2011年8月12日星期五

貸評之亂(下)

(刊於2011年8月12日am730)


算罷啦,成間標普買返嚟乾手淨腳...

債,係證券市場最大資產品種,標普及穆迪兩間美國信貸評級公司,壟斷超過8成市場,其意見及評級,左右巨額資金流向,仲有企業甚至國家舉債成本。

投資銀行收錢幫客仔投資評級,呢種行為叫「貪污」;貸評公司收錢做信用評級,反而係「生意」,08年後成村大孖沙蝕咗錢排隊狀告標普穆迪,圍插都插唔入。美國貸評公司,受憲法「言論自由」金鐘罩保護,其他國家習慣咗睇標普穆迪面色,甚至好似香港咁,將退休金等資產分布同美國公司信貸評級掛鈎,令標普及穆迪,擁有半官方監管機構影響力,遍及全球,變成「貸評霸權」,美元儲備貨幣地位牢不可破。

作為美國最大債主,中國最近大聲疾呼,要同其他國家聯手,改革國際信貸評機制,呢樣嘢新興國家會支持,歐洲亦講咗好多年,睇睇今次「貸評之亂」,會唔會催生新國際貸評秩序。

美國印銀紙,全球焗買,QE2玩完兩個月,就上演一齣《強姦2》金融大龍鳳,全球股市暴跌,面對咁情況,唔會有國家覺得自己「金融安全」。如果財經茄哩啡幫中投坐盤幫手管理3.2萬億美元中國外匯儲備,第一件事就係搣1%出嚟收購標普,搞吓事都好;,第二件事,走去說歐盟整番個Eurobond,進一步一體化,等債市投資者多一個選擇,搬一兩成外匯儲備去歐洲,理得佢美息狂升經濟大亂Double-Dip,兩三年前,全世界唔係唱緊Decouple咩?

歐洲廿幾個國家扮齊心,叫德國繼續補貼班洗腳唔抺腳契細佬,同叫意大利放棄部分財政自主權畀契哥話事一樣咁難,中國唔同,阿公話晒事,要抗衡美元霸權,其實講緊將人民幣推向國際有幾大決心同信心,講咗好耐好似國際板等金融改革,仲未見影,股市十二五規劃都未拎出嚟,進一步開放債市,容許地方政府發債解決部分系統性風險,等債市投資者更多選擇,反而近日多咗好多「消息人士」吹風,有冇好消息,下星期副總理李克強嚟香港,可能會提供多少線索。

香港係人民幣改革重要實驗室,李克強訪港,除咗拎住200億人仔國債,應該唔會得兩蔬蕉,如果冇嘢講,即係話人民幣國際化步伐,唔會因為今次「貸評之亂」而改變節奏,你有你亂,我閂埋門做自己嘢,繼續扮演負責任「大國」角色。

呢種處變不驚態度,喺呢啲大事大節,其實係好事,甚至散戶都應該學吓,記得舊年5月,恒指低位萬九點樓下,當日歐洲唱緊希臘爆煲,亞洲因為南韓天安號出事朝鮮半島講到要開拖,美國又發生疑似黑客入侵事件,股市一日暴跌千點再奇蹟Deep-V反彈,同今日種種,何奇相似,太陽底下,竟無新事。

而家講基本分析,會畀人笑,咁又可以點?好似工行(1398)咁,今年純利極可能突破2000億人仔,市盈率7倍多啲,市帳率1.5倍,理得佢本帳簿磚頭風險高,點都健康過聯儲局或歐洲央行啩?

關連文章:
1. 貸評之亂(上)(下)
2. 貸評清剿(上)(下)

伸延閱讀:
1. 大公國際資信評估

2011年8月11日星期四

貸評之亂(上)

(刊於2011年8月11日am730)

老米都扯火!

信貸評級冇咗一格,債券竟然更加值錢,舉債成本仲平咗,大家見過未?股市未上天堂先見地獄,冇乜點升過就散晒笨豬式直插,大家又見過未?今期就算唔識睇,都要睇睇呢場,因為標普歷史性搣甩美國3條A最高信用評級引發嘅「貸評之亂」。

首先講句,當通街太平軍橫衝直撞,冇可能叫班長毛髮逆行埋一邊疏好條辮,當金融市場上落咁多嘢解釋唔到,唔會好多人會識得睇通全局,過去一個星期,除咗星期五晨早收到風嗰班春江鴨,就算係期貨市場大鱷,買上買落都一樣咁大風險,去澳門賭一舖大細可能仲慳時間,財經茄哩啡只能喺就視線範圍內,見到幾多講幾多。

環境越複雜,最好方法其實就係溫習返最簡單投資ABC,第一係控制風險,望住自己個袋有幾多錢唔輸得,到位就剪,賣仔莫摸頭;第二更老套,當張張報紙頭版,連續幾日用股災個頭條,買貨放埋一邊跟住瞓覺。呢啲最原始理論,喺08年咁大時大節都有效,如果話你知今時今日已經冇用,即係話地球已經唔適合人類投資。

「如果資金被迫喺地球,即係話你知,債務風險唔係冇,不過冇想像中咁恐怖,老套啲講句,只係淡友做低個市最大藉口,而呢家嘢已經玩咗年幾兩年,玩得最開心者,咪就係標普同穆迪兩間美國信貸評級公司囉!」

以上幾句,喺上月中「貸評清剿」一文出現,經過今個星期呢場「貸評之亂」,如果順叔繼續扮法官,會繼續維持原判。美國債多,唔係新聞,意大利債多,亦唔係新聞。債仔欠錢太多,就會惡過債主,中國唔敢沽美債,德國亦唔會夾硬要意大利還錢,真係出事,只要美國一日可以印美金,就可以還債,意大利西班牙唔可以印歐元,但只要歐盟一日唔想解體,歐洲央行亦可以繼續印銀紙撐住。

穆迪上個月扯份紅旗報告出街,最多喺中港兩地被圍剿兼畀人笑到臉黃,標普上星期五喺歐洲風頭火勢之時,下調美國評級,最咗債王格羅斯讚佢有「腰骨」,由美國總統到股神,仲有華爾街大型基金話事人,如果事前冇收到風,幾乎個個扯火喊打喊殺,睇黑石及LEGG MASON幾個大芬老闆,近日高調圍剿標普,除非齊齊做場大戲,否則標普今次得罪人唔少。

下回再續。

關連文章:
1. 貸評之亂(上)(下)
2. 貸評清剿(上)(下)

伸延閱讀:
1. Bill Miller怒屌標普全文