2010年12月31日星期五

治堵綠道(下)

(刊於2010年12月31日am730)


上回講到,中國未準備多變身做全國最大汽車市場,車市爆炸性增長,透支可持續發展,大城市塞車問題更加嚴重,治堵成為全國熱話,北京上海等地方政府被迫限發車牌,多項買車優惠急剎車,其他提高買車駕成本措施,可能陸續有來,車股死晒火。

限牌限行,只可以治標,真正治堵良方,其實好老土,第一要提高環保意識,第二要改變有車先夠威嘅普遍心態。

中國過去兩年車市爆炸性增長,多項政府買車優惠,加埋只得幾千蚊,好難左右一個十幾廿萬或更高金額買車決定,政府推動力真正作用,可能係趨生咗中產階級對擁有私家車心理需求,買車講車經,變成社會風氣,好似當年香港大學生講「屋仔、車仔、老婆仔」,未買車好似人生仍有虧欠。

踩單車,在大陸新富新一代眼中,可能好老土,勾起八十年代改革開放前,單車王國時代阿燦表叔集體回億,但喺歐美,單車代步普及程度,已經變成先進城市指標,返工放工踩單車,好似香港大明星踩架LUMA ORIGINAL,由山頂去中環買牛腩,先叫做「型」。

中國好多城市,已經開闢緊所謂「綠道」,多數講緊俾單車專用通道,不過絕大部分,講緊觀光旅遊健身,山區海邊江畔整條單車徑,當係城市綠色建設一部分,好似香港計劃中嘅新界單車徑網絡,唔係城市交通建設一部份。

國內主要城市,家陣吋金呎土,要改建市中心主要通道,開闢單車通道,又要喺主要建築生俾位泊單車,難度唔細,不過蜀道再難再險,宜萬鐵路今個月都通咗車,高鐵都可以全國都係,大城市劃幾條單車綠道,既環保,又治堵,只係決心問題。

老布殊

朱棣文

前美國總統老布殊,七十年代駐華期間,經常踩單車出出入入,強身健體之餘,又可以直接了解中國社會,後來做咗總統,89年訪華,李鵬送咗兩部天津飛鴿牌單車過佢。舊年底,奧巴馬訪華,科技部部長萬鋼,又送飛鴿單車俾奧巴馬及美國能源部長朱棣文,不過今次係電動單車。

由單車王國到汽車王國,中國汽車市場過去兩年爆炸性增長,引發大城市絕望式塞車,正正係中國經濟增長模式,不可持續發展最佳寫照,有些事有些時,退後一步,反而進步,治堵綠道,本來係好簡單之事,到中國大城市,變返一街都係單車,大家既唔覺老土,亦唔覺有型,中國先算真正現代化。


關連文章:
1. 治堵綠道(上)(下)

2010年12月30日星期四

治堵綠道(上)

(刊於2010年12月30日am730)



今期開車。

今年炒股票,成年唔做嘢,齋玩九月十月,恒指食足四千點,唔少股票,幾成幾成,甚至幾倍幾倍咁升,但如果轉身唔夠快,唔覺意坐多兩個月,坐晒艇。車股波幅大,調整亦最跨張,以吉利(0175)為例,用11月1日做分水嶺,之前兩個月升近一倍,之後兩個月打回原型。

講緊今年全國汽車銷售,極可能再增長超過三成,全年賣1800萬架,年底車股咁慘情,皆因條街開始唱,08年底一系列買車優惠政策,包括減稅、汽車下鄉、舊換新津貼等,會陸續退市,過去兩年驚人增長,無法年復一年。

有關優惠津貼,放落中國消費市場,引爆車市爆炸性增長,短短兩年時間,令中國超越美國,成為全球最大汽車市場,相信唔少相關官員,或者汽車業人士,為「全球最大」呢個光環開過香檳,但實情係,由城市規劃到交通規例設計,中國都未準備好成為全球最大汽車市場(唔少冇品駕駛人士更加未準備好)。

點解咁講,唔使扯到太長遠,大城市繁忙時間蛇餅車龍,就係最佳答案。

香港塞紅隧,條龍最少會郁吓,唔少經常往返大陸香港人,都可以話你知,京滬粵深塞車,可以有幾絕望,塞車夜景,變成旅遊景點,除咗油公司,電訊商可能都會成為間接受惠者,因為好多人要在塞車期間,上網或者打電話打發時間。

塞車問題,可能嚴重到要寫入十二五規劃,治堵,亦可能成為考核地方高官政績指標之一,聖誕前,北京宣布,下年開始學上海,限制新車牌發行,買車牌遲早貴過架車,其他大城市,相信會被迫陸續效法,直接壓抑買車需求。財政部喺星期二,宣佈取消小排量汽車購置稅優惠,政策思路,亦反映中央有意提高買車成本,避免爆炸性增長,透支可持續發展。

世事多數冇咁簡單,減少新車落地,唔代表唔會塞車,優惠政策急剎車,亦唔代表間間車企都會中招,當傳媒到分析員,一面倒唱淡一個行業時候,唔一定係逆流而行訊號,但可以好肯定咁講,大多數人,過度簡單咁分析緊形勢。

經過近月調整,大部分車股,已經回落到十一、二倍水平,東風(0489)更加係個位數字,十足黃昏行業估值,除非閣下相信,中國汽車市場,已經好似美國咁飽和,否則唔會間間車企,無論大車細車貨車私家車,明年業績都會大幅放緩甚至倒退,肯定有三兩間車企,例如二三線城市銷售做得特別好嗰啲,可以保持可觀增長,亦即係話要開始揀車股,唔係咪埋眼投資內地汽車市場咁簡單。

下回再續。

關連文章:
1. 治堵綠道(上)(下)

2010年12月24日星期五

港深特特區(下)

(刊於2010年12月24日am730)


小曾子: 我好鍾意擦鞋!

(標題為後期改動)

上回講到,中央要在2020年前,將前海變成「現代服務業中心」,究竟係乜,會唔會影響香港競爭力,無謂浪費時間,因為前海其實係一個實驗室,要將深圳經濟特區,同香港特別行政區搓埋一嚿,十年後搓咗嚿乜嘢出嚟,有乜化學反應,冇人會估到,規劃精神,其實係叫港深兩地政府,攞住免成金牌,放手放膽「先行先試」。

唔少人將集點,放在前海金融創新,呢方面的確好多故仔可以講,例如「探索資本帳對外開放和人民幣國際化路徑」,會唔會令前海成為人民幣自由流動實驗區、「支持符合條件香港上市內地企業到深圳掛牌」,會唔會講緊中移動(0941)、和黃(0013)成為第一批二十間進駐前海企業,會有好多著數,定係要做啲唔賺錢大動作,還番當日胡錦濤破格接見一個人情等等,都值得留意。

不過前海體制創新,其實更加值得期等,如果閣下接受,公共行政改革等如政治改革,前海甚至可以話係中國政治改革試點,再吹大啲,就係為未來同台灣搓埋一嚿做政治實驗。
根據香港政府表述,前海由深圳市政府主導開發管理,港府為發展規劃及相關政策提供意見,不過根據國務院相關批文,講明會成立一個由發改委牽頭,港深粵政府同時參加嘅協調機制,解決前海規劃各種問題,有乜大鑊嘢,先向國務院報告,即係預咗香港更加積極參與。

深圳市政府網頁上,有關前海規劃英文撮要,可能用一種唔熟悉語言,更加坦白直接,同中文版八股好唔同,流露咗更多前海發展政策思路,例如英文撮要提到,要在前海建立一個有效率公共服務系統,香港在城市管理及公共服務經驗,可以成為前海最佳借鑑,仲講到香港教育、醫療及社會保障制度,會慢慢融合於前海,有關思路,在中文文本並冇出現。

發展前海潛台辭,其實即係港深融合,劇本已經寫得好清楚,中央希望香港更積極參與,有深圳政協,甚至曾經提案,請有資歷香港人才,做前海管理區行政總裁。香港政府唔可以好似粵港合作、河套區發展咁,一年半載先聚聚吹吹水,甚至可能要好快要問立法會要錢,開幾個常設職位,參與前海規劃發展。

港官同內地官員碰面,可能太在意可能以前本住一國兩際河水不犯井水,有所避忌,客客氣氣好嚟好去,反而做唔到嘢,中央大員要港深合作發展前海,可能正正係要港深兩地有官場政治玩,有對立利益,有交嗌有交打,咁先可以打成一片。

阿公開到口叫你先行先試,香港不妨大膽出聲,商界中人,斷估已經成村人排隊在前海敲門,放低大堆大膽建議,官場政界,如果仲係閃閃縮縮鵪鵪鶉鶉,咁就死得,中港新形勢,需要攞住iPad指手劃腳嘅政治家氣概,唔係頭耷耷抄note屎之當奴氣質。

小曾子,對腳夾緊啲!
祝大家聖誕開心。


關連文章:
1. 港深特特區(上)(下)
2. 港深特區(上)(下)

2010年12月23日星期四

港深特特區(上)

(刊於2010年12月23日am730)

楊潔篪:二郎腿
尚福林: 二郎腿 + iPad
胡錦濤: 變返小曾子...
(標題為後期改動)

十月初寫咗篇港深特區,今期續集,開前海,特區中的特持區。

特首曾蔭權今個星期北京述職,事務特別繁忙,見咗好多唔同中央部委財金大員,就算冇公布公容,都知道中港融合,要快馬加鞭,風起雲湧。

曾蔭權見發改委、人民銀行及證監會等高官之時,撓起二郎腿大款次次,拎住iPAD手指篤篤,轉個鏡頭,到真正大老闆胡錦濤,哈,即刻變身做番小曾子,半邊屁股正襟危坐,兩隻大髀沒要有緊,iPAD變番手稿,頭耷耷抄note屎,這是我們的特首,兩個錯白字:「丟」、「假」。

作為佢老闆,香港市民其實應該感到慶幸,有一個好識做官嘅香港特首,呢句唔係反話,因為中港關係,已經唔再係一國兩制河水不犯井水咁簡單,需要真正政治家,處理勢將出現亦無可避免嘅中港官場政治。

咩粵港合作聯席會議,一年開得一次會,咩河套區發展聯合專責小組,又係半年一劑,風花雪月,等得你屍爬,阿公已經強勢出招,要將兩個特區搓埋一嚿。曾蔭權在北京期間,深圳掟咗份前海總體發展規劃綱要出街,前海發展,建議所有有意番大陸投資自己財富或時間嘅人或公司,都應該關心吓。

前海發展總綱,先後經過國務院、發改委同埋廣東省政府批復,所謂「現代服務業中心」,究竟係乜,其實唔使深究,另起金融爐灶影響香港競爭力之說,更加無謂,因為根本冇人知道前海最後會變成點。

成份總綱,其實可以用四個字高度濃縮:先行先試。

「發揮經濟特區先行先試的作用」、「利用經濟特區立法權進行先行先試和制度創新」、「先行先試不斷探索香港服業與內地合作的新模式」、「支持金融改革創新項目在前海先行先試」,一大抽先行先試,不能盡錄。

前海面規劃面積,唔計未來填海或者納入其他深圳地區,大約十五平方公里,即係大約四分一個香港島,聽講以前諗住做藍天綠地保育休閑區,而家基本上係荒地一片,忽然要大興土木,仲要咁多個先行先試,你話有冇可能,有邊個知道最後試咗啲乜出嚟?

唔知係乜冇所謂,因為訊息清楚不過,中央俾晒免死金牌,先行先試,唔會行先死先,要香港同深圳,一個政治特區,一個經濟特區,將前海變做特區中嘅特區,特事特辦,放膽大幹特幹。

要趕番屋企做冬,下回再續。

狂炒筆記...

關連文章:
1. 港深特特區(上)(下)
2. 港深特區(上)(下)

2010年12月17日星期五

暴炒烈酒(下)

(刊於2010年12月16日am730)

上回講到,茅台五糧液等著名土炮烈酒,近年掀起漲價狂潮,搞到全國嘈嘈閉。

話口未完,星期三,阿公終於忍唔住出聲,新華社出咗份稿,大字標題「十傳媒評擊五糧液漲價」。中國消費品牌,尤其係食得入口嗰啲,最大風險,係被競爭對手惡意中傷。五糧液被官方喉舌狂插,可能非常無辜,事緣今個星期,多間北京超市,聲稱收到五糧液廠家加價通知,理由係「為滿足消費者身份需求」,即係話唔賣怪啲,有失買家身份咁解。

大佬,五糧液企業管治往績認真麻麻,但斷估班高層唔係白痴(亦唔排除部分區域經理真係白痴),一句成本增加搞掂,冇理由在愁貧仇富敏感地區踩鋼線,五糧液已經否認發出有關加價白痴理由,但形象已經大大揩嘢,亦證明就算係奢侈品,如果漲價漲到影響和諧社會,阿公一樣會當係眾人之事,插之有理。

講到呢度,可能唔少人會問,點解幾個響噹噹靚酒名牌,產品售價會搞到咁混亂,呢個亦係中國酒商一個好大問題,冇直接經營零售網絡,就算喺自己地頭賣土炮,都係靠分銷商一層層推售,中間邊個環節有人囤貨居奇,會直接推高產品售價。

茅台在國內主要經銷商,叫白山方大,未上市,冇乜公開資料,五糧液嗰個,叫銀基集團(0886),香港上市,今年股價升咗1.5倍,因為唔少投資者買唔到橙買個桔,當銀基係烈酒A股隻輪咁玩。

國產烈酒零售價急漲,銀基今年業績,應該相當靚仔,不過作為五糧液主要經銷商之一,銀基就算可以洗脫帶頭囤貨居奇嫌疑,亦難免被人質疑,管理旗下分銷商,有冇出咗問題,烈酒暴炒成為全國焦點,廠商如果因為顧及品牌形象,開始檢討營銷策略,直接參與零售網絡業務(在青啤身上發生過),又或者阿公忍唔住出手,大大棍扑落高檔酒市場,會直接影響銀基盤生意及投資者信心。

銀基呢類酒辦出現,因為早年中國超市百貨業未夠成熟,今日全國連鎖零售巨人,幾乎已經全國插晒旗,網絡日趨成熟,可能係銀基最大威脅。銀基每年採購額,八成來自五糧液,五成銷售,來自一名「最大客戶」(可能係同機場免稅銷售有關),銀基做十蚊生意大約賺三蚊,呢名「最大客戶」,或者其他零售巨人,過銀基一楝,直接同五糧液做生意,分咗中間人三蚊利潤,未必冇可能。

所以銀基幾乎在所有場合,都強調自己同五糧液,包括可能互相參股(開口牌絕大多數吹水),每年採購額,都要按照雙方「私人及商業協商」,鐵打的交情,流水的官場,五糧液始終係國企,不過如果買銀基,要隨時留意五糧液管理層變動。

關連文章:
1. 暴炒烈酒(上)(下)

2010年12月16日星期四

暴炒烈酒(上)

(刊於2010年12月16日am730)

今期開白酒,講緊國產土炮烈酒。

中央電視台可能係全世界最好賺電視台,每年年底公開拍賣黃金廣告時段,收入動輒過百億,今年招標額126億(人民幣,下同),再創歷史新高。之前幾年,奶品商最肯掟錢賣廣告,今年央視黃金招標,頭三位取大豪客,全部係國產烈酒商,齋睇呢張經濟雨晴表,已經知道賣酒好搵。

國產烈酒,外國投資者可以飲,但公司清一色國內上市,唔係人人可以投資,所以香港人唔係太熟呢個高增長行業,五糧液及貴州茅台,市值都超過千五億,前者已經超越萬科成為深圳最大市值公司,後者由前年前幾蚊雞爆上現在超過二百蚊,酒王變股王。

炒烈酒股好搵,炒烈酒亦相當唔失禮。

十年前,老豆牛一,買咗支五十年陳茅台,盛惠三千幾港元,今日聽講要過萬蚊。無知有時最有福,當年飲得好過癮,咩掛杯咩三百幾種香味等茅台術語出齊,後來聽講,所謂幾十年陳釀,其實得一滴酒基,係唔係,唔知,不過如果今日要買支五十年茅台,記住數番轉頭半個世紀,諗吓六十年代大躍進,食都冇得食,有冇咁多剩糧釀酒。

通脹預期令全國炒風熾熱,唔係新聞,做紡織不如炒棉花,做玩具不如炒膠粒。炒生鮮食品,時限風險等如買末日輪,阿公一句唔該價格管制,可能落得一倉爛蒜。烈酒越陳越香,完全唔同講法,一時賣唔出,慢慢飲又得,送禮又得,放入櫃底幾十年都仲得,所以大戶有大戶炒,散戶有散戶炒,攪到全國投訴緊,點解靚酒越嚟越貴。

唔好話五十年陳釀,最普通53度茅台,據多份內地傳媒報道,舊年五一期間,唔使六嚿水,最近在超市零售價,已經超過千二大元,炒高逾一倍,仲要有價冇貨,五糧液品牌冇茅台咁響,但價格升幅亦相當驚人,更奇怪者,幾大上市酒商,幾乎齊齊公開澄清,過去一年,出廠價冇乜點加,誰炒了你的烈酒,口同鼻拗。

中國人有錢咗,多咗人飲得起高檔酒,肯定係事實,但需求肯定冇話忽然拋離供應一倍咁跨張,即係話整個烈酒銷售網絡,有唔少人在唔同層面囤積居奇。中央價格管制,未必會管到奢侈消費品,不過如果炒到全國嘈嘈閉,就會變成眾人之事,湯臣一品就係咁出事。

呢個現象,直接影響一間近月非常受歡迎嘅香港股票,銀基(0886),下回再續。

關連文章:
1. 暴炒烈酒(上)(下)

2010年12月10日星期五

十萬億火急(下)

(刊於2010年12月10日am730)

上回講到,內地官方喉舌,患上熱錢敏感症,11月12日內地小股災,人民日報瀨國際投資銀行出口術,中央電視台《經濟半小時》,本來做做吓直擊G20系列,失驚無神痛擊香港,關注對沖基金屯兵積糧,密謀大舉侵華。

中銀香港(2388)研究員黃少明,隨口噏咗熱錢十萬億個數,攪到滿城風雨,不過茶杯風波,對中銀嚟講,真正十萬億火急,其實係人民幣清算額度突然爆煲。

香港係中國唯一離岸人民幣結算中心,中銀又係香港唯一人民幣清算行,同上海外匯交易中心,今年貿易結算有個80億 (人民幣,下同)兌換配額,到9月,仍然剩一半,但十月未完,另一半額度未夠一個月用盡,即係唔可以結匯,如果唔係金管局同人民銀行有個貨幣互換安排,借調100億人仔應急,十月底可能在香港銀行暢唔到人仔。

金管局踢爆事件後,銀行界消息人士,突然蒲晒出嚟,中港兩地通街毒箭,主流講法,話九至十月期間,人仔結算貿易,並冇特別增幅,清算行兌換配額等然爆標,有人借貿易之名,行炒賣之實,令中央大感不滿云云,撞啱內地官方喉舌熱錢敏感症爆發,又撞啱金管局帶隊訪京,增爭增加人仔結算額度,中銀鏹水洗都唔清。

如果香港只批准一間地產商起發水樓,大家可以估吓,其他大孖沙會點反應,中央獨厚中銀,做獨市清算生意,人仔個餅又越嚟越大,其他銀行表面上粒聲冇出,大家又可以估吓,背後做咗幾多嘢。

中銀管理第幾流,大家心中有數,但斷估唔會蠢到,殺隻會生金蛋嘅雞,攞對腳做鳳爪,單嘢背後有冇大行高人發功,得個估字,但個勢已經做咗出嚟,香港金融界,共乎已經出現共識,齊齊合奏清算行獨市風險太大,一係多幾間做,一係金管局做。

港銀人仔業務,涉及眾多外匯管制法規,普通人好難明白攪緊乜,斷估全香港有接近700百萬人(包括順叔),結算同清算分別係乜都唔知,中銀從來冇解釋有關業務點運作,又冇拆條細數出嚟,母公司中國銀行(3988),年報有條「結算與清算手續費」,09年收入75億,65億來自國內,當中10億差別,或多或少,可以反映中銀呢盤獨市生意,有幾好賺。

人民日報含沙射影,嫌疑犯高盛即刻對號入座,借啲意開個記者會公開解話,咁先係波,中銀除非自己身有屎,否則當係危機處理又好,投資者教育又好,都係時候出嚟為自己盤獨市生意解吓畫(最好搵埋黃少明出嚟講熱錢)。作為香港清算行,可以睇晒所有行家人仔盤路,香港銀行人仔盤越坐越大,斷估中銀呢盤生意,唔會獨市得好耐,不過霸得一時得一時,好過坐以待弊任人砌。

關連文章:
1. 十萬億火急(上)(下)

伸延閱讀:
1. 人民日報: 要打擊操控市場的國際資本大鱷

2010年12月9日星期四

十萬億火急(上)

(刊於2010年12月9日am730)


熱錢十萬億點嚟?

今期開熱錢。

月初番到香港,周街講緊咩嘢十萬億熱錢囤港,以為所謂貨幣戰爭已經開拖,仲上演到諾曼第登陸戰。香港要谷大人民幣離岸水池,失驚無神,變咗熱錢侵華橋頭堡。

引發風波源頭,中央電視台《經濟半小時》,早在11月12日播出,不過唔知道適逢金融局加銀行公會訪京,內地傳媒借勢翻叮,定係香港傳媒,睇完重播以為中央唔妥香港,總之連續幾日,個個好認真咁討論十萬億,焗住香港高官齊齊撲出嚟解畫。

嗰排《經濟半小時》,連續幾日,做緊個「直擊G20」系列,去到11月12日,忽然變咗「直擊G20之熱錢屯兵香港」,仲無厘頭過「柴九之九姑娘」,內容主要話索羅斯等國際炒家及對沖基金,紛紛香港開舖,虎視眈眈內地資產市場云云,裡面訪問咗中銀高級研究員黃少明,叫佢估計吓熱錢數量。黃生首先假設美國大量印銀紙,可能令舊年6000億熱錢湧入香港情況,歷史重演,加埋對沖基金引入資金,就噏咗十萬億呢個數出嚟。

舊年金管局話6000億湧入香港,講緊08年底至舊年10月,銀行體系結餘加埋外匯基金票據淨增長,當中唔少應該唔係熱錢,而係貪香港有存款保障嘅細膽錢,銀行體系結餘,已經由舊年底三千幾億,回落近一半,近半年一直持平。黃少明用6000億呢個數做基礎,加加埋埋,合理推斷,應該係一萬億,點解加多咗個零出嚟,變咗十萬億,要問番佢自己,不過與其隨口噏當秘笈,不如問吓點解單嘢在內地炒得咁大,又反映咗乜嘢心態。

心水清者,應該記得,在11月12日,內地股市急跌超過半成,好有理由相信,《經濟半小時》有關負責人,臨急臨忙,開咗隻做定咗嘅罐頭應節,將小股災同國際大鱷拉埋一齊無限聯想,結果直擊G20,變咗痛擊香港。

今個月初,人民日報一連三日,大大篇幅評論中國股市未來廿年路向,又咁啱,又特別提到,11月12日,一間幾日前積極看好中國股市「某國際知名投資銀行」,向客戶發出沽售中國股票電郵,「翻手為雲覆手為雨有操控股指謀利之嫌」,高盛已經對號入座,公開大大聲話唔關佢事。

中國財金大員,今日由樓價到菜價都要管,有冇時間理埋中央台人民日報講乜,好大疑問,對沖基金香港開檔話人哋對內地市場不懷好意(炒港幣同人民幣掛鈎其實更加有得諗),投行唱淡H股又話人哋A股期指上下其手,論斷其實相當天真,財金大員如果咁水平,中國經濟都幾牙煙,但合理推斷,美國開閘放洪,中國已經擺好陣勢落閘放狗,大家如果有A股老鼠倉,咪貪方便喺香港上網落盤,喺找換店打錢番大陸, 又咪以為好似銀行服務咁安全,大陸落閘抗洪,大動作未必會做,打吓老鼠倉,甚至做低三兩間地下錢莊,絕對有可能,亦會為股市帶嚟陣痛。

下回再續。

關連文章:
1. 十萬億火急(上)(下)

伸延閱讀:
1. 人民日報: 要打擊操控市場的國際資本大鱷

電視風雲(上)

(刊於2010年12月2日am730)


今期開電視。

後知後覺,啱啱睇鬼佬雜誌,先知道在英國極受歡近嘅《Britain’s Got Talent》,已經移稙中國,融合英文日文中文,叫《中國達人秀》,青年劉偉,自幼失去雙臂,自學用腳趾彈鋼琴,技驚全國,賺人熱淚,眾望所歸取得冠軍。

中國地方電視台,近年亦好興真人秀,但亦搞咗唔少大頭佛,例如早年《超級女聲》,搞到廣電總局,通令全國禁止再全國網上或短訊投票,《非誠勿擾》,有條中女,又爆咗句刺痛全國仇富神經嘅「寧在寶馬哭不坐男友單車笑」,搞到要換主持,劉偉斷臂鋼琴師嘅故事,夠勵志又啱廣電總局胃口,節目叫好叫座,收視破晒記錄。

大陸電視市場發展快,節目需求大,頻道多內容少,有渠冇水,加上廣電總局呢樣唔準嗰樣唔準,《畫皮》都只可以係妖唔係鬼,成日顧住唔好踩地雷,創意空間大極有限,好似上海衛視買版權做《中國達人秀》咁,入口外國節目,可能越嚟越普遍。

外國電視內容,唔係樣樣啱中國人口味,呢方面,由香港上市電視台到節目製作人,其實有好大發展空間,尤其係華南廣府話地帶,聽講唔少人電話鈴聲,仲用緊中坑集體回憶《天蠶變》主題曲,可見香港文化仲有一定市場,唔好話天王巨星賺人仔賺到手軟,三四線過氣藝人甚至講波佬,在大陸都搵到飯食。

從呢個角度睇,在香港電視市場擁有近壟斷地位嘅電視廣播(511),如果話你知,內地業務在09年,營業額只有1.8億(港元,下同),佔公司收入唔夠半成,仲少過內容賣埠馬六甲,實在講唔過去,無記在內地一年盈利,分分鐘可能少過謝霆鋒,開拓內地業務唔夠積極,唔知係冇人,定係冇創意。

當然啦,一間公司43歲,六叔103歲,又好難要求間公司有幾進取,喺香港幾乎零競爭,就算好似影音工廠咁,日復一日年復一年,用埋同一班人,拍賣啲換湯唔換藥嘅連續劇,已經足夠麻醉八成市場。無記製作,在內地唔係冇人睇,不過網上老翻太多,唔係咁多電視台肯出錢買內容。

上個月,廣電總局出咗一系列新例,嚴打影片分享網站侵權內容,仲搵咗幾間細雞公司祭旗,內地幾個熱門影片分享網站,都未上市,如果要上市,尤其係去海外市場掛牌,第一件事就係要清理門戶,大家可以留意吓,未來香港電視台,會唔會直接賣內容俾內地網站,分得幾多唔知,但最少係條新財路。

下回再續,睇睇除咗內地市場,無記仲有乜嘢資產未用盡。

關連文章:
1. 電視風雲(上)(下)

2010年12月2日星期四

電視風雲(下)

(刊於2010年12月3日am730)


上回講到,電視廣播(0511)香港有壟斷地位,不思進取,冇用盡內地市場潛力。

內容唔夠創新,老本亦唔識食。多數人講開無記奇貨可居,一係話免費電視市場壟斷地位,一係話清水灣地皮乜乜物物,其實無記開台四十幾年儲落片庫,可能先係最重要隱形資產,「節目及影片版權」,無記列作流動資產入帳,值3.7億(港元,下同),十年前邵氏個華文電影片庫,幾百套電影,都蕒咗4億以上,無記呢嚿嘢,如果花啲心思做商業應用,其實可以釋放更大價值,對香港文化研究人嚟講,更加係無價寶。

復刻一個龐大片庫,應該需要唔少錢,影音庫存亦唔同文字館藏,做一個有效率檢索目錄(cataloging),難度好高,亦好煩,但呢啲錢呢啲時間,值得花嘅,好簡單,蔡楓華勁哥金曲舊片,都大把人睇,做個娛樂圈當年今日,都肯定有市場有廣告啦。

不過無記近年唔少風風雨雨,同唱片公司鬧翻,絕對唔係歌星有冇豬肉獎咁簡單,關乎行業結構性分帳及巨額版稅,呢個行頭透明度唔高,暫時冇人講到對無記有乜影響,仲有幾間收費電視想搶佔免費電視市場,未來如果引入競爭法,無記仲可唔可以咁霸道,又係未知之數,咁多挑戰,要一個103歲主席,領導一間43年企業,靠創意靠拼勁再闖,根本冇可能。

無記董事局,可能係大型上市公司當中,最多閒人一個,講賣盤,由六叔九張幾講到百幾歲,真的假不了,陳志雲官司纏身,無記都搵佢番嚟開工,有本專門好認真咁報道八掛新聞嘅雜誌,早兩個星期,聲稱引述內幕消息,話志雲大師其實肩負秘密任務,為無記賣盤做中間人,因為志雲大師,同恒地(0012)大公子李家傑,兩個大男人,又係王老五,又係好朋友,特別好傾云云。

地主富豪要買間香港電視台,絕對唔出奇,但亦有理由相信,有興趣買家,唔止一個,大陸傳媒,傳咗一排上海文廣有興趣,中移動(0941)旗下附屬公司廣東移動,出得起四百億買浦發銀行股分,搞手機支付咁有創意,掟多二三百億買無記,再搵個有香港身分證人頭持牌,未必係天馬行空,年前私有化邵氏,簡化控股結構,重大交易唔使過兩個股東會咁麻煩,其實係無記賣盤最大啟示,大股東肯定想賣,問題係邊個出得起幾多錢。

等賣盤,未必個個有六叔咁長命,好在無記派息唔算失禮,假設全年派息,同09年一樣,每股1.6元不變,以星期四收市價計算,仲有4厘息,生果日報廣告收益,至9月半年,按年上升超兩成半,無記今年廣告數入,如無意外,做到相同增長幅度,冇乜難度,

簡單總結,無記作為一間電視台,內容冇乜好睇,作為一間上市公司,退可守進可攻,今日股市風高浪急,如果被焗賭,無記係最穩陣選擇。

關連文章:
1. 電視風雲(上)(下)

2010年11月28日星期日

鐵翼長空四十年


中國打造大飛機,C919並不是第一架。

第一架國產大飛機,叫「運十」。

四十年前,歐洲開始組建空中巴士,中國大飛機項目,幾乎同期起步,1970年,文革風雨中立項。

「運十」項目最後為何下馬,當年為何改為跟美國McDonnell Douglas合作生產民航客機,眾說紛紜,夾雜太多愛國情緒,亦充斥陰謀論,官方傳媒資料,絕大部分避重就輕,講不出所以然。

有關「運十」資料,網上極多討論,就算解不開這個中國民航史上最大謎團,亦有助了解這個高度複雜的工業,以及C919未來發展變數,資料太多,相關文章出處,不花時間考證了...

關連文章:
1. 超人大飛機(上)(中)(下)
2. 打造大飛機(上)(下)

伸延閱讀:
01. "運十" - 708工程參考資料
02. 一個馬桶就難住了"運十"
03. 美國的陰謀: 麥道扼殺我國大飛機
04. 誰在欺騙中國人,"運十"下馬背後真相
05. "運十"夢斷的關鍵人: 沈圖
06. 假作真時真亦假: 沈圖叛國謠言
07. 毀滅"運十"是從1979年開始的
08. "運十"915發動機研制過程
09. "運十"裝外購發動機試飛不丟人
10. 程不時博客
11. 航空工業60年: 從"運十"到C919
12. "運十"在哭泣,C919原來是個「萬國貨」
13. 為C919大運唱讚歌還為時過早,惡意貶低運十更可惡!

打做大飛機(下)

(刊於2010年11月26日am730)


中航工業飛出去

上回講到,以前生產飛機及零部件國企,無啖好食,焗住不務正業,今日中國決心打造大飛機,殺入民航工業市場,歐美巨頭又要生意換生意,令呢個幾年前廢墟一片嘅板塊,有望苦盡甘來。

民航產業起步慢,亦反映在相關國企佈局,龍頭中航工業,遲在08年底,由一航二航合併而成立,旗下中港上市公司,多達21間,東一忽西一忽,有急切需要進行架構大手術。

一間架構亂七八糟巨型國企,睇重邊個上市平台,其實好簡單,留意吓黨企大佬,同時坐喺邊間上公司董事局就知道,中航工業集團最高層,包括大哥大林左鳴,只擔任其中一間公司董事,就係香港上市嘅中航科工(2347)

中航科工今年8 月,將原本好似飛行棋嘅公司標誌,換上跟母公司相同嘅噴射機招牌,策略定位,變成集團「民用航空產品製造業的旗艦公司和國際化融資併購平台」。中航科工目前市值大約190億港元,據傳媒報道,集團副董事長譚瑞松,8月講過,目標在三年內,透過注入資產,將公司市值谷到過千億。

相關注資概念,條街其實大把人唱緊,近年國企賣嘢俾香港上市公司,亦唔見得有乜親情價筍貨,變數太多,聽吓就算,最緊要係公司盤生意,本身有冇增長潛力。

中航科工今年已經賣咗汽車業務,變成一間純正民航產業公司,基本上有兩大瓣生意,第一項,本業,製造通用航空飛機及零部件,即係直升機或小型飛機,第二項,係透過旗下附屬公司,以及同姊妹公司合資企業,製造民航飛機零部件及材料,空中巴士在天津組裝線,以及在哈爾濱複合材料製造中心,中航科工都持有兩成股權。

國務院及軍委會,上星期已經出咗通知,未來十年續步開放4000米以下低空領域,即係話由通用航空到私人飛機,以後唔駛出幾個月同解放軍申請,會唔會多咗中國富豪買私人飛機直升機,又會唔會買國產貨,唔知,係都冇咁快,不過來自旅遊或農業等通航需求,肯定會增加。

民航產業,個餅更大,中航科工旗下兩間A股公司,包括洪都航空及哈飛股份,過去一年股價炒到雞飛狗走,中航科工持股近五成,現市價計,幾乎已經本身市值。

中航工業擁有近壟斷地位,但做飛機太覆雜,業務分散在系內上市公司,唔似能源或電訊巨型咁簡單,聽講林左鳴熟讀通用電器發展史,目標將中航集團變成好似GE咁,軍工轉化民用嘅綜合巨企,GE有個JACK WELCH,中航工業以至中航科工最大問題,係集團企管能力,可唔可以應付到迅速膨脹但又極度複雜嘅業務。

汽車產業過去數年,出現爆炸性增長,原因得一個,就係國內需求。民航產業,要同歐美巨企與虎謀皮,唔會咁簡單,決定因素在於中國打造大飛機,係咪順風順水,如果相信只要有夢想,可以登空探月,國產大型民航機翱翔藍天,未必係非份之想。

關連文章:
1. 打造大飛機(上)(下)

伸延閱讀:
1. 中航工業旗下上市公司 (中航工業公司網頁)
2. 林左鳴訪問: 中航工業這一年 (網易財經轉載《英才》訪問)
3. 中航科工冀3年後市值千億 (文匯報網頁)
4. 中航科工 - 投機與投資 (內地博客轉載陸羽仁,留意有關空巴天津合營分析)
5. 國務院、中央軍委印發深化低空空域管理改革意見 (國務院網站)

2010年11月27日星期六

打造大飛機(上)

(刊於2010年11月25日am730)


大國堀起,其實好唔得閒,要射人上月球,又要國產大型客機衝上雲宵。

打造大飛機,可以話係幾代中國航天人夢想,決心氣魄,同當年冇褲著都要原子彈差無幾,傾全國之力亦要做到也,07年立項,由中國商用飛機負責研制開發,預計2014年首飛,兩年後投放市場。

兩年一度珠海國際航天展啱啱閉幕,國產大飛機C919首次亮相,雖然得半隻機殼,冇翼冇引擎,已經成為全球航空業焦點,仲聲稱接獲一百架訂單,買家幾乎清一色國企航空公司,暫時唔知係咪落訂冇退款嘅霸王死約,但如果C919可以安全起飛穩陣著陸,就算剩係賣中國市場,AIRBUS(空中巴士)及BOEING(波音)兩大歐美巨頭,已經唔可以獨霸藍天,AB之後,要加個C。

中國商飛估計,未來廿年,中國需要補充4,439架民用飛機,總值超過4,500億美元,超大部分係C919類型幹線機,一隻大飛機,零部件超過四百萬件,邊間公司做乜嘢特別叻,有冇國企做到勞斯萊斯級起動引擎,要專到無倫嘅專業人士先識講,財經茄哩啡只可以計條師奶數,一個幾千億美元大餅,就算放十份一落中國民用航天工業,拉動增值作用亦相當可觀。

呢個大餅,國企以前餅碎都食唔到粒,龍頭中航工業,08年重組後營業額過千億,但相信絕大部分來自非上市軍工生意,旗下逾廿間中港上市企業,09年之前,幾乎冇一間營業額過百億。

今日歐美巨頭要飛入中國,焗住分餅仔,空中巴士在天津總裝線,舊年6月交付咗第一架A320,又同幾間上市國企,在哈爾濱搞咗個飛機複合材料製造中心,多咗外國生意,加埋C919開始砌機,生產飛機零部件國企,應該開始步入增長期,如果打造大飛機順風順水,出現類似早幾年車企爆炸性增長,未必冇可能。

可能早年冇啖好食,好多掛名「航空」上市公司,業務雜碎到你估唔到。深圳中航(0161),表面上做液晶體顯示器,其實做手錶;中航工業國際(0232),表面上做直升機,其實做蒸氣機。

仲有間航天控股(0031),表面上做火箭,其實做地產,08年底同母公司成立合營企業,發展海南島航天發射場配套區,總投資約12億人民幣(下同),今年8月,4千幾萬買斷母公司35%項目持股,叫做筍,一個四百萬平方米加四公里海岸線地產項目,有錢發展都冇技術經驗營運,應該會學雅居樂(3383)發展海南項目,轉手引入策略投資,母公司在星期二,在網頁偷偷地公布,項目發展大綱,已經得到市政府批核,一個住宅酒店項目,隔離同時有火箭升空,點搓得埋,要等公司交待詳情,但如果當呢隻嘢係當海南特產,旅遊炒磚頭,現價平過雅居樂好多咁囉。

下回再續,睇睇一隻相對純正嘅航天工業股。

關連文章:
1. 打造大飛機(上)(下)

伸延閱讀
1. 中央為什麼要大張旗鼓宣打造大飛機 (內地博客轉載新華網)
2. 大飛機市場ABC: C919接一百架訂單 (中國經濟網轉載人民日報
3. C919項目最新進展 (中國商用飛機公司網頁)
4. 中國大飛機造出來也出不了國門!(內地博客)
5. 大飛機「心臟」- 發動機 - 仍靠進口 (新華網)
6. 航天控股海南「發射場 + 地產」項目大綱獲批 (中國航天科技集團公司網頁)

2010年11月19日星期五

消防警報(下)

(刊於2010年11月19日am730)

上回講到,中國消防(0445),下稱中消)盤生意,過去幾年,並冇跟大陸樓市同步增長,即係話概念靠唔住,就算出現消防設備搶購潮,未必代表中消會突然好景。

根據人民消防網數字,全中消企業,接近五千間,競爭激烈,中消個名夠晒巴閉,但全國唔知排老幾。中消亦冇乜嘢必殺產品,人人都要買,舉個例,如果上海要買一百部裝有百呎雲梯火燭車,斷估中消一定做唔出。

生意做唔大,亦可能同公司老闆心態有關。

中消02年上市,業務每年高速增長,05年高峰期,賺1.7億人民幣(下同),同年搵到美國聯合技術(下稱UTC)入股29%,UTC同時購入認股權,可以在08年3月起五年內,收購主席江雄持股,一次過增持到51%以上,到時會觸發全面收購,行使價EBIT減淨負債後8.5倍。

如果閣下係江雄,簽咗呢份協議之後,變相幫UTC打工,心態都可能唔同晒。最理想情況,做大間公司,谷大除稅除息前盈利,博高價套現,不過現實可能係, 掛住控制債務,反而令中消擴展業務縳手縳腳,作為少數上市消防企業,並冇利用資本優勢,壯大業務。

美國佬有意進軍中國市場,但人生路唔熟,打口釘落中消,認股權變紅蘿蔔,引誘激勵江雄做好間公司,一家便宜兩家著。由08年3月底開始,UTC已經可以行使認購權,中消業績,反而開始步入倒退期,09年第一次出現稅前虧損,今年頭半年,稅前溢利亦只得幾百萬,小投資者唔可以完全排除,管理層用資產折讓取代盈利增長,引誘UTC收購嘅可能,不過如果公司經營溢利大幅變差,收購價好極有限。

UTC押在中國風險投資,亦唔只中消呢一注,在08年底,獲商務部批准,入股全國龍頭南京消防,同年全面收購另一隻火燭股海灣控股,UTC早兩個月,入稟控告海灣控股前股東,索償1.8億,理由係原來93年起,海灣控股已經冇幫員工支付社會保障資金,會唔會影響UTC對中消信心,又係一個未知數。

至今年6月底,中消資產淨值13億,經過近兩日大升,市值衝過8億港元,仍有大幅折讓,睇落好筍,望真啲,有唔少嘢解唔通。08年底,公司現金7.9億,海嘯前後好多人等錢周轉,又咁啱, 09年底現金水平急降至1.67億,中消解釋,幾單大型系統工程,完工前唔會有進度金,要墊錢做生意,甚至要放低幾億保證金,今年頭半年收回部分款項,現金變番3.9億,但營業額又唔見突破,奇怪。

簡單結論,中消概念一流,不過生意惡做,UTC收購變數太多,平未必代表抵買,一間公司股價長期停留在海嘯價水平,自然有佢道理。

以上純粹推測,如有錯漏,請當消防警報誤鳴。

關連文章:
1. 消防警報(上)(下)
2. Greener Buildings, Redder Alarms

伸延閱讀:
1. 公安部: 保溫材料等諸多隱患造成上海火災慘劇(新浪轉載新華網)
2. 另一種泡沬,另一個警鐘,聚氨酯建材消防隱患,兩年前已在深圳發現...(新浪網)
3. 外牆保溫頻頻惹火(中國建築裝飾網)
4.《高層民用建築設計防火規範》(廈門消防網)

2010年11月18日星期四

消防警報(上)

(刊於2010年11月18日am730)




2009年2月
北京央視大廈
2010年11月
上海靜安住宅
2011年2月
瀋陽萬鑫酒店

天地為爐,萬物作銅,上海沖天大火,怨消防不力,不如怪人工影天氣辦公室,近年呼風喚雨,點解唔射幾十支氣象火箭上天,炸幾嚿雨雲落嚟救火。

所有特大傷亡事故,幾乎都係一連串意外及疏忽,不幸咁撞埋一齊,事前可以防範,但事發好難挽救。官方新華社話,火災由無證焊工違規施工引起,已經拉咗八條友。咪玩啦,而家最重要話俾全中國知,點解楝樓會燒得咁通,邊類型樓宇存在類相威脅,唔係拉幾個民工或判頭揹鑊。

大陸舊樓建築用料唔襟燒,絕對唔奇怪,但冇理由廿幾層樓,瞬間化為熔爐。根據網上視頻,現場小區其實有三楝公寓,都搭咗鷹架,據報做緊「節能保溫」外牆工程,以綠色圍網高度睇嚟,出事大廈工程進度最快,大火高溫,加上圍網著火四圍飛,隔離大廈竟然未被波及,可以大膽估計,之所以燒通頂,主要因為外牆新添加物料。

近年大陸大攪節能減排,地方政府為滿足規劃硬指標,推動建築物加上節能設施,成為其中一項熱門綠色投資。今次出事公寓,用咗乜嘢隔熱建材、有冇通過安全檢測、全國有幾多大廈用咗,官方應該都唔會再交待,年幾前,上海成楝河畔新樓冧咗落嚟,有冇聽過邊間發展商被釘牌?

做得快,多數有古怪,香港當年八萬五趕起樓,都出咗單短樁醜聞,大陸呢兩年全國大興土木,高速城鎮化背後,收埋幾多隱患,怕且要再過幾年先浮現,上海樓宇安全標準,斷估已經最國全嚴,最大商業城市都攪成咁,番大陸買樓,要認真小心。

上海住宅唔同山西煤礦,今次咁大鑊,唔知會唔會震動到官場同樓市(高層住宅及做咗同類節能工程樓宇多數受影響),不過好可能出現消防設備搶購潮,因為國務院在星期二,出到「國辦發明電」紅頭文件,明令全國展開火災隱患大排查、大整改,確保要買齊消防設備,做足防火措施,否則所尋政府官員揹鑊。

投資市場出名冷血,汶川地震會炒東方電氣(1072),上海大火炒中國消防(0445),兩日升近兩成。

中國消防,個名改得冇得頂(前稱萬友消防),不過全國加大消防投資,中國消防又未必一定生意大旺。大家可以諗諗,呢幾年中國建築業蓬勃,新樓處處,同住宅落成速度掛鈎嘅管道燃氣市場,出現爆炸性增長。新樓要駁喉供氣,同樣要添置消防設備,但係近幾年,中國消防盤生意,只係唔上唔落,甚至可以話越做越細,並冇同建築業同步增長。

下回再續,睇睇點解。

關連文章:
1. 消防警報(上)(下)

伸延閱讀:
1. 公安部: 保溫材料等諸多隱患造成上海火災慘劇(新浪轉載新華網)
2. 另一種泡沬,另一個警鐘,聚氨酯建材消防隱患,兩年前已在深圳發現...(新浪網)
3. 外牆保溫頻頻惹火(中國建築裝飾網)
4.《高層民用建築設計防火規範》(廈門消防網)

2010年11月13日星期六

逃之QQ(下)

(刊於2010年11月12日am730)


QQ愛

上回講到,騰訊(700)唔可能係一間世界級互聯網公司,食粥食飯要睇國內市場。
騰訊今日已建立互聯網霸主地位,近乎壟斷,但其實大部份收入,可以話來自「偏門」生意,唔係好啱中央胃口。

例如QQ聊天室,殺手鍊應用之一,QQ即時通訊活躍用戶,至今年九月底,超過6.3億,第三季,最高記錄1.2億用戶同時在線搞搞震,認真跨張。

呢個全國最大自由空間,舊年年初,一度拉閘兩個月,騰訊官方講法,因為要做網絡升級,實際上當時中央七國部委,成為整治互聯網專項行動辨公室,打擊所謂「三俗」之風,要配合阿公進行和諧工程。

QQ聊天室人氣旺,自然成為網上詐騙熱門工具,更加出晒名係尋歡獵艷聖地,到內地網上論壇走兩轉,唔難發現好多人對騰訊咬牙切齒,認為QQ聊天室,令國人已經相對混亂嘅道德觀念,更加亂七八糟,唔少人更建議QQ聊天室應該永久閂門。

網絡遊戲近年成為騰訊增長新熱點,但呢方面河蟹力度都唔細,中央政府連網民連線打機俾人蝦,都關心埋一份。今年六月,文化部整咗份網絡遊戲暫行管理辦法,鐵腕整治,嚴禁強制PK,即係未得角式扮演遊戲玩家同意,其他人唔可以砌佢,更大鑊者,文化部講明,暫行將變永遠,會推行網遊實名登記,未成年又唔可以進行虛擬貨幣交易。

Q幣取代人民幣,可能係天方夜譚,但虛擬貨幣宏觀調控,絕對唔係講笑,係中央控制互聯網企業殺手鐧。今個星期,又有新招,今次仲跨張,包括人民銀行十四個部委,又整份聯合通知,對虛擬貨幣應用及流通,提出多種限制,Q幣如果唔可以炒賣,大家可以是但問吓國內朋友,對QQ會有乜影響。

國家主席胡錦濤,在深圳特區成立三十周,參觀幾間代表企業,騰訊就係其中之一,聖眷可能亦係死亡之吻,騰訊要做代表,就要識做少少,帶頭關閉QQ聊天室,全力配合中央實行實名登記,限制Q幣流通,未必冇可能,改邪歸正,偏門變正門,啱中央胃口,不過未必啱網民胃口。

建設和諧社會,虛擬世界自然要河蟹埋一份,以淨化網絡之名,行控制言論之實,肯定係政策趨勢。中國互聯網市場增長迅速,乃國情倒影,現實世界言論行為太多限制,虛擬網絡自然大放異彩,尋找敢言毒自由空間,自由空間越細,網絡公司增長越放緩,無可避免。

關連文章:
1. 逃之QQ(上)(下)

伸延閱讀:
1. QQ聊天室:中國最大的色情基地 (天涯論壇,網上打手多,真偽自辨)
2. 禁止PK (文化部網遊暫行管理辦法)
3. 虛擬貨幣已被納人金融監管視線 (中國評論新聞網)

2010年11月12日星期五

逃之QQ(上)

(刊於2010年11月12日am730)

十年前
1999年: 李澤楷入股打救QQ (伸延閱讀)

十年後
2008年6月10日,電盈被踢出恒指
同日騰訊成為藍籌

今期開騰訊(0700)

公元2005年,同一位大陸朋友講開騰訊,當日股價個位數字,佢玩開QQ,建議有幾多買幾多,坐幾年,實掂。對於一個科網泡沫輸晒成副身家嘅中坑嚟講,諗到網股就頭痛,只係走咗一轉,勢估唔到,一間冇創意老番ICQ起家A貨,居然跑出。

阿Q精神,捉到鹿掹得條毛者,唔止財經茄哩啡,仲包括當年由數碼港到反轉香港嘅李澤楷。

電盈(0008)投資過騰訊,年報亦搵唔番資料,不過根據當日唔少報章報道,以及靠寫中國創投出位嘅李俊晨,在《INVESTING IN CHINA》一書中都有提到,電盈在99年,投資約110萬美金,買咗騰訊兩成股份,01年撲水還債,千零萬美金賣咗俾南非上市公司NASPERS。

呢兩成股份,如果坐到今日,市值650億,等如電盈3倍。08年5月恒指季檢,電盈眾望所歸冇得留低,踢電盈出局者,正正係騰訊,如果當年馬化騰敲門要錢見過面,恒指換馬之日,李澤楷唔知有乜感想。

公平啲講,騰訊未上市已經套現走人者,仲包括大陸科網風投教父熊曉鴿,創投難度高,賺十倍其實好有交待,又有邊個估到,一個傳呼公司程式編寫員,會風生水起到住石澳獨立屋,一隻企鵝QQ,可以吸引到全中國最龐大網上付費客戶群。

深圳山寨廠冇人識寶,今日QQ變成巨無霸,根據彭博資料,32間證券行,有一半將目標價放喺200蚊或樓上,投資者鍾意買貴嘢,唔敢話全世界都睇錯,不過幾肯定分析員同大多數香港人一樣,冇用過QQ,例如瑞銀位大哥,舊年三月仲話騰訊一年睇54.5,星期一連QQ同360搞乜都唔知,就將目標價由200抽到230。(所以話除咗一個浮動12個月目標價,投行應該整多個不變3年目標價)

12個月目標價不斷改變,標嚟做乜?

為咗了解QQ係乜,又聽朋友講QQ溝女超級容易,順叔特登搵部專上咸網預咗中毒嘅舊電腦,註冊登記Q號,忍受超慢速度,下載成堆軟件,俾錢買Q幣升級,攪足兩晚,最後都要食白果,女鬼都見唔到一隻。

受歡迎互聯網應用,應該白痴都識用, QQ兩晚痛苦經驗,最大結論係,騰訊目前介面及技術支援,其實反映咗管理層願景,根本冇準備衝出中國,邊個分析員同你講騰訊大把現金,海外收購有得諗,以後可以唔使睇佢份報告,要買精於併購互聯網公司,不如買坐住三成幾騰訊股份多年冇放嘅NASPERS。

唔識打世界波,做門口狗做到最惡一隻,理論上在大陸亦大把錢途,下回再續,睇睇QQ在大陸,又攪緊乜Q,桃之夭夭,定係應該逃之夭夭。

關連文章:
1. 逃之QQ(上)(下)

伸延閱讀:
1. 相關資料,載於《Investing in China: The Emerging Venture Capital Industry》 P.95
2. QQ大戰360 (信報網頁)

2010年11月5日星期五

忽然暴跌(下)

(刊於2010年11月5日am730)




(標題為後期改動)

打麻雀旺起上嚟,十三么叫糊,放生衰家出衝轉頭都會自摸,但係個勢無論好,好難旺足廿四圈,因為一個人得意之時,容易失態,亦容易做錯決定。

做人係咁,做生意都係咁,十一年前福特收購VOLVO,就係美國汽車黃金頂峰時期,今日輪到國產車企行大運,吉利(0175)衝出世界買VOLVO,令人擔心又係風光之時錯誤決定,買咗張劏豬櫈。

上個月底講開比亞迪(1211)老闆王傳福,先獲國家主席胡錦濤高格調接見表揚,再帶巴群主席巴菲特遊中國做大戲,一個星期內,分別同地球上最巴閉政經人物攬頭攬頸,風頭無兩,論運勢,可能係王傳福人生高峰。

話口未完,出事。

今年第三季,行家「金九銀十」,比亞迪純利跌近百分百,即係幾乎冇錢賺,股價兩日急跌近兩成,市值蒸發超過二百億,慘情。

行運一條龍,衰開有條路,比亞迪近幾個月,壞消息又似乎多咗少少,例如將全年汽車生產目削四分一至六十萬架,某車系可能受新高排稅影響,又自爆今年電動車出口美國加州撻Q,連陝西廠房,一個投資五十億(人民幣,下同)增產大計,亦因為違規用地被沒收。

其他車企,好少話聽到廠房用地出問題,所謂「金九銀十」,行家九月銷售亦多數增長理想,比亞迪斯人獨憔悴,可能係競爭對手寧願棄糊一圈都要誅殘旺家,又可能比亞迪近年,自我感覺太良好,大支嘢咗,不屑疏通地方政府關係,經營銷售代理網絡又出咗問題,大家如果識得大陸汽車推銷員,可以打聽吓比亞迪係咪鍊佣鍊得最盡。

就算比亞迪唔識做人做生意,最緊要搞得掂同股神關係。比亞迪擴產出現資金缺口,至9月底,流動負債58億,按季再增近30億,按年增加近十倍,明知利息可能掉頭,仍靠滾動短債周轉,唔肯銷定長錢,可能對公司制造現金能力有信心,可能等緊A股上市,又可能同股神傾緊加注溝貨,股價大跌之後,股神注資機會,又高咗好多,運勢高峰忽見逆流,王傳福下一個決定,可見真章。

經過今個星期調整,比亞迪市盈率,罕有平過吉利,但市帳率雙位數字,仍然係吉利兩倍有多,不過唔好忘記,多謝股神關照,令比亞迪成為全國,甚至全球最多人識汽車品牌,呢樣無形資產,值得秤高幾錢,分析員叫你沽清中國汽車股,仲可以考慮考慮,但如果建議沽比亞迪買吉利,就係三流分析,此時此刻大行空群唱淡比亞迪,大家諗諗做緊乜嘢。

人生無常,既命也運,得意失勢,大腕細茄,發財輸錢,原是一線一念之間之事。

關連文章:
1. 忽然暴跌(上)(下)

伸延閱讀:
1. 深圳特區30周年慶典王傳福發言 (鳳凰視頻)
2. 王傳福導演股神SHOW (21CN.com)
3. 比亞迪經銷商忍無可忍 車展現場舉旗抗議 (網易汽車頻道轉載新華網)

豪門二代(下)

(刊於2010年11月5日am730)


我爸是李剛!

上期講開香港豪門二代,大陸富二代,一啲唔失禮。

早排香港有個靚仔,串人坐巴士「咁陰功」,犯眾憎慘被高登大軍起底圍剿,如果件事發在大陸,可能乜事都冇,因為混帳千倍之事,多多都有。

大家上網搜索吓「富二代」、「飆車」,就會明白點解大陸車企咁好景,富二代名車極速千里送西瓜慘釀車禍、官二代車死人囂張「亮爹」,幾乎已經唔係新聞(賠錢了事個案可能更多)。大家搜索吓「汪汪王王」(呢個朵反映強烈「仇富」心態),又可以知道所謂「京城四少」,同中港台女星錯綜複雜關係圖,同十幾廿年前香港娛頭,似曾相識。

富二代現象,在大陸已經變成熱門議題,多數講緊八十後獨子獨女,輕鬆繼承改革開放後先富起來嘅父蔭,衍生出種種社會問題。以前見到來自國內年青人,好多時會被佢哋嚇一大跳,縱使只得千分一機會,都會咬住唔放,今日所認識大陸新一代,大多數冇晒嗰種打死擺就之拼勁,如果中國今日經濟成就,建基於改革開放後,全中國人急起直追文革時失去黃金廿年,努力奮鬥改變自己命運的故事,今日大陸富二代所展現氣質,令人擔心。

鬼佬傳媒日日講緊「十二五規劃」乜乜物物,最攪笑係成個規劃都未出街,五中全會只係通過咗老共八股指導思想,規劃最後寫乜,講都冇人信,發改委今個星期,第一次展開全民諮詢,順叔為中國國運着想,上去發改委網頁,建議引入遺產稅,至今未能通過和諧審查。

雖然大陸呢期興收入分配改革,官方傳媒又大鑼大鼓倡議富人行善,但遺產稅其實十劃都唔知有冇半撇(嚟真的話可能會炒爆香港樓)。富二代風流,可能前世積德,全地球都係咁,但「民二代」太折墮,就不合情理,最低限度,民工子女,應該同城鎮居民,在教育、社會保障等方向享有相同待遇,咁都做唔到的話,都唔好叫自己做人民政府。

共同社論: 戶籍改革
 大陸呢個星期,全民關心大事,其實係建國以來,第六次全國人口普查,十三億人口,六百萬個普查人員,幾乎係不可能完成之任務。今次「六普」最大特色,連外國人同流動人口都查埋,即係見人就查,有理由相信,大央政府今次,認真想改革戶籍政策(要投資大陸城鎮化、消費概念,要留意吓四月公布嘅普查結果)。

年初國有十三份報章,極罕有咁發表共同社論,字字鏗鏘,和諧不掉的。

「我們希望,我億萬國民,地無分南北,人不分城鄉,都擁有同樣的就業、醫療、養老、受教育、自由遷徙的權利。我們希望,一項為患數十年的弊政,能終止於我們這一代,讓下一代人真正享有自由、民主、平等的憲法賦予的神聖權利!」


我就是李剛...

關連文章:
1. 豪門二代(上下)

伸延閱讀:
1. 京城四少 (「仇富」CUTIE版)
2. 財經茄哩啡就「十二五規劃」建言 (發改委網頁,終於通過和諧審查...)
3. 「六普」或為戶改開路 ( 新浪網轉載每日經濟新聞)
4. 全國13家報紙發表共同社論促戶籍改革全文 (GFW BLOG)

2010年11月4日星期四

豪門二代(上)

(刊於2010年11月4 日am730)

替四叔開心
替郭伯爺揪心
替徐子淇擔心
 今期周身唔得閒,拉雜而談,開富二代。

特首曾蔭權任內最大功績,可能成功鼓勵生育,三個先夠數。近排八掛雜誌封面,唔係呢個生仔就係嗰個大肚,唔知因為香港娛樂圈搬咗上大陸冇新聞,定係香港人不甘交稅津貼大陸同飽,出現啤啤潮。

社會風氣,會傳染嘅,城中富豪大孖沙,年近花甲添丁,耄耋之年抱孫,幾乎家家有喜,當中最笑得最見牙唔見眼者,連中三元之恒地(0012)主席四叔也,長子家傑,作為城中最鑽石亦最耆英王老五,借肚播種,一索得三男。

見到恒地三兄弟,智信智仁智勇,一個餅印,諗起新地三兄弟,炳湘炳江炳聯,三房鬩牆。最新一期某週刊,時事封面,標題係「郭炳湘投靠李嘉誠」,八封頭條,徐子淇聲言「生到有仔為止」,冇錯,香港人真係睇得電視劇太多,尤其係反映大台文化、金枝欲孽式爭家產爭橙仔樣版連續劇太多,無限聯想,真係替徐子淇擔心囉...



香港幾大地產豪門,控制上市公司市值非同小可,亦即係話,豪門恩怨,唔單止係家事八掛事,亦係股東眾人之事,就算在股東會正接提問點分家產,亦唔算過份。

投資地產,除咗要掌握入貨出貨時機,亦好講揀地起樓眼光,亦即係話,成功產品唔似得工廠咁任意複制,每個項目可能拗餐飽先去馬,除非有個最高權力伯爺一鎚定音,如果唔係,就要有班好有默契管理團隊。

希慎(0014)傳到第五代,開枝散葉但公司冇事冇幹,主要原因係冇大志,乖乖地收租,冇數拗(當年買娛樂行揩嘢唔知有冇出現權力鬥爭),其他地產巨企,如果幾房人馬咁高咁大,好難長期同聲同氣,如果因為咁,未來十幾廿年,香港多咗地產富二代自己出嚟插旗,話唔定香港地產反而會多咗競爭。

藍籌地產股權力交接,新世界(0017)其實靜靜起革命,富二代純官當打之年,唔少股民見識過乜料(所以新世界股價仲有資產值折讓),今日第三代開始上場,暫時睇嚟,出奇咁四平八穩,由本企業刊物《新語》已經睇得出,好落力為形象洗底,公司計劃重建尖沙咀物業,最新又話要近百億投資大陸酒店,新世界變革,值得疑中留意,望多兩眼。

新語創刊封面: 新世界轉性?
答案: 凸透新世界

今時今日,如果焗炒地產股,邊炒邊走,冇人會怪你,但疊埋心水長坐,就相當白痴,等到通街地產代理,變番做糖水舖茶餐廳,再做長線投資者未遲,不過到時,記住要望吓班富二代係乜樣。

下回再續,睇睇大陸富二代。

關連文章:
1. 豪門二代(上下)

伸延閱讀
1. 曾蔭權: 三個才夠數
2. 新世界集團刊物《新語》創刊號

2010年10月28日星期四

忽然暴跌(上)

(刊於2010年10月28日am730)


鐵道兵志在四方...

(標題為後期改動)

今期睇睇兩隻忽然大跌股份,先講中鐵建(1186)

韓戰六十週年,大陸官方傳媒大鑼大鼓,放喺國際大棋局,隱隱然有句潛台詞,當年窮到冇褲著,一樣同你死過,今日大國堀起,貨幣戰爭,怕你有牙?

中鐵建前身係解放軍鐵道兵,當年抗美援朝,行先死先,今日同發展中國家援交,一樣係開路先鋒,原來亦一樣槍林彈雨。

上星期五,中鐵建股價創一年收市新高,星期一停牌,大鑊,沙特輕軌鐵路項目,嚴重超支,可能勁蝕41.5億人民幣(下同),消息一出,震撼地球,股價狂插一成四。

先講少少政治背景,單嘢國家主席胡錦濤舊年初,訪問沙特時簽落,係中沙兩國合作最大項目,直接影響中國同全球最大石油出產國、甚至近六十個伊斯蘭國家關係,胡錦濤先後作出三次批示,話呢個項目「意義重大,一定要搞好」,仲要「按期保質完成」。

一定要把這項目搞好!
即係話,呢個項目,唔單止係中鐵建輸出國產鐵路技術省招牌之作,更加肩負國家外交重任,絕對唔衰得,嚴重超支,可以首先排除項目執行、進度監控出現問題。

根據中鐵建通告解釋,項目簽約時只有「概念設計」,由於班中東油王,對項目「運能需求較合同規定大幅提升」,但「地下管網和征地拆遷嚴重滯後」,延誤工期。即使係咁,中鐵建仍然能夠不辱所托,「按期保質完成」,無他,今年下半年,投入大量人力物力財力,在攝氏五十度高溫沙漠嚴夏日夜趕工,終於滿足在十一月前開通營運要求。

麥加輕鐵,為咗方便每年過百萬伊斯蘭信徒朝覲,運力達每小時七萬二千人,即係話呢條鐵路,絕大部分時間冇乜人用,在沙特油王眼中,只係一個形象工程,諸多要求絕對唔出奇,但亦預咗起條鐵路一定蝕,沙特出名油多錢多,在國際政治舞台亦出名左右逢源,犯不著為區區幾十億人仔,同中國過唔去。

中鐵建網頁,有一欄「決戰沙特」,其中一段公司新聞,提到沙特城鄉事務部正副部長等主事要員,十月初,在中鐵建高層陪同下,試坐即將開通嘅麥加輕鐵,麥加市長豎起大拇指連聲讚好,部長親王親口感謝中鐵建巨大貢獻云云。篇嘢縱有水分,亦可反映雙方合作關係,唔會太差,甚至項目超支,亦在雙方溝通預算之內。

除非中鐵建好似當年鐵色軍旅,為國嫁女貼埋條命,否則項目超支部份,遲早收番,唔會變成爛數,記唔記得,當年港府起西鐵,部分工程超支,一樣照貼番俾承建商,沙特油王,唔會豪唔過當年九鐵獨立王國。

下回再續,又睇睇比亞迪(1211),跌得有冇道理。

關連文章:
1. 忽然暴跌(上)(下)

伸延閱讀:
1. 沙齋月麥加交通問題
2. 胡錦濤訪問沙特專輯 (人民網)
3. 《決戰沙特》 (中鐵建網頁特輯)
4. 政治責任高於一切,國家榮譽至高無上,不惜一切代價完成奇蹟工程 (中鐵建網頁)
5. 勁蝕40億人仔 (港交所通告)
6. 沙特油王試坐驗貨直豎拇指 (中鐵建網頁)

2010年10月22日星期五

貴物鬥窮人(下)

(刊於2010年10月21日am730)

QE2 = 強2姦?

上回講到,美國佬狂印銀紙,全球焗跟,中央銀行取代影子銀行,炮製巨量熱錢,令今年市況,好似三年前大牛市DEJA VU。

除咗熱錢急促流轉,大陸貨幣政策亦似曾相識,人行星期二加息,因為大量熱錢流入炒高資產價格,要平抑通脹,但加息預期又吸引更大量熱錢湧入,雞先蛋先有用 冇用,費事嘥時間。

大陸對上一個加息週期,07年3月中開始,半年內加咗五次,期間港股足足升咗一萬點。如果呢個加息週期,又係每次四分一厘咁慢慢吱,唔 係一厘兩厘咁推上去,大家可以當加息係好消息。

恒指 vs 人行基準利率

仲有一樣似曾相識,就係大陸向香港泄洪,07年開港股直通車,衝咗落屎坑,今日密鑼緊鼓攪人民幣離岸中心,其實係同一件事。大陸想提高人民幣影響力,就要將人仔國際化,但又唔夠薑打開資本帳,人仔離岸中心就係一個折衷方案,為人仔衝世界試水之餘,亦可以減輕資金湧人國內衝擊力度。

呢個水池,未來會變得幾深幾闊,大得幾快,大家可以睇睇,港交所(0388)行政總裁李小加,上個月整咗篇「關於人民幣國際化的六個問題」,相對淺白咁,講咗人民幣國際化路線圖,洋洋萬言書,咁出力,無他,因為港交所食粥食飯靠呢個試水池也。

九月開始,港交所升足五成,見過180蚊。港交所十二個月目標價,基本上反映投資銀行,對港股未來一年有幾旺場嘅預期,睇番舊年11月12日,港交所公布第三季業績之後,高盛睇163、摩通睇158、瑞信睇140、美林睇130、瑞銀睇104,全部錯晒(點解目標價要睇12個月未? 因為一改再改永遠唔會錯!),即係話,投資銀行,全部低估晒,過去一年人仔國際化速度,亦低估咗對對港交所帶嚟嘅旺場效應。

上個月,「港深特區」一文中講過,喺中港融合呢個大格局之下,港交所係少數有買貴冇買錯嘅股份,呢個論斷,今日仍然未錯。如果大家相信歷史會重演,港交所有機會重返250蚊樓上歷史高位,其實唔係一定要買港交所,是但執藥都冇問題,但前題係「如果歷史會重演」。

今年同三年前大牛市最大分別,係經濟,當日全球一片歌舞昇平,今日歐洲美國仍然瓜瓜地,全球資金炒爆新興市場,巴西同泰國,最近已經透過加稅壓抑外資湧入境內債市,同香港謝絕投資移民買樓,一樣道理,即係話貨幣戰爭,真正殺戮戰場,唔係匯市,而係資產市場。

賤人毆疲元,貴物鬥窮人,唔想被通脹強姦,唯有焗賭,不過要講多次,記住轉身要快,斬纜要狠。

關連文章:
1. 貴物鬥窮人(上)(下)
2. 肥田冇人爭

伸延閱讀:
1. 關於人民幣國際化的六個問題 (資料: 港交所)
2. The Yuan Three-Step (轉載梁鳳儀在亞洲華爾街日報文章)
3. UBS舊年今日點睇港交所 (版權問題,偷咗雞一星期,條LINK已剷...)
4. 港深特區(下)