Best Blogger Tips

2010年7月23日星期五

紫金山下(下)

(刊於2010年7月23日am730)


上杭縣往城郊水西渡,4.5公里,路上往往見到摩托車甚或單車,載空樽而往,拉山泉水而回。

居民唔敢飲用自來水,因為上游開礦,金山壞水,唔係新聞,如果閣下賣桶裝水,都會借居民心理陰影,大做生意。

十年前,紫金一個礦場,攔砂壩崩圍,帶毒礦渣沖毁山腳同康村大部分房屋農田,紫金焗住徵地賠償,每人一份紫金原始股,當日價值1338大元,紫金後來變成千億巨企,揞口費價值暴漲近百萬元。

6月中,據《新世紀》周刊報道,上杭教育局,曾向鄰近中學發出緊急通知,建議高考生,唔好食魚,如報道屬實,即係話紫金最新滲漏醜聞,事發時間可能更早。

咁多年嚟,咁多問題,紫金履險如夷,反映管理層掌握經濟吸納政治之道,好有一手,年報所載,紫金16名董事及監事當中,最少7個,曾任當地省縣級政府要職。

大部份巨型國企,阿公擁有絕對控股權,股權分散者,會在公司章程,加上政府人事任免權金鐘罩,但呢兩種控制手段,都冇套在紫金頭上。

紫金最大股東,叫「興杭國投」,據A股招股書,擁有公司32%股權,從事「授權範圍內的國有資產經營」,據H股招股書,興杭國投屬「上杭縣財政局管理的國有企業」。即係話,嚴格嚟講,紫金係一間縣級國企,縣級國企市值千億,絕無僅有,由一班縣級官員圍威喂,更加罕見。

紫金今次出事,可能成為阿公整治呢個山寨土皇國導火線,將中國第一金股,納入中央治下,亦係博紫金反彈唯一支持,但絕不建議。

咁都得!咁「環保有創新」!?
唔怪得可以露天採礦,又咁易崩圍...

央企國企,壟斷大部分礦業,黃金,例外,因為中國金礦出名品位低,金價大熱之前,冇肉食,所以早年紫金山都被當雞肋,近年開始大吃回頭草,包括唯一一間黃金央企,A股中金黃金(600489)阿媽中國黃金集團。

據美國地質調查局資料,06年,中國探明黃金儲量,1200噸,全球排第八,只係南非五分一,不過07年開始,連續三年,產量世界第一,同傳統產金大國產量持續下跌,對比鮮明。

黃金開採,對生態破壞極大,破壞植被、山體唔在講,提煉黃金產生毒物,有說高達一克對一噸之比。

忽變產金大國,唔等如中國地大物博,只代表國人膽正命平,廉價勞動力拉低開採成本,生態代價,睬你都傻,唔應該掘,照掘,中國金業殺雞取卵式增長,只係追求經濟增長,妄顧子孫福祉另一寫照。

據聞紫金山下同康村,唔少人發咗達,但家家戶戶,幾乎都曾因為爭產家嘈屋閉,一片綠衫消不得,腰金拖紫是何人,中國,係時候認真反思,乜嘢叫做可持續發展。

關連文章:
1. 紫金山下(上)(下)

伸延閱讀:
(推介這幾篇文匯報的調查報道,為近年香港傳媒罕有出色力作...)
1. 文匯報: 小城背後的「紫金帝國」貢獻七成稅收
2. 文匯報: 頭頂三尺懸炸彈
3. 文匯報:背負「金山」不幸福 紫金富戶頻反思
4. 文匯報: 親人變仇人 有錢矛盾增
5. 文匯報: 被錢耽誤的一代 深陷「金山陷阱」
6. 文匯報: 成也紫金敗也紫金
習近平: 紫金「環保有創新...」
左一為陳景河

2010年7月22日星期四

紫金山下(上)


(刊於2010年7月22日am730)

一片綠衫消不得,拖紫腰金是何人?
今期開紫金(2899)。

中國第一金股,國內形象出奇負面,提起紫金人事,多數開兩飛,一係巨額國有資產流失,一係滲漏污染環保問題,今日先講前者。

話說紫金董事長兼總裁兼總工程師陳景河,本來係閩西地質大隊分隊長,在福建紫金山勘探近十年。

93年放棄鐵飯碗,申請調職到上杭縣礦產公司(紫金前身)做經理,偏向瘠山行。陳景河在紫金山放低唔少腳毛,探山探到幾多棵樹都知道,有眼識金山, 其實抵佢發達,不過紫金98年底改制前,向國家上報金礦藏量只有5.45噸,引入私人資本後,紫金山黃金儲量激增,搖身變成全國 最大單一露天金礦,仲要上金下銅,越掘越有。落差太大,咁就引起唔少非議,指陳景河當年隱瞞紫金山實際藏量,令國有資產賤價流失。

陳景河自己賺咗幾多,順叔唔得閒慢慢查,不過佢個最佳拍檔,紫金其中一個主要發起股東,陳發樹,在2000年8月,透過三間「新華都」字頭控股公司,注資約2500萬人民幣(下同),已經取得近27%紫金股份,紫金在03年及08年,先後港中兩地上市,市值高峰期逾1700億,有幾好賺,自己計。

陳發樹透過減持紫金,保守估計,套現幾十億計,而家係青啤(168)第二大股東,大陸打工皇帝、前微軟中國總裁唐駿,08年盛傳10億身價,過檔新華都幫陳發樹打工。陳發樹發過豬頭,花名一大堆,又「福建首富」又「中國巴菲特」,越發,越多人唔妥佢,舊年底聲稱捐身家45%,83億成立慈善基金,想做「中國蓋茨」,反而惹起更大反彈,話佢其實想避稅及買政治保險。

由陳景河到陳發樹,公眾形象唔討好,唔係仇富情緒咁簡單,根本原因,在於紫金控制權買得太平,賤買國有資產,即係侵吞眾人之財,自然犯眾憎。公司「惹火」,有乜行差踏錯,亦容易變落水狗,中證監已經先後兩次,就紫金資訊披露問題,立案調查,七月爆出「環保門」醜聞之前,唐駿亦被踢爆「學歷門」,在山雞大學買博士沙紙,成個集團系統,隱隱然山雨欲來。

紫金由改制到香港上市期間,福建話事人,叫習近平,當年習近平以省長身份,視察紫金,仲當住陳景河面,讚紫金「體制活、效益好、環保有創新」(據《中國礦業報》2001年11月報道),如果紫金出事,唔知會唔會令習儲履歷,多咗隻黑豬。

陳景河神通廣大,08年8月,胡錦濤訪問塔吉克斯坦國,又咁啱,紫金約好咗塔國官員簽合作備忘錄,於是出現咗國家主席,見證紫金海外拓彊偉大場面,玩到咁大,除非胡總甘心命抵站台,否則好牙煙。

靠山吃山靠水吃水,下回睇睇,紫金山下汀江傍,居民吃什麼山,又吃什麼水。

關連文章:
1. 紫金山下(上)(下)

伸延閱讀:
1. 趙岩: 陳景河大肆侵吞國有資產(轉載博訊文章,真偽自辨)
2. 習近平讚紫金「環保有創新」(該文記者為鄒永明,與紫金宣傳部長同名同姓)
3. 紫金宣傳部長否認封口費 (鳳凰網)
4. 中塔元首見證紫金與塔國合作簽字儀式 (紫金網頁)
呢條友乜水...