Best Blogger Tips

2010年3月26日星期五

中國和黃

(刊於2010年3月26日am730)

唔少人鐘意將復星國際(0656),叫做「上海和黃」,可以同香港首富相提並論,管理層對呢個花名,亦照單全收,以「全國最大民營綜合企業」做招牌。

好比唔比,結果成為復星國際IR最大敗筆,股價同其他綜合企業一樣,大落後,07年每股HK$9.23上市,而家都係6蚊上下,長期潛水。

復星老闆郭廣昌,對公司運作有句名言:「要站在產業角度看資本,站在資本角度看產業,實現產業與資本的雙重溢利。」呢句話講白咗,就係幫企業搵錢,幫錢搵有增長潛力企業,復星發蹟起家,就係因為兩樣都掂,結果在全國唔少國企老闆,不知財資何物之時,已經買落唔少好嘢,例如香港上市嘅招金(1818),都係復星晨早出資、湊大上市。復星09年純利46億人民幣,其中大半,來目股權投資增值。(如果大家想知道呢間嘢,收埋啲乜好嘢,可以上公司網站,每個月都會出份投資者簡報,值得一看。)

換句話講,復星核心競爭力,唔係作為業務多元化嘅綜合企業,而係一間熟悉中國嘅創投、或者私募基金。私人股權投資大孖沙凱雷,進入中國都要拍住復星,就知道復星呢方面確有一手,管理層應該諗諗,係咪改變吓IR策略,突出戰略投資呢辦業務。

不過無論私募基金又好、創投又好,識入貨只係啱咗一半,另一半更重要: EXIT。揀啱時機套現走人,復星仲未證明自己有咁眼光同決心,呢方面,或者真係要同誠哥學吓嘢。