Best Blogger Tips

2010年5月8日星期六

霸王秘方(下)

(刊於2010年5月7日am730)

記唔記得呢個李嘉欣廣告?

香港「最受信任人物」調查,成龍塾底,但大陸消費者,仍好受龍伯,吹脹。

霸王招股書第149頁,唔小心露底,提到在08年,有項財務收入,「以美元支付品牌代言人廣告費用匯兌收益1.2百萬人民幣」,期間代言人,只有成龍,同年人民幣兌美元,升值6.5%,計翻條數,即係成龍最少袋250萬美金!

講緊一年250萬美金,唔係成份合約酬金,八封新聞代言人身價,絕大部分係經理人吹水抬價,但呢條數,係全地球最冇水份者,甄子丹同王菲,應該對吓數有冇收順咗。

霸王在01年,其實出咗個「麗濤」系列,搵李嘉欣,拍樣版式洗頭水廣告,即係睇住條女將頭髮揈嚟揈去果種,結果仆直。霸王系列一反傳統,重金禮聘髮型半世紀冇變嘅成龍,事前似鋼線,事後都似鋼線,反而令人覺得唔似吹水,動L,得咗。

明星代言,廣告轟炸,人人都識,但霸王前線促銷員,人工及忠誠度,都係行內一流,可見公司管理「霸王花」,幾有一手。霸王成功真正秘方,唔係祖傳藥理,而係在過去十幾年,摸索出嚟嘅推廣行銷策略,比對手更能夠掌握消費心理潮流觸角。

霸王最新大計,將男性洗頭水成功模式,複制到其他產品,搵王菲搶攻女人市場,搵甄子丹賣涼茶,仲有清潔劑。大劑,霸王人力財力,暫時睇,支持唔到多條戰線同時增長,霸王09年收入,增長主要來自同年推出追風系列,霸王系列,增長大幅放緩。貪多唔爛,恐怕業務越多元化,祖傳秘方越易露底。

霸王追風,零售價冠絕超市,明星效應,可以令消費者甘心俾多十皮八塊,所以賣100蚊稅前可以賺26蚊。霸王涼茶,三個半一罐,貴過王老吉,大摩分析員,已經撲出嚟「保守估計」,霸王涼茶今年可以產生3.5億收入(賣成億罐?),霸王而家已經35倍市盈率,大摩話仲有24%水位,睇7蚊喎。

大行小報告: 大摩飲涼茶

場戲做得好,原來唔單止可以催眠消費者,連大摩都相信,洗完頭,盤水可當涼茶飲,正。

(同場加映: 洗頭水者,商業建構需要之物,早年見一四川故娘,五呎八吋,長髮及腰,梳髮指間,如絲似帛,問用乜洗頭,答曰: 洗米水…)

關連文章:
1. 霸王秘方(上)(下)

伸延閱讀:
1. 南方周末: 霸王之惑
2. 陳啟源係陳朝陳武帝霸先後人(不如話係項羽後代啦...)

2010年5月7日星期五

霸王秘方(上)

(刊於2010年5月6日am730)

簡單兩個字: 經典

今個星期,以茄哩啡之心,度霸王之腹。

霸王國際(1338),商標氣概力拔山兮,96年已經注冊賣洗頭水,不過業務幾乎十年不飛不鳴,05年中藥洗頭水市場,佔有率只有6.3%。不鳴則已,一鳴驚人,07年,佔有率急升至43.5%。

霸王老闆陳啟源,早年賣殺蟲水,能夠在出名競爭亂過七國洗頭水市場,忽然半匡天下,全靠祖傳秘方。公司標榜陳啟源出自中藥世家,將祖傳秘方結合現代科技,研制出中草藥洗頭水,防脫髮,保烏絲,巴閉。

不過,有關中藥世家、祖傳秘方陳述,只在公司網頁出現,招股文件披露,要揹法律責任,隻字不提,連「競爭優勢」一項,都冇提及霸王中草藥秘方有何神效。

如果食粥食飯都靠條秘方,註冊技術專利係指定動作。但霸王在「風險因素」話你知,大陸註冊專利,要公佈配方詳情,為免「競爭對手得悉配方的詳情,模仿我們的生產方法」,所以冇申請任何專利。COME你個ON,申請專利最終目的,正正係要競爭對手,知都冇得抄,抄都要賠錢,霸王硬上弓,將件事掉轉講,即係話你知,呢條獨門秘方,原本係公司最大「競爭優勢」,不過而家變咗最大「風險因素」,搲頭。

同樣靠獨門秘方賣扮靚消費品, L’Occitane(0973,下譯歐舒丹)香港招股,講到明,最少已經為十項產品配方,成功註冊發明專利,單睇呢樣,歐舒丹所謂「天然配方」,相對於霸王「祖傳秘方」,可信性最少秤高兩錢。

霸王食水洗過來佬化妝品

咪以為歐舒丹國際名牌,食水好深,幫襯佢買100蚊護膚品,原料成本唔洗20蚊,歐舒丹稅前只係賺15蚊,霸王衝唔出國際楚河漢界,經營溢利率反而有26%(見附表)。歐舒丹堅持自己經營銷售網點,56蚊蚊分銷推廣成本,八成其實係鋪租人工,霸王洗頭水放在超市賣,100蚊收入,36蚊去咗分銷推廣,非常跨張,即係話,相對來佬名牌,霸王花需要更多錢賣廣告,令消費者覺得買佢支洗頭水物有所值。

明天再續,如果想知道成龍「動L」真正身價,財經茄哩啡下回分解。

關連文章:
1. 霸王秘方(上)(下)

伸延閱讀:
1. 南方周末: 霸王之惑