Best Blogger Tips

2012年6月30日星期六

Beast & the Breast


聽講陳克勤「搓Our Breast」之後,努力苦練「痾佬」,更曾經在立法會用英文發言騷吓料,不過,上面條片最後一段,顯示克勤哥仍然擺脫捲脷「lur」脷的壞習慣,「better place」變咗「bladder paste」,唔知「DAB」係咪應該改做「DRAB」...

你話禮義廉乜都好,最少作為一個政黨,民建聯一路搵緊位俾第二、三梯隊上,好似白鴿阮品強咁,廿幾年前已經見到佢啲街板,掛到而家人都死埋,都係等唔到上位,都仲係高達鐵頭仁...

新一屆行政會議名單,赫然出現克勤哥的「Breast friend」:李慧琼子。

順叔喺度諗,當日老董引入「問責制」,主要目的就係閹割公務員系統,不過呢,行政會議人數同時增加一倍,同時亦閹撚埋自己個內閣。

行會有30人(立法會都係60人),圍威喂一人一句,已經半粒鐘,一半所謂「問責官員」,有乜冬瓜豆腐要人頭落地,一半係「李慧琼子」呢類非官守議員,可以吹水唔抺咀,全世界有冇邊個政制,一個內閣有泰半成員係「Minsters without Portfolio」?

既然係「問責制」,行會非官守議員,根本唔需要存在。

Hello Kitty懸案


唔知有邊個記得,1999年香港有單非常轟動的Hello Kitty兇殺案...

梁生大地震,難以自圓其說,諗咗好耐,可以有三種解釋:

  1. 有關僭建法例,政出多門,日改夜改,專業人士甚至地政屋宇署人員,查實個個都朦查查...
  2. 梁營好早已經掌握唐宮秘圖,就算自己身有屎,200呎笑2000呎,唔想Tip off唐唐拆除自己的政治炸彈,所以一直隱忍不發...
  3. 由傳媒到屋宇署到最新幾條建築測量專業證人,都只係在梁宅遊「花園」,冇入屋,梁宅地底,同全港大部分獨立屋一樣,仲有一個大型僭建,所以冇搵專業人士由頭到尾、由外至內仔細審查一次...
點都好,都係嗰句,新界大量官地被霸佔,市區豪宅獨立屋大型僭建普遍,丁屋都要被開刀,梁振英都係時候,就全港豪宅獨立屋僭建嚟一次全面調查,南區掃到山頂,乎合安全,可以豁免保留,不過要補地價,如果佢唔夠膽做呢個動作,順叔會傾向相信上面第三個解釋...

關連文章:
1. 拆解僭建聯(上)(下)

2012年6月29日星期五

大禮露微


(哈哈哈,都係嗰句,見報版標題,冇咁斯文的...)

開心星期五,風花雪月,睇睇北京年年向香港送「大禮」,顯露咗乜嘢細微之事,香港人應該留意。

香港回歸十五年,國家主席胡錦濤親自落嚟贈慶,唔知中央政府下面個「人工影響天氣辦公室」,係咪真係咁呼風喚雨,周未長假好可能打風,小雲叮噹孫悟空等七一上街撐Hello Kitty,Cosplay遊行可能有啲麻煩。

每逢有北京領導人嚟香港,例行公事,公布吓一堆中港經濟互動新措施,今年胡錦濤親自南下,斷估會有更多場大龍鳳,官方新華社在星期三首先熱身,引述國務院消息,事先張掦中央政府將制定一系列政策,「進一步支持香港經濟社會發展」。

呢個幾乎一年一度的指定動作,香港傳媒,香港人,慣咗以「大禮」形容之,星期四揭吓香港報紙,頭版頭條大字標題,乜嘢「阿爺送六大禮」,乜嘢「中央六路惠港」,電台電視報道有關消息,有係「大禮」前「大禮」後,越聽越「銀」耳,越睇越扯火。

內地傳媒比較注動行文用字,早年報道有關消息的時候,全部採用較中性的字眼,例如「加強中港合作」、「促進兩地經貿融合」等,近兩日的內地報章,尤其係同香港接近的華南地區傳媒,亦都用晒「大禮」二字,官方新華社評論文章,總結香港回歸以來保持「繁榮安定」的「泉源」,仲掟咗一句「問渠哪得清如許,為有源頭活水來」,問你死未。

洗腦式的「皇恩浩盪」,做得多講得多,好似香港冇咗中央「大禮」就死得,好記得幾年前好似又係打風,部分內地旅客滯留香港機場,電視台扑咪,有位大陸同胞大大聲向各位港燦講:「如果不是中央政府照顧你們香港,完蛋了」。

順叔冇意挑撥兩地同胞感情,只不過,想同香港各位傳媒朋友講一句,最好減少使用「大禮」呢兩個字,既不大,亦非禮,講得多,人哋都會睇你唔起。

港府確保水電供應穩定,乃份內之事,唔需要掛在口邊向全港居民送「大禮」,旅發局在海外宣傳吓,老襯亭維港夜景,乃自身優勢,唔會有人話向山頂居民送「大禮」,經濟融合雙贏共利,中港兩制互補長短,僅此而己,「大」咩「禮」咩啫。

由03年開始,種種所謂挺港「大禮」,邊個可以舉一個例子,只係對香港有著數,要大陸同胞或企業向香港「讓利」?就算自由行,大佬,國民外遊乃公民自由,又係乜嘢「大禮」;國務院話支持香港強積金等投資內地金融資產,中國證監會其實咪又係四圍鼓勵長線投資者入市,呢個又係乜嘢大禮。講嚟講去,例如人民幣業務乜乜物物,年年係咁講,唔等如歲歲送「大禮」,中央政府自己金融改革手腳慢,唔放膽而矣。

之前講過,舊年副總理李克強嚟香港,由新華社公布的所謂「挺港36條」,潛治辭其實係「治港36條」,變相等如中央政府規劃香港的「施政報告」,要中港兩地在政治經濟社會文化上全面接軌,想飛都飛唔出,今次胡錦濤訪港的所謂「大禮」,唔會超出「治港36條」範疇。

兩地兩制磨合,以大溝細,中強港弱之勢無可逆轉,但香港回歸十五年,中國並非冇受香港影響,例如民運人士李旺陽「被自殺」一事,香港人的反映及傳媒的窮追猛打,最低限度,起到此少監察的作用。

香港全球獨有的「核心價值」,只有一國兩制,如何在兩地兩制磨合過程中,讓北京明白到自由民主人權等普世價值的重要。講就偉大,其實只是香港人做翻一直做緊的事,建華八年當奴七年,回歸後冰火煎熬十五載,香港仲咁有生命力,查實已經係最大成就,同根同發展,無需自我婑化,由拒絕將「大禮」二字掛在咀邊開始。

關連文章:
1. 治港鐵道(上)

2012年6月28日星期四

老實樓神(下)






今期財經茄哩啡撈埋「樓盤分析員」,推介長實(0001)最新開售的城中筍盤峻瀅,將價單及樓書當上市公司招股書咁睇,講多次,冇意唱好某一公司或某一樓盤,只不過用一個最哄動的樓盤,睇睇一啲買新樓ABC,當係消費者教育。

上回講到,峻瀅以每方呎5313元(港元,下同)的「Win硬價」作招徠,不過講緊用建築面積計算的即供優惠呎價,樓書及價單列用的「實用面積」,亦唔當得真,如果將單位所攤分公用地方面積、查實係石屎牆的「非結構預製外牆」等一大抽唔等使的發水面積剔除,單位實用比例分分鐘低於7成,實用面積方呎價分分鐘超過8,000大元。

講完單位縮水,梗係輪到樓盤發水,兩者因果互連,之前講過無數次,今次唔再重覆。

峻瀅樓書第96頁,列出咗獲政府豁免計算樓面面積的「環保設施」及「創新設施」,當中「非結構預製外牆」,已經有88,802方呎,露台70,547方呎,工作平台28,686方呎;露台同埋工作平台,點解要一分為二,再佔用多啲石屎牆,又有幾環保,起樓用預製組件又幾創新,大家可以問吓候任特首梁振英及發展局局長林鄭月娥,未來政策會唔會再咁鬆手。

樓書第97頁,列出各種各樣獲豁免的設施,包括「康樂設施」、「有蓋花園」、「加濶的公用走廊及升降機大堂」等,冇逐一列出佔用面積,不過睇牌頭已經知道唔細,所以峻瀅近1,800個單位,個個都分攤咗接近200方呎的公用面積。

咁都未講完,根據樓書平面圖,每個單位都放咗個放落唔細的「冷氣機平台」,不過面積表又冇交待,「冷氣機平台」計唔計落建築或銷售面積。

峻瀅樓書冇列明樓盤原來的可建樓面面積,以及最後賣俾用家的總銷售面積,財經茄哩啡唯有自己計師奶數。

峻瀅樓盤,位於將軍澳85區,同區查實有三個計劃中的住宅盤,包括峻瀅,前身都係捷和鋼廠的廠房物業,三個都同長實共同發展,峻瀅地盤,2007年補地價28.7億元,可建樓面大約100萬平方呎,平均地價只係2,700元一呎。

峻瀅樓書詳列每一個單位的建築面積,將所用單位建築面積加埋一齊,總共140萬方呎多啲,換句話講,樓盤發水最少40%,假設平均售價,建築面積計每方呎6,000元,峻瀅銷售收入都有84億元,長實可以賺幾多,大家自己計喇。

發水4成,唔怪得峻瀅實用率,俾盡佢都係7成多啲,地產業「行規」,唔代表消費者應該逆來順受,唔通個個高官都有僭建,就等如合法,大家又可以問吓政府,講咗好耐話要收緊發水面積的豁免,究竟要講到幾時。

除咗計錢,樓書越係細粒的字,越應該用放大鏡放大慢慢研究,例如幾乎每張面積表都提到,部分單位露台或平台,外牆裝飾內藏公用去水喉,真係要買的話,就要睇吓個單位會唔會收埋直徑近呎的去水喉。

有「樓神」之稱的長實執行董事趙國雄,出咗名老實,例如月前天宇海的「平台層」,不過係買家疏忽的美麗誤會,又話將軍澳85區另外兩個樓盤,對峻瀅極度綠化的景觀唔會有影響,佢老兄講得出「發展商點會自己擋自己」,就一定有辦法啦,分分鐘未來兩個盤,長實都係用防彈玻璃做牆身,峻瀅業主可以享受透視樓景。

峻瀅廣告最真實一幕

其他小問題,例如堆填區的清新空氣,聞聞吓就「心曠神怡」,就算行得慢啲行十幾分鐘先到港鐵站,班次又疏落,咪當鍛鍊腳骨力囉,好多人都係咁啦,大家開車坐車行過東區走廊,記住望吓對面將軍澳,有幾多楝一模一樣的住宅建築,再想像一吓,類似建築群,未來幾年可能會再擴大一倍。

長實近年,做豪宅及甲級商業物業,成績唔係咁見得人,不過呢,在大眾化一手樓市搵食,鋪鋪精甩邊,講到投資者教育,即係樓價平貴,唔好問財經茄哩啡臨時客串的「樓盤分析員」,信老實樓神啦,在堆填區良心推盤幫年青人上車,「Win硬價」!

關連文章:
1. 老實樓神(上)(下)
2. 樓花天與地
3. 僭建演義(中)

伸延閱讀:
1. 環保觸角: 新樓牆壁越來越厚 外牆計入銷售實在荒謬

2012年6月27日星期三

周大碌一碌


周大福珠寶(1929)上市半年,派第一份全年成績表,聲言未來3年收入「翻一翻」。

周大福未出年報,好多嘢未有得睇,純官講乜,聽吓就算,碌一碌有幾大碌,係咁兒Look Look。

純利增長近8成,賺63個億(港元,下同),集資幾百億、大量補充存貨、散落授權分銷商製造收入增長、股價大插潛水,幾個劇本指定動作之後,周大福最新市值約920個億,市盈率15倍,市帳率3.2倍。

比較吓兩間盈利水平相若,舊年賺60個億左右,但投資者信心懸殊的公司:煤氣(0003),市值14,00億,市盈率23倍;碧桂園(2007),市值500億,市盈率7倍,周大福最新估值,大約在兩者之間,可以話唔平唔貴,唔上唔落。

周大福較招股價潛水35%,業績Black Out之後,純官係咪應該大手增持,話俾大家聽佢碌周大福有幾抵買?

關連文章:
1. 周街是福(上下)
2. 迎賓周大福(上下)

伸延閱讀:
1. 大餅變紅衫

老實樓神(上)


香港普通市民買樓,作為投資者作為消費者,權益向來冇乜保護,股市出入都叫做有個證監,買樓中招唯有認命坐監,股票分析員一大堆,又有幾何見到「樓盤分析員」,有見及此,財經茄哩啡扮埋「地產茄哩啡」,頭炮同大家推介一個城中筍盤:峻瀅。

嗱嗱嗱,順叔絕對無意,刻意唱好某公司某個樓盤,不過張張報紙頭版頭條都話峻瀅「大減價」、「平盡」將軍澳,咁哄動,可以作為一個買新樓的實戰例子,既然冇地政專業人士做「樓盤分析員」,順叔就算唔係地政專業,都唯有頂硬上,唔夠班做投資者教育,計吓師奶數,做吓消費者教育都好。

峻瀅日前開盤,當然唔少得人稱「樓神」的長實(0001)執行董事趙國雄,開咗個每平方呎5313銀(港元,下同)的「WIN硬價」,聽講仲低過同「區內」二手市場價格,開倉賣大包益去貨,樓神仲話,希望可以提供到一個機會,幫香港年青人置業上車咁話,聽到樓神呢句說話,感動咗囉。

峻瀅在電視賣行廣告,又「新中環機遇」又「香港東千億催燦」,宣傳口號無得彈,唯一可以批評的地方,就係略嫌平實內儉咗少少,形容呢個離將軍澳日出康城八至十幾分鐘腳程的新盤的地理位置,查實可以再浮跨啲,例如「汕尾以南、沙堤以南、一路向西」咁,都冇錯喎。

印象講多無謂,講銀最實際,打開峻瀅官方網頁幾張價單,的確有好多單位,呎價低於「5313」的,不過講緊用建築面積計算,仲要係現金或按揭即時付款的95折優惠,用「實用面積」計,就冇「WIN硬價」呢支歌仔唱。

咁咩嘢叫做「實用面積」呢,根據峻瀅樓書第4頁的定義,當然包埋露台、工作平台、窗台呢抽嘢,如果有圍牆連接公眾地方,圍牆面積都會計算埋入去單位的實用面積,打開是但一張價單,右下角超細粒字的注釋,又有一句,「買賣合約之實用面積之計算包括非結構預製外牆,並由非結構預製外牆之外圍計起」。

咁咩叫「非結構預製外牆」呢,顧名思義,即係預製組件,唔知點解咁環保,聽講可以得到優惠,政府豁免計算樓面面積,於是近年越整越厚,想知道「非結構預製外牆」點影響單位的實用面積,又可以去返峻瀅樓書第7頁,上面提到,呢類預製組件牆,最厚去到30厘米,接近一呎,隔離仲有個幾仔細的圖表,話你知每座每個單位,「非結構預製外牆」的面積有幾大,例如第三座全楝的A單位,預制組件最厚,佔單位有蓋面積足足7.12平方米,即係話幾百萬買個單位,足足有76平方呎係石屎牆,用「WIN硬價」計算,都要40萬。

明明係石屎,不過呢,引用一位網友所言,冇咗幾面牆,成間屋會冧,又即係話,閣下買咗個單位,日日夜夜都用緊呢啲「非結構預製外牆」,即係好實用,當然應該計入「實用面積」啦,「非結構預製外牆」,而家搞到厚度高達30厘米,肯定唔係峻瀅獨家,應該唔少新樓都用緊呢一招。

如果閣下覺得石屎牆唔實用,咪減咗條數自己再計吓,舉個例,跟據峻瀅價單,第3座32樓A單位,即供價514.6萬,建築面積970呎,呎價5,305元,OK?單位分攤咗199呎公用面積,仲有76呎石屎牆,剩低695呎需要舖地磚,實用比例得71%,呎價變咗7,404元;再減埋22呎露台、16呎工作平台、33呎窗台,實用面積又可以話得返624呎,實用率64%,呎價高達8,246元。

一個單位,用唔同面積計算,有唔同呎價,不過最後簽字成交,永遠係一個價錢,講到尾,就要閣下自己判斷,一個九龍以東以東再以東、汕尾以南以南一路向西的將軍澳分層單位,牌面近千呎,實際可用唔夠700呎,值唔值500萬,下回再續。

關連文章:
1. 老實樓神(上)(下)
2. 樓花天與地
3. 僭建演義(中)

伸延閱讀:
1. 環保觸角: 新樓牆壁越來越厚 外牆計入銷售實在荒謬

2012年6月26日星期二

拆解僭建聯(下)


上回講到,港府針對僭建的執法,在2001年出現一次突變,「優先處理」有即時危險、對環境造成嚴重滋擾、以及新建的違規建築,政府打擊僭建,查實不遺餘力,好有效率。

根據政府在去年6月,向立法會發展事務委員會特別會議提交的一份文件顯示,在2001年,全港估計有80萬個僭建物,推出「優先處理」的執法政策後,每年拆4萬個,去到2011年3月底,處理咗超過40萬個僭建物,十年時間,拆咗一半!

好喇,既然政府咁出力打擊僭建,咁點解在新界,仲係咁多僭建,點解在市區,又仲係咁多達官貴人被踢爆「僭建聯」身份?合理解釋只有一個,就係2001年推出的所謂「優先處理」的政策,潛台辭其實是「選擇性執法」。

過去十年被清拆的僭建物,被拆除的僭建,相信絕大部份在市區,受影響的絕大部分是小市民小業主的普通住宅或舊樓,新界丁屋僭建霸官地,無需「優先處理」,申訴專員公署在過去十年,不下三次主動調查、並公開批評政府在打擊新界僭建執法不力,「優柔寡斷」、「厚此薄彼」,舊年4月一份報告,更加引爆香港過去一年的僭建風暴。

被政府「優先處理」政策放生的「僭建聯」成員,當然唔止係新界丁屋,仲有市區豪宅及獨立屋。申訴專員公署多次針對新界僭建,斷估因為唔少市民向地政部門投訴無門,唯有搵申訴專員,豪宅區人口冇咁稠密,各種僭建經過專業人士處理,冇咁篤眼篤鼻,甚至神不知鬼不覺,就算被屋宇署發現出埋清拆令,市區仲有大把舊樓危險違規建築要「優先處理」,有排都未拆到山頂豪宅海邊獨立屋。

當然啦,大家可以反問吓,市區僭建咁普遍,究竟現行的建築物條例,係咪太不近人情,係咪太多太煩太擾民,搞到連專業測量師,甚至地政署屋宇署人員都矇查查,如果法例已經不合時宜,咁咪改囉,搬咗龍門,人人合法,一天光晒;如果法例無需改變,咁就唔該唔好再「選擇性執法」,拆普通住宅違規建築就喊打喊殺,豪宅獨立屋僭建就隻眼開隻眼閉。

講到尾,2001年制定的「優先處理」政策,已經過咗十年有凸,都係時候,因應香港最新的社會經濟政治環境,重新檢討一次。

阿水都知道,買獨立屋最大著數,好似二千呎地底唐宮咁,可以向下發展發水,唔使問阿季,香港十間獨立屋,分分鐘有九間半,僭建咗大大小小的地下室,今時今日,梁振英政府最應該「優先處理」的,正正就係豪宅區獨立屋的僭建。

政府可以好似處理新界丁屋咁,定條死線要豪宅業主自首,乎合安全標準的,咪豁免佢哋唔使拆囉,按市價打個折頭補地價咁,隨便計條師奶數,假設香港市區有2000間獨立屋,平均每間有500呎僭建面積,平均每呎補地價2萬港銀,庫房都收返200個億啦,政府成日話冇人手冇資源打擊僭建,「優先處理」獨立屋僭建之後,咪大把錢收拾埋其他四十幾萬個違規建築囉,梁振英而家提出呢項政策,又可以分散吓公眾注意力,同時彰顯自己及管治班子「僭建聯」割席的決心,一個唔該,仲可以壓抑吓香港樓價添。

香港僭建風波已經玩咗超過一年,今日進入「專業人士治港」年代,仲要係地政測量專業,丁屋都要開刀,諗唔到任何理由,梁振英政府可以繼續放生豪宅獨立屋的普遍僭建問題,任由地政執法部門公信力繼續破產。

哥斯拉好唔得閒...
當然啦,香港高官近年碰上自家僭建問題,個個好似被人落咗降頭咁,冇人可按常理出牌,梁振英一生謹慎規行規矩步,都犯上一個在普通人眼中非常低級的錯誤,難以自言其說,財經茄哩啡忽發其想,唔通梁振英山頂大宅地底,查實仲有一個大型僭建未曝光,所以處理今次僭建問題進退失據左支右絀?如果係咁,就好睇過戲囉。

關連文章:
1. 拆解僭建聯(上)(下)
2. 僭建演義(上)(中)(下)

伸延閱讀:
1. 申訴專員公署有關新界僭建報告(1996年2005年2011年)
2. 打擊僭建的政策(2012年3月2011年6月

2012年6月25日星期一

拆解僭建聯(上)


今期湊熱鬧,拆解香港一個象徵身份地位的組織:「僭建聯」。

香港市區一個普通分層單位,唔計縮水都得幾百呎,冇空間冇風景,僭建條毛咩,所以夠班加入「僭建聯」者,多數件物業有咁上下價值,加入「僭建聯」而成為新聞人物者,亦肯定有頭有臉。

「僭建聯」最具代表性人物,當然要數前政務司司長唐英年,參選特首期間被踢爆住宅僭建二千呎地下巨宅,成為選戰轉捩點,勢估唔到,唐宮醜聞最大受益者,候任行政長官梁振英,仍然選擇加入「僭建聯」,奇怪當日唐唐被萬箭穿心時,點解唔搵直升機或者Google衛星,走去梁振英屋企上空掃兩掃,睇睇有冇違規建築。

政客講嘢靠得住,乜乸都識上樹,今期唔係討論政治誠信問題,而係想探討吓,香港政府打擊住宅違規建築咁多年,點解僭建問題仲係咁嚴重,尤其係在達官貴人雲集、人傑地靈的豪宅區獨立屋,點解仲有咁多知法犯法的猛人,點解咁多拆唔清的僭建物。

先講講少少背景資料,「僭建聯」成員逐一曝光,呢場由住宅違規建築引發的政治風波,查實已經吹咗超過一年,風眼源頭,來自去年4月申訴專員公署一份調查報告,批評政府在處理市區及新界違規建築時,選擇性執法,令輿論矛頭,直指新界的僭建及佔用官地問題。

其後唔少住在新界的達官貴人,當然仲包括土豪鄉紳,逐一被踢爆家有僭建,照香港政治生態推斷,可能有唔少人為咗分散注意力,放吓風爆吓陰毒,將傳媒目光被吸引到一個在市區同樣普遍、亦容易踢爆的「知法犯法」現象,結果發現「僭建聯」成員星光熠熠,港九新界「個個身有屎」,由行政長官曾蔭權到問責高官,新舊行政會議成員到立法會民意代表,個個同坐一條船。

隨便引用舊新聞舉幾個例子。

孫明揚,官至教育局局長,曾幾何時港府房策地政的最高話事人,知法犯法的教壞細路的最佳案例,跑馬地住宅僭建雜物房,收清拆令甚至被釘契都當冇件事。

李國寶,前行政會議成員,最資深立法會議員,山頂頂層複式單位,加建千呎天台屋,據報道又係收埋清拆令兼被釘契,可能李國寶唔需要幫襯電能實業(0006)買電,聽講有關建築只係「太陽能板」,叫記者坐直升機睇清楚咁話。

陳鑑林,民建聯中堅份子,沙田丁屋門口僭建花園,天台僭建玻璃屋,更佔用官地放置貨櫃放雜物,「真誠為香港」的民意代表,當然唔會承認知法犯法,不過「法律不外乎人情」,僭建「只因村屋設施不足」。

梁振英被踢爆「僭建聯」成員身份後,最少願意立即洗底,毁屍滅跡,其他李國寶陳鑑林之類的「僭建聯」代表,相信唔少人,繼續側側膊,風頭火勢後就當冇件事,唔通屋宇署夠膽引用法例所賦予權力,入屋視察,甚至爆入山頂白加道27號Altadena House頂樓,強拆「太陽能板」呢類「環保設施」咩。

僭建風波炒大咗之後,舊年年中,曾蔭權已經大大聲提醒所有問責官員及行會成員,家有僭建就請立即拆彈,唐宮風暴對唐英年有咁大殺傷力,就係咁解。

梁振英山頂住宅有僭建,唔涉及入假圖則的欺詐行為,不過,經過逾一年的僭建風暴後,梁振英仲戇居居在「僭建聯」冇跳船,一句「無心之失」,好冇說服力囉。

拆解「僭建聯」坐大的成因,首先可以排除執法不力的因素,因為政府近年打擊市區違規建築,重拳重藥,絕不手軟。早在2000年初,當時的規劃地政局,已經成立專責小組,在所謂諮詢公眾後,在2001年4月,公布咗針對僭建物的新執法政策,重點係「優先處理」有即時危險、對環境造成嚴重滋擾,以及新建的僭建物。

下回再續,睇睇「優先處理」呢項新政出台之後,對拆解「僭建聯」各個組成部分,有乜影響,打擊咗邊個,又放生咗邊個。

關連文章:
1. 拆解僭建聯(上)(下)
2. 僭建演義(上)(中)(下)

伸延閱讀:
1. 申訴專員公署有關新界僭建報告(1996年2005年2011年)
2. 維基百科: 2011年香港僭建風波
3. 明報: 梁振英「家中所有建築物都有入則」(2011年5月15日)
4. 蘋果: 彤叔女婿山頂大宅地底疑僭建逾萬呎

神九吊天宮


咩嘢「太空之吻」,屌,「神九吊天宮」咪仲傳神?(有冇人有下聯?)

老八生日前,科學發展觀上身,飛天入海,兩大劑興奮藥係咁揈,最少揈咗幾百億人仔,算得係乜,掟俾IMF都幾百個億...美金啦。

唔係話探索深海太空唔啱,不過近排睇神九評論,又有人講,如果唔係當年大躍進期間,老毛寧要核子唔要褲子,64年爆粒原子彈,中國冇今日,有關講法,同八九六四後中國經濟一日千里的言論,似曾相識。

俗語都有云,死還死,七孔流血還七孔流血,唔明白點解係都要拉埋一齊講,既然係咁,在中國熱烈慶祝「神九吊天宮」之時,為《宇宙大帝》最後配上一句「毋忘六四」贈慶,都唔算太牽強啩...

伸延閱讀:
1. 溫家寶: 中國窮人逾億

2012年6月24日星期日

維修啟示

最近搞緊以下改動:
  • Google唔知又改咗啲乜嘢,Blogger好多舊相無故失蹤,要Repost或者重新Format
  • GOW財茄台收咗唔少Copyright notices,為免被拉人封舖,部分視頻會被刪除,或者搬去一個新的Youtube account
  • 財經茄哩啡Facebook平台砌極砌唔掂,索性用個新 Facebook Page由頭起過
因應以上改動,需要刪除唔少舊文舊片,部份網友在財經茄哩啡幾個雞棚,包括Facebook、Youtube及Blogger的留言,可能因此而唔見咗,唔好意思。

謝謝收看。