2011年7月1日星期五

建市大業

(刊於2011年6月30日am730)


星期五放假,又可以偷懶,講吓中國股市改革大勢。

建國60周年,條街人人唱股市一定做好應節,七一中國共產黨90歲生日,全國大鑼大鼓,建黨偉業都拍埋,竟然冇乜人唱股市沖喜論,可見個市氣氛幾淡。

今時今日,先進共產黨員,斷估唔會咁白痴亦冇需要,特登為乜嘢建國建黨奧運世博沖喜造勢,不過好多市場改革,因為上半年緊縮調控拖住咗,唔做唔做仍要做,中國證監會日前已經講咗,股市十二五規劃,會短期內出台,下半年如果改革再開車,唔應該睇得太淡。

大陸所謂規劃,好多嘢寫咗唔一定做,冇寫又乜都做晒,不過大方向唔會太離罩。證監會研究中心主任祁斌,日前喺惠州咩嘢論壇做演講嘉賓,本來以為係另一場八股悶騷,點知條友洋洋四萬幾字演辭,絕無冷場,精采非常,有道理有數據,字裡行間透露咗唔少國情變化,仲有資本市場十二五規劃唔少大思路,強力建議大家上網搵嚟睇睇,搵唔到可以電郵順叔。

原來1921年中共建黨,同年喺全國,有成立咗136個交易所,第二年又全部破產; 07年大牛市,上海深圳兩個股市換手率,即係成交股數同流通股數比例,都接近10倍,可見中國人愛賭好炒,可能真係民族性之一,今日通脹問題,好大程度因為游資太多,投資產品太少,人人焗住炒樓炒礦炒蒜頭,所以資本市場未來五年重要改革方向,就係繼續開放、繼續做大。

發達經濟債市規模通常係股市兩倍,中國相反,債市僅及股市一半;美國紐交所2千間上市公司,納斯達克3千間,OTCBB有5千間,大陸又啱啱掉轉,主板過千間,中小板創業板加埋得幾百間。資本市場結構好似倒金字塔半天吊,點會穩陣,所以有需要改革上市發行體制,仲要進一步開放債券、私募基金及OTC市場。開放速度太快但係人人炒炒貢,都係死路一條,另一個重要戲肉,就係引入更多好似社保基金等長線資金入市,將中國養老體系、社會保障體系及股市發展結合。

作為證監會戰略委員會成員之一,祁斌仲提到一個好有意思嘅戰略方向,就係交易所體制改革。佢叫大家想像一下,十幾年後,中國如果有一個交易所控股集團,下轄四個交易所,整合上海深圳香港台灣股市,呢個統一交易所平台如果出現,新加坡會主動要求加入,唔去澳洲搵食,南韓甚至東盟十國亦有可能加入,東京如果唔埋堆,就要被徹底邊緣化,最大戰略效果,就係「兵不血刃解放台灣」。

呢個購思冇可能未來5年落實,但中港股市一體化,可以係最方便快捷第一步,大吉利是如果出現大股災,有本錢撈底長坐的話,港交所(388)永遠係唔會買錯亦唔會爆煲必然選擇。

伸延閱讀:
#