香港股市,跟04年的中國珠寶零售市場一樣,也是周街是福,散戶要保護自己,不做有違自己投資原則及紀律的事,相對做自己想做的事,往往更加重要。(再簡單啲講,好多時,唔做好過做...)

順叔做人沒有太多原則,作文時倒還有那麼的一點點,在香港股市病態的一手市場,孖展額度都可以變成新聞,財經茄哩啡可以做的,恐怕只是在自己能力範圍內,說幾句不中聽的話,喋喋不休寫了幾期的新股及珠寶業情況,如果各位可以帶走的,只是「抽」或「唔抽」的一個結論,順叔會哈哈大笑的。

關連文章:
1. 周街是福(上)(中)(下)
2. 迎賓周大福(上)(中)(下)

伸延閱讀:
1. 大餅變紅衫
2. 壹週刊: 炒蒙能輸5億 陳振聰露底



同場加映:


2011年12月6日星期二

周街是福(中)

(部分內容刊於2011年12月6日am730)


上回講到,周大福在04年底盡沽以「基礎投資者」身分認購的中國人壽(2628)股分,套取資金全面擴展周大福珠寶(1929)在內地的業務,中國珠寶零售業亦是在這個時候,出現「周街是福」的情況。

「...希望『周六福』及『周大生』將來也可以上市…」這是某位網友在順叔網誌上的一句留言,咪以為只係搞笑,呢個極可能是周大福過去幾年,三扒兩撥谷肥自己,再滾水淥腳趕住上市的策略轉變的關鍵。

2002年中國開放黃金買賣之前,珠寶店好難做黃金首飾生意,當時港資珠寶零售點,亦唔可以獨資經營,只能夠在灰色地帶,以近乎違法的「特許經營」或「合資經營」,半公開半遮掩運作。呢個情況,在04年開始實施的「屍爬」(CEPA),出現大突破,港制金飾關稅大降,亦容許港商獨資註冊金飾企業。

04年是「特許經營」開始在中國開枝散葉的黃金歲月,阿公明明話唔準,但係全國人人趕住坐上呢架「致富快車」,結果在04年12月底,商務部半推半就下,正式頒布《特許經營企業備案管理辦法》,全國大大小小連鎖加盟店,由「違規」的經濟現實,變成「合法」的商業網絡。

在這個時勢,準備在大陸放手大幹的周大福,第一眼見到的,就是「周街是福」的混亂場面,街頭有間「周大生」,街尾又有「周六福」(有網友甚至發掘到有間大慶「周佳福」),最恐怖者,呢班「周乜周物」、「乜福乜福」,幾乎間間都準備以「連鎖加盟」形式進行「細胞分裂」,將品牌及版圖,推廣至全國,如果周大福唔做嘢,剛剛富起來的內地消費者,見到「周街是福」,唯獨唔見「周大福」,以為周大福唔係大品牌老字號,甚至係A貨咁就大鑊。

呢個時候,周大福做咗兩件事。

首先,周大福將各個疑似「周大X」、「周X福」、「X大福」,告上法庭,呢個動作唔係咁成功,根據中國商標網有關「商標異議裁定」的資料,國家商標局,在2003年至2006年,最少駁回周大福提出,有關「周大生」、「周六福」及「陳大福」侵權的申請。

既然唔能夠在知識產權框架,扭轉「周街是福」的情況,周大福唯有做第二件事,就係同競爭對手鬥快插旗。根據目前資料,已經推斷唔到,當年第一個透過「加盟店」增肥係邊個珠寶品牌,但可以好肯定咁講,主動又好被動又好,周大福零售網點近年的幾何級的增長速度,招牌插遍全國,除咗谷大上市,其實亦係一個為咗保護品牌的重要「宣傳」手段。

如果大家以為「周大生」只係「周街是福」的其中一間A貨,咁就大錯特錯,周大生近年開舖之狠,相對周大福,有過之而無不及,近來周大生趨谷緊的宣傳口號,叫做「闊步邁向2000間連鎖店」,仲多過周大福500間。

根據周大福招股書資料,唔計收入少於500萬人民幣的小型珠寶商,在2010年,周大福在中國的市佔率12.6%,排第一,周大生亦有7.1%,排第三,周大生珠寶品質可能有分別,但擴張手法同周大福幾乎一樣,是但搵間市場調查公司的話,周大生隨時亦可以話自己係「全國最大珠寶零售商」。


後面有個勢兇夾惡的周大生,周大福唔係一句「老字號」就坐定粒六,因為前面仲有一間「老鳯祥」。

老鳯祥銀樓,始創於道光年代,163年歷史,字號之老,老到可以做周大福太公, A股上市,代號「600612」,前身叫做「第一鉛筆」,招牌產品係「中華牌鉛筆」,在05年開始推動股改,控股東東係上海國資委,開始注入老鳯祥銀樓等部分資產,成為進軍珠寶零售業的「國家隊」主力。

據周大福招股書,老鳳祥市佔率9%,舊年排第二,但老鳳祥自己網頁聲稱,2010年銷售超過140億元人民幣,多過周大福同期內地營業額,全國「銀樓分號」超過600間,銷售網點超過1000間,並且以每年100間新增加盟店的速度擴張。

周大福上市,規模忽然曝光,嚇到外國芬佬嘩嘩聲,但睇埋周大生同埋老鳳祥少少資料,就知道好多人做緊同一件事,周大福望落去規模大到嘔,但競爭亦大到嘔,甚至有可能,周大生及老鳳祥正密謀在香港上市集資,周大福焗住極速增肥後,再滾水淥腳趕上市,要在仍然保持「中國最大零售珠寶商」光環的這一刻,正名上市,增加品牌知名度,避免慢人一步,避免多人一個二奶形象。

下回再續。

關連文章:
1. 周街是福(上)(中)(下)
2. 迎賓周大福(上)(中)(下)

伸延閱讀:
1. 大餅變紅衫

2011年12月5日星期一

台企染「藍」

亞視誤報老江西去,罰30萬,呢單嘢,唔好再玩啦...


睇吓戲唔好?

台灣藍綠對決前一個月,兩間大型台資企業,齊齊染藍。

星期一,旺旺(151)及康師傅(322)正式晉身香港藍籌,有兩個問題百思不得其解:

(1) 台灣商人在大陸,點解會特別成功,香港大孖沙係咪唔識在大陸做生意?
(2) 點解TVB(511)及亞視股權變動,同時會出現台灣資金踪影?

澳門賭場因為「政治不正確」,唔夠格染藍?亞視呢嚿豬頭骨,由邱德根到鄭家純到林百欣,轉手無數次,冇人搞得掂,旺旺都有興趣...


《賽德克.巴萊》的政經影評,還是要寫的,不過未有乜嘢頭緒,有冇高人幫吓手...

-- to be continued...

2011年12月4日星期日

周街是福(上)


周街是「福」,絕對唔係講笑,可惜搵唔到「周佳福」...

呢期絕對唔係開周大福珠寶(1929),而係講吓中國珠寶零售業最新情況。金舖多過米舖,「周大生」到「周六福」到「金大福」,周街係福,睇睇食粥食飯靠內地遊客的香港老字號,在中國千店一擲的擴張策略,係咪多此一舉。

先熱身,由香港的病態新股市場講起。

話說香港股市一手市場(Primary Market),家陣同時有三單規模相若的大刁撲水搶客,包括全國第二大證券公司海通證券(6837)、全國第三大人壽保險公司新華人壽(1336),仲有全地球最大的珠寶零售商周大福。

三單刁,前兩者,都有所謂「基礎投資者」入咗飛,周大福IPO迎賓,要「裸奔」。

「基礎投資者」,英文「Cornerstone Investor」,唔好攪錯「策略投資者」,「Strategic Investor」,例如幾年前國企巨銀上市,搵歐美金融機構入股,大家有策略合作關係,有長期持股的默契,先叫做「策略投資者」;承銷商搵啲咩大孖沙及大型基金落飛,保證有貨但同時設定一段時間的「禁售期」,叫做「基礎投資者」。

新股上市搵基礎投資者圍飛,幾乎係香港第一市場的獨有怪雞現象,可能因為香港散戶以為抽新股好易賺錢的病態心理太出名,又同時容易受「名牌」、「名人效應」影響,所以近年大型新股應市,承銷團都好鍾意用呢一招。

周大福招股,上星期搞咗場「富豪級」投資者推介會,城中國內富豪列隊出席,星光熠熠,歡樂滿東華式場面,斷估都係做俾散戶睇,因為三單大型新股當中,暫時只有周大福,未搵到「基礎投資者」入飛。

周大福老闆鄭裕彤做慣大型新股「基礎投資者」,人脈又廣,拎隻私人珍藏幾十年的周大福上市酬賓,反而冇人吼,唔知係咪估值貴到冇朋友,彤叔眾多老死,肯接貨都唔肯受禁售期束縛,冇接貨就寧願在周大福上市後再搵位幫襯。

又唔怪得晒彤叔班老友冇義氣,未來半年,場「歐債百家樂」唔知搞成點,香港同台灣邊個做辦事人又唔知,分分鐘中國邊個做總理都有變數,以招股上限定價計,周大福市值2,100億元(港元,下同),如果坐住一隻市盈率60倍、市帳率18倍的新股,唔準郁6個月,邊個會咁沙膽。

記憶之中,第一次高調利用「基礎投資者」做宣傳的香港新股,叫做中國人壽(2628),03年底上市,當時唔係咁多人認識中國保險市場潛力,搵咗城中三大富豪圍飛兼做宣傳,除咗李嘉誠的長實(0001)和黃(0013),恒地(0012)李兆基及新世界發展(0017)彤叔,都係用私人公司名義落飛,彤叔就係透過周大福,買咗超過1億股中人壽H股,每股3.59元。

中人壽上市後一年,股份禁售期屆滿,周大福配售超過1億股中人壽出街,每股大約5.35元,套現近6億元,根據當時承銷商講法,周大福套現所得,將會用作旗下的周大福珠寶,拓展中國市場之用。

好喇,到戲肉。

將時間回撥至2004年12月,周大福盡沽中人壽股分,套取資金在內地大肆擴張,這一年這一刻,亦係中國珠寶零售業,出現翻天覆地巨變的轉捩點,好多「周乜周物」、「乜福物福」,就係呢個時候開始,周街都係。

綜合周大福招股文件及公司網頁資料,周大福遲在2003年,在深圳設立中國總部,集中內地業務營運。04年底,周大福在內地大約只有百幾間分店,至05年增加至超過500間,去年在北京開設第1,000間零售點,到今年3月底,已經增加至1,506間。

周大福超過80年歷史,偏偏在過去短短幾年,零售網絡出現幾何速度的增長,除咗為上市,另一個重要原因,其實係為保持品牌形象的「宣傳」!

點解咁講,下回分解,輪到周大福的兩個主要競爭對手出場,咪以為係周生生(0116)六福(0590),真正主角,講緊開新舖更狠更跨張的「周大生」,同埋真真正正的老字號:老鳳祥(600612)

關連文章:
1. 周街是福(上)(中)(下)
2. 迎賓周大福(上)(中)(下)
3. 大餅變紅衫