2011年2月24日星期四

讀者YAN的讀後感

To: 財經Carefree-順叔

今天看完你寫的「財政預算(上)」,忍不住要花時間回應你!

你提到「居屋無乜二手市塲...橫掂收唔返,政府如果夠膽一炮過豁免或者大折扣補地價,市場肯定多咗唔少二手居屋出貨.....

我不知道你有沒有相關專業資格,如果你有的話,容我得罪講句:是高分低能。

什麼是合約精神?當你購買綠表居屋時,已清楚寫明補地價的折扣,已訂明只可自住,不可出租。

我很想問問你,你是否居住在私人屋苑?如是,請你不要妄意評論居屋二手市場。你可知道假如我是一手居屋業主,就算我要買給自由市場,在現今樓價高的時候,根本不用真金白銀拿錢補地價,房署是可以直接從買家付給賣家中的成交金額支取。

何謂補地價要分期?有什麼足夠理由,容許一手居屋業主賣樓時收到的錢,可以分期償還補地價給房署?實情是技術上,他們已付出補地價金額才可以賣樓給自由市場,既然已一筆過收到賣樓後的得益,為何可以分期還?

你說自由市場、居屋綠表市場不活躍?唉,係人都知道成交不可和私人市場的成立相比,真的要問問個腦袋,假如你是一手居屋業主,當年你可以享有資助,以平價買樓自住,無論你賣給自由市場或綠表市塲,即表示你已放棄了原先得來的優惠或資助。再者、賣了樓後,住去邊度?可以找回平價單位或付出更高的成本,投進私人物業市場?

還有、假如豁免或者大折扣補地價,那麼對早前已在自由市場買樓的巿民,有何影響?對他們公道嗎?這個由來已久的政策真的可以朝令值夕改嗎?你看不見那些自由市場活躍的屋苑,如康山花園、龍蟠苑、清麗苑...的成交嗎?每月有多少宗自由市場賣買?成交金額多少?請你查清楚再花謬論!

以我個人意見,政府想壓抑樓價再升,基本只需出三招就可以。
1)復建居屋、夾屋,以解決基層、中產對擁有自置物業的期望。
2)限制內地人(非本港居民)購買物業,只可購一層。
3)無論以公司名義或個人名義買樓收租,由現在的15%的稅收,增加至30%

所有人都知道,現在的物業市場已被扭曲,太多內地人拿着錢來買樓,看看那些新盤,他們一買就買幾個,買樓後他們可以有實力丟空,也可以出租於予他人,是整個樓市供不應求的幫兇。他們咪就係和我們搶奶粉的內地人。明明奶粉供應商已表明有足夠供應,但為何我們仍買不到奶粉?我真不明白為何政府不聽市民的建議,容忍內地人無限量購買住宅、奶粉、....等?

以我估計,你也是住在私人物業,亦是現今住宅市場的既得利益者。假如你不是,我希望你可以將我的回應刊登在am730.

讀者
Yan


關連文章:
1. 財政失算(上)(下)

財政失算(上)

 (刊於2011年2月24日am730)
今期新鮮熱辣,開財政預算。

財爺曾俊華,親自領導所謂房屋用地供應督導小組,確保土地供應又快又充夠,講得出口唔怕醜,夠膽話「正以具前瞻性及創意的思維」,開拓更多土地。

唔知邊位天才,度條屎橋,預算案提出兩大增加土地供應新方法,首先會喺維港以外,搵地方填海,第二,犀利,財爺話香港地質極為適合開發岩洞,提供可用地下空間咁話。

大佬,作為一個國際城市,香港獨一無二之處,就係市區同郊區相隔唔遠,坐一兩個鐘頭車,甚至行幾步路,就有山有水有海,遠離塵囂。樓價越升越有,一般市民已經離中心地帶越嚟越遠,打免費郊外風景主意,恐怕全港環保人士到行山人士都會反對,呢兩個咁有「創意」建議,正正顯示出政府就增加樓宇供應,一係已經冇晒辦法,一係唔冇誠意諗辦法。

香港雖則話地少人多,增加供應調控樓市,唔一定要從土地供應著手。簡單舉個例,最近去開柴灣,發現政府起咗個青年廣場,俾班後生仔搞活動,樓上仲有幾層青年旅舍,聽講可以長期租住,當時第一個諗法,就係點解楝嘢唔起高啲,隔離小西灣有個新建市政大樓,有係得幾層高,點解又唔起多十幾層青年旅舍,提供多啲單身宿舍,怕且唔會有咁多八九十後嘈嘈閉。

呢個只係簡單例子,政府真係要增加供應,大把嘢可以做,唔使去到住岩洞。香港最大一項房屋資源,仲要係現成,其實一早收埋喺政府資產負債表。

根據房委會數字,如果唔包未發售或未落成單位,房委加埋房協,居屋單位接近40萬個,呢批政府津貼單位,因為要補地價,基本上冇乜二手市場,相關補地價金額,當會計項目,等如冇可能收回嘅「應收帳」,橫掂收唔返,政府如果夠膽一炮過豁免或者大折扣補地價,市場肯定多咗唔少二手居屋出貨,呢個建議好多人已經提出過,政府亦做緊所謂「活化二手居屋政策」,研究分期補地價,不過搞成年都只聞樓梯響,如果決心真係大到穿山覆海開發新天地,相對之下,活化居屋又有幾難?

講到尾,當年董建華郁樓市,腳痛下台收場,財爺同宗老闆,剩翻年幾兩年任期,肯定唔會同你癲,順叔寫包單開盤口,乜嘢開發岩洞,乜嘢活化居屋,全部都係吹水,得個講字。

下回再續。

關連文章:
1. 財政失算(上)(下)

申延閱讀:
1. 讀者YAN的讀後感