Best Blogger Tips

2011年3月11日星期五

廣廈千萬間(下)

(刊於2011年3月11日am730)

上回講到,中央政府向全國蝸居居民承諾, 5年3600萬個「保障性」住房單位,今年有1000萬個動工,廣廈千萬間,大庇天下寒士。

香港當年八萬五,建華八年,六年通縮,相信有番十年經驗投資者,有深刻體會,作為全球第一人口大國,中國房策轉向,公營房屋體系再次膨脹,影響一定好大,不過未必可以同十幾年前香港相提並論。

香港回歸之後,多災多難,撞正亞洲金融風暴,又九一一又沙士,更重要者,當年公務員系統仍然非常有效率,董建華八萬五,忽然冇咗之前,其實係執行得最徹底政策;中國國運正隆,點睇都唔相信會好似當年香港咁黑仔, 落實阿公福利主義地政房策,地方政府出名上有政策下有對策,亦肯定冇當年香港咁有效率。

香港房屋社會福利網,以出租公屋主導,近年冇咗居屋,更加簡單;大陸啱啱再起步,好多嘢未成型,仲要複雜到爆,所謂「保障性」住房,以財經茄哩啡有限理解,已經最少分五種,出租分兩類,「廉租房」及「公共租賃房」,應該係俾最草根階層,拎出嚟賣,有「經濟適用房」及「雙限房」,簡單嚟講,可以算係香港居屋,仲有各種「棚區改造房」,仲有各種置房租屋津貼,即係話成個公營房屋體系,亂過七國,落實政策難度超高,所以周不時聽到,武漢經濟適用房攪珠攪出比中六合彩機會更低嘅「六連號」醜聞。

講咗咁多,即係話大陸房策轉向,最後有幾徹底,仍然未有定數有待觀察,一個最有用探熱針,就係國控發展商業務變化,尤其係中國海外(688)及同系A股上市公司中國建築(601668)。中海系集合地產發展及建築兩大範業務,阿公要起樓,照計義不容遲,以前中國海外年報內所謂「企業社會責任報告」,講緊幾時邊度捐咗幾多錢,未來「社會責任」,可能要揹唔少公營房屋項目,生意一定多咗,有幾好賺,大家可以留意吓。

福利房唔係免費午餐,今年廣廈千萬間,就算唔計相關賣地收入流失,亦最少要1.3萬億(人民幣,下同)投資,各級政府揹起其中5千億,其他邊個找數,唔使問阿季,國控房企一定焗住參與,國有銀行亦好難唔被拖落水,斷估好快,銀監會等監管機構,就要出台新指令新政策,指導銀行為阿公起樓提供更多貸款,公營房屋體系如果高速膨脹,銀行息差一定受壓,大家亦可以留意吓。

今期講住咁多,福利主義抬頭對中國公共財政影響,搵日再講。
伸延閱讀:
#

2011年3月10日星期四

廣廈千萬間(上)

(刊於2011年3月10日am730)

香港鬥地主玩得多,今期開大陸房策。

總理溫家寶鐘意吟詩,估唔到連施政都配合埋古詩古風,十二五規劃房屋政策主軸,要令公營房屋體系再次膨脹,到2015年,覆蓋整體市場兩成,5年提供3600萬個「保障性」住房單位,今年底前會有1000萬個單位動工,廣廈千萬間,大庇天下寒士。

廿一世紀之前幾十年,「樓市」基本上唔喺中國存在,98年開始,阿公唔再為公務員及國企員工提供免費宿舍,焗佢哋去私人市場買樓,同時推出樓宇按揭等改革措施,讓樓市飛,飛到近幾年民怨四起,中央聞到羅味,要加大加厚番個房屋福利網,作為全球第一人口大國,房策大轉向,如果做到好似十年前市場化改革咁徹底,影響唔講得笑。

政府津貼5年內興建3600萬間保障房,唔計私人住宅市場,供應量等如當年香港八萬五乘85倍。唔好講咁長遠,1000萬個公共房屋單位,相對舊年數字,增加超過7成,新建公營房屋可能要一兩年先可以推出市場,但絕多數上市發展商,今年銷售目標,又話要按年五成六成咁增加,即係話公私兩面房屋供應,只會有增冇減。

舊年大陸樓市火爆,好多發展商銷售創歷史新高,根據住建部官方數字,全國大約賣咗9.3億平方米私人住宅,不過私樓動工量亦達到13億平方米,加埋之前買落未起好,全國在建私人住宅超過30億平方米,中央又話唔準囤地,限時限令起樓,如果官方數字信得過,牌面上,供應充足。

阿公除咗八萬五上身狂谷供應,需求方面亦做咗唔少功夫,迫全國城市自製限購令,又收緊按揭,變相資本控制,打擊投機甚至投資需求。根據國家統計局數字,全國城市居民,89%已經擁有住房,其中4 成住喺計劃經濟時代興建宿舍,4成住緊私樓,咁高自置物業比例,又有咁多供應, 如果樓價照升,即係話內地樓市,存在供求以外左右因素,其中一個最大問題,係住房配置,跟唔上城鎮化步伐,流動人口多,鄉下有祖屋,但城裡要蝸居。

中央增加福利房供應,又話要改革戶籍制度,讓再多流動人口受到城市福利制度保障,如果政策得到落實,可以話對症落藥。

下回再續。
伸延閱讀:
#

2011年3月7日星期一

超大農作(下)

(刊於2011年3月4日am730)

調理農務 種瓜得金

有幾多散戶,夠膽買超大(0682)呢隻中國第一農作股,唔知,不過機構投資者,好多今日仍然持重貨,尤其係戇居居唔知白菜幾錢斤之外國芬佬。

早兩日,超大公布半年業績後,攪咗個投資者電話會議,發問者幾乎清一色係老外,亦幾乎全部係對沖基金,少數SELL SIDE聲音,來自麥格理位老外分析員,條友舊年6月仲叫人增持超大,睇12蚊咁話。一兩年前同一場合,大部分問題圍繞超大業務經營,今個星期,個個關心超大財狀狀況,語氣仲相當唔客氣,有關轉變,反映芬佬對超大可能開始有介心,甚至關心短倉多過長倉,做定嘢沽空。

超大同你講,股本回報率,接近20%係咪?大陸銀行借一年短錢,息率個位數字,調理農業又有政策支持,唔似地產咁難借錢,俾你做大股東,諗都唔使諗,借短錢擴張業務,發過豬頭;超大又同你講,市帳率得60%係咪?股本回報率咁高,股價又咁殘,俾你做大股東,又係諗都唔使諗,用公司錢回購股票,即賺兩三成,又係發過豬頭。

超大老闆郭浩,唔借錢,唔回購,偏偏鐘意配股及可換股撲水,資金成本超貴,又難怪班芬佬嘈嘈閉,甚至有人兜口兜臉質問超大管理層,點解釋公司股價咁殘,跌到市盈率3倍。市盈率3倍咁可憐,如果呢個時候再配股集資,即係話大股東視公司股票如牛屎,超大個財務總監,喺投資者會議上面,代郭浩「再次」保證,三年內唔會發行新股,大家記住喇。

幾年前有二五仔向順叔展示過一堆咭片,包括超大、第一天然食品(1076)浩倫農科(1073)三間公司高層,咭片上地址,全部集中灣仔華潤幾層樓,今日唔知有冇人搬咗,不過超大同浩倫內地總部,都喺福州西湖隔離,大家係福建老鄉,齊齊耕田搵食,又係鄰居,斷估好有計傾,我幫你買肥料,你幫我賣菜,成條調理農務供應鏈串埋一抽,盤生意好容易越做越大,第一天然已經爆咗煲,唔知對超大有冇影響。超大近年投資咗間亞洲果業(0073),創香港掛牌第一日即被勒令停牌傳奇,又係神神怪怪。

大自然定律,種瓜得瓜;金融市場冇咁簡單,種金得乜,可以問吓馬多夫。

馬多夫個基金,玩咗十幾廿年,唔會由頭到尾都係老作,盤生意谷大咗,有錢在手,好多嘢可以由虛變實,不過連續十幾年超常理高回報,最後都被踢爆係個龐氏騙局,以錢滾錢。真又好假又好,馬多夫未爆煲之前,幫唔少人賺過錢,有條友叫Jeffrey Picower,仲聲稱馬多夫幫佢賺咗50億美金添。

關連文章:
1. 超大農作(上)(下)

伸延閱讀:
1. 超大2月28日投資者會議錄音 (資料來源: 超大網頁)
2. 湯財手記: 福建蠱票
3. Jeffry Picower Dead: Madoff Friend Found At Bottom Of Pool
4. 壹週刊: 農作變「老作」,超大現「袋」(嗱,咪話財經茄喱啡侵犯壹仔版權,壹仔撻「超大農作」條題都冇俾返CREDIT順叔呀...)

超大農作(上)

(刊於2011年3月3日am730)


今期開超大現袋(0682)

冬春交替,北京又開人大政協兩會,咩三農政策咩一號文件,條街例牌好多人建議炒作農業概念,呢支歌仔,今年應用喺超大就超大鑊,股價一月開始插近兩成,唔似係好兆頭。

星期二,超大公布中期業績,至12月半年,做38億(人民幣,下同)生意,稅前賺15億,又係雙方數字增長,市盈率3倍,資產折讓4成,仲要唔係搞地產,只係租地耕田,更完美者,靚仔業績唔係一次半次,而係年年保持,上市啱啱十年,除咗金融海嘯之後一年,每年強勁增長,股東回報一直高企兩至三成,相對之下,騰訊(0700)認真羞家。

超大完美得難以相信,多年嚟好多人講過分析過,例如純利增長強勁但派息超級孤寒、經常更換核數師、大股東掟貨唔手軟發行股本膨脹逾一倍等,唔使加多把口,亦冇時間慢慢睇佢盤數,試吓用財經茄哩啡平民思維,猜度一吓呢隻中國第一農作股。

近年扶農政策力度越嚟越大,城鎮化加速,有識之士聞到政策風向,唔少人開始務農搵銀,早年傳過高盛都養緊豬。靠自己勞動力日鋤夜鋤嘅基層農民,雖然仍然唔見得太好境,但相對十年前,生計應該有一定改善,搵本2003年出版大陸禁書《中國農民調查》,可以知道當年中國農民有幾淒涼。

中國農民仲係冇啖好食之際,超大二千年底香港上市,已經講緊做一蚊生意賺你六毫子,如果耕田咁好搵,中央政府都唔使搞乜嘢三農政策,插幾間國企,整多幾間超大已經搞掂,如果超大模式咁神奇,以大陸國情,晨早已經捧咗上天做重點宣傳,但係咁多年嚟,官方傳媒對呢間第一農作民企,幾乎絕口不提,視而不見。就算阿公唔做,國內咁多有膽有識有商業頭腦之士,見到超大盤生意咁好搵,又唔見有咩嘢其他大型民企務農,原來調理農務,都可以咁令人搵不著頭腦。

河南係農業大省,舊年糧食耕地面積9,740千公頃,產量5,437噸,至舊年6月底年度,超大耕地面積3.3萬公頃,只係河南0.3%,不過超大銷售量277萬噸。又等如河南全省全年糧食產量5%。更神奇者,全國糧食最低收購價,講緊幾毫子一斤,作為最上游農企,超大平均售價,又高達2.49元,又係一堆完美得令人難以理解數字,超大一係霸晒全國肥田嚟耕,一係識得點瓜成金,先可以解釋到相關落差。

種瓜得瓜,種金得乜,下回再續。

關連文章:
1. 超大農作(上)(下)

伸延閱讀:
1. 馬沙筆記: 淺談超大現代