(刊於2011年7月15日am730)
上回講到，穆迪以唔知乜嘢「官方數據」，「叉倫廚」國家審計署地方債條數，畀內地監管機構及官方傳媒狂插，日前扯份所謂「紅旗報告」出街，又犯眾憎在中港金融界被圍剿。
份嘢名為《新興市場公司的「紅旗」訊號：以中國為重點》，以5大類20種「警號」，量度上市公司會計及治理風險，例如上市未夠3年就插一支紅旗；3年內資產或收入倍翻，又插一支紅旗，紅旗越多風險越高。穆迪冇講由乜篩選準則，揀咗61間有信貸評級上市公司祭旗，全部都喺中國經營，絕大部分係民企，結果一啲上市冇耐公司，慘被插滿十幾支紅旗，穆迪聲稱，呢個分析框架，可以突出「未為人注意」風險云云。
呢份紅旗報告，應該係金融近代史上，最失敗、最倒自己米一份研究報告，財經茄哩啡飾演法官大人的話，隨便已經可以指出廿幾種謬誤。
例如，插旗準則，粗疏到冇朋友，超大(0682)近年換過無數次核數師，呢項風險竟然冇被插旗。中信泰富(0267)有7支紅旗，超大反而得6支，大家如果睇過順叔月前《超大農作》，就知道超大爆煲風險，同中信泰富邊個高啲。又例如，穆迪認為家族持股量高於3成，就應該插一支紅旗，大佬，你去問是但一間銀行貸款部門高層，決定借唔借公畀客仔，除咗睇數睇行業，最重要因素其實係睇「人」，判斷大股東信唔信得過，家族持股高就要插支旗，罷明一碌竹打沉所有民企。
如果用20種「警號」，就可以「量化」投資風險，咁信貸評級公司都可以執粒，最搞笑者，穆迪倒自己米，聲稱呢個，「紅旗訊號」分析框架，有助提高穆迪信貸評級透明度，嘩，大佬，咁即係同市場講，穆迪做信貸評級，原來好似幼稚園老師給「黑豬印」咁兒嬉，咁大家以後應該信你穆迪插幾多支旗，定係乜嘢三條四個B？
近排歐美投資者，時興唱淡做空中國概念，尤其係民企，斷估穆迪見到「渾水」摸水咁成功咁紅，備受壓力所以要整色整水，東施扮北施，不但被插公司大反擊，同被插公司有刁做或有證券投資評級嘅投資銀行，亦幫拖反插穆迪，「紅旗報告」處子登場就引起全方位負面壓力，可以肯定，穆迪今後唔會夠膽再亂扯紅旗。
紅旗報告出街之日，撞啱大跌市，被插公司股價一仆一碌，債市反而冇乜風吹草動，可以反證債市投資者，其實已經當穆迪冇到，咁就帶出一個極度荒謬發展方向：信貸評級，喺債市認受性越嚟越低，但喺股市影響力，有越嚟越大之勢，貸評公司會唔會利用呢個趨勢，喺股市上下其手，大家可以繼續留意。
信貸評級市場各種荒謬現象，仲有好多嘢可以講，篇幅有限，今次係咁先，如果大家問法官大人，穆迪抵唔抵被圍剿，法官大人會毫不猶豫咁答：抵剿！
關連文章:
1. 貸評清剿（上）｜（下）
伸延閱讀:
1. 下載: 穆迪扯旗報告
