(刊於2011年9月30日am730)
 |
| 中國版雷曼迷債？ |
大陸房地產公司大大話話幾萬間，人人要撲水，中央收緊銀根又加強樓市調控，房地產市場資金需求大但傳統貸款供應唔多，於是齊齊古古怪怪巧立名目，其中一個好受歡迎融資渠道，嚟自信託公司，綠城中國(3900)透過房地產信託平台做融資，熟於做得最早兼最大之一，呢個「影子銀行」灰色地帶，唔係咁多人知做緊乜，市場越無知，壞消息對相關公司殺傷力越大。
綠城同好多間信託公司有合作，舉個例，喺2009年9月，綠城同平保(2318)旗下平安信托，成立咗一個信托融資平台，平安信托跟住3年，會注資150億元(人民幣，下同)幫綠城做生意，簡單嚟講，綠城同平安信託，分別成會分別成立「項目公司A」及「信託基金B」，綠城將「項目公司A」部分權益，賣畀「信託基金B」，換取「信託基金B」所提供貸款，綠城本身會同時向「信託基金B」基金單位持有人提供信貸擔保，平安信託就會將「信託基金B」單位，當係理財產品咁賣畀客仔集資，息口當然高啲，但最終風險邊個承受，咪係資金鏈最低層班散戶囉。
根據綠城最新中期報告，至6月底，信託融資總計其實只有52億元 (人民幣，下同)，利息介乎7厘至9.8厘，如果係正正經經貸款，債唔算多息亦唔係太高，不過最衰當中有嚿近3億元「相關衍生工具」，冇解釋係乜，唔知實利息係乜，對綠城或然負債又唔知最高可以倍大都幾多，任何公司資產負債表出現一啲咁難明東東，除非喺附注即時有詳細清晰交待，否則第一個反應應該係避之則吉。
根據中國信託業協會資料，全國只有65間信託公司，絕大部分由地方政府或者國企持有(聽講鄭裕彤都有一張牌)，至6月底，有17%信託資產，即係超過6千億元，投資咗喺地產，當中應該唔少透過平保又或者國企銀行等金融機構，以理財產品形式，銷售咗畀內地散戶，假設邊間地產公司爆煲，邊個擔保邊個要包底，肯定口同鼻拗，分分鐘演變成「中國式次按」或「中國式迷債」風波。
綠城只係資金鏈亮起紅燈，唔係話間公司唔值錢，要撲水的話，將部分項目當爛尾樓咁賣畀行家，應該唔係問題，當然，類似香港地產商呢啲虎視眈眈咁多年的有米玩家，極可能會等到真係有大型發展商爆煲，先會出手掃平貨，未來中國內房股債市市場，有可能出現類似08年咁大波融轉角位，大把平貨執，真係有人爆煲的話，亦係返大陸買樓置業長期投資最佳訊號。
近來聽講溫州大批老闆走路，收緊銀根令中小企冇啖好食，以致樓市調控令金融系統紅燈大閃，越嚟越大壓力要求中央放鬆政策，如果真係出現咁情況，結論就係，中國最「大得不能倒的」，原來係地產，呢啲咪係「道德風險」囉。
伸延閱讀:
1. 中國信託業的監管及發展
2. 2011年第2季信託公司資產投入及分布
3. 影子銀行風險增
#
