2010年5月14日星期五

金融鐵道(下)

(刊於2010年5月14日am730


上回提到,鐵路投資大熱。

到2020年,中2百公里以上時速高鐵,里程將超過一萬八千公里,全國鐵路網絡擴容提速,有啲似五十年代美國,透過興建全國公速公路,為社會經濟翻天換面(當年冷戰思維,驚打仗,取公路捨鐵路,從呢個角度睇,中國策略思維相當和平)。

中交建(1800)主力起碼頭,鐵路建設,優勢唔及兩間鐵字號。中鐵(0390)中鐵建(1186),均源出鐵道部,中鐵建同根苗更紅,前身係鐵道兵,等如一部中國鐵路奮鬥史。

鐵道兵,又稱「老鐵」,當年解放軍最惡哽兵種。抗美援朝,人肉擋炸彈,一邊捱轟一邊修路;前線後方,唔太平得去邊,篳路藍縷開山劈石,幾乎又係鋪一里路軌犧牲一個。鐵色兵團,後來收編成鐵道部多個工程局,幾經整合,變成今日中鐵建。

老鐵新天,當年絕壁風槍打隧道,今日掌握先進鐵路技術,準備大舉海外擴展,連奧巴馬都公開承認,高鐵建設,中國技術,領先美國,難怪大陸官民,提及中國鐵路發展,引以為榮,變成「科學發展觀」偉大理論以下,科教興國代表作。

近年凱恩斯翻生,多國政府計劃大搞基建刺激經濟。上個月,鐵道部同莫財加州,簽咗初步意向書,向通用電器提供技術甚至銀行貸款,嫁女貼大床,起子彈火車,美國佬最終係咪咁順攤,彈生意彈俾中資企業,未必,但海外業務,在國家支持下,好可能成為兩間鐵字號增長動力。鐵道部高鐵負責人鄭堅,上個月接受紐約時報訪問時,順手抽咗張地圖出嚟,講到好激,話中國未來高鐵網絡,可以穿過緬甸連接印度,甚至駁埋德黑蘭同莫斯科,鐵色絲路。

基建工程,合約額鉅利薄,管治效率、成本控制非常重要,中鐵建唔少老總,軍旅出身,兵味不改,呢方面更信得過。中鐵上市,帳目一度受質疑,中鐵建上市盤數,條數夠煩但夠清晰,成為核數師安永內部培訓教材。唔少大行,話中鐵建毛利率次於中鐵,三流分析,中鐵建將現場管理員費用,計入主營銷售成本,中鐵在行政費用入數,睇清楚先好講嘢。

亦有唔少分析員,話大陸基建公司,做一百蚊生意,賺得兩三蚊,諗深一層,銀行如果唔係炒炒貢,咪又係咁?每日全世界最聰明亦最賤格嘅人,在金融市場設計各種冇人明嘅創新投資工具,唔知幾時會爆個炸彈嚟個Deep V,同樣係大盤生意賺一蚊幾毫,寧願信老鐵。

關連文章:
1. 金融鐡道(上)(下)

金融鐵道(上)

(刊於2010年5月13日am730)

今期開鐵路。

香港人聚焦港深廣高鐵,唔多覺,其實國內外,呢期好興投資鐵路。股神掃貨,晒冷一刁,就係押注鐵路公司;中國銀行(3988)月前60億人民幣(下同),直接投資京滬高鐵,今個禮拜,又75億入股山西鐵路煤運項目,A股可換股價集資400億,眼都唔眨豪擲三份一投資鐵路。

中行其實唔算不務正業,據鐵道部數字,大陸未來十年,最少擲5萬億起鐵路,假設8成資金舉債,中行又因為咁,嘜得實鐵道部呢個客仔,攞到3成市場,息差保持2%以上,已經賺到240億。當創投項目咁做,一條優質客運線,一個優質貨運線,唔覺意上到市,賺價之餘,中銀國際仲可以舐埋幾巴仙上市佣金,算盤打到啪啪聲。

美好假設,建基於鐵道部唔會爆煲,同埋起完條鐵路有希望賺錢。前者,機會好細,後者,唔係短期內可以實現。早排國內官方傳媒爆料,作為全國高鐵樣板,京津線08年8月開通,至今蝕超過7億,如果中行繼續擲錢直接投資高鐵,股東就要認真諗諗。

營運鐵路,投資期長,高風險未必有高回報,相對之下,建築工程公司起橋開路鋪軌,低回報,但係低風險,只要生意額夠高,山大斬埋幾斤柴。大陸打造新鐵路王國,全國又大興土木,理論上,幾間國企基建公司,就算造阿公生意油水唔多,增長亦非常可觀,但係股價大落後,幾年前先後招股上市,一度係市場打令,今日幾乎隻隻潛水(見附表)。

又唔怪得人,幾隻基建股,超大型,但超悶,悶到好多機構投資者頂唔順較腳,例如瑞銀,舊年第4季開始,幫班客仔大舉散貨,中鐵建(1186)持股量由9月底超過7.5%,兩個月內散到唔夠5%,瑞銀分析員,一路建議「中性」住中鐵建,H股睇12蚊,班客仔清晒倉,星期三索性所有大陸基建股都唔再跟,冇眼屎乾淨盲。(大家可以繼續相信,投資銀行坐盤班友,同研究部隔咗層中國牆。)

唔單止外國佬,社保基金都沽埋一份,舊年9月,開始大舉減持中交建(1800),持股近9%,兩個月內沽到唔見影,不過有關舉動,可能只係社保基金,作為極少數QFII同QDII都有無限Quota投資者,利用獨有優勢套戥AH股差價,中鐵建A股年報顯示,社保基金持股量,舊年其實增加近一倍(未計國有股無償轉讓)。

明天再續。

關連文章:
1. 金融鐡道(上)(下)