Best Blogger Tips

2012年3月30日星期五

換鼻孔出氣

本來唔想再講,打開香港報紙及電視,個個話郭炳聯出入老廉飲咖啡時,「用手遮面」,忍唔住講多兩句...

TVB: 用手掩面
蘋果: 揑著鼻子

太睇少香港大孖沙喇,挑,你話佢撩鼻屎都得啦!

人哋好可能,只係做緊瑜伽,一種叫做「Alternate Nostril Breathing」的基本呼吸法,聽講有紓緩緊張情緒的作用,甚至只係人哋的日常習慣,不過,手勢冇咁正宗咁解...


講完,謝謝收看。

關連文章:
1. 次輪好戲(下)
2. 新地之料(上)(中)(下)

中國達人秀

(部分內容,刊於2012年3月30日am730)


佛涯組合

南方彝人组合彝族

近排事事評論員上身,太口臭,要消毒一輪,哈哈哈,今期又係快樂星期五,風花雪月,要連埋片睇先好睇,有時間就幫襯吓順叔個網誌。

如果有幫襯開財經茄哩啡在Youtube的「GOW財茄台」,應該睇過,早排上載咗一段今年《中國達人秀》的比賽片段,三個和尚表演「少林足球唱歌真人版」,合唱一首自創的舊詞新曲《遊子吟》。

呢個「佛涯組合」,結他木魚加引磬,彷似讚「佛偈」,三位大師斷估投入咗真感情,有一定感染力,感動全場。出家人幾有創作天份都好,入世參加天才表演,已經唔對路,做和尚更算不孝,諗深一層,感染力越強,成件事越冇說服力。不出幾日,「佛涯組合」被網民踢爆,其中兩位成員,其實出家冇耐,早前更曾先以「南方彝人組合」身份,參加《我要上春晚節目》,勁歌熱舞。


小王子(剪接版)

小王子(現場版)

上一季的《中國達人秀》,亦有位失去雙親的蒙古小孤雛,叫做「烏達本」,唱草原民歌《夢中的額吉》,表達對離世母親的思念,歌聲一鳴驚人,現場好多人即時聽到喊,但係電視版本,被人發現「咪咀」,原來製作人員為咗效果更佳,將另一個較年長的蒙古細路的錄音,剪接咗落去,結果烏達本一場真真正正賺人熱淚的表演,變咗呃人熱淚的做假。

《中國達人秀》,其實係賣遍全球《Britain’s Got Talent》系列的移植品,呢個天才表演的精髓,在於其貌不揚原來身懷絕技的反差,好似當日「靚聲村姑」Susan Boyle,一個肥嬸唱出天籟之音,對所以就算在外國,相信幕後人員都會搵啲半職業人士做枚,其算真正的「真人騷」,呢個半做馬方式,嚟到中國,又點會唔做假兼大做特做。中國13億人,真係乜嘢奇人奇士都有,《中國達人秀》執正嚟做,可以有無限驚喜,冇理由要做馬,好似「佛涯組合」同埋蒙古小王子,真才實料,表演觸動人心,整色整水反而捉蟲。


潘倩倩(女聲)

潘倩倩(男聲)

望住呢個《中國達人秀》,既覺得可惜,亦替香港演藝創作擔心。例如有個潘倩倩,真正身份就算唔係火煱店女服務員,亦不過係個二打六,但係唱起歌,唱贏香港一線女星幾條街,最恐怖的,反串唱男聲都可能唱羸香港一線男歌手。

大陸演藝創作,臥虎藏龍,最蝕低地方,唔係班人冇料,而係太多禁區扼殺創意,香港娛樂圈,差唔多成個搬咗返大陸,個個搵到盤滿砵滿,香港明星,就算二三線,都仲有啲名牌效應,仲可以食吓老本咁。

話就話一國兩際,但係中港之間,政治經濟社會文化甚至地域的楚河漢界,不斷被洗刷磨蝕,亦係一個難以逆轉的趨勢,娛樂圈就係最佳例子,以前未「屍爬」(CEPA) ,香港演藝界愁雲慘霧,仲拍到叫座叫好的《無間道》,今日個個北上搵真銀,差唔多放棄咗最能發揮創意的香港地盤,與此同時,內地大搞文化振英傳媒改革,大量官方傳媒準備殺入香港,名為國際化,實為同化,順叔講過好多次,到香港年青人,唱住內地流行曲,追捧內地明星的時候,一國兩際就正式玩完。

早兩日寫過所謂香港的「核心價值」,其實係最基本的普世價值,在中港兩地的融合過程當中,香港最大作用,其實係令中國共產黨,明白自由、民主、法治等普世價值的可貴,香港演藝界北上搲撈,無可厚非,但係就唔知有幾多個,會嘗試踩吓線,衝擊一下內地意識形態的思維,爭取多少少創作空間,唔知當日支持唐英年競選行政長官的演藝界選委,最後有冇變咗「無間道」?

講開又講,香港最有創意的空間,在互聯網,年青人惡搞得嚟,就算政見不同或者容易受社會情緒感染,絕大部分充滿正義感,對政治議題又充滿興趣,呢個自由創作「公共空間」太重要,絕對唔應該改變,作為一個間唔中會惡搞吓的超齡網民,順叔強烈反對惡搞刑事化。

香港演藝界代表,得唔得閒,為網民惡搞的自由,講幾句說話?

伸延閱讀:
1. 新聞透視: 惡搞與二次創作(噚日先出街,建議所有惡搞網民都要睇吓)

2012年3月29日星期四

凸首摺櫈

嘩,出到武士刀...


唔怪得凸首要帶定摺櫈落區了...

九倉之瘡(下)

先嚟一個同場加映,3月28日,睇睇吳光正去咗邊...


上回講到,97年後經過商人治港及公務員治港,今日好似九倉(0004)吳光正咁講,即將進入「專業人士治港」的年代。

而且係一個精通地產市場規則及「潛規則」的專業人士。

識窿路的專業人士,律師建築師測量師,絕大部分靠地產商開飯,唔會公開指正批評種種頑疾流弊,政府隻眼開售眼閉,唔少「退休高官」更加盟地產商,或任全職或任謀臣,例如新地(0016)就請得郁政務司司長級的許仕仁,地產市場又點會唔出現嚴重的「資訊不對稱」,又點會唔形成地產霸權。

測量師出身的候任行政長官梁振英,同時出任行政會議召集人多年,又有專業知識又有發言權,對所謂「地產霸權」的各種現象怪象,從來冇出過一句聲,當你之前忍而不發,在權力核心「觀察」15年,乜都夠啦,今日挾住「寧要共產黨不要地產黨」的「民意」上台,如果地產市場經濟利益繼續嚴重向商家傾斜及輸送,「專業人士治港」就認真失敗。

地產大孖沙唔接受梁振英,可能來自潛意識,睇唔起在地產市場提供中介服務的專業人士,記唔記得,政協常委何柱國,講過一句「測量師同地產經紀冇乜分別」;亦有可能來自恐懼,知己佑彼,在大孖沙及未來特首中間,竟然形成咗不利於地產商的「資訊不對稱」問題。

《中央聯合聲明》的土地契約部分,聽講就係由梁振英撰寫,當年佢作為基本法諮詢委員會秘書長,處理港九新界地契大限問題,肯定有同地產大孖沙甚至係大孖沙伯爺交手,近年中國大陸的土地及住房制度改革,又係梁振英出謀獻策。所以梁振英亦係,香港最熟悉土地契約的一個政治人物,對主權移交前後土地擁有權變化的種種歷史背景及敏感資料,瞭如指掌,一個這樣的「專業人士」,打交道食兼食同一行飯幾十年,竟然唔知佢開邊辨,仲要做自己老闆,地產大孖沙唔驚就有鬼。

咩八萬五三萬九,最多在表面嗰層,叫做對樓價起跌有啲心理影響,已經雄霸所有香港地標,建立不敗收租物業組合的地產商,又點會放喺心上;地契到期之後點玩法,好似九倉海運大廈咁,可以一舖打殘成個收租大倉,甚至直接決定地主可以做地主幾耐,份身家可以傳幾多代。

隨住2047年大限臨近,越嚟越多地皮的政府租契到期,呢個問題就殺得越埋身,對於普通住宅,政府如果要小業主補地價或者交貴地租,香港暴動都似,最擔心呢個問題的,其實係好似九倉呢類,坐住兩個商場,就雄霸9%香港零售市場的老牌超級包租公。

梁振英講到明上台之後,只會「穩中求變」,現實上亦冇可能反枱。政府做得睇場,話事人又熟悉所有規則兼潛規則,未必需要出到地契期限呢個殺手鐧,要調整產業結構,打破「地產霸權」,太多嘢可以做,最可能出現的情況,就係好似當年華資取代英資咁,由中資打破港資的壟斷。

舉個例,九倉要在尖沙咀起個幸福摩天輪,到而家都未搞得掂,除咗海運大廈地契問題,仲有遊輪碼頭呢個變數。

西九豪宅群,係97年之後批出的最大嚿肥豬肉,英資一條毛都食唔到,中資亦完全冇參與,南九龍未來會大龍鳳,大家可以留意吓,南九會唔會變成另一個西九,中資財團又會唔會分到餅仔。

唔知係咪睇到呢種變數,九倉由以前的保守包租公,積極變身,近幾年在中港地產的投資,大大話話過千億港元,明知返到大陸人生路不熟又冇咁容易發水,都要積極北上,至舊年底,內地資產佔集團整體比例4成,近月繼續積極掃地,中港佔比好快會成五五之分。

大陸的「地產霸權」,完全係另一套玩法,今期講唔到咁多,但香港地產商搵錢,絕對唔似得香港咁撳住嚟搶,九倉在大陸做住宅多,變數更大,可以咁講,藍籌地產股當中,九倉面對的不明朗因素最多,絕對唔再係防守性的收租股,最低限度,要將呢隻嘢,當做半間「內房股」咁睇。

關連文章:
1. 九倉之瘡(上)(中)(下)

伸延閱讀:
1. 九倉2011年業績Investor Presentation Webcast

2012年3月28日星期三

九倉之瘡(中)

上回講到,九倉(0004)海港城的收租「米倉」,原來生咗粒大「暗瘡」,佔近3成樓面的海運大廈,地契6月中到期,作為睇場的政府,可以好順攤咁重訂租約係咪易收吓地租,強硬少少可以要九倉補地價重訂地契,最極端但多數唔會發生的,就係收回土地。

九倉呢粒「暗瘡」,唔單止九倉股東應該關心,其實亦關乎到香港土地政策上面的一粒大毒瘡。

唔少人話,在香港,有土地就有霸權,呢句說話,只係一個通俗的講法,更加正確咁講,就係香港有土地就有嚴重的市場「資訊不對稱」(Information Asymmetry),這亦是形成所謂「地產霸權」的結構性因素。

市民本身權益被剝奪多年都矇然不覺,政府長期隻眼開隻眼閉,香港吋土呎金,長年搏奕下來大佔上風,地產商肥到底褲都著唔落都唯有繼續肥落去。

簡單到買一層樓,張樓契幾吋厚,全部雞腸英文加法律條文,阿水識睇咩,如果做按揭,份契只會在律師樓過吓手,轉頭就俾銀行收咗,100個小業主,99個唔會知道間大廈地契幾時到期,自己佔公契幾大份,地積比率有冇用盡,被人「強拍」時都唔知重建價值有幾多。

又例如,政府成日話香港土地資源緊張,但又有好多哥球會與乜球會、私人俱樂部咁,佔用大型超靚地皮,大量呢種黃金地段,今日市值動輒百億港元計,港英年代以「私人遊樂場地契約」形式,免地價或象徵或批出,地契寫明呢啲「只招待會員」的設施,其實公眾有權又限度使用,但政府從來隻眼開隻眼閉,聽講有大量私人會所用地,今年地契到期,政府會否繼續放軟手腳,會唔會好似當日保護維港咁,有冇專業人士突然「醒覺」做打手,是候任特首梁振英的土地政策的其中一條最重要線索。

唔會有幾多市民,知道「地租」或者「地契到期」呢類類念,上市地產商如果唔主動透露的話,亦唔會有幾多小股東,留意到或者知道,有關上市公司的物業組合,有幾多好似九倉海運大廈咁,原對重訂租約或地契的不明朗因素。

順叔唔係專業人士,所有有關土地政策的知識,都係睇書上網睇返嚟,唔擔保冇出錯,但係既然冇乜專業人士夠膽講,財經茄哩啡唯有用有限理解去推度。地契上面的年期,涉及「社會資源再循環」的概念,假如一個地主佔用一塊地皮多年,已經食足幾代人幾十年,甚至影響產業結構的新陳代謝,就係政府出手的時候,在重訂地契或者組約時,加入促進社會資源再循環的催化劑,例如補地價,例如交貴啲地租。

2047年唔單止係一國兩制50年不變的大限,亦係港九絕大部分物業的地契到期之日,王家衛套《2046》上畫,霎吓眼已經8年, 香港越嚟越多地契已經到期,包括住宅,亦包括類似海港城的黃金商業用地,就呢個問題,政府一直採取舖舖清的態度,即係冇人想揹鑊,35年在土地市場,絕對唔係一個長時間,政府都係時候做嘢,最低限度,就係普及化關乎小業主及市民切身利益的地政知識,扭轉市場資訊嚴重不對稱的情況。

舉個例,物業或土地契約,係唔係應該有啲人人睇得明的資料,可以被小業主保存或者讓公眾更方便查閱?政府處理到期地契時,係咪將商業及住宅物業分開處理,幾十年前以低廉地價購入的黃金地段、做私人會所的用地,應該收貴啲地租或者再補地價?係咪應該讓公眾明白有關問題的迫切性,參與討論一套完善的行政或立法方案?

香港經過董建華年代的商人治港,到曾蔭權的公務員治港,今日有人話「幹部治港」,撇開政治,引用九倉主席吳光正一句,到咗「專業人士治港」的時代,仲要係熟悉地政專業知識的測量師,地產市場遊戲規則同埋「潛規則」,難免出現變數,下回再續。

關連文章:
1. 九倉之瘡(上)(中)(下)

伸延閱讀:
1. 九倉2011年業績Investor Presentation Webcast

2012年3月27日星期二

九倉之瘡(上)


今期開九倉(0004)

後3月25日的第一天,候任特首梁振英走去西環「不是謝票」前,走咗去見現任特首曾蔭權,兩人一坐低,思歪(CY)半倚疏化蹺起二郎腿,當奴挺直腰板夾緊大腿,見到當奴呢套神經反射式的指定動作身體語言,笑咗。

2005年當奴上台,搬入前港督府,大把人噓寒問暖,包括新地(0016)「借出」的一部二手跑步機,候任及現任行政長官,兩個都做咗公眾人物幾十年嚟,當奴人面廣朋友多,工商界人人話同思歪唔熟,唔知佢開邊辨,更可能有唔少人想捉佢痛腳,思歪要坐得耐,最低限度,會同跑步機呢類「疑似官商勾結」物體保持距離。

不過一個人上咗位,又好難唔擔保,有啲「蕭李老薑攝石人」埋身,外人難分真朋假友,長實(0001)主席李嘉誠,今次企硬撐唐英年,雖則話得15%身家在香港反枱都唔驚,但呢份信用風骨,相信贏返唔少香港人幾分尊重。

圍住特首新貴班人當中,新世界發展(0017)主席鄭家純,應該熟於真朋友一類,開完人大政協會議,聽講會用私人飛機請梁振英坐順風機返香港,早排雖然提名唐唐,噚日思歪跑出發表勝利宣言,純官攝位企最前排,個位仲靚過端安建業(983)主席羅康瑞,唔理世俗眼光,瀟洒。

特首選舉後的金權遊戲,小圈子以外,大家鬼知裡面搞邊科,好似恒地(0012)主席李兆基咁,一投出票站,連自己投票取向都唔記得,精靈得佢。當日提名唐唐,最後票投思歪的,最少超過100個選委,都冇謂捉鬼囉,例如九倉,系內高層幾張選票,最初都押咗落唐唐,有冇轉軚經過西環,已經冇乜人關心。

九倉主席吳光正,參選特首係過來人,選舉結束之後,即刻以個人辦公室名義,發表聲明,恭喜思歪,希望「專業人士治港」可以為香港展開新一頁,又話比賽結束,「香港跟各參選人已經付出代價」,唔一齊隊啤都向前看,「很多地方需要修復」。咁顧全大局,一啲擦鞋味道都冇,呢啲咪高囉。

放得份身家喺人哋個場,點都要望住個睇場幾分面色,作為香港最大型商業包租公之一,九倉最重要兩個「大倉」,一個在銅鑼灣時代廣場,一個在尖沙咀海港城,睇場嗰個,潛規則有少少改變,影響已經好大,唔係話下星期就有成班古惑仔去廣東道D&G收片,不過,好似當年九倉鳩佔時代廣場地面公眾廣場幾十年,政府不聞不問不知不覺幾十年呢支歌仔,好難再有得唱。

又舉多個例,海港城係九倉在的收租大倉,亦有一個暗病大瘡,點醫法,亦要睇政府睇場的面色。佔海港城物業組合近三成樓面面積的海運大廈,地契今年6月中就到期,大限唔夠3個月,而家是但掀開一份投行的九倉研究報告,人人都講緊,海運大廈的續租安排,美銀美林上個月曾經估計,好似九倉副主席吳天海咁講,「如果需要補地價的話」,九倉需要付出約53億港銀的補地價,等如重訂租約。

作為包租公,九倉梗係同人講,「不方便講細節」,無論政府、商戶及租客,都唔想有任何不便,但斷估唔少競爭對手,仲有九倉股東,仲有香港公眾,都好有興趣,九倉同政府究竟傾緊乜。

政府收回地皮的可能性,唔會好高,但係需唔需要補地價、補幾多,唔使補只係延長租約的話,地租又收幾多,更重要一點,最後有乜消息向公眾披露,就好反映政府呢個睇場,同埋九倉的關係。

呢單嘢,牌面上,會由當奴的跛腳鴨政府處理,唔知思歪個候任特首辦公室,會唔會插上一腳,傳媒記者朋友,質問梁振英的土地政府,佢必定只會遊花園同你講「穩中求變」,不如當面問吓佢,作為測量師、作為地政專業人士,對九倉續租海運大廈呢單嘢,又有乜睇法。

下回再續。

關連文章:
1. 九倉之瘡(上)(中)(下)

伸延閱讀:
1. 九倉2011年業績Investor Presentation Webcast

2012年3月26日星期一

無題



核心價值

(部分內容,刊於2012年3月26日am730)

今期講幾句不中聽的話。

香港特首選舉落幕,市民經過幾個月「類普選」的投入,「民意」經過山車的起伏,保送梁振英上位的,還是那689張選票。台灣馬英九當總統,選票有689萬張。

順叔不怕公開講,今次「選舉」的結果,順叔是「樂」於見到的。退一萬步說,去到上星期五的民調,梁振英仍得到逾4成的最高支持,這份「民意」總有一點基礎,講白一點通俗一點,不少香港人,寧要共產黨,也不要地產霸權。

套用票投梁振英的醫學會會長蔡堅的幾句說話(相關視頻),過去7年的香港,生仔冇床位,住要逼劏房(這句是順叔加落去的),死人冇地葬,制度必須要有所改變,梁振英今天的「民意」,正正是代表向現有金權集團壟斷的衝擊,政經秩序重新洗牌,最少是個改變的契機。再講一句可能更不中聽的說話,如果有人撤資、如果出現移民潮,年青一代有更多上位機會,香港明天是否更好,取決於他們的努力,就像八十年代初的香港。

死守立法會功能組別保護罩的工商精英,今天講民主普選;對政協花樽趨之若鶩的建制政治人物,今天忽然「拒共」;靠數碼港起家的電盈(0008)主席李澤湝,今天講「良心」;提名唐英年參選的新世界(0017)主席鄭家純,今天攝位站在梁營勝利宣言最前排的…… 望著這些15年來「與狼共舞」的人和事,去到最後一刻無力地高舉「一國兩制」的唐英年,今天應該終於明白到,為何由此始終,不能拉近自己跟市民的距離。

經過今次選戰的洗禮,公子哥兒應該會大個仔,唐唐跌倒了再爬起來,今天被過了一楝的工商界精英,經過反思之後重新部署,或者無需5年後,已經又是一條好漢。

所謂「香港的核心價值」,是一句帶膠味的金句。自由民主人權,是最基本最簡單的普世價值,是每個人與生俱來的權利,普世價值不應該有地域性,硬要說「香港的核心價值」,只有一個,就是「一國兩制」。

「一國兩制」亦只是一句金句中的金句,除非中國經濟爆煲或者政局大亂,否則「大國堀起」,喜歡也吧不喜歡也吧,中港融合的洪流不可逆轉,一國兩制的楚河漢界必定被洗刷得面目模糊,唐英年上場也吧,梁振英上場也吧,只能減慢不會停止。

內地人到香港自由行及投資移民,既是人口互換,亦是「換血」;南方電網誓要入青山,計劃收購中電(0002)的電廠資產,中國海外(0688)重返香港地產市場,國企中資南下,還打著破霸權反壟斷的正義招牌;香港八卦雜誌封面,期期都是女明星或名人大肚,根本沒有娛樂新聞,因為整個娛樂圈已搬上大陸,所謂「港產片」,只有《桃姐》、《歲月神偷》等沒有將來的題材,當香港年青人,唱著內地流行曲,港產片只有《讓子彈飛》,一國兩際就正式宣布玩撚完。

這一切一切,林行止稱之為「去英迎華」,「華化」可以見血,例如在新彊,亦可以不著痕跡,例如今天中國已經找不到一個滿族旗人。漢本位說,滿洲旗人已經被漢人「滅族」,掉轉頭看,旗袍幾乎變成中國女姓的「國服」、「普通話」就是帶滿語口音的東北「官話」。

順叔不迷信民主制度,但國際金融中心沒有普選的制度,永遠是國際大笑話。中國正向世界推銷以經濟發展換最人權自由的「北京共識」,站在這歷史的終結之後的轉角位,香港人最大的角色,就是要令共產黨明白,自由民主人權等普世價值的珍貴,講就很偉大,其實好簡單,只是繼續爭取自己與生俱來的權利罷了,這是香港的價值,也是普世的價值。

這方面,順叔對香港人仍是充滿信心的。

香港是島國,是圍城,700萬人迫在彈丸之地,社會氣氛及情緒容易傳染,因此民意容易「衝動」,在逼到埋身時,會一齊站出來,例如八九六四,例如零三七一,例如今天,「民意」是否被利用了,不是重點,重點在於香港人會站出來,而站出來時,又是如此的秩序井然,這就是香港,共產黨拿不走的。

香港網絡文化多姿多采,社交網站成為最熱門的「公共空間」(Public Sphere),LIKE來LIKE去,某程度上,外判了自己的思想主見,甚至不排除有網絡無間道在推波助瀾,但這也不是重點,重點在於今天在網上惡搞的後生仔,五年後就是香港的中堅分子,請記著今天的政治課,記著今天熱情參與的熱誠,這就是香港,共產黨拿不走的。

中共經過近一個世紀的權力鬥爭,玩政治,手段超班,作為香港人之一,順叔今次大開眼界,服!中共透過各種渠道的參與或干預,「管理」香港一個開放型的經濟、自由的社會的能力,拭目以待。

一句到尾,順叔支持共產黨有權在香港執政,但請透過一人一票的平等普選走上台前,不要再拿著「一國兩制」的招牌,在陰暗角落指手劃腳。

伸延閱讀:
1. 林行止: 順利過渡寫上句號 從今而後逐步華化

2012年3月25日星期日

唐唐哭了


這是唐唐有史以來,最好的一次公開演講。

唐唐的眼淚,可以看得出、感受到,是真的。經過今次洗禮,公子哥兒也大個仔吧?

最後一刻高舉「一國兩制」?李澤楷出嚟講「良心」?這一刻觸動人心的唐唐,現在明白當初跟香港人的距離吧?現在跌倒了的唐唐,能真正的感受到民意吧?­能真正聽到香港人的聲音吧?

跌倒了爬起身,今天起Come out of the corner fighting,真正的維護香港的價值,或許不到2017,會再見面的。

節錄唐唐的結語:「可以難過,不必悲傷,香港的前途,仍是樂觀的」。